Kawlram nih Russia sinin MiG-29 vanlawng 20 an cawk

Russia nih Kawlram sinah MiG-29 Jet vanlawng phun a zuar tiah kan hnu December 23, 2009 ni ah Russia ramchung chuak Kommersant thawngthanhca nih a tial. Russia le Kawlram cu kan hnu lei ahkhan US $570 million man vanlawng lei cawknak tuah dingin minthuhnak an tuah tiah Russia hriamnam company Rosoboronesport nih a chim. Kawl cozah nih hin kan hnu 2001 kum thawk in MiG-29 vanlawng pawl cu tamlak te Russia sinin a rak cawk cang tiah cu thawngthanhca nihcun a tial chap. Russian nihhin Kawl cozah sinah hiti a zuarnak hi Tuluk nih Kawlram sinah “ultra-modern” J-10 le FC-1 vanlawng pawl laan ding aa timh caah a si. Cu pinah Kawlram chungah Nuclear cawnnak center sak aa timh chih. (Ref: Irrawaddey)

Boieng 737 vanlawng a tla i minung 90 siizung an phan

US vanlawng Boieng 737 cu Dec 23, 09 Jamaica khua ah tha tein tum khawh lo i a tlak pah in a tum caah minung 90 siizung an phan. A thimi cu an um hraw lo. Nain 90 lakah a cheukhat cu kutkiak, kekiak tibantuk in an i khawng. A citmi minung hi 154 hrawng an si i cu lakah 6 cu vanlawng chung riantuantu pawl an si. (Ref: AP)Mirang ca a rel khomi caah Hika & Hika ah tam deuh in rel khawh a si.

Al-Qaeda he pehtlaihmi Nigeria rammi pakhat nih U.S vanlawng bompuah a timh

Detroit vanlawngtual ah tum aa timh liomi vanlawng pakhat cu Al-Qaeda he pehtlaihnak a ngeimi Nigeria rammi pakhat nih bompuah a timh nain khualtlawn le vanlawng chungtuan pawl nih an khap hmanh, tiah U.S cozah nih zahan (zarhte) ah a rak thanh.Christmas ni ah khualtlawn 278 phorh Northwest Airlines Flight vanlawng chungah bompuah a timh lio ah Abdul Farouk Abdulmutallab cu fakngai in aa hliam. Abdulmutallab a thutnak in tlang thum hlat ah a thumi, Syed Jafry nih, “Adang khuatlawn pawl nih meithahnak le ti an lak thliahmah lio ah khuatlawn pakhat le Abdulmatallab cu an i vel i, cu khualtlawn pa nih a hren khawh,” tiah a hmuh ning cu a chim. Cu hnu ah, vanlawng tuanvo ngei pawl nih Abdulmatallab cu Amsterdam in a rak zuangmi cu vanlawng chung i khan pakkhat ah an va hren. Nawlngeitu lei nih biahalnak an tuah i Abdulmattallab nih, bompuah dingah siichunhnak a hman. A ke ah a tape in aa tem chihmi thil dip (powder) pawl le cu siichunhnak chung i chemical pawl fonh in puah aa timmi a si, tiah aa phuang. Ram humhimnak caah ruahnak petu pawl he ceihmainak an ngei hnu ah Ramhun Obama nih, ram chung vanlawngtual poah ah i ralrin deuhnak ding ah tuah a herhmi pawl tuah ding forhfialnak a tuah, the White House nih a thanh. Bompuah aa timtu Abdulmatallab cu a ke aa khangh sual ruangah University of Michigan Medical Center ah an thlop lio a si. U.S thawngthanh bu lei nih an thanh ningah, Abdulmatallab nih Al-Qaeda cunglei nih an kan fial ningin ka tuahmi a si tiin tuanvo ngeitu pawl cu a chimh hna, tiah a tial. Nain, U.S ralhrang hlathlaitu pawl nih cun, cu bantuk chim ding cu a tuan rih, amah lawng nih a tuahmi zong a si kho ko, tiah an chim. Federal Security Bulletin chirhchan in U.S thawngthanh bu pakhat nih, bompuah aa timmi pa nih a thilri pawl cu Yemen ah a rak lak i cuka ah cun khoika le zeitik puah ding timi zong an rak fial chih, tiah a tial. – AFP