US President hlun Bill Clinton nih North Korea thonginn um US Journalist pahnih a va chuah khawh

Riantuannak sakhan ah a kan kuat lai tiin kan thin a phang peng, hi tiin kan thin a phang peng lioah ruah lo piin itonnak pakhat ah nan kal lai tiah a kan ti. Cu itonnak hmun lei ah a kan kalpi. US President hlun Bill Clinton cu kan hmaiah a rak dir kan hmuh i kan lau tuk, cun kan thinlung chungah kan theihmi cu kan nunnak mangchia adih cang tiin Laura Ling nih a chim. Cun, aluanciami ni (140) chung cu kan caah a har bik ni le khua caan a si, kan nung lai maw kan thi lai tiin kan thinlung ah a zel, cubantuk in ngaihthiamnak a kan petu North Korea cungah kan i lawm, cun inn ah kan phak thanmi cu kan i nuam tuk hringhran tiin Laura Ling nih (5/8/2009) US a phanh hnuah a chim. Hibantuk in 4/8/2009 ah US President hlun Bill Clinton nih North Korea ah a va kal i Journal pahnih a va chuahnak a ruang cu July 2009 ah khan tlaihkhih a tongmi Ling le Lee nih an innchungkhar telephone an rak chawnh hna. Ling le Lee nih an chimmi bia cu North Korea cozah nih US upa President hlun Bill Clinton tibantuk North Korea a rak tlawng ahcun kan in ngaihthiam hna lai tiin a kan ti tiin an innchungkhar sinah an chimh hna. Bill Clinton nih Journalist pahnih hna i an thiltuahnak cungah ngaihthiamnak Kim Jong Il sinah a hal tiin North Korea nih a chim nain suimilam 3:15 an itonnak ah cubantuk ngaihthiam halnak a tuah le tuah lo ka thei lo, sinain North Korea nih Nuclear a hloh nakhnga kong a chimtu cu fiang tein theih a si tiin Adminstration Official nih a ti. Laura Ling (kum 32) le Euna Lee (kum36) luatnak hi an innchungkhar ca lawngah lunglawmhnak a si lo, kan ram pumpi ca zongah lunglawmhnak a si, White House lawng le American mipi vialte zong nih US President hlun Bill Clinton le amah Vice President hlun Al Gore cungah nan lung nan i lawm cio lai tiah ka ruah tiah US President Obama nih a ti. Nawlngahnak um loin North Korea ram chungah nan luh timi ruangah Laura Ling (kum 32) le Euna Lee (kum 36) cu North Korea nih March17, 2009 ah a tlaih hna. June 12, 2009 ah khan rianhrang tuannak in dantatnak North Korea nih a pek hna. Laura Ling (kum 32) le Euna Lee (kum 36) hi US Vice President hlun Al Gore nih a ngeihmi Current TV zung caah thawngpang latu rian a tuanmi an si. US President hlun Bill Clinton le North Korea uktu Kim Jon Il an iton hnu ah Kim Jon Il nih Laura Ling (kum 32) le Euna Lee (kum 36) luatnak caah ngaihthiamnak a pek. North Korea le US ram hi 1994 North Korea nuclear buaibainak a um hlan in pehtlaihnak a um ti lo. 2000 kum lawnglawng ah Bill Clinton nih President term hnihnak a tuan dih lai ah amah i Secretary of State a simi Madeleine Albright cu North Korea ah a rak tlawngter. (Ref: CNN&BBC)

Mandalay ah thi hlutmi an zuar

Mandalay siizungpi i zawnruahnak ngei ngaiin thi an hlutmi cu tangka tampi in an zuar tiah Mandalay khuami hna nih an chim. Cuti an zuarmi thi a caw kho ve lomi pakhat nih kan hnu August 2 ah khan thi a hlumi bu sinah kal in bawmhnak a va hal hna. Thi hlutnak bu nih cun langthum kan bawmh hna tiah an ti. Thi hlutnak i riantuan vemi pakhat nih cun cuti hlutmi thi an zuar cu a dawhcah lo ngai tiah a ti. Tangka a ngei deuhmi nih cun thi thawlkhat ah a sangsang in an pek i a ngei ve lomi nih cun Ks. 5500 hrawng an pek ve. Aungpyinlay thihlutnak bu nih hin Mandalay siizungpi caah thi lang 25 hrawng cu thla khat ah na hlut tawn. Cu lawng siloin a dangdang a hlumi zong an um ve rih. Mandalay ah thihlutnak bu 7 hrawng an um. (Rf:faiceu)

Thantlang Zuu Khap Bu nih bochanmi tlangval pakhat Palek nih an vuak

Thantlang, Chin Ramkulh-Thantlang khua hlum khuanu khuapa, biaknak le mino hna nih i bawm in an tuanmi Zuu Khap Cawlcanghnak i pumpek in a tuanmi tlangval pakhat cu Thantlang palik bawi le a hawile nih Hakha leiin a hung phanmi bus cung i zuu an chek lioah an vuak.

October 21, 09 zaan ahkhan Thangtlang Zuu Khap Bu i an i bochan ngaimi Salai Ceu Lian cu zuu bawhnak hmun i zuu phurhmi a chek hna lioah Thantlang Palik Sakhan bawizik le a naule nih an vuak i siikhan a phan, tiah a pumpak humhimnak caah a min langhter lomi khuami pakhat nih a chim.

Palik pawl nih an vuaknak a ruang he pehtlai in, "An tlaihmi zuu hi palik pawl ta si dawh a si. Cu ruangah hitin an vuaknak hi a si," tiah a ti. An vuak lio hin Thantlang sakhan-hmu zong nih thingtan aa ken ve i a naule cu"That uh! That uh!" a ti hna, tiah mithmu hna nih an chim.

Salai Ceu Lian cu Zuu Khap cawlcanghnak ah pumpek in a tuan i khua upa hna zong nih an i bochan ngaimi a si, cun hi zuu khap le zuu chek hi cozah lei nawlngeitu sinah Thantlang khuanu khuapa le biaknak bu hna i bawm in tangka tampi dih in rak halmi a si. Nain, atu bantuk in palik nih kut an thlakhnawh hna caah khuami cu an lungfaak ngai. A herhning in cawlcangh dingin timhtuahnak zong an ngei.
"October 22 ahkhan Thantlang pastor pawl le khuanu khuapa tonnak an ngei. An kan nihsawh tuk cang i a herh ningin cawlcangh dingin biakhiahnak an ngei," tiah thawng kan theih.

Kum hramthok hrawng zongah Thantlang Zuu Khap Bu nih Thantlang palik pa i a zuu lang 200 renglo an rak tlaih ruangah buainak tete a rak um bal.(Ref::YCCF-International)

Thantlang meithat pawl meithal kah an cawnter hna

Thantlang, Chin ramkulh-Thantlang hrambunh meithat (Fire Emergency) pawl cu cunglei nawlngeitu khuakhannak in meithal kah an cawng, meithlak kuan an thlahmi zong 500 renglo a si cang, tiah Thantlang Laitlum pakhat nih a chim.

Thantlang meithat ralkap minung 60 tluk cu Hmawngtlang lam le Thlualam lam ah meithal kah an cawnter hna caah khualtlawn zong an khap, tiah a ti

"Lam ah meithal kah cu cawnter a si caah khual tlawn lo ding le a lam zong pal lo dingin tlang an au," tiah a pumpaak humhimnak caah a min langhter lomi khuami pakhat nih Seihnam sinah a chim.

"17 October 09, zinglei 9:00 in meithal kah cawn cu an thok i meithal an puahmi hi zun 500 renglo a si cang tiah meithal kah a cawng vemi chungin pakhat nih a ka chimh, " tiah a ti.

Meithal kah an cawnnak a ruang he pehtlai in, "2010 tikah buainak a chuah sual ahcun meithal a tlai ding kan si, cuca cun kan cawnnak a si," tiah a cawng liomi pakhat nih a chim.

"Mei phalh teh nan cawng lo maw tiah ka hal i meithat cu kan si nain meiphalh daan cu kan cawng lo. Meiphalh cu a kan cawnter rua lai lo, hi pin cun traning dang zong a um ti lo," tiah a ti. (Ref::Seihnam)

Kawlram ah Australia nih chawlehthal hram a bunhmi a lak than

Australia hnipuan lei riantuan mi phukhat nih Kawlram ah hrambunh in chawlehthal rian an tuanmi kir than ding in an chim tiah Australia i a ummi Burma Campaign Australia- BCA nih a chim. Ralkap cozah uknak tangah mipi an temtuar tuk caah chawlehthal hram kan bunhmi ka lak thannak cu a si tiah Speciality Fashion Group nih BCA sin ca a tial mi ah aa tel. Speciality Fashion Group i minthang tazeih hna cu Millers, Crossroads, Katies, Autography, City Chic le Queen Park hna an i tel. Australia ah hin dawr 843 a um i kum khat chung an zuar khawhmi hi 560.5 mil a si. Speciality Fashion Group hi hmasabik Australia chawlehthal lei in a kir mi an si tiah theih a si. (Ref: faiceu)

Nobel Peace Laksawng cungah Committee bia

2009 Daihnak laksawng cu US President Obama nih a hmuh. Cheukhat nihcun an lawmhpi, nain cheukhat nih cun hi bantuk laksawng hmuh dingah a tuan caan nih a zat rih lo a timi zong an um. Daihnak laksawng a petu Committee le Noway Prime Minister hlun Jagland nih an chim mi cu President Obama cu ramkhat le ramkhat pehtlaihnak a tuahmi cungah siseh, a hawi minung riantuantu kar i pehthlainak a ngeihmi lungput, hmuitinh mi cungah le vawlei cungah nuclear um lo dingin aa zuamnak cungah upatnak kan pek, hi hnu hmailei zong hinak tampi rian a tuan rih lai. Hotal nih a mahnak rian kan tuan kho deuh maw? Daihnak laksawng ngeitu Alfred Nobel nih hi laksawng pek ding ca i a saduhthah mi zong zoh in kan peknak a si. Hi laksawng pek dingah a minung thim hi a har ngai mi rian a si tiah Oct 10, 09 ah media sinah an chim.
President Obama cu a ralai mi December thla chungah Norway ram Oslo khuapi ah US Dallor 1.4 million he upatnak laksawng hlam ah a kal lai. (Ref: faiceu)