Upatnak he,
Ngun Hlei Iang
Malaysia
Upatnak he,
Ngun Hlei Iang
Malaysia
Rom. 11:36 zeizong vialte hi amah nih a sermi an si i…. amah thawngin…. amah caah an si dih. Pathian cungah sunparnak cu zungzal in um ko seh! Amen.
Hmasabikah Pathian min cu thangthat in um ko seh! Nihin hi Sundayzing Sermon Tawite tiah ka rak thlahnak kumkhat tlinnak ni asi. Pathian min ka thangthat tuk! Sermon a rel tontu nan dih lak cungah Pathian nih thluachuah in pe chinchin hram ko hnaseh. Kumkhat chung pehtonh tein thlah khawhnak caantha a ka pe tu Pathian min thangthat loin ka um kho lo. Paul nih a chim bang in, zeizong vialte hi amah thawngin, a mahcaah le amah sunparnak caah ah an si dih a ti bangin Pathian nih sunparnak co chinchin ko seh!
Sundayzing Sermon Tawite tiin kumkhat chung ka thlah lai tiah ka hawipa ka sawm i thlacamnak ka tinpiah lio ah, ka hawipa nih cun, sianginn na kai lio ah na ca he, asi kho lo, na duh cun thlakhat voikhat hrawng thlah te ko a ka ti i hna a ka tlak pi lo. Nihin ahcun Pathian thawngin kumkhat a tling cang. A karlak tete ah khual zong ka tlawngpah ton nain asikhawh chungin pehtonh tein thlah khawh ka rak i zuam peng. Ka room in internet a ngah lo can hna zongah ka hawi le room in asi khawh chungin thlah khawh dingin kaa zuam peng. Ka rian pakhat ah ka rak ruah i, ka ministry pakhat ah ka rak ruah. Cucaah, thla rak ka cam piak peng ve uh ti kha nan dih lak sinah sawm le nawl kan duh hna. Voikhat cu ka hawi Chinese pa he Luzon (Philippines ram chung) lei ah khual kan tlawng i kan riahnak ah internet um ti lo, sundayzing le asi cang. Sermon thlah ka hauh cang nak kong kha ka hawipa cu ka chim i a rannak in a motor he internet umnak lei ah kan va tli colh. Hi hna hi keimah nih ka tuah khawh mi si lo, Pathian nih khua a khan dih mi tu kha asi. Minung nih kan tuah khawh, kan ti khawh kan ti mi hi a rak si hrimhrim lo. Jesuh nih Johan 15:5 chungah, keimah loin nan tuah khawh mi zeihmanh a um lo ati bantukin, zeizongvialte hi Amah thawng longlongin asi ko.
Cucaah, Pathian sinah duhnak taktak he kan i timh asi ahcun, Amah nih zeizong vialte tlam a tlin ter dih ko lai. Pathian nih a zoh mi cu thil dang si lo, kan thinlung Amah caah si maw, kan pek maw, ti mi longlong kha asi. Pathian he ahman mi thlarau lei i pehtlaihnak ngeih ding tluk in a herh mi vawlei cungah zeihmanh a um lo. Cu nun cu ahopaoh ngei hna seh ti a kan duh. Asinan, kan minung sinak, derthawmnak nih a kan tei lengmang i keimah ka ti khawh, ka tuah khawh, ka kawl khawh, ka thiam, ka sang kan i ti sual lengmang. Cu tikah, kan tla than lengmang.
Cucaah, Paul nih a kan cawnpiak mi, zeizong vial te hi Pathian thawng longlong in asi ko ti mi hi kan nun ah i tlaih peng uh sih law, Amah tu kha sunparnak pe lengmang ko uh sih tiah sermon tawite kumkhat tlin nak lawmhnak bia chim bu he thazang lak pah ding in kan sawm hna.
Sermon rel ton tu, thla a ka cam piak tu nan dih lak sinah lawmhnak tampi ka ngei, Pathian nih thluachuah in pe chinchin ko hna seh!
Pahniang
Manila, Philippines
/////////////////////////////
Mark 6:46 A zultu kha a kalter dih hna hnuah anih cu thlacam awkah tlang cungah a kai
Teinak kan hmuh tikah, onnak kan hmuh tikah, minthannak kan hmuh tikah, hla hna kan remh, sermon hna crusade hna camping hna kan tuah dih tikah, thil pipa kan tuah dih tikah khoi ka ah kan kal ton? Minih thangthat awkah an ra lai, lawmhnak bia chimawkah an ra lai, zei thinlung dah kan ngei cang? Lawmhnak bia a chim tu ding hna kha a bawh in kan bawh sual hna maw? hihi, sualnak ah a kan luhpi kho tu an si, kan i ralring ngaingai a hau. A sang pi kan phan cang kan ti lio ah, a kan tlak ter tu le tlak fawi taktak mi si. Hi ban tuk tukforhnak hi a hopaoh nih kan ton lengmang mi thil a si.
Mark 6:46 i a cung lei kan zoh ah cun, Jesuh nih nga pahnih le chang panga in minung thongnga rawl a danghnak kong asi. Thil lianngan a tuah dih hnu bak asi. Zeitindah a si khawh tiin zultu hna he pakhat le pakhat i ceihnak, discuss tuahnak can hmanh a pe hna lo. A dih bak in a zultu hna kha lawng chungah a luhter hna, cun Bethsaida lei a kal ter cawlh chung hna i, anih tu cu thlacam awkah tlang cungah a kai. Jesuh nih amah nawl in a tuah mi zeihmanh a um lo. A Pa thawng longlong in a tuah mi si i APa kha thangthatnak le sunparnak a pek hmasa peng. Cutikah Satan tukforhnak zong a tei dih peng. Jesuh hmanh thla a cam lengmang asi ahcun kan nih teh zeitluk in dah thlacam kan herh chinchin lai ti hi kan ruat bal maw!
Voikhat ah, kan khua (tlang hram lei) ah crusade an tuah i, adonghnak zanlei sang ah, saya pakhat nih a piang thar mi nan kut thlir uh, a ti. Cun, milu a rel hna i, khah, cuzat thlarau tlau ka tlaih hna tiah list a lak i khrihfa upa pawl a pek ta hna. Program dang ka ngei rih a ti i a kan tlun tak. Khua ka ruat ngaingai mi cu, Thlarau tlau mi tlaih khawhnak hi minung tuah khawh mi si hnga maw? David nih milu a rel ban tuk asi i, mah pumpak thangthat duhnak thinlung a chuak cang tikah Pathian a lang kho ti lo, kan i ralrin awk a herh ngaingai. Cucaah, thluachuah kan hmuh ding tluk in kan hmu ton lo lengmang nak cu asi. Jesuh nih a kan hmuhsak mi lamtu hi zulh khawh i zuam hna uh sih.
Cucaah, Pathian thawngin khuaruahhar in thil kan tuah khawh mi, teinak kan hmuh mi hna a um tikah arannak in Pathian sinah kal i kanmah te longin caan lak in thlacam hi a herh ngaingai. Cutikah Satan pa zong nih kan nun ah hmunhma a la kho ti lai lo. Kan nih unau rawl kan dih lak hihi i ralring cio hna uh sih, Pathian longlong kha panh lengmang ko uh sih, zeitik hmanhah philh hlah uh sih. A mah longlong sunparnak kan pek peng a siahcun a ra lai mi thlichia le tilet zong kan tei dih ko lai.
Nan cungah Pathian thluachuahnak um ko seh!
Pahniang
Manila, Philippines
//////////////////////////
Jeim 4:8 Pathian cu naih u law an naih ve hna lai♫
Immanence = Pathian cu kan pong ah naih tein a kan um pi nak
Transcendence = Pathian cu kan sinin aa hlat tuk nak in a kan zoh nak
Pathian cu van le vawlei ser tu a si i khoika poah ah a um mi si. Pathian he naih le hlat kan ti tikah hin lenglei i hlat le naih kha si lo in, Pathian thinlung chung in, kan thinlung chungin naih le hlat tu kha a sawh duh deuh mi asi lai.
ZTC, Falam ah siangin ka kai lio ah, nikhat cu class chungah saya. Dr. Do Sian Thang nih blank paper cheu li ah cheu khat cio khi a kan phawt i, Immanence le Transcendence ti mi hi tial uh a kan ti. Ca tlap ka zoh tikah a faate long si fawn, ka tial duh mi le tam ngai, Immanence long ka tial hmanh ah a khat cang. A hnu lei he a hmai lei he khat dih lak in ka tial. Grade point 1.75 long ka ngah. Ka hawi pa Zawzaw (Zaw Lat Aung) cu
Immanence = daily bread
Transcendence = over drinking
ti mi te long hi a tial i full mark bak a ngah. A idea um tu ning cu, immanence nih hin Pathian nih kan sinah naihtein a kan um pi i, kan i fenhaih awk, kan ei din awk vial te zong a kan zoh khenh, a kan um pi, a kan tuarpi, a kan lawmhpi, a kan hnemh i a kan hruai ti kha theih i Pathian ttihzah bu tein nun kha asi. Ka hawipa nih transcendence hi over drinking tiin a langhter tikah, Pathian cu ka pong ah um loh, hlat tuk nak in a um, ka duh poh in ka um lai, ka ding lai ti kha asi. Pathian kan pongah mithmuh in um sehlaw kan tuah ngam lo dingmi thil kha, kan tuah tikah Pathian cu kan pongah a um lo ti kha kan tuah sernak nih a langhter ko. Bawi le kan saya te hmai ah kan duh paoh kan tuah ngam lo, kan um ngam lo.
Nihin ah ka chim duh mi cu, Pathian nih Thlarau Thianghlim in a kan um pi peng ko ti hi cu hopoah nih kan chim dih mi asi ko lai nain, kan tuahser nak nih hin Pathian cu kan sinah a um lo bantukin, hlat pi ah a um ban tukin le kan tuah mi thil hi a kan hmu kho deuh lai lo bantukin kan um sual mi tu kha asi. Khrihfa nun hi theih le chimh thiam kha asi lo, nunpi tu kha asi. Sermon hna thiam tuk, chimh le rel hna thiam tuk ttung i a nunpi huam lo mi nihin ah tampi hmuh asi. Zeibantukin Pathian nih a ka umpi ko kan ti len kan chim len zongah ningcang loin kan nun, kan ei, kan ding, mi kan hleng hna asiah cun, cu kan tuahsernak nih cun Pathian nih a umpi lo mi, Pathian he aa hlat tuk mi kan si ti kha a langhter ko. Pathian cu naih uh law an naih ve hna lai tiah a kan cawnpiak bantukin, Pathian he naih tein um hi kan mah cungah aahngatchan (a mutti) hmasa mi asi, khrihfa nun ahcun kanmah nih va naihhmasa le va tlaihchan hmasa le va bochan hmasa a herh mi si. Cuticun, Pathian nih tawin a kan lak dih ve lai. Pathian nih thluachuah in pe cio ko hna seh!
PaHniang
Manila, Philippines
Phungthlukbia 15:27, A hak a kaumi nih a innchungkhar cungah harnak a tlunter,
Mahatma Gandhi nih the earth can provide your need, not your greed a rak ti i, vawlei nih hin na herh mi cu an pek kho ko nain, na hakkauhnak tu cu an pe kho lo, a ti. Hitler nih vawlei pumpi hi tei dih, uk dih le a kuttang ah chiah dih a rak duh. Cucaah, Hitler bantuk minung pahnih pathum um hna seh law, vawlei pi nih a daih ti hna lo. Kan hakkauhnak cu vawlei nih an kan pe kho ti lo.
Philippines ram i mirum pahra hna lak ah aa tel ve mi Zobel de Ayala cu fanu le fapa a ngeih hna. An rum ngai caah, ka fanu le ka fapa nih hin midang tthi hna sehlaw, kan ngeih mi pawl hi mi dang nih an i hrawm ve lai i a donghnak ah cun a chuh zong an kan chuh dih sual lai, ti kha an phan caah, a fanu a fapa bak cu a tthitumh ter hna. Cu unau pahnih hna nih fa an ngeih mi hna cu hawi an lo lo, an thluak zong a hman lo, tiah ka hoi nu nih a ka chim. Hi nih hin khua a ka ruah ter ngaingai. Vawleicung thil le ri ruangah hin unau, tta far ayin bak an si ko mi an ni um bak ko! An fa le zong cu hawi an lo lo, an thluak hna a hman lo tikah hmailei ah an sipuazi a tthi hruai kho tu ding an si hlei ti lo i an ro vial te vuih tak awk zong an i tlak hlei lo. Cucaah, Phungthlukbia 15:27 chung i a kan cawnpiak mi, A hak a kaumi nih a innchungkhar cungah harnak a tlunter, ti mi hi ruat than tuah uh sih. Hakkauhnak nih lungretheihnak le hnangamlonak le mi zawnruahlonak long te a kan pek. Hakkauhnak ngeih cu mah le mah harnak i pek zong a si rih. Cucaah, kan i ralring ngaingai a herh hlei ah, kan tei khawh ding zong a herh ngaingai mi asi. Zeipoh ngeih dih hi nuamhnak le hnangamnak asi hlei lo.
Jesuh nih Luka 12:15 chung ah “Ralring tein um u, hakkauhnak kha i veng u; zeicahtiah mi a nunnak taktak cu, zeitluk hmanh in rum seh law, a thilri hi a si lo,” tiah a ti. Rumnak cu kan thinlung le kan nun chung i kan ngeih mi Khrih tu ah khan a si. Cun, Kolose 3:5 chung ah, hakkauhnak hi siasal biakning phun khat a si a ti tthan. Cucaah hakkauhnak ngeih hi ttih a tung ngaingai mi a si i, siasal biakning phunkhat a si a ti caah, Pathian he aa ral kah mi zong a si. Kan i ralring a herh ngaingai ko!
Paul nih Filipi 4:12 chungah fiang tein a kan cawnpiak rih mi cu, “Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang” ti hi asi.
Hakkauhnak a tei kho mi le ngeih mi cung ah lungsi hnangam tein um kha a tiam mi kan si i Pathian a thangthat kho peng tu kan si nak hnga Pathian nih thluachuah kan pe hram cio ko seh!
Pastor Hniang Uk
Manila, Philippines
/////////////////////////////
Rom 8:28, Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh.
Kan ton mi thil paoh hi phun hnih in hmuh khawh a si: chiatnak lei le tthatnak lei. Chiatnak lei in thil a zoh kho peng mi hi an nun khua zong a toi ti asi. Khrihfa mi kan nunnak ah chiatnak lei in thil hmuh awk pakhat hmanh a um lo ti mi hi Paul nun nak nih a kan cawn piak. Cucaah, kan ton mi thil poh hi zeitin dah kan lak, zei ah dah kan hman ti mi kha kan mah cungah aa hngatchan mi asi.
Paul hi Khrih zultu asi hnu i a nunnak pawl minung sinak lei in kan zoh ah cun si duh awk pakhat hmanh a um lo. Asinain, a chiatnak lei in Paul nih pakhat hmanh a hmu lo. A hman lo piin thong an thlak zongah, thonginn chung ah zeitindah Pathian bia ka karhzaih ter khawh lai ti tu kha a tuah (Phil. 1:13; Lam. 16:19-34). Mibupi nih an kulh, an velh zong ah thawngthabia chim ding can ttha tu kha a zoh i tehte hna a khan (Lam.22:1-21). Siangpahrang Agripa hmai a phanh zongah, a zumhnak kong langhter ding tu kha aa zuam (Lam. 26:1-32). Lawng in Rom lei ah biaceih ding in kuat a si zong ah, lawng cungah van le vawlei sertu Pathian lianngannak thawngthabia tu kha a chim. Thong an tlak zongah, thonginn chung in Khrihfabu tampi thazang pek nak cakuat a tial. Cu cakuat pawl cu nihin ah Bible ah kan i hman rih. Zei thil a ton poh ah, cu a ton mi chungin zeitindah Pathian bia a karhzaih khawh lai ti mi long a tuak. Chiatnak lei in a hmuh mi pakhat hmanh um lo. Thihnak le nunnak kar lak i a va ton mi thil a si ko zongah a tuak mi thil dang zeihmah a um ti lo. Cucaah, Paul cu pongkam thil sining thli hran nak nih a zumhnak kha zeiti hmanh in a hninh kho ti lo mi zumhnak a ngei. Cucaah Nun dan ka thiam cang a ti khawh nak cu si. Cucaah Paul cu pi a tling mi zumhnak le pi a tling mi nun lei ah a hmaibik in a kan kal piak tu asi. Pathian nih zumtu vial te kha, cu pitling nun le zumhnak lei ah kal peng hna seh ti a kan duh piak.
A can ah cun kan ton mi thil hi vawlei cungah a harbik le mivanchia bik zong ah kan i ruah kho men. Pathian na um maw um lo ti zong in bia kan hal kho men. Asinain, kha chungin khan Pathian nih nangmah hmang in a sunparnak langhter le hmuh a duh ca tu ah asi ti mi hi thei hna uh sih law, kan ton mi thil poh hi a tha mi siseh, a chia mi siseh, Paul nih a nun hrim in a rak kan cawn piak ban tuk in, pi a tling mi nun le zumhnak lei ah a kal thluahmah mi kan si nak hnga Pathian nih thluachuah rak kan pe hram cio ko seh!
Pahniang
Manila, Philippines
///////////////////////////
Upatnak nganpi he
(Hmanthlak attach ka rak tuah).
Pu R. Hram Ceu
Source:: YCCF-International
