By, Thang Ning Kee
Kawl Ralkap nih cun November 07, (Sunday) 2010 ni hi Election ni caah a phuang cang. Mah ni ah cun zumtu khrifa (Christian) hna caah cun Biakin hna khar tiang kha kan herh laiih biaknak khuarkhirhnak pakhat ah kan caah cun a tla cang. Biakin kan khar thenglo zong ah lungnuam in an pum kho hna lem lailo. Zei ah Sunday ni kher an hril mi nih hin biaknak le a mipi hna zawn an ruatlo bak kha alang. Aungsan Suhkyi an chuah hlan ah Election tuah man antim nih hin a mah an tihnak alang ter. Sukyi a chuah hnu ah cun thil a danglam khomi le mipi ih Sukyi an zumnak langter an ttihnak siin alang.
Election ah a lut dingmi hna cu August 16 in 31 chung hrim hrim ah hming pet ding le pawisa ting 5 kyats 500,000 pet cih ding ti asi hawi. Zarh hnih chung ah Ram ai awh tu ding kawlnak le timlamh nak ding caah can a tawi tuk. Timhlam can neilo dingin a tuahnak hna hrim hi asi. ……
Auak hluat taw, People’s Assembly (Lower House) Constituencies caah 492 in 330 ah an tum ter ih Athet hluat taw National Assembly (Upper House) Constituencies zong State le Divission pakhat ah hlei hnih (12) cio rampum caah 168 lawng ah an tuah ih Chin miphun caah Lower 4 le Upper ah 1 kan sung tinak asi. Asi nain Myone (Township) tampi a neimi State cheukhat le Division chuekhat hnakin cun Chin State hi kani miat deuh nain rampum puluk hei zohtik ah Ralkap nih fawifai teih a uk khawhnak ding lam a tuah tiin hmuh khawh asi.
Atu te Ralkap caih a biapi ngaimi strategy thar a tuahmi cu, Border guard agreement a tuah duhlo mi lakih tha a thawng cem Wah (UWSA) le a hawi Mengla(NDAA-ESS) pawl August 20 ah a tawng than hnaih nanmah ramkulh chung ah Election nantuah lai tiah bia a ceihpi than hna kan zoh tikah Kawl ralkap acozah nih hin biarum in a ngahlo ah bianem in a duhmi ngah ding kha a biapi ah a chiah ih lih le hrawk hrawl dik le diklo hi a caah a biapi tilo tinak asi. Border guard an duhnak ding ah rorum ngaiin bia a ceihpi hna ih an ngahlo tikah a biarum bantuk in le a do ngam tak tak hna lo leng ah a tu nemtein Election lut ding ah a va liam hna cu mi pangai caah cun ningzak za asi. Mipi hmai zong ah ningzak an hngalh tilo. Culio ah ralkap acozah nih zeitik hman ah Rohinja (Muslim) pawl Kawlram mi sinak pet aduh ballo hna zong Arakan (Rakhai) ramkulh chungih Puti Tuang le Mawngtaw hna ah anmah vote thlak ding ah a liam hnaih ramsihnak zong a pe cuahmah hna ti asi. Atulio Kawl ralkap ih a kal ning ah hin a hlan ih a ral hna zong Federal Union a au lo ding mi le Ralkap uknak hnai hnok terlo ding mi poh cu misual ansi zong ah ramdang mi ansi zong ah vote pe dingah a liam cuahmah hna cang. Ram le Phun neitu le mi ding mifel asi zong ah long term policy ah Federal Union le Democracy phung hram fel a kal than ngam dingih a hmuh mi poh cu a duh hna baklo tiah afiang ngai.
Khatta leiah hei zoh u silaw, Dr. Tu Kya ih Kachin Progressive Party hi Election caih Tlangparmi hna lakih list a pe hmasa cem lei asi nain KPP lawng silo Kachin party pathum bak a tu tiang register atuah ter hnaloih Wah le Mengla pawl register tuahzawng a timlo mi amah nih a va liam hnaih luh ter a tim hna kan zoh tikah, mah zawn te ah hin mi tampi ih an hmuh khawhlo mi Kawlram caih long term policy ih a biapi mi biahli (bia thup) a lang ter. Hei check hnik u sih…. meithar he kahawk lo dingih agreement a tuahmi pawl lakah hin Wah pawl hi a thrawng cemmi ansi ih Border Guard agreement tuah ding ah Kawl ralkap a sung nak hi Wah ruang ah asi ti kan hmu kho. Biana bia ah Wah nih Border guard agreement hi hei pawmpi bang selaw KIO thawkin a dang pawl kha cu anduhlo zawng ah tharum hmangin a tuahter hrim hrim hna lai. Asilo ah KIO le a dang pawl nih agreement an tuah khawh ah cun Wah lawng kha cu tharum hmangin a tuah thiam thiam pi men lai. Wah he a dangpawl an kawp ah cun Kawl ralkap nih tharum hmangih tuahter hna kha a hei ngam tak tak lo tikah KIO le adang pawl le a hei biak thul ih a ngahlo hnu ah a tu Wah le Mengla pawl Election lut ding ah a nem nakin a va liam than hna. A ruang cu atu election a lut ding party cheukhat nih anduhlonak an au nak thawng arak ngan deuh deuh tikah a ral lakih zeiti hmanin a tuah kholo mi Wah pawl va liam hna ih Election lut ding mi party pawlih lungkimlo aw thawng cu rehter (thing) a tim than. Achan cu Wah le Mengla an kawp ah cun constituency 5 a neimi ansi caah Kawl ralkap caah a biapi ngai. Kawl ralkap caah Kachin zeiah tihtlak cem asilo nain Election caah a ttihcem le Wah hi ttihcem tlak asi nain Election caah a ttihloih lut ding ah a liam than kan zoh tiakah,,, Kachin pawl hi Nyawng Hne Pin Nyila Khan ah siseh, a zei can poh zawng ah an chimmi hi Federal Union siding le Panglong agreement hmang than ding hi an chim cem le kalpi mi asi caah Dr. Tuu Kya pawl hi Election ah an lut khawh ih Kachin State ah an cah sual asi ah cun Parliament ah anral asithiam thiam lai ti an hmuh caah asi. Biana bia ah Chin party hna le Arakan party hna hi zeihman Ralkap caah ttinung mi statement an ngeilo tikah ah cun an State chung ah an rak cak hnu ah Federal kawng hna Panglong agreement kawng hna cei than an tim zong ah Election hlan ah nan chimlo mi le nan lungkim ciami bak cu zei hman nan chim kholo ati hna lai, Dr. Tukya hna rak tei bang selaw adang pawl he Parliament ah ani kawp than lai caah Dr. Tu Kya pawl hi a tih cem nak asi. Kawl ralkap nih hin a caah khua sau a ruat cia asi, a sawh sawhin a caah thil a tuahlo ti kan thei ve a hau (an zial thiam ngai ngai). Wah pawl hi hei zoh than u silaw annih cu Tlangpar miphun dang hna bangin Federal Union hrim hrim a timi hna ansilo, ram nei a timmi hna an si caah an duhmi an hmuhnak poh ding caah cun Kawl ralkap he zong a lungkim kho dingmi ansi. Cu cu Kawl ralkap nih a thei caah Border guard agreement caah dawnkhantu No.1 asi ti a thei nabu in Dr. Tuu Kya hna zong Election caah party register a tuah ter hnalo lio ah a mah baknih election lut ding hna ah a va liam than hna, Tu Ma Neng Ko Ma Neng in I hlen zungzal in Kawl ralkap nih a tuai pi hna ko hih. A dawng cem ah a hodah teitu, zoh a nuam lai. Wah hna cu township 5-6 hrawng an nei khawh ah cun state an siar laiih Talukram chungih a cep(tawt) tukmi an mipi hna an rak luhpi ding hi an aims ngamcam asi, taluk nih cu cu bawh phahin Kawl Ralkap cu a ven (bawm) peng nak zawng asi.
Kawl rakkap nih atu lio, tlangpar miphun pawl ram kulh a buaipi cem mi hna hi Kachin, Shan, Karen le Mon pawl ansi. Rakhai (Arakan) le Chin ramkulh hna kha cu Election caah a zalian cem mi ah a hei chiah ko hna, tulio kan zalian nak hi Election adih tikih thawng kan tlaknak ding asi lai tihi thei cia kan um ah cun lunglawm tlak asi hnga. Arakan ah cun acozah le Election duhlonak an au aw cu a tam nain an miphun aiawh tlakih Ram Ralkap aw Statement le thil phut a um khawh lo caah asi cem. Atu Tlangpar miphun pawl lakih a ttih cem mi hna hi an miphun aiawh tlak ngaiih political platform aneiih ralkap thrawng a neimi hna hi a tih hna ih a buaipi lio hna cu an si. NLD le Tlangpar mi hna hi awkhat chuahih kut tlaih awk nak ngai ngai a umlo mi zawng Kawl Ralkap van thatnak asi. Cu caah pakhat hnung ah chiahin pakhat hmai ah phorhin a hlen hna tawn. Kawl ralkap ih diklonak cu kan chim ih a dih kholo bangin a fimnak le zialnak zawng cu tawp kholo in an thuk cangih hram an hnget cang caah anamh lam ah cun an sawh sawh velo ti thei dingah a tha. (NLD lei siseh opposition groups dang hna siseh, tlangpar miphun leader hna zong siseh Kawlram thatlonak kong cu vawlei pum ah an aupi hna nain 2008 constitution kong hmailei ram hruai le uk ding phunghram tihnung ngai asimi le mipi le a bikin tlangpar miphun hna caah phun thlauhnak tiang a um ti kha ramdang ram uktu hna fiang ding ah an hna an thlak kho hna lo hi a pawi ngai ngai, zeiah tiah Ramdang uktu tampi nih Election a um phawt ah cun mipi nih Ralkap an hril lailo ih an duhmi an hril khawh lai tiah an zumnak hi Kawl Ralkap caah a myiat cemnak kha asi. A ngai ngai ah Kawl ralkap hna nih anmah hrim tling dingah a phun phun in mipi hna an thlen hna le an force hna ti hi ramdang mi le Uktu hna tampi nih an hmu hluh kholo caah Kawl Ralkap a thatlo an thei nain Action lak ding ah cun Election pei a tuahpi cang lai tiah hin an vaivawin nak hi asi.
The Nation News (Bangkok) nih cun Kawl Ralkap ih 2010 Election hi nihin ni tiang vawleicung pum puluk ih ngaihsak (a buaipi) cemmi asiko tiah a phuang. August 16 niah Bangkok Post nih cun Kawl Ralkap ih 2010 Election cu pawmpi tlak hrim hrim asilo, Kawram mipi pawl le vawlei pi hlen ih Kawram mipi hna zungzal Ralkap thang ah canter timnak men asi tiin a chuah. Cu hna lawng silo The Independent (London), Telegraph (London), Tim of India, The Hindu News, The New Nation (Bangladesh), The Guardian (London), Los Angeles Times (USA) hna nih fak ngaiin an dem leng ah ram tampi Media le News pawlnih Kawl Ralkap ih 2010 Election hi Free and Fair asilo nak kha an aupi cuahmah lio ah Kawl Ralkap cu a zei pawiloin a duhmi tuah dingah hmai cu a hei nawr ko hih. (Tulio bak kha cu Election kong kan ceih zong ah History hna ceih tamloin 2008 ih ram uknak phung hrampi le Kawl ralkapih 2010 Election caih opposition groups le tlangpar miphun hna le an ralkap hna cungih a hlithup le thiam ngaiin a tuahmi strategy hna kong hi pholang kho hna u sihlaw mipi hna ca zawngah san a tlai deuh lai tih zum a um ngai)
Kawl ralkap ih amah nawl bakih a tuah mi 2008 ih ram Uknak dan hrampi nih Ralkap nih a zungzal a Uknak dingih a nemhngeh fiangnak pawl kan zoh tikah,
1) Article 1: 6 Ralkap nih ram politics cu a hruai lai
2) Article 1: 14 Ralkap cu rampi, State le Division tiang uknak ah a tel lai.
3) Article 20 Ralkap pakhat lawng a um laiih ram ralkap he petlaih mi poh cu zalawn tein khua aruah dihlai.
4) Article 60 (b) 3 Ralkap cu ram uk nak step poh ah a tel dih lai.
5) Chapter 7, article 338 ralkap pakhat bak tilo cu zei budang ralkap hman um asing lo.
6) Article 412, 413, 419 Emergency canah ralkap nih Aana ting khawhnak constitution nih a pet leng ah can tiam umloin ram cu Ralkap nih uk khawhnak nawl a pet.
7) Ralkap cu ho hmannih mawhpuh tuahin ati buai hna a hnawk kho lai lo
8) Article ralakp he a pehtlaih mi poh cu Raluk Bawi nih bia a ceih lai
9) Chapter 4, Article 74, 109, 141, 161 ram uknak Parliament ih 25% cu ralkap nih direct in a lak lai.
10) Article 115, 147(b) ral veng nak, lung chung zei ralkap kong hna cu ralkap lawng nih bia a thlak lai.
11) Article 121(k) Ralkap cu special opportunity pet ding
12) Article 20 Ral vengnak, lung chung zei, ramchung kong le ramri kong hna ah siseh, Article 212 , 234 ah Vonkyi chuk dawttu hna sinak pet nak ah ralkap chung mi lawng pet hna ding
13) Article 262 State, Division ralveng nak le ramri kong hna cu Ralkap lu cem (Ka kawi zei usi chuk) lawng nih a ceih lai
14) Article 258 Ralkap ih a hmunpi asimi Nei Pyi Taw Council cu Rampi ih a sang cem nawlnei nak a si lai
15) Emergency caanah chapter 11, Article 412, 413, 418, 432 ah rampi ih dan tuahnak, UKnak, rorel (biaceih) nak pawl cu ralkap nih a lak dih lai ih can tiam umlo in Aa Na Ting khawh nak zawng a ngei ter.
16) Chapter 14, Article 443, 445, 447 ah ralkap ih ro ngahnak/ a hmaiih acozah ih dan tuahmi hna, strategy pawl hmang kho dingin a tuah piak caah 2008 Kawl ralkap ih rampi uknak phunghram pi cu Ralkap hmuhnak, ralkap dirhmun in Ralkap nih Kawlram zungzal in zungzal a uk khawhnak ding caah an tuah mi ti hi a fiang cik cek koN
Note: Aliam ciami Election vialte kanzoh tikah Kawl ralkap acozah nih mipi attih hna ballo ih a duh pohin a nawlin a tuahhnawh hna,… Tu tan ah hin cun mipi lak ah a mui le a zia a thlak nak kan hmuh khawh hi buainak thim lakih mipi caah ceunak hmete a rak lang cang ti khawh asi. Ziah tiah,
a) Election ah a tling khawhnak hnga thi dengin mipi a nem in siseh a rum in siseh a tlawn hna, chaw le va hna a pek hna, Election ah sung khawh asi tinak thinlung thar an nei.
b) Kawl ralkap acozah poh nih Rohinkya (Muslim) an duh ballo mi hna zawng rammi sihnak le vote pein a mah vote ding ah a liam kho hna cang.
c) Border Guard agreement caih amah caah lamkhar tu cem Wah hna kha chin cia bantukin an ramcin ah Election tuah ve ding ah a liam hna.
d) Tlangpar miphun lakih background a nei deuhmi hna kha Election ah a ttih ngai ngai hna cang…. ih a hlan ah ttihnak a nei ballo mi kha Kawl ralkap nih ttihnak a nei kho cang mi ah hin Ram mipi ca hmailei Hope cu a um dawh cu asi deuh ko, a can belte a rau hnga maw, a naih laidah?
August 25, 2010
Ottawa
