Kawl Ralkap Nih Karen Pawl An Khah Tthan Hna

Nizan thla (23) ni ah Karen ram Phapun District,Lutaw myone(Township) chung i,a um mi Tadade khua ah ni zan 2:30 ah kawl ralkap an phan i,an khua piin mei in an khangh dih hna ti an khua pawng um mi pakhat pa nih a chimh.

Khua an rak lut hlan deuh ah Meithal pi in khua cu an rak kah i khua mi vialte cu thih tih ruang ah ramlak ah an zam dih ralkap pawl cu khua chung ah an lut i inn khat hmanh tang lo in mei in an duah dih tiah a chimh.

Ralpak pawl an rak phan nak ruang cu nizan tinhni ah khan kawl ralkap le KNU Tatmaha(5) an ni kak hnu tlawmpal ah ralkap pawl cu an rak ral i,Tadade khua cu mei in an duah dih ti in Tatmaha(5)Buhmu Saw Kaledu nih a chimh.

Tadade khua hi inn dong(50) an si minung (500)hrawng an si thih ruang ah cun ram lak ah an zam a tli mi hna mi cu khua zong an panh ngam ti lo ti a si.An mah Karen miphun caah rian a tuanmi Backpack an timi hna ngan damnak lei in rian tuanmi hna nih Tadade khuami ram lak ah a zammi hna ei awk din awk ngei lo i a um mi hna va bawmh ding le si ai va pek ding ah an ni timh tuah lio a si ti in KNU Karen hriamnam tlai Buhmu Saw Kaledu nih a chimh chih.Tadale khua mei in a duahmi Sitcawng pawl hi zei sitcawng an si ti fiang tein an theih kho rih hna lo.

Ref::.KIC

SOCIAL SECURITY LE A BENEFIT UMTUNING:

1. Social Security cu zeidah si?

Ans: Social Security cu US cozah nih rianttuantu mipi caan sau nunhumnak caah a tuah mi program asi. US ram ah phungning in a ummi poh cu social security number an pek hna i chinchiahnak an tuah hna. Cu number tel loin rian ttuan khawh asi lo. Mi nih rian an ttuan i phaisa an hmuh tikah cu number hmang cun social security tax le medicare tax a zuh piak hna i hmailei anmah venhimnak caah an nawh (invest) piak hna. Rianttuantu hna nih phaisa an hmuh zat le tax an pek zat cio cu dikdiar tein chinchiah piak dih an si.

2. A benefit pawl cu zei te hna dah an si?

Ans: A benefit pawl hi tam ngai a um. Kumkhua a upa i rian a ttuan kho ti lomi poh kha social security tax an pekmi cung cio tuak in 'tar pension' an pek hna. An hmuh zat cu an tax pek mi tlawm-tam le an pension laak kum cungah hngat in aa lo cio lo. Cun, rian an ttuan ti lo i healh insurance an ngeih khawh ti lo tikah an ngandamnak zohkhenhnak caah 'medicare' an pek hna. Cu lawng asi rih lo, tar hlan zongah a benefit hi co khawhnak lam tampi a um. Rianttuantu nucem nih maw, pacem nih maw thihnak in chungkhar an tthen tik hna le nu le va nih nunttian (divorce) an ton tikah an credit a qualify mi an si ahcun taan takmi kop hawi (spouse) le kum 18 tang an fale nih social security benefit cu hmuh khawh asi. Cun, rianttuantu nih pumtlamtling lo in a um sual tikah social security benefit cu hmuh khawh asi fawn.

3. A benefit hi qualify le qualify lo ti a um maw?

Ans: Um. An zohnak tampi lak ah a biapibik cu social security credit point hi asi. Full benefit hmuh khawh nak ding caah cun credit point 40 hmuh a hau. Credit 40 a tlinh theng lomi zong nih social security benefit laak hau dirhmun in a um ahcun pek cu an pek tthiamthiam ko lai. Nain, a hmuh mi belte cu a tlawm ve lai.

4. Credit point umtuning cu zeitindah asi?

Ans: Rian ttuanmi kum 25 in a cunglei asi mi sin poh ah kumfatin Internal Revenue Service (IRS) zung nih 'social security statement' kuat cio asi. Mah ca chungah cun credit point hmuh zat le benefit qualify khawh zat cu an langhter lengmang. Credit point cu hmuh mi phaisa tlawmtam in tuak asi lo. Rianttuannak tuanbia tu in an zoh. Pehtlai tein rian a ttuan mi poh cu duhsah tete in credit point an karh piak lengmang hna. A rianttuannak kum 10 a tling cangmi poh nih cun credit point 40 hmuh lo khawh asi lo.

5. Social security pension tlawm-tam hi zei nih dah lai a rel bik?

Ans: Social security pension tlawm-tam cu tax pekmi tlawmtam le retired kum nih lai a rel bik. Social securiy tax tamdeuh a pe mi poh nih tamdeuh an hmuh khawh i tlawmdeuh a pe mi poh nih tlawmdeuh an hmuh ve. Cun, retired kum nih faak ngaiin bia a chim fawn. Early retirement le full retirement tiin a um i full retirement kum tiang rian ttuanmi nih cun mah le sining ah a sangbik in hmuh khawh asi. Full retirement kum 67 asi mi pa kha kum 62 ah a retired asi ahcun a hmuh ding mi hi 30% hrawng in a zor kho.

6. Early retirement le full retirement umtuning cu zeitindah asi?

Ans: Early retirement an timi cu kum 62 le full retirement karlak caan chung i pension laak khi asi. Full retirement cu mah le chuah kum cio hoih in a kal. A umtuning cu hitihin asi:

a) 1937 ri in a tanglei poh caah cun full retirement kum cu 65 asi.

b) 1938 - 1942 kum chung i a chuakmi caah cun retired kum cu kumkhat ah thla hnih lengmang in a karh. 1938 kum caah 65 le thla 2, 1939 caah 65 le thla 4, 1940 caah 65 le thla 6, 1941 caah 65 le thla 8, 1942 caah 65 le thla 10 tiin.

c) 1943 in 1954 karlak a chuakmi caah cun straight in 66 asi dih.

d) Cun, 1955 in 1959 karlak chuakmi pawl caah hin kumkhat ah thla 2 duahmah in an hun karh ter tthan. 1955 chuakmi caah 66 le thla 2 etc.... tiin a kal i 1959 caah cun 66 le thla 10 a hung si.

e) 1960 ri in a hnulei chuakmi poh caah cun 67 hi kan full retirement kum asi. # January thla chuakmi poh cu a liam cia kum tu kha rel piak an si.

Van T. Cung

Maryland

Note: Hi ca hi US a phanka u le nau cheukhat caah tthahnem santlai asi hnga maw timi ruahnak he a tlangpi in ttialmi asi. Rianttuan teimak te hna, tax tampi pek te hna a santlaihning kong langhter duhnak asi.

Ref:: ChinAmericanForum

Octopus Paul Aa Din Cang Lai

2010 World Cup lio i khuaruahhar tlak in World Cup a latu ding le a teitu ding hmanko in a chim khotu octopus Paul cu 2010 World Cup dih in aa din ve cang lai tiah Oberhausen i Sea Life aquarium in Tanja Munzig nih a chim. Hi thawngpang nih hin World Cup lio i Paul a chimmi lei in phaisa a thapmi tampi a miakmi pawl cu a lau ngai ko lai tiah a ti chih. “Paul cu aa din cang, nan za te cung ah aa lawm, a tu cu hlanlio a rak um tawnning tein a um than cang lai, a mah a zohkhenhtu he a um than cang lai i ngakchia a rak lengtu pawl kha an lung a lawmhter than cang hna lai” tiah a ti. Hi octopus Paul hi World Cup lio i German chuihmi puai vialte hman tein a chim khawh caah vawlei cung minthang ah aa chuah. Cu lawng si loin final ah Spain nih a tei lai a timi zong a hman than. (Ref-Telegraph)


Faiceu Vol2.No 78

Htet Htet Moe Oo Zung A Kal Cang

Thawnglatu Mah Aye Thu San cungah a kut zuan ruang le, thihphaih ruangah tazacuai mi Htet Htet Moe Oo cu July 13, 2010 ah biaceih zung a lut cang. A voithumnak zung a rat a si. Biaceihtu nih Htet Htet a tuanbiatawi a lak, an case pawl cu an rel piak i a hlan mi sihni nih special power in aamahkhannak a tuah. Midang thawnghlattu nih a timi cu Htet Htet a sihni pa nih aamahkhannak dingah kyats sing 10 an pek hna tiah chim. A ralai mi July 27, 2010 ah Mah Aye Thu San nih a duhnak pawl (biaceihnak) a chim te lai. (Ref: Irrawaddy)



Ref::Faiceu Vol.No 78