Josef Nun in Cawnawk

Gen. 39:2 “ Bawipa nih Josef cu a umpi i a caah thil kalning a tluang dih ko.”

Nihin ah, 'Pathian nih cun Thlarau Thianghlim in a kan um pi peng ko si' kan ti ko lai. Asiko, a hman ko! Asinain, cu an umpi nak kha Amah ţihzah buin na tuah tuan nak he na langhter maw? Kan umtuning kha Pathian nih umpi lo mi bantuk hna in kan um sual maw? Zeitindah kan langh ther? Josef nih cun Bawipa nih a umpi nak kha Amah ţihzahnak le dinfelnak in a langhter.‘Suffering is part of life’ an ti i, vawlei pumsa kan nunnak ah hin harnak hi cu aa tel chih mi asi cang anti. Jesuh zong vawlei cung pumsa nun in a rak tlawnlen lio ah, a ti hal, a paw tam, a thin hung, a ţap, har sa ngai in vailamtah a phorh, hlinghluchin an khuh, vailamtah ah an khenh chih..tbt..

Cucaah, "Pathian nih um pi" ti tikah hin harnak kan tong lai lo ti nak cu asi hrimhrim lo. ‘Josef cu Bawipa nih a um pi’ titik ah a nun kan zoh ah cun harnak a tong ngaingai: a nu tuan tein a thi, a u le nih an rem lo, khur ah an thlak, an zuar, sal a tuan, a si lo piin an phuh i thong a tla, a pa nih a thi cang tiah a ruah, a u le nih a um nak zong an thei ti lo, hi dir hmun in kum hleithum chung a tuar. Hibantuk ah Josef caah hin zeitluk in dah lunglen awk asi, zeikhuadah a ruat hnga, Pathian a thangţhat peng ko hnga maw, a mawtchiat lai dah, vawleicungah mi vanchia bik ka si a ti ko hnga lo maw tibantuk hi na ruat bal maw? Duh awktlak a um lo mi hi vialte dir hmun ah hin ‘Bawipa nih Josef cu a um pi’ ti asi. Pathian nih Josef cu nunnuamhnak (easy life) a pe colh lo, kum hleithum chung a tuar hmasa. Asinain, Josef nih Pathian a mawtchiat (complain) ti mi kan hmu bak lo.

Nihin ah ngeichiatnak na tong maw? Vawleicung i vanchia bik ah tah naa ruat sual maw? Thong na tla maw? Na tuah lo mi pi kha sual ah an in puh sual maw? Zeituah awk hngal lo tiang in lungrawknak hna na ngei sual maw? Josef a tuar mi tluk hmanh kan tuar rih lo kho men. Bawipa nih a ka umpi, a ka theihpi i a ka tuar pi ve ko ti hi philh hrimhrim hlah uhsih. Josef a nunnak in thazang la hna uh sih. Josef cu zei dir hmun (thonginn, sal tuannak) a phan zongah Pathian ţih zah buin le dingfel tein a um a tuan peng i a donghnak ah cun Egypt ram uktu ah a cang. (Gen. 41:37-44). Pathian a ţihzah mi kan si ah cun Pathian nih a kan zoh sawhsawh lai lo, harnak zong a kan tuar ter peng lai lo, Josef bantukin a theipar zuun can, thil kal ning a tluang dih can a um ve hrimhrim ko lai.

Josef bantukin Pathian a ţihzah mi le Pathian nih a umpi mi kan si peng nak hnga Bawipa nih thluachuah in pe ko hna seh!

PaHniang

Manila, Philippines

Kawl Ralkap Sakhan 4 An Ting

Feb11 kawkareih myoh pawng hna i kawl ralkap sakhan 4 Tawngtunglung sakhan,Kawngmu,cawngsiakung le khinhninmu sakhan hna cu DKBA kaluthubaw tatzin Buhmu kyawtet hruai mi le KNU tatzin(101)hna an ni bawm i zing 5 in zanlei 6 tiang an sakhan cu an kah hna i kawl ralkap lei nih hnu ah an soh piak hna an hriam nam le an thilril an kawn zen vialte cu KNU lei nih an lak piak dih hna,kawl ralkap lei hi 3 an thi 4 nih hma an put.Mah zong hi fiang tein an theih kho rih hna lo.DKBA lei hi 1 nih hma kan put ti Buhmu kyawtet nih a chim.An sakhan kan ting khawh i an thilril vialte kan lak khawh hnu in an sakhan cu kan kal tak hna a ti.An ni kap nak hi kawkareih le Miahvati lampi pawng ah a si i khua mi 4 hrawng nih hma an put ti theih a si.An ni kah nak hmun hi ka phan bal nak hmun a si caah ka theih mi a si Kawkareih myo he meng1 hrawng lawng a hlat lai.

Vawlei le phalu taih puai ah November(30) in December thla dih tiang thlahnih chung DKBA le kawl ralkap an ni kap nak ah kawl ralkap lei a thi mi le hma pu mi cazin cu nizan ah DKBA nih report an chuak cang.Mah thlahnih chung an ni kah nak ah kawl ralkap lei a thi mi hi(251)an si hma pu mi hi(278)an phan.DKBA lei hi(5)an thi hma pu mi hi khua mi he chimh in(9)nih an put.Buhmu SanAung nih a ti mi cu kannih cu a hman tazia te in a um mi le a nung mi kan si caah kan mah nih kan tei nak hna hi a si Pathian zong nih a kan um pi a ti. Sakap pa le sa bantuk kan si ko a ti.A bia pi cem cu peuhcia ni in kan kap hna caah le hmun hma ne zia kan cuan cin deuh ca ah a si a ti.

Cun KNU nih ni hin ah kum khat chung kawl ralkap he an ni kap nak ah a thi mi cazin an report an chuah ve cang.2010 kum chung kawl ralkap le KNU tatmaha(7)i an ni kap mi hi voi (1083)a phan kawl ralkap lei a thi mi hi(618),hma pu mi(1304)le a nung in an tlaih mi hna(16)an si.KNU lei hi (9)an thi i,(9)nih hma an put a nung in an tlaih mi hna hi thah lo in an nun nak him nak ding caah KNU nih tavun an lak piak hna i a cheu cu kawl ram chung ah a thlah than hna i,a cheu an khua lei ah a kir ngam ti lo mi hna cu thailand ram ah rian kan kawl piak hna ti KUN Secreatry buhmu Sawhlahnguai nih a chimh.

Cun kumkhat chung KNU tatmaha(7)le kawl ralkap an ni kap nak ah kawl ralkap lei meitha pi te in meithal an lak paik an ting piak mi hna hi(46)a phan i kawn zen an ting piak mi hna cu 4000 hrawng a phan thongpang thanhnak set hi(10),cun kawl ralkap an mawtaw(8)hi hman ngalh lo in an hrawh piak dih hna,Cun kawl ralkap lei a thi mi chung i ralbawi pawl(40)leng an tel ve.Mah voi thong khat leng an ni kap nak chung ah hmai ton bak in kan ni kap mi hi cu a tlawm ngai i peuhcia a thli te in kan kap mi hna long hi a si i ca ah kan mah lei kan thih lo nak hi a si ti in buhmu Sawhlahnguai nih a chim chih.Mah KNU report hi tatmaha(7) report a si.KNU hi tatmaha(1)in tatmaha(7)tiang an um.Adang tatmaha report a te rih lo.
DBKA Ralkap Hmanthlak

Egypt Ah Lunglawmhnak Bomb A Puak!

Egypt ram ah duh tlong in kum 30 chung ro a reltu Pu Hosni Mubarak cu tuchun ah a zam ruangmang cang. Nizaan TV in mipi sin bia a chimnak ah "Ka chuak lai lo, Egypt ram cu ka dawttuk, ka nunnak a dih tiangin hi ram vawlei he hin kan i tthen lai lo" tiah a ti ko nain a tlah-ttem a phoih ruangmang. Kan Cathiang nih "Zeipoh nih caan an ngeih cio" a timi hi a rak dik hringhran ko rua.

Pu Hosni Mubarak

A tang hi tuchun mipi sandah an piah lio a si. Tuchun hi duh lo an langhternak a ni 18 nak ni a si. Nizaan ah ka ttum lai lo tiah a chim caah mipi an thin inh a zual i tuchun hi cu a um-ek in cawl an i tim. A umnak President Palace kal hnawh i a herhning in ifimtawl an i tim cang. Hihi aa fian ve cang caah a si lai, ralkap kut ah nawlngeihnak a chanh hnu ah a zam ruangmang ko. A zam cang e... ti thawng an theih cun mipi cu lunglawmhnak bomb nih dara a puah hnawh hna ti awk in lawmhnak in an khat. An i kup, an i rek, a cheu an ttap, a cheu an ni, a cheu nih than an thlah. Mipi hotu Pu ElBaradei nih cun, "Tuchun Egypt mipi sin i a tlungmi lunglawmhnak cu hmur le kaa in ka chim kho hrim lo e" a ti. A hotu dang pakhat Pu Ayman Nour nih cun, "Egypt rampi cu a thar in hrin tthan a si cang; Egypt minung zong a thar in hrin a si cang" tiah a ti ve.

A tang hi Pu Hosni Mubarak a zamnak hmun Sharm El-Sheikh khuapi cu a si. Egypt penram chim lei rili sen (red sea) hru'l ah a ummi a si. Minung 35,000 hrawng an umnak, a nuam ngaingai mi hmun, mitampi nih lungduh cuainak ah an hman tawnnak khualipi a si. Hi hmun ahhin a taang rih mi a chan cu umhar lileng ngaiin a hman ve cang lai.

Hawi ram ralkap hi cu an rak fimtuk hringhran. Anmah le an rian an i hngalh. Ram mipi cungah dawhnak, upatnak, zawnruahnak an ngei. Hngar an um tuk ko e. Kannih ram ralkap belte cu hruhnak nih chahtuk in a tuam hna i anmah ca i a tthadeuh komi thil hmanh an hmuh in an hmu kho lo. Hnabeidong taktak kan si ko. Van le vulei a rawk hlan nikhat khat ah khin Egypt mipi nih an temmi lunglawmhnak hi kan hei tem kho ve te hnga dikmaw. Thiangi pa Maryland Source:: Laiforum@yahoogroups.com

SPDC Nih Power Up Cang Lai

SPDC nih Power up cang lai

Kawlram hruaitu State Peace and Development Council nih cun aralaimi March 15 ni khin uktu thar sinah Power a hluai canglai tiah Naypyidaw leiin thawngthanh asi. Ralkap hruaitu tampi hna cu a tu lio hi Naypyidaw ah Meeting an tuah cuahmah lio asi i mah an meeting i an ceihbik dingmi kong cu arakkai tharmi USDP party nih dominant tuahmi uktu thar sinah Power hluainak ding kong asi lai tiah zumh asi tiah Naypyidaw lei tthiamtthiam in thawng theih asi.

Kawlram Cabinet thar

Kawlram Cabinet thar ding ah asikho dingmi ministers 30 hna cu mintar an si cang. Nain ngeihchiat awktlak ngai pakhat asimi cu an dihlak in pa lawngte an si pinah ramchungmi ralkap asilomi (civillian) pali (4) lawng an i tel tiah theih asi. Adang asi kho mi asiloah atangmi 26 hna cu ralkaphlun lawngte in an si. Aralai dingmi cacawn ninga ni khin parliament pawlnih mah Cabinet thar ding pawl cu an thim hna lai. Mah asi khomi mipi pali hna cu Tin Sann, of construction company ACE; Pyay Thet Tin, the rector of the Yangon Institute of Medicine; Mya Aye, the rector of the Mandalay Institute of Medicine; and Win Myint, the chairman of the Union of Myanmar Federation of Chambers of Commerce and Industry hna an si.

Myint Aung Innthongthlak asi

Defense Minister caah Pu Than Shwe nih athimmi L-Gen. Myint Aung nih mah cu defense minister rian cu a duhlo i a el ruangah Innthong ah thlak asi tiah theih asi. Commander-in-Chief rian attuan kho dingmi Lt-Gen Min Aung Hlaing kut tangah Defense Minister rian va ttuan cu ka duh lo tiah Lt.Gen. Myint Aung nih achim. Myint Aung hi Defense Services Academy (DSA) Intake 18 in sianginn kai ai limmi (buih angahmi) asi nain Min Aung Hlaing tu cu DSA Intake 19 sianginn in ai limmi asi. Mah kha asi tik ah Mying Aung kha Min Aung Hlaing nak in a senior deuhmi asi. Naypyidaw lei in thawng theih ning ah cun Myint Aung hi a rianttuan tti hawi pawl nih cun ttihzahupat awktlak in an hmuh lio ah Min Aung Hlaing cu miruamkai miporhlaw tiin an hmuh mi asi. Lt-Gen Ko Ko tu nih mah Defense Ministry rian cu a ttuan tthan lai. Defense Ministry rian an khinhmi a el hna thok in Myint Aung cu Lt.Gen rian zong in dinhter asi pin ah innlo motor tibantuk pawl zong chuh dih asi . Atu cu innthong ah thlak in a chung le he tthen asi.

Pu Than Shwe & State Supreme Council

Pu Than Shwe nih keimah nih kawlram ah power a ngeicem dingmi State Supreme Council cu ka hruai lai tiah a phuan. State Supreme Council hi kawlram ah nawlngeibikmi pum asi te ding khi a si. State Supreme Council nih cun a rak kaithar dingmi uktu pawl hna kha advise peknak lei kam ah rian ai lak dingmi asi lai caah tampi a hip khawh hna lai. Mah cu State Supreme Council i chungtel ding hna cu Snr-Gen Than Shwe, Vice Snr-Gen Maung Aye, Pyithu Hluttaw [Lower House] Speaker Thura Shwe Mann, President-elect Thein Sein, Vice President-elect Thiha Thura Tin Aung Myint Oo, former Lt. Gen Tin Aye le adang ralbawi pahnih hna an si lai.

Shan Leader Hkun Htun Oo thong chuahnak an hal

Nizaan ah Japan UN zung hmaiah Kawlram Democracy ngahnak dingah a cawlcangmi hna Kawlmi hna le Shanmi hna nih cun Shan Leader asimi Hkun Htun Oo cu thong a tlaknak in chuah ding ah aunak an tuah. Kawlram hi mipi nih hruaimi Democracy leiah a panhko timi Vawleipi hmaiah an langhter hlan ah kan hruaitu asimi Pu Hkun Htun Oo cu an chuah hma sa i a mah pumpak nih freedom a ngeihmi cu an theih piak ahau tiah protest (duhlonak langhter) a tuah tu pawl nih cun an au. Pu Hkun Htun Oo cu Shan National League for Democracy hotu a si i February 7, 2005 opposition le ethnic groups pawl he meeting an rak tuah ruangah kawlram rawiphiar tu tiah kum 93 thongtla dingin nawl rak pek mi asi i a tu hi Kachin State chaklei Puta-Oo timi thonginn ah mah cu term cu a tuar cuahmah lio asi.

Nan Hawi,
Kolatt,
Syracuse University
New York

Source::YCCF-International

UN Chief Ban Ki-moon Nih Kawlram Uktu Thar A Hmuh Ning!

UN Chief Ban Ki-moon nih Prime Minister hlun Ex-Gen.Thein Sein Kawlram President ah an thimmi cu abiapitukmi karhlannak pakhat asi tiah achim. Parliment thar zongnih hin Kawlram thlennak ahramthawk asinak a hmuhsak ding hi ruahchannak ka ngei tiah ati. Arak kaitharmi a cozah le a rianttuantu dihlak he zong Kawlram democracy leiah a panh khawh chinnak hna, a tthancho khawhchinnak hna, le daihnak leiah a panh khawh chin nak hna kan mah UN lei in cun rianttuan tti ding in ready kan si ko tiah a chim chih (DVB).

Democratic Voice of Burma News chungin lakmi asi.

Nan Hawi,
Kolatt,
Syracuse University
New York

Source:: YCCF-International@yahoogroups.com