Um Har Phen Ah Hmanthlak

Malaysia Thawngpang Chia

March 9, 2011 ah Malaysia in US zuang ding mi Laimi minung 12 cu Airport ah kalding in bus an kai dih hnu ah an tumter than dih hna i zuang lo ding in an let ter hna. Cun mah ni zanlei 4pm ah azuang ding mi minung 35 zong an let ter dih hna i chungkhar minung 4 te lawng an zuan ter hna. Zeitik an zuan khawh te lai theih asi lo. Mah hi achuaknak hi atulio Kawl pawl Chin min in US le New Zealand ah azuang mi an tleih mi an um. Chin pawl nih an refugee kha an zuarh hna i acawchom pawl ruang ah asi.

Laimi tampi cu TB zawtnak zong an zuar i refugee hmuh hnu ah ramdang kal ding interview tuah dih hnu ah an refugee zuarmi an tam ti hi theih asi. Atu New Zealand ah cozah nih akong an hlat cuahmah mi Kawlpa zong kha refugee acaw mi si dawh in an chim. Hitihin cun sau kan rau ti lai lo. Cun ramdang phan cang pawl zong hnangam in um sawh ding asi lo. Lih le hrokhrol achuah dih ahcun ram kuat than nak hi aum kho dih mi asi. Cucaah zei tuanbia in dah ramthumnak ka phanh tihi theih peng ahau cang. Lih le hrokhrol hi cu saupi nun dawh asi lo hih. Aza tawk aum, kan luan tuk luam mam cang!

Refugee azuar mi miphun ti reng reng cu.....

Kawi Khen

Source:: YCCF-International@yahoogroups.com

Toidor Nun Phunkhat

Toidor nun phunkhat

I Peter 5:5 “toidornak puan kha i aih u……… mitoidor cu a vel kha a pek hna,”

Feb. 16, 2011 ah ka hawipa Bro. Dick nih Bible study kan ngei lai, na thil ţha deuh mi te rak i hruk te a ka ti. Na thil ţha deuh mi te rak i hruk te a ka ti tikah ka khuaruah har pah. Ka va kal ah cun, Bible study kan tuah ţi mi hna cu a tu Philippines ram president i spokesman ( president awiawh in biachimtu, chimhnak nawl zong ngei tu) le khuapi uktu (mayor) pa hnih, biaceihtuk (lawyer) le adangdang ram uk tu lei in rengsang mi pawl an si. Kan tuahnak a hmun zong hi a tu Philippines president pa i a chung le (a nu nau fa le inn) inn ah a si. Ka khuaruahhar ngai mi pakhat cu mahtluk upa le bawi an si ko nain, kilvengtu (guard) ho hmanh an ni ken bak lo. An mah te cio in driver pakhat te he an ra cio ko (kawlram hna ah siseh law, an thawngvang a than lai ning hi, a mak lai dah). Mi an kan zoh ning, an kan biak ning, an kan chawnh ning, mi an upat ning, a ho poh kha aa rual tein a kan chawnh ning hna ka zoh tikah an fim bak. Toidor nun an ngei. Cucaah pei ram zong an hruai khawh hi ti kha ka lung ah a rak chuak ngaingai.

Mathai 8 chung i ralbawipa toidor nun a ngeih ning le a thinlung put hi zoh tuah uh sih, ⁶“Bawipa, ka sinumpa cu a zaw i inn ah a ril ko, a cawl zong a cawlcang kho lo i a zual ngaingai ko,” tiah a ti. ⁷Jesuh nih cun, “Ka ra lai i ka damter lai,” tiah a ti. ⁸Ralbawipa nih cun, “Aa, bawipa, si hlah! Nang ka inn i rat dingah hin kaa tlak lo. Nawl hei pe law ka sinumpa cu a dam ko lai. ⁹Kei zong ka cunglei bawi nawl tang i a ummi ka si i ka tang zongah ralkap an um ve. Pakhat cu, ‘Kal,’ ka ti i a kal ve ko, cun a dang pakhat cu, ‘Ra,’ ka ti i a ra ve ko; cun ka sal cu, ‘Hihi tuah,’ ka ti i a tuah ve ko,” tiah a leh. ¹⁰Cu bia cu Jesuh nih a theih tikah a khuaruah a har i a zulmi mizapi hna cu, Hi pa bantukin zumhnak a ngeimi Israel mi hna lakah ahohmanh ka hmu rih hna lo. ¹¹Hihi va philh hlah u: Nichuahlei le nitlaklei in mi tampi an ra te lai i Vancung Pennak chungah cun rawldanghnak cabuai ah Abraham le Isak le Jakob hna he tiah an ṭhu ṭi lai” tiah a ti.

Ralbawipa nih cun sinum cu tampi a ngei ko hnga lo maw? A thih zong ah a dang pei an tampi rih ko cu! A sinum pa ca tham ah cun a kut tangah mi fial ding an tampi ko tung? Cun sinum hna cu ti sawh lo in, amah thengtheng nih Jesuh sin va kal in a va nawl piak mi lungput hi na ruat bal maw? A bia chim dan zong hi zoh rih uh sih, zeitluk in dah aa toidor ti cu kan hmuh khawh.

Job nih a ti bangin, chuahpi mi zeihmanh kan ngei lo, kan kal pi khawh ding zong a um hlei lo. Zei dah kan ni uah pi awk, pawrhlawrh pi awk cu a um hnga? Kan nawlngeihnak (power), kan degree, kan thil ti khawhnak, kan motor, kan phone, kan computer, kan thilri hna kan ni uah pi sual maw? Hi hna ruang ah mi nih chawnh khawh lo tiang hna in kan um sual maw? A nei lo mi hna kha kan nek sual hna maw? Cu ti kan um sual a si ah cun zangfah kan va si dah! Zeicahtiah, “Pathian nih milungpuam le mipawrhlawr cu a doh hna i mitoidor cu a vel kha a pek hna,” a ti.

Kan ni uah pi awk cu pakhat longlong a um. Cucu Khrih Jesuh kha a si i, cu Khrih aa uah pi mi nih cun toidor nun a ngei.

PaHniang

Manila, Philippines