He I Tonnak
Evan. Thomas Tiak Uk le Pu Mang Cung Nung (Sailo Pa) itonnakSLP: Na tuanbia tawi?(Sailo Pa) itonnakSLP: Na tuanbia tawi?
TTU: Kei hi Vuangtu khua mi Pu H. Khen Thang le Zephai khua mi Pi Hlawn Zing hna i an fapa ka si. Thla 7 ka si lio ah kapa hi Police a lut i Kawlram ah nupi dang a kan ngeih taak. Ka nu he kan hmei. Tlawmpal ah kanu cu Zephai kapu le nih an rak laak. Kei tu cu Kapi (kapa nu) le kapa pa u le nih an ka cawm i sifah ruang le keimah pumpaak hrokhrol ruangah cataang sang kai kho lo in, taangriat tiang lawng ka rak kai. Sianginn kai ka ngol hnu in Phakanh ah ka va kal ve. Khi ka ah Phe, Bing, Zuu tbt sualnak phunphun in ka caan ka rak hmang ve. Bing le Number 4 in a thi ding ka si ca-ah khua lei ah an ka tlun ter. March 13, 1991 ah Tlangpi khua mi Pu Nawl Kio le Pi Hniar Tiak hna i an fanu he kan i um. Atu hi fanu 2 le fapa 2 he Free Evangelist in kum kua chung Pathian rian kan tuan cuahmah lio pi a si.
SLP: Cu bantuk sualnak khor chung in an chuahtu Bawipa min thangthat si ko seh. Pathian rian, evangelist na ttuan cu kan lomhpi tuk ve. Na piantharning tawifiang in na kan chim kho hnga maw?
TTU: Delhli ah refugee sawk ve ding in ka kal i Aizawl ka va phan. Chapchar kut ti mi puai ka va zohnak ah ka phaisa bawm ka thlau diam. Lungrethei in ka um lio ah Aizawl LCF nih hla hruaitu ah an ka lak i ka rak i ot ve. Durtlang Pu Lalcungnunga sinah camping kai an ka sawm i ka lung chung in kai nautat ngai ko na-in lahkhah a ka petu an si ca-ah el ngam lo in ka zulh ve hna. "Vawlei bawi nih cun misual an kawl hna i thong an thlak hna. Jesuh nih cun misual a kan kawl i a kan hmuh tikah dantat lo in kan sual a kan ngaihthiam, kan thilrit a kan chawn lawng si lo in zungzal nunnak tiang a kan pek" timi Biatak kha ka van theih tikah kai lawm tuk. Cuticun ka piantharning cu a si.
SLP: Tluang Za Uk phu nan dirhning?
TTU: Hlan lio ah zu ding tii hawikawm pathum, Tluang Thang , Za Kian le Tial Uk hna cu, December 22, 2000 ni ah Evan Tluang Thang inn ah thla kan cam tti hna. Pathian Thiangthlarau nih a kan um pi i, chun ni tlak ngol siang lo in le cat kho lo in khua mui tiang thla kan cam. Pathian rian ttuan tti ding in kan nun ah Pathian aw kan theih cio i cu ni cun rianttuan kan thok. Hriphi camping kan tuah lio ah Hriphi Baptist Church Chairman Pu Hme Hrang nun ah Pathian nih Bia a chimh i, hi hna pa thum hi "Tluang Za Uk" tiah min na sak hna lai a ti i, Pathian ni zing ah thlacamnak a kan ngeihpiak hnu in "Tluang Za Uk" ti min kan put hi a si.
SLP: Laitlang ah camping, crusade nan tuahning?
TTU: Kan nih cu crusade nak in camping deuh in kan kal. Crusade hi Thlarau lei thazaang a der mi hna thazaang pek deuh asi. Camping tu cu Thlarau nun ngei lomi hna thlarau nun va ngeih ter khi a si. Phundang in kan chim ahcun Camping cu thlaici tuh a si i, Crusade cu a kho cia mi ti toih deuh khi asi,
Hi camping kan tuah tikah, kan ram Khrihfabu tampi hi kan si a fak tuk i camping kan tuah kho lo ti hi a tam ngai tawn. Cun Pathian chaw tete zong hi, cheukhat Khrihfabu cu, Thlarau nun ngeihter nak in vulei cawlcanghnak le vulei inn le lo, biakinn tbt. sersiamnak deuh hi usa kan pe deuh. Vulei kan um chung ah biakinn le inn le lo a herh lo kan tinak cu asi lo. A herh ciocio mi ah zeidah usa pek deuh ding ti ka chim duhnak a si. Cucaah, Pathian nih "Amah bochan le zumhnak in kal u law, keimah nih kan um pi hna lai i ka sunparnak ka langhter lai" a kan ti caah a mah Pathian zumhnak in kan kal.
SLP: Camping na tuahnak tangka hi zeitindah an hmuh tawn?
TTU: Camping kan tuah nak hmun kip ah Krifabu phaisa le ngeih le chiah kan hmang lo. Thlarau tlau tlaihnak ca-ah mah le sian tawk cio in an i tel hna. Camping kan tuah chung poh Pathian nih a kan cawm. A tam a chuah le a tam kan ei i a tlawm a chuah le tlawm kan ei ve. Pathian nih a chuah ter lo le ei lo hna in Camping kan tuah caan hna a um ve. Camping hi a tam deuh cu zarh khat kan tuah i, camping chung kan cawnpiak mi hna cu ,Sual kong in Khrih khamhnak tiang kan cawnpiak hna. Camping programe a dih in zumtu nun hi zarh khat hrawng cawnnak kan peh than tawn. Camping kan tuahnak ah hin Zu nih a tei tuk ruang ah thih ai tiim cang mi hna an um tawn I, cu hna cu kan sinah kan um ter hna, ei le din kan cawm hna. Baibal kan rel pi hna, thla kan campi hna. Bible sianginn a kai mi zong an um. Evagelist a tuan cang mizong an um cang Pathian thawng in.
SLP: Cu kong cu mah vial si rih sehlaw, Hlasak lei ah na luhning kong van kan chim rih tuah.
TTU: Hlasak lei ka luhning hi,ka ngakchiat lio ah Sunday School ah hlasak an ka thiah tawn i ka rak sak tawn. Sunday School programe in Church pi zong ah caan kan hmang hna i cu ah cun an ka thiah i, ka sak pah tawn. Cucu ka rak i thok nak cu asi ko. Pathian dawt nak ka rak theih hlan kha cu ka hlasak ah tha a ka petu cu mipi an rak si. Mipi thangthat le conglomh le uarnak kha ka hla sak ah tha a ka petu ngai a rak si. Atu cu Pathian Thlarau nih a ka cencilh hnu ahcun, Hla ka sak nak ah thazaang a ka pe tu bik cu chung lei Thiang Thlarau kha a si cang, Amen.
SLP: Hla phel le VCD hi zeizatdah na chuah cang?
TTU: Hlaphel hi keimah lawng ka chuahmi cu phel 4 a si. Hawi le he kan chuah ti mi le, pumpak, Khrihfabu nih an tuah mi le kanmah Tluang Za Uk Group in kan tuah mi he cun 17 hrawng a si cang.
SLP: Hla hi fung zeizatdah na phauh cang?
TTU: Kei hi Zuun hla hna, Mithi hla hna, Hla porpawk hna, Ram hla, Khua hla, Biakinn luhnak, Innthar luhnak, Hlaremh ti in ka phuah hna. Ka phuahmi dihlak hi fung 1500 hrawnghrang hi ka phuah cang. Hla hi kuanfang le cite bantuk an si.
SLP: Kuanfang le cite na tahchunhning te cu fiang deuh in?
TTU: Hla hi Kuanfang le cite ka tahchunh tawn. Kuanfang cu meithal chung ah rawnmi a si. Zen thazang in kuanfang nih Vomkhuai le Ngalhriang hmanh a thluk ruangmang ko. Cu bantuk te cun, mi pakhat chung i a um mi, hmurkaa in chim phuan khawh lo mi feeling kha hla in kan vun sak tikah cun, zei tluk lungtthawng mi hna thinlung zong a khehkhuai khawh ve ko. Cite zong nih a thaw lo mi rawl te hmanh a thawt ter khawh. Cu bantuk te cun Hla zong nih hin Bia hi a thawt ter ve. Pathian bia kan chimnak ah ngaih an huam lo mi zong hla in kan vun sak ahcun ngaih an duh i an co hlan khawh ko. Cu ca-ah hla hi thil ti khawhnak ngan tuk a ngei. Ram dawtnak, Pathian dawtnak, nungak tlangval dawtnak, chungkhar dawtnak nun a kan ngeih ter kho tu hriamnam pakhat a si ko.
SLP: Tahchunh na thiam ngai, Pianthar hnu love song sak hi zeitindah na ruah ve?
TTU: Kan hnu lei Cazual pakhat ka relmi ah, "Love song sak a duh lo mi cu Pathian dawtnak kong an chim ding a si lo, Pathian cu dawtnak a si", tiah a rak tial. Dawtnak hi Pathian sin in a ra mi dawtnak le minung le minung karlak dawtnak ti in kan tthen thiam a hau. Nu le va dawtnak, nungak tlangval dawtnak, hawi le kawm dawtnak hna hi zum lo tu zong nih an ngeih cio mi a si. Cucu Gal 5:22 i dawtnak he khin a dang pi an si. Cu bantuk dawtnak hla cu dawtu nih a dawtmi nungak kha a hei phuah ve ko. A dawtnak theihternak le a dawtnak a theih thiam lo ruang i a lungfahnak langhternak ti'n an phuah cio ko. Cu bantuk vawlei dawtnak hla cu Pathian fa vancung ram nun a ngei cangmi nih cun kan sak ding a si lo. Pathian nih a kan dawtnak hla, le hawi dang zong nih Bawipa dawtnak an theih khawhnak ding ca tu ah Pathian hla tu hi tampi in kan sak ding deuh a si.
SLP: Laitlang ah hin Khrifabu le Evangelist karlak ah rii a um in ka theih. Hmunkhat te ah rianttuan tti hna sehlaw an thatpi lai tiah na zum maw?
TTU: Sawl siangpahrang nih khan David kha a hman zia thiam sehlaw a bawmtu ttha tukmi a si ko hnga. Amah tha tthawn tertu chin asi hnga.
JoShua tu nih cun Jerikoh doh an timh lio ah Lampi ah a hmuh mi Vancungmi Vainam zuh cia in a dir mi pa kha, a lang in zoh ko lo in a va komh i, "Kan ral maw na si, kan hawi dah?" a va ti tikah Vanmi nih "Nan ral ka si lo Isreal mi nan Pathian nih a thlah mi ka si" a ti. Na phanat kha i phawih a ti i, Pathian nih a thlahmi Vanmi tang te ah a kun i na phanat I phawih a ti bantuk in inautat lo te-in ai phoih ca-ah Jeriko pi cu an tei ko. Pathian nih a thlahmi hna hi hman zia thiam ve hna u sih law anmah hmang in Pathian nih a kan fialmi kaltak a herhmi tete hi kaltak in iphoih ve hna uh sih law, Sehtan ral tam pi kan tei ko hnga.
SLP: Laitlang ah Khrihfabu le Evangelist rian an ttuan tti khawh lo nak a ruang bik zeidah a si hnga?
TTU: Faroh fanu nih bawhte Moses cawmtu ah amah nu a va auhter tik hna ah, Moses cu a hnuk in a cawm. Baibal kan rel tikah Moses kha a mah a nu nih ai lak thai lo i, a cawmtertu Faroh fanu sinah a pek than. Khrihfabu le Evangelist ttuan tti khawhlonak hna cu:
(1) Kan ram Evangelist tampi cu, Thlarau fa cawm ding ah an kan sawm na-in a donghnak ah a kan cawmtertu Khrihfabu sinah pek tthan lo in i kal pi i fir kan hman tawn ca-ah a si. Phundang in chim ahcun "An kan ttih ca-ah kan ttuan tti khawh lo nak pakhat a si".
(2) (Efe.6:12) ah "Kan dohmi hi minung an si lo Van le Vulei kar i a um mi Thur thlarau le amui mi chan tthawnnak an si" a ti. Evangelist cheukhat cu Pulpit cung in pumpak doh le Khrihfabu min thlur in doh le, Baibal Sianginn min thlur in doh kan hman ruang ah a si. Kanmah a kan do le a kan sawi peng mi cu len sawm kan duh hna lo bantuk khi a si.
(3) Nathan hmang in Pathian nih David kha a sik tikah, David nih Nathan hua lo in Pathian nih a fial ti a theih ca-ah Pathian sinah ngaihthiam tu a hal i Pathian nih a ngaihthiam. Khrihfabu cheukhat cu Evangelist hna hmang in Pathian nih a cawnpiak ve hna tikah an nun remh i tim lo in nun a chimtu Evangelist kha huat in an i lak caah hin kan tuan ti khawh lo nak cu a si.
SLP: Khrihfabu zong, Evangelist zong nek lo te-in, ai ruang te-in na chimmi cu uar a um ngai. Hi na bialehnak nih hin Khrihfabu le Evangelist ca zongah hmailei thil ttha a chuahpi lai tiah ka zumh. Biadang ah, Hlasak tikah na feel kho taktak tawn maw?
TTU: Salm 103;1-3 kan rel tikah "Maw ka nunnak Bawipa cu thangtthat tuah, ka sining dihlak a min thiang cu thangtthat tuah u", a ti bang ka nunnak ka sining dihlak in Bawipa ka thangtthat ca-ah ka feel kho taktak ko. Nungak dawtmi kong hmanh cu pei kan feel tawn cu, zungzal Bawipa dawtnak cu chunglei nun a ngeimi nih cun feel lo khawh a si lo. Lam.16:25 kan rel tik zongah, Paul le Silas cu thonginn chungah Pathian sin thla an cam hnu ah, minung theih awk long ah si lo in Pathian an thangtthat, Pathian an thangtthat mi tu kha thongtla nih an ngeih hna tikah ttemttawn nak cikcin vialte cat lak in Pathian tthawnnak a langhnak a si.
Minung thangtthat le conglomh duhnak ngei lo in amah Pathian tu thangtthat in hla ka sak ca-ah keimah zong ka feel i ka Pathian zong nih ka hla hmang in temtawn nak hri a chah ve tawn. Hla sak tikah mah nih sunparnak bawh loin, Bawipa tu nih sunparnak co seh ti lungput he kan sak ahcun a satu kha Bawipa nih a kan cawisan lila ko.
SLP: Pianthar hlan le pianthar hnu hlasak ai dannak a um maw?
TTU: (1). Ka pianthar hlan ahcun Hla ka sak lai ah raltthatnak ah Zuu tlawmpal ka ding ta.Ka pianthar hnu bel ah cun ka raltthatnak hi Pathian pekmi Thiang Thlarau tu a si cang, ritnak man zuu a si ti lo.
(2). Kapian thar hlan ah cun hla kasak tik ah aw that le mi uar ding ah kai zuam. Ka pianthar hnu ah cun ka sak mi hla Pathian nih a hman khawhnak hnga Thiang Thlarau sawm in thla ka cam.
(3). Ka pianthar hlan ah cun ka aw kha Tepphel ah an khumh i Tepphel a rawh tik ah a rawk ve ko. Ka pianthar hnu ah cun a rawk kho mi Tepphel ah si ti lo in a rawk kho ti lo mi Minung lungthin chung ah Pathian Thlarau nih a khumh cang.
(4). Ka pianthar hlan ah cun laksawng hmu ding in hla sak kai zuam, laksawng ka hmuh tik ah ka rak i lawm. Ka pianthar hnu ah cun vulei laksawng ruah chan in si ti lo in Pathian nih ka sakmi ka hla hmang in taksa, thinlung, thlarau in dam lo mi hna damnak a pek mi hna ka hmuh tikah, vulei sui le ngun nih a cawk khawh lo mi lawmhnak ka ngei cang, Amen.
SLP: Laimi caah Sia herh bia cah na duhmi
TTU: (1). Pathian hla hi cawisang u sih, hlawrh u sih, Vulei lovesong nak in duh deuh u sih.
(2). Pathian hla tampi an kan phuah piak khawhnak hnga thlacam in a phuah kho mi tete thazang pe hna u sih.
(3). Kan Laiholh hi uar u sih, zahpi hlah u sih. Kan unau Mizo cu zei bantuk mi he an i um i zei ram an phak zong ah an fa le an holh an thiam ter mi
hna khi i cawn awk a tlak ka ti.
(4). Chungkhar le Khrihfabu ah Laiholh hmang hna u sih.
(5). Kan miphun a dirhkamhtu le kan holh a dirhkamhtu kan ca hi thiam dih hna u sih,
(6). Kan Laica in ca i kua hna u sih, Lai Baibal rel i zuam peng hna u sih.
(7). Number 6:6 ah Nazir mi caah zulh ding phung Pathian nih a pek mi hna lak ah, Ruak ah kal lo ding a ti, Samson kha Pathian thim mi Nazir mi a si
na in Nazir mi nih ral rin ding Saruak kha ral ring lo in amah nih a thah cia mi Chiandeih ruak ah a kal i, khuaithlar a va ei ca-ah a poi loh ti mi
sual hmete nih, Sual ngan deuh ramdang nu Timnah nu in Gaza khua hlawhhlang nu in a donghnak a ral a si mi Philistin nu Dellilah tiang ai
duh i a thih phahnak a si. Thil hmete ah kan ruah mi a poi loh kan ti tawn mi Beer, Zuu, Phe, kuak, khaini, sahdah hna hi duh sah duhsah te in kan mi phun muichianak ram ah le thanchiatnak le sifahnak ram ah a kan hruai tu a si ca-ah tawng ti loin hlonh dih cang hna u sih, ti te hi bia cah ka duh ve.
SLP: Laimp4 kongah ruahnak cheuh na kan duhmi?
TTU: Laimp4 nan kan tuahpiakmi cu kai lawm taktak ti hlei in chim ding ka ngei ti lo. Laihla vialte khumh dih hna u law techin fapar chan tiang rothil a si lai. Bawipa nih a van thluachuah le lei thluachuah tampi in pe ko hna seh.
SLP: Caan pek in bia na kan ruah khawh caah kan I lawm.
TTU: Keimah kai lawm deuh.
