US Baptist Missionary 8 Haiti ah an tlaih hna

US ram Idaho State in Baptist khrihfa bu chungtel a si mi zumtu 10 cu Haito cozah nih hngakchia ningcang loin zuarnak(child trafficking) ruang he pehtlai in an tlaih hna i bia an ceih hna. Cu Baptist misionary 10 hna cu Idaho State in aluanciami December thla ah khan missionary riantuan ding caah Haiti ram ah an rak kal. Laura Silsby timi nu hi anlak ah hruaitu a si, cun Charisa Coulter timi pa zong hi Haiti ram ngakttah mi hna i cawm ding caah December 2009 ah khan Haiti ah a rakkal mi a si.

An nih missionary 10 hna hi Haiti ram Prime Minister nih "Haiti rammi hngakhcia athli thup in US ah kalpi a tim mi hna ansi" tiah a ti hna. Hi hngakchia lak ah hin cheukhat cu nu le pa tlamtling tein a nung rih ko mi an si a ti rih. Missionary lak ah biachimnak nawl a ngei mi nih a chimnak ah cun mahhngakchia pawl cu Domanican Republic ram ah i an tuahmi ngaktah zohkhenhnak inn ah chiah ding caah kan timh mi hna si tiah a chim.

Cu hngakchia 33 hna cu ramdang petnak ding caah a herh mi catlap zeihmanh a ngei lo mi lawng te an si caah hin Haiti cozah nih 'child trafficking' timi hngakchia zuarnak nan tuah tiah taza an cuai khawh mi hna hi a si. An mah missionary hna nih cun hngakchia hna khualtlawnnak ding caah catlap(document) a herh lai tiah kan ruat lo, kan theih lo caah a si tiah an chim ve.

Cu missionary 10 hna cu Haiti ram an chuaktak hnu ah Domanican Republic ram airport ah February ni 2 ni ah an tlaih mi hna a si i, hngakchia an i kalpi mi hna hi thla 2 lawng a si rih mi hngakchia in kum 12 asi cang mi tiang an i tel. Mah cu hngakchia hna lak ah hngakchia 10 nih kan nu le kan pa an nung rih ko an umnak zong kan theih ko tiah hlathlai tuhna an chimh dih hna i Haiti khualipi Port-au-Prince khua ah a um mi ngaktah cawmnak pakhat ah an kirpi than dih hna i an nu le pa hna he i ton than khawh ding caah tu hi an tawlrel piak cuah mah lio hna a si. Cu hngakchia lak ah nu te pakhat nih cun ngaktah ka si lo ka nu le pa an nung rih ko nain Summer camp ah a kan kalpi rua tiah ka ruah le ka zulh mi hna si a ti. Hngakchia hna hi anram ah an vun kirpi le cang ka in an ti a hal i an rawl hna arak ttam tuk caah nawl ngeitu hna nih cu missionary hna cu an zum kho bak hna lo.

Cu missionary hna cu an tlaih dih hna i bia an ceih piak hna i an lak ah an hruaitu le pa 2 hna hi an tlaih thai rih hna i adang 8 cu an thlah than cang hna. An thlahthan mi hna zong cu US ram ah an rak kir than kho cang.(Ref::cyona.info)

Real Madrid Nih Mithar An Cawk

Spain club Real Madrid nih, Racing Santander club sin in hmaikal Sergio Canales Madrazo cu kan cawk cang i a ra laimi 2010 June 1 thawk in kan mah sinah a chuih cang lai, tiah thawng an thanh. Canales cu kum 18 lawng a si rih i bawlung a tawnh tham ning le a chuih ning a that tuk caah Europe minthang club pawl nih a tu lio mino lak i cawk an duh bikmi cazin ah pakhatnak ah aa telmi a si i balender le hmaikal ah tha tein a chuihmi kho a si.Tu kum 2009/2010 pumpalulh chuih caan chungah Racing caah Spanish La Liga ah puai 11 a chuih i kawl 5 a sut piak cang hna. A man balte cu fiang in an thanh lo i, sterling pound million 4 hrawng si te lai, tiah Wikipedia nih atial.(Ref:Foatball 365&Wikipedia)




Seihman
Malaysia

UN Palai Tomas Ojea Quintana Kawlram ah atlawng

UN nih Kawlram ah palai an thlah lengmang hna nain UN palai hna nih thil anchuahpi kho taktak mi tutiang ah aum kho bal rih lo. 2008-2009 kum hna caah Ibrahim Gambari cu UN palai ah an rak thlah nain thilpipa achuah lanh kho lo. UN lutlai Banki Moon pumpak zong in Kawlram ah a kal i ralbawi hna a ton hna nain a biachim mi cu Kawl ralkap nih zei an rel piak hlei lo.

Tutan an thlah mi hi Tomas Ojea Quintana ti a si i a nih hi tulio UN zung i nuhrincovo lei he pehtlai in tuanvo ngeitu upa pakhat asi i Kawlram ah nuhrin covo aumloning hna he pehtlai in siseh ramkhel rian kawng caah siseh palai in an vun thlah mi a si.

February 13 ni ah Yangon ah aphan. VOA nih a chimnak ah cun atu Mr. Quintana Kawlram a tlawnnak aruang bik cu tlangcung mi upa hna le opposition party hna aralai mi election ah an itelve khawh ding caah chimhchawnnak ngeih ding ah ai tinh bik mi asi. Cun Nobel laksawng ahmu kho mi Aung San Sukyi he zong i ton khawhnak ding caah timhtuahnak he Kawlram ah a vapanh cu a si(Ref cyo.info)

Avoi 63nak Shan Ramthen Ni Cu Ramkip Ah An Tuah

Hlan lio ah Shan miphun ni (Shan National Day) tiin an rak hman tonmi Shan ramthen ni (Shan State Day) cu kan hnu Feb 7, 2010 ni ahkhan vawlei cung ram kip ah an tuah. Hi ni a rak thawknak cu 1947 kum, Shan ramthen Panglong myone ah Shan Sawbwa pawl le ramkhel riantuan tu pawl nih British uknak kuttang in luatnak dingah hnatlaknak an tuah ni a si. Cu hnu ninga a rauh ah Gen Aung San le Kawlram cozah lei rian ngeitu pawl cu tlangcung mi (Shan, Chin, Kachin aiawhtu pawl) he tonnak an tuah i tuanbia ah a tangmi Panglong hnatlaknak (Panglong Agreement) cu min an rak thut khawh caah Britis uknak tang in 1948 ah kan rak luat khawhnak a si.
Shan ramthen ni Kawlram chungah a donghnak an tuah hi 2005 kum asi i cu ahcun Shan ramkhel rian lei upa pawl, mino hruaitu pawl le Kawl ramkhel riantuantu pawl nih federal ram (federal union) dirhnak kong an rak ceih caah an tuah hnu ninga ah hruaitu zeimawzah cu tlaih an tong. An tlaihmi chungah Sao Hso Ten (President of the Shan State Peace Council), ramkhel riantuan Shwe Ohn, Shan Nationalities League for Democracy (SNLD) in an chairman le chungtuan, cun Hkun Htun Oo le Sai Nyunt Lwin te pawl an i tel. Shan hruaitu pathum hna cu thong 75 in 106 kar an thlak hna i Hkun Htun Oo cu kum 93 thongthlak a tong. SNLD hi 1990 kum thimnak ah thutnak 23 a hmu i NLD khawh in tambik changtu a si. (Ref: Irrawaddy)

Faiceu Media Group
Malaysia

ABC thawngthanhnak Nih World Trade Center A Cimh Lio Hmanthlak An Langhter Tthan

Sep 11, 2001 lio US ram World Trade Center cu Osama bin Laden minung

pawl nih vanlawng in an doh/pah ruangah a cim i minung thong tampi an thi. Cu a pah lio te le a cimh lio te hmanthlak cu ABC news nih Feb 10, 2010 ah a langhter than. A tu hmanthlak hi New York palik Greg Semendinger nih helicopter cung in a rak thlak mi a si. Hi lio caan ah minung 13 nih hman thong tampi an rak thlak nain a tu tluk in a fiang lo. (Ref: Reuters)

Faiceu Media Group

Malaysia