Minung Nih Nunak An Serkho Ve Cang

Craig Venter chuahkehnak cu Salt Lake City,Utah a si. A tlanval lio ah fimcawnnak lei ah a biatak tuk lem lo. Ti cung le lawng cung ah um lawng a rak huam. Reprot card ah grade Cs le Ds pawl he a lawm peng mi a rak si. Time Megazine nih Venter cu a hngakchiat lio tein mi pakhat khat a cang te lai tiah a ho hmanh nih an hmu lem lo an ti. Mills High School in a dih hnu ah San Mateo Community College, California ah apeh. 1972 ah Bachelor of Science Biochemistry in a dih i 1975 ah University of California,San Diego in Physiology le Pharmacology in Ph. D a dih. 1984 in National Institute of Health ah riantuan hram a thawk.

May 20, 2010 ah J Craig Venter nih nunnak a ser kho cang ti mi thawng vawlei cung ah a thanh. Nunnak cu Pathian lawng lawng nih ser khawh a si tiah zapi nih theih mi le pom ning a si. Minung zong nih a ser khawh ve cang.
A thil hmuh mi thawng in khamhnak si (immunization) chuah thawk in pawngkam filhhnawmhnak (environmental pollution) thianh ding tiang ramthar rian tuan khawhnak a lam a hmuhsak piak. Cu ve bantuk in khat ta lei in biahalnak a um ve mi cu minung nih nunnak a ser ti mi hna hi kan tuah awk a si maw si lo ti mi le hi fimthiamnak hi thatlonak lei ah a hmang ding sin ah phanh sual ah cun zeitin dah khua kan khan te lai ti mi a buai mi zong an um ve.
Hika YouTube ah na zoh a si ah cun avoikhatnak minung nih a ser mi nunnak cu na hmuh lai. Kum 15 chung a retheihnak vialte i a theipar a si. Hi nunnak a ngei mi rungrul hi von zoh ah cun a simple tuk mi te a lo nain, minung nih a rak ser lo ah cun hi vawlei cung hrim ah kan rak hmuh khawh lo ding khi a si. A umnak cu Maryland State i J. Craig Venter Institute www.jcvi.org ah a si. Amah a ngeitu le a sertu cu fimthiamnak a ngei mi mirum pa J. Craig Venter a si.

Minung nih nunnak ser ti mi hi a luan cia mi caan tuanbia zong ah minung sinak sernak ah saduhthah a ngan cem le a sang cem ah ruah a rak si. Frankinstein timi lenhoih ah sibawi pa pakhat nih mithi pawl an pum pawl kha thit chom le fonhtomh chom in nunnak a ser ti mi kong a rak tial i vawlei cung zong ah minthang ngai cauk ah a rak cang i bisakop zong an rak thlak len. Catialtu lila zong nih a uar cem mi cauk ah a tel mi a si. Frankinstein cu nunnak cu a ngei ko nain mi kut,mi ke,mi pum,mi hmai,mi chungrel vialte peh chom mi a si caah a mui cu a chia ngai ngai. Nunnak a ngeih caah khua tuaktannak zong cu a ngeih ve i amah le amah minung tak tak ah a ruah i minung tak tak pawl zong kha a komh duh tuk hna. Asinain a muisam nih minung dirhmun a phanh ve lo caah minung nih cu minung ah an rak rel lo. Cu cu a theih cang ka tein komh a rak zuam i amah an komh duh lo mi pawl kha a huat cang hna. That hna a that than ti a si i a hnu cem ah cun amah a nunnak a rak ser mi sibawi pa lila nih a dawi a dawi i an i ton tik ah a sertu pa kha lungpang chung ah a zuan pi i an pahnih in an thi tiah a donhter. Mithang rock hlasak thiam Alice Cooper ti mi zong nih Feed My Frankinstein ti in hla a rak phan i rock hla a uar mi pawl nih cun kan rak uar ngai ngai.Mah Youtube Hi.Pathian nih nunnak a ser mi le minung nih nunnak a ser mi kong ah a dannak pakhat te lawng a um. Pathian nih cun nunnak a ngei lo mi tlak in nunnak kha a rak ser. Minung nih cun nunnak a ngei cia mi i rungrul i a kutke cheubang in nunnak cu a ser. ( Frankinstein lenhoih zong ah cun nunnak a ngei cia in a thi mi pawl kha a komh hna i nunnak cu a ser). A fawinak chim ah cun nunnak a ngei cia mi kha hman in nunnak kha a ser kan hei ti lai cu.

An thil hmuh mi nih a chuah pi mi cu minung nih an duhning muisam chuah ding in nunnak (cell) chuah pi khawh ding khi a si. Nan theih cio kan theih cio bantuk in DNA cu saram vialte i nunnak a hram cu a si. Kan theih ding ah a chap ding mi cu hi hnu hmai lei ah DNA zong hi Walmart i thil cawl bantuk in minung nih kan cawk khawh ve te lai ti mi kha a si. An rak tuah mi cu nunnak phun kip i DNA pawl kha an kut,an ke, an tenge ti bantuk an lak hna I an komh ter hnu ah DNA a thar pakhat an chuah ter mi cu a si. Hi thil an tuah khawhnak ding ah kum 15 an rak rau. An tuah khawh mi DNA kha tha tein le pum tlam tling tein a thang (grow), a then zong a then kho (divide) i a karh zong a karh kho (multiply). Cu cu nunnak a ngei ti mi a sullam a si.
Hi thil vialte hi computer software hman in tuah mi a si.Hi thil an hmuh mi nih zeidah a pipa a chuah pi kho lai tiah biahalnak an ngei. Craig Venter nih a ti mi cu a phatnak ah minung nih heh tiah kan i zuam leng meng mi hmuitinh mi pakhat kan chuah pi kho ve ti nak a si. A pahnihnak ah khamhnak si (immunization) thar chuah khawh ding ah a lam a um te lai i a pathumnak ah Carbondioxide thlichia a dawp kho mi rungrul nunnak thar chuah i CO2 ruang ah a cang mi pawngkam filhhnawmhnak vialte a thianh ter kho te lai a ti.
US ram lai mi pawl zong hi hnu nikhat khat ah cun kan pumsa chung i thil tha lo vialte a thianh ter khotu rungrul DNA thar bantuk internet online in a cah cah i cawk khawhnak a lam a um kho te men.

dr. van

Ref::cyona.info

Pudu Thong Innpi An Phur Cang Lai

Chinmi tamlak mitthli he ni le caan an rel tawn nak Pudu thong inpi ( Malaysia ) cu June 20-23 ah khin an phur cang lai.Hi thong in ah hin Chinmi mitthli zeizat khi maw a luang cang.Pudu thong in pi cu an phur lai nain, Chinmi hna temtuarnak,mitthli nih a ttial taa mi cu vawlei dongh tiang a tlau ti lailo. Hi thong in ah hin thongtla zeizat remruam dah an thah cang hna. Acheu cu hri in an thlai hna i, a cheu cu siopi in an sio hna. Cingdaan ( caning) ttih ruang ah mahte i, ai thatmi an tlawm tilo. Mah ti minung an thah hna nak hmun ah hin mithla hrum ai thawng hi nihin ni tiang theih peng asi. An theih ballo mi india muihmai a kengmi pa hi zan poh ah ai chok tawn i, inkil a va phak hrawng ah khin a tlau tawn ti asi. Russel Lee nih True Singapore Ghost stories cauk a tialmi ah mi an thahnak hna hmun hrawng hin tuksapur ai hraam thawng thongtla pawl nih an theih tawn tiah a ttial. ( screams have been heard from rooms where hangings have taken place).

Pudu thong in hi 1891 kum ah Kuala lumpur khua laicer ah Mirang nih sak hram an rak thok i,1895 ah an lim, $ 320000 an rak dih.Charle Edwin Spooner nih design a rak suai. A kulhnak vampang hi pe 860 asau, pe 14 asang, thongtla pa Khong Yen Chong zuk phun phun an suaiter i, tinbawsi litres 2000 a dih, kumkhat ah a lim. Vampang cung i suaimi ah cun vawlei cung ah asau bik tiah record ah an chiah.( It was recorded in Guinness Records as the longest mural in the world ) Cu thongtla pa i a kut neh cu nihin tiang hi a hmun ko nain a can a sauh tuk cang tik ah an kok dih ngawt cang.
Misual pawl le ritnak sii a hmangmi le a zuarmi pawl chiahnak ding ah sakmi asi. Vawlei cung ralpi pahnih nak lio ah Japan nih mirang (English), Australian, New Zealand an tlaihmi hna pawl tamlak te Pudu thong in ah hin an rak thlak hna. A cheu cu vawlei tang ah an hngawng an cik hna, ramchungmi Malay mi zong tamlak te Japan pawl nih hin an hngawng an rak cik hna. Kan nih krifa mi hna nih cun kan i phumnak hmun kha zeitik hmanh ah tlau lo ding in kan tuah, hi lio Japan pawl cu an ruak an vui hna nak ah khan Alu te pawl hna an cin, a ruang cu a thlithup i an thahmi hna kha Pudu thongin leng ah chuak hlah seh ti an duh ruang ah asi.1986 kum ah Kevin Barlow le Brian Chamber ( Australia mi ) hna cu ritsii zuar ruang ah Pudu thong in ah hin an rak thah hna. An thong in khan hi a mui zungzal, a ruang cu thlalang awng hi lehmah 6-8 hrawng lawng a kau. Malaysia nih independence an lak hnu 1960 kum in 1993 kum tiang ah minung 180 Sadam hussein bantuk khan an hngawng in an thlai hna.

Tuksapur minung ai hraam an theih tawn nak Pudu thong in pi cu june 20-23 ah khin an phur cang lai i, commercial centre ( chaw lehthal nak hmun ) ah an tuah cang lai. Nain mithla an tthinlo nak, thlakawkbar, aihraam thawng zantlai hnu ah an theih lengmang nak hmun asi caah a hohmanh nih an caw lailo a titu zeimawzat an um.

Damte cio in,,,,

Danny B. Thla Tawn

Czech Republic

World Cup Ca Video Ah Kawl Nu Pahnih An I Tel

A voi 19nk World Cup ca hman dingmi hla (Waka Waka) (this time for Africa) timi 3D hla tuah mi ah vawlei cung ramkip an i tel i (we’re all Africa) timi chimnak ah Kawlnu nih, kan nih cu Africa in kan si tiah Kawl holh in a chimnak zong an telh chih ve. S.Africa music tumthiam Freshlyground nih an tum i Shakira nih a sak. A duhmi nih youtube in zohkhawh a si. Hlasatu Shakira nih “Ka caah a nuamtuk mi le a sunglawi tukmi pakhat a si, a voikhatnak 3D kai thlakmi video zong si” tiah a chim. FIFA hruaitu bawi nih “Mipi nih World cup puai lai an i ngeihmi ah, zei hla dah an hman lai timi zong an i ruah chih mi a si” tiah a ti. (Ref: Myanmardailynews)

Faiceu Malaysia

U.S.A Cuan Hawidawt Hna,

U.S.A aphaan rihlo Refugee minung nih U.S.A ram kanphanh kaaah zeibantuk in kanthu kanto lai timi hi kantheih ning aarak ikhah ciolo cale kantheih ningin thil aarak idan mihi theihter kavun induh hna. U.S ram ahcun State Pakhat chung ciocio hmanh ah ankan zohkhenh ning le kan tthutto ning hi aakhat cio hna lo.State pakhat le pakhat zong an phunglam (Law) aakhat cio hna lo.

Kum 2010 cun U.S .A ram ah Refugee aphaan tharmi caah bomhnak akai tiin kanrak theih i kumdang nakcun alet in akai deuh taktak ko. Asi nain hi phaisa hi aphaisa fangin hmuh asi lo. Kanphanh hlan in kan thutto nak ding Innlo ca le kan eidin awk (Basic need) caah zei mawzat cu anrak hman chungcang. Kanmah nuva ankan zoh khenh ningin ka vun langh ter hmanh lai;

Inn hi thla Nga (5 Months) chung hlaanpiak kan si. (thilri hmanrua tlamtling cia tein) Hand phone thar 1 ankan cawkpiak. Timei bill le phone bill hi thlakhat ca pek piak kan si. Hi acunglei pahnih ca i andih mihi Bomhnak kantimi chungin anhman mi asi i Family tamdeuhpawl cu ataang mi khirhthan ansi. Nu va le single pawl tu cu ahluh lolei tukhi asi.

Herhpang dang caah tiin thlakhat ah minung pakhat ah $200 in thlathum chung pek kan si.Phanh kaa in thlali tlin hlanah rian luhkhawh ahcun Bonus $ 200 pek asi. Eidin nak hi Card in pek asi i eidin phunlawng cawkkhawh asi. Thlakhat caah $ 180 hrawng hi pakhat caah rawnpiak lengmang asi i Riantlaih hlan chung rawnpiak asi. Rian in idinh asi ahcun athar in sok than ahau.Damlo caan Free in ithlop nak ding caah Card an kan tuah piak i thlariat chung hman khawh asi nain riantlaih lo ahcun athar in sok khawhthan asi. Hi Card hin Ha bunh dah tilo adang cu Free in ithlop khawh dih asi. Ha fangkhat bunh hi $700 in $ 900 kar adih. Cucaah na ha atthat lo ahcun U.S.A naphanh hlan hrimhrim ah iser taak philh hlah. U.S.A ram ah Nau ngeih hi free asi.Fim cawnnak lei in High School dihtiang hi Acozah nih free in kaiter asi.Refugee minung nih U.S ramah kum2 umhnu in Green Card sokkhawh asi i Kum5 umhnu in Citizen sokkhawh asi.

U.S.A ram cu Chungkhar fale 3-4 angeimi caah aakaih bik. Tefa ngeilo le Single caah cun U.S acozah rianh khi alo ko. Kumdongh Laksawng anti i tefa 3-4 angei mi hna nih kumdongh lai cu Bawi Jesuh ttumlai ngaih in ingaih asi. Hi laksawng hi family tam caah cun atlawm te hrim lo. Zeicahtiah U.S.A Acozah nih akal pimi cu aaruang tein (or) aatluk tein (Equalization) nunter khi asi.

Keimah hmuhning ahcun U.S.A kanphanh mihi Khuacuanh nak Cincawi kanphaan tiin kahmuh. U.S.A hi lothlam tual i donhmi ttheng Cincawi he katah chunh.
Adangdang zong theih duhmi nanum asi ahcun theih duhmi konglam kha Email in ihal le ileh khawh kan izuam tthan hnalai (kanti khawh tawk in).

Robrt Hram Hei
Atlanta, U.S.A