Lungsia Herhnak Hee

Dear Dawtmi u le nau hna,

Sermi cu Sertu duhning in kan nun lo ahcun Sertu nih a duh ning in a
kan tuah khawh ti cu hopoah theih dih a si. Asinain Sertu duhning in
sermi hna zong nih nunzia kan thiam lo can a tampi ve bantuk in sertu
duhnak zong sermi hna nih theih dih awk caah a har ngai.

Zei thil kan ton poah ah Paul nih cun Pathian nih a duh ning in a
kawhmi hna cu zeizong vialte hi a tha lei ah a serpiak ko hna tiah
Rome cauk chung ah aa tial.
Pathian nih a dawtmi hna minung sinah rian a tuan ning hi phun tampi
in a um nain phun tampi, lam tampi chungah tlawmte kan nunnak ah i
ruahthan awk caah tlawmte in nan theih ciami cungah hun langhter nolh
than ka duh.

(1) Pathian minung hna cu an duh ning in an kal tikah a herh ahcun
Saram zong in bia a chim. Eg. Balaam cu aa citmi la kha a duhning in a
hruai nain kal a duhnak kha Sertu Pathian duhnak a si lo caah La in
bia a chim.

(2) David cu Pathian sal tha a si nain Uriah nupi a sual pi caah
Nathan thawng in a sualnak aa theih, aa ngaihchih nain a dawtmi a fapa
nih a thihtak. Theih ko buin tuah ahcun dantatnak chung in a luat hlei
lo.

(3) Laban cu thil i ken lo ding Pathian thil a hngar tuk i alak sual
caah harnak a tong.

(4) Ananias le Saphirah nu va hna zong Zultu Peter sinah lihbia an
chim caah an thil colh. Eg. Pathian pek ding zumhtlak lo in an pek
caah an thi.

Zumtu hna zong
(1) Job a sualnak a um lo nain harnak fahnak a tong ve tawn ko.

Chim duhmi cu mah le sikhawh tawk tein Pathian hmaiah zeitin dah kan
nun ti kha......... ......... ......

Dam tein,
Thawng Za Pum

Dam Tein Mangttha Uh

Tu hrawng cu um hra ah tiah Video Edit tuah pah in can ka hmanh ko hih.Chicago kan umnak kan inn le kan tlawn lennak hrawng ah zaihmi pawl an si hna.Chicago khua cu khuapi cu si ve ko minak an tam ngai.Vun rangnak in vunnak le Mixico pawl an tam deuh rua ka ti.Malay ah kan um i an mah Malaymi hmuh lo in Indo pawl lawng te kan hmuh hna bang Chicago khua le US State khua tampi cu minak le Mixico hi an tam deuh ko rua.Um har ah Chicago kan umnak pawngpang hrawng ah ziahmi Video a zoh ngaihuam mi nan um ah cun Thomas Tial Uk sakmi Dam Tein Mangttha Uh timi Hla Video a zoh ngaimi nan cung ah kaalawm.

Van B Lian

Cawk Fuhbik Mi Diego

Kan hnu zarh ah goal.com nih careltu sinin vote a lak i Cristiano Ronaldo cu azungzal in man fakbik mi record a tlaih. Manchester City nih ruah lo piin club Daego pumpululh dawi lio minthang si dingin mithar a caw khomi tiah record a tlaih ve. Cun Germany club Werder Bremen in Italy club Juventus ah aa thialmi Diego cu cawk fuh (hman) bikmi tiah vote an pek ve. Ziah hiti an thim tiah cun an chuih hmasa Roma puai 3:1 in an teinak ah kawlkhat a kawl ve hleiah a hawi le tam tuk a bawmh khawh hna caah a si.(Ref:Faiceu)

Lyon Club Ah Grosso Aa Thial

Fabio Grasso khuaruah har in a dir lio Italy club Juventus hnu kham a simi Fabio Grosso (31) cu French club Lyon ah thial dingin club pahnih hnatlaknak an ngei cang. Hi hnatlaknak an ngeih hi tukum thal chung pumpululh chuihmi cawk zuarnak kutka an khar ni a simi nihnih ni ah khan hnatlaknak an ngeih a si. Thial man ah pound 4mil a si lai tiah Lyon lei nih an chim.

Real Tangka Hman A Tambik

Spain ram in Real Madarid club cu tukum thal ah a tangka hman a tam bik a si i Euro pound 250 hlei minthang pumpullulh chuih thiam Cristiano Ronaldo, Ka Ka le Alonso te pawl cawknak ah a hman. Spain club pawl nih an hmanmi tangka a dihlak in Euro pound 477mil a si. Nikum King Cup, La Liga Cup le Champion League Cup pathum a lami Barcelona club cu pound 110mil a hman ve. Real le Barca club pahnih nih Spain club dihlak hmanmi zatuak 75 cu an hman. Spain pawl nih hi zah an hman ko nain England Premier League club pawl cu an tluk rih hna lo. Tukum England club pawl nih an hmanmi hi Euro pound 504mil an hman i tam bik a hmangmi club cu Manchester City club a si i pound 140mil mithar cawknak ah an hman. England le Spain khawh cun Italy Series A club pawl nih pound 422mil, French club pawl nih Euro pound 245mil, cun German club pawl nih 220mil tiah an hman cio hna.(Ref: Faiceu)

KNU Le DKBA Ral

Tuluk ram a zammi kawlram mi KNU ralbu 7 nih DKBA cu Lepahekon hmun August 28 zing slm 9 ah hmuhlo ral minute 15 tluk an tuk. DKBA 999 lei in minung 5 an thi i minung 15 hma an pu. KNU lei in cun zeihmanh thawng theih a si lo. Thai ram chungah kuan tlangpipi an tla. Atu ral an i tuknak cu a luan cia kum 3 lio i DKBA le Kawl ralkap nih an lakmi hmun a si. Atu tiang DKBA cu KNU nih a thli in a tuk tikah nikhat ah hma a pumi pakhat hnih lengmang an si. Atu ral an i tuknak hmun hin a luan cia June 2 thawk in Kawl ralkap le DKBA fonh in KNU ralbu 7 cu thlakhat tluk rau ralpi an i tu. Cuti an i tuk hnu July thlacheu hrawngah KNU nih an kianh hna. Atu an i tukmi cu cuti an kianh hnu i an i tuk thanmi a voi khatnak a si. Cun KNU ralbu 6 umnak hmun a simi Mon ramchung i Bayatongsu pawng i Mekatha khuate ah DKBA ralbu 907 cu August 30 zan slm 10 hrawngah an rat tikah KNU le DKBA karah raltuknak zong a chuak dengmang. (Ref: RFA)

Malaysia Fawn Kad Kawlram Ah An Zuar

Malaysia ram i hmanmi fawn kad (pre-paid) cu Kawlram ah an zuar ve. Kawlram ramchung company pakhat a simi DISys. Co., Ltd nih Malaysia ram a kal dingmi hna caah tiah tuakin Malaysia ram hman dingah Maxis company nih chuahmi Hotlink fawn kad cu dollar 18 in an zuar. Fawn kad cawk a duhmi hna nih US$ 18 le Malaysia Visa, Malaysia umnak hmun (address), Passport copy, Fawn kad khumhnak catlap tial dih hnu ah an duhmi ni in a hlankan nihnih ah cawk a hau. Atu lio Malay RM le US$ tangka thlen tuak ah cun RM 30 man cu RM 63 in cawk tluk a si. Fawn kad hman tikah Malay ramchung cun minit pakhat ah RM 0.33 a si i Kawlram chawnh duh ah cun minit pakhat ah RM 0.99 a si. 1988 thawkin ramleng riantaunnak hmun ah hin Kawlram mi hna caah cun Thailand dih in Malaysia hi a tam bikmi pahnihnak a si. Ningcang tein riantuan a thawhmi lengin minung 140,000 an um i ningcang lo a ummi an tam deuh. Cu lakah cun Chin mi thong 30 in 40 kan si lai tiah ruah a si. (Ref: Mizzima)

Daw Suu Kong Nawlnak

Daw Suu kong nawlnak an cohlan Daw Aung San Suu Kyi cu kanhnu thla August 11, 09 ah khan thong kum 3 le rianhrang tuan ding an timi kong ah a sihni hna nih nawlnak ca September 3, 09 ah khan an tial. Cu an tialmi cu biaceihbawi U Myint Aung nih Sep. 4, 09 ah a cohlan tiah sihni U Kyi Win nih a chim. “Biaceih bawi nih cun a ralaimi September 18 ah kap hnih sihni hna nih biachuahpi dingin ni a timh” tiah sihni U Kyi Win nih a chim. “1974 phunghrampi in biachah khawh a si lo, zeiruangah tiah cun cu phunghrampi cu a nung ti lo tiah ca kan tial. Kan nih kan ruahning ah cun Daw Aung San Suu Kyi cu a luat awk a si ko kan ti” tiah U Kyi Win nih a chim. (Ref: Mizzima)

Kokang Ral Kong US A thindai Lo

Kawlram ralkap nih ramri mitlawmte a simi Kokang bu ral tuk ti lo dingin na daih awk a si cang tiah American nih a frohfial. Kawlram nichuah chaklei Tuluk ramri i a ummi Kokang miphun hna cu Kawl ralkap cozah nih a tuk caah American cu thindai loin a um tiah kan hnu August 30, 2009 ah khan US ramdanglei vunci palai biachimnak nawl a ngeimi Ian Kelly nih a chim. Kawlrampi a daihnak ding le rualremnak dingah thazang hmang loin democracy thazang he cabuai khat ah thu in bia i ruah awk tu a si deuh ti zongin a forhfial. August 26 in aa thawk mi raltuknak ruangah Kokang minung 30,000 leng Tuluk ram ah an tli i a cheu cu an kir than cang. Sinain ral a dai cang tiah Kawl ralkap cozah nih thawng a thanhmi cu an zumh khawh lo caah thinphan dai loin an um. A cheu cu kir a ngamh lo zong an tampi. Kumpi kum 20 leng raldaihnak an tuah hnuah atu bantuk ral an tuk cu a si i Kawl ralkap lei in minung 26 an thi i Kokang ralkap 8 an thi tiah Kawl ralkap lei nih thawng a thanh. Ral daihnak a tuahmi pawl cu ramri kilvengtu ah Kawl ralkap nih tuah a duh nain an lungtlin lo caah atu bantuk ral an thawh cu a si tiah ramleng dotu hna nih an chim. (Ref: RFA)