Kan I Bia Tak Maw?

Kan i Bia Tak Maw?

John 12:26 “….Keimah kha nan ka zulh hrimhrim lai…….”

Vawlei cung ralpi pahnihnak (1942-1945) hrawng i a laar ngaingai mi Adolf Hitler nih "ka thinlung hi rak ka khuai (operation tuah) uh law nan hmuh ding mi cu vawlei pumpi dih lak uk duhnak (ka kut tang ah chiah duh nak) lawng te nan hmuh lai" a ti. Hitler cu vawlei pi a hninhtertu a rak si ti cu ahopoh nih hngalh cio a si . Hitler a tthatnak a chiatnak nak in, ka chim duh deuh mi cu, a thinlung dihlak, aruahnak dih lak, a nunnak dih lak in aa pek ning, pumpeknak (commitment) a ngeih ning tu hi a si. A thinlung le a ruahnak dih lak in focus mi pakhat lawng a ngei, cucu, vawlei cung dih lak tei dih ding kha a si, a hruh in aa hruh pi chih.

Khrihfa kan si nak, Zisuh kan zulhnak ah hin hi ban tuk thin lung, nunnak, sinak le ruahnak dih lak in focus le zulh hi a kan duh piak mi a si ko lo maw? Pathian nih a kan duh piak mi, Deuteronomy 6:5 chung ah “Bawipa na Pathian cu na lungthin vialte le na ruahnak vialte le na tthawnnak vialte in na dawt lai” ti hi a si. Cun, Luke 14:26-27 ah zeizong vialte nak in Amah Pathian kha pakhatnak ah chiah peng ding , tiah a kan cawn piak.

II Singpahrang 7: 3-4 chung ah mithinghmui hna pa li nih cun Siria ralkap nih Samaria an kulh dih i mangtam a tlun lio ah, “hi ka kan tthut peng ah cun kan thi lai, khuachung kan kal zong ah rawl a um lo i kan thi thiamthiam lai. Siria ralkap um nak lei ah kal uh sih law, an kan zuah ah cun kan nung lai, an kan zuah lo le kan thi ko lai,” an ti. Asinain, thih ciocio ah rawl a um nak Siria ralkap sin lei ah cun an i thim, an kal.

Minung hi a thi ding lawngte kan si. Innchung ah tthut peng i khoi ka pumhnak le fellowship hmanh ah kal lo zong ah thih ding thiamthiam; rawl um lo nak Samaria -- zungzal nunnak um lo nak hmun, vawlei pumsa duhnak ah ei, din, tlawnlen zong ah thih ding thiamthiam a si ko tung ahcun, thih ding ciocio ah thih hnu zungzal nunnak a ngei tu Fapa Zisuh Khrih sin lei ah panh hrimhrim hi attha deuh lo maw? Thih hnu in panh chawm a ngah ti lo, nihin hi panh caan si. Rawl um nak Siria ralkap sin kal pah in Samaria lei kir pah than cu a ngah lai lo; nifatin kan nunnak ah zungzal nunnak Khrih lei panh pah in vawlei pumsa duhnak, nuamhnak kir hnawh than pah lengmang cu a ngah lai lo. Khrihfa (khrih zultu) kan si ah cun si lawlaw uh sih law, i bia tak lawlaw in zulh lawlaw cang ko uh sih!

Hitler nih khan vawlei pumpi rak tei nih, rak uk dih hmanh seh law, ka bible nih a chim mi cu Mathai 16:26 ah "mi pakhat nih vawlei cung hi co dih hmanh seh law, a thlarau nunnak a sungh tung ah cun zei dah san a tlai" a ti. Cucaah, Hitler nih zeisan a tlai lo mi cungah a nunnak dih lak aa pe i, aa biatak lawlaw. Nan nih, kan nih biatak a hmu mi, i fuh sual zong a um ti lo mi; Lam le Biatak le Nunnak a si mi Zisuh Khrih kan zulh nak ah hin kan i biatak chinchin ding si ko lo maw? Amin men Khrihfa sawhsawh si ti hlah uh sih!

Pahniang
Manila, Philippines
//////////////////////////