Pathian Thawng Longlong In A Si Ko

Rom. 11:36 zeizong vialte hi amah nih a sermi an si i…. amah thawngin…. amah caah an si dih. Pathian cungah sunparnak cu zungzal in um ko seh! Amen.

Hmasabikah Pathian min cu thangthat in um ko seh! Nihin hi Sundayzing Sermon Tawite tiah ka rak thlahnak kumkhat tlinnak ni asi. Pathian min ka thangthat tuk! Sermon a rel tontu nan dih lak cungah Pathian nih thluachuah in pe chinchin hram ko hnaseh. Kumkhat chung pehtonh tein thlah khawhnak caantha a ka pe tu Pathian min thangthat loin ka um kho lo. Paul nih a chim bang in, zeizong vialte hi amah thawngin, a mahcaah le amah sunparnak caah ah an si dih a ti bangin Pathian nih sunparnak co chinchin ko seh!

Sundayzing Sermon Tawite tiin kumkhat chung ka thlah lai tiah ka hawipa ka sawm i thlacamnak ka tinpiah lio ah, ka hawipa nih cun, sianginn na kai lio ah na ca he, asi kho lo, na duh cun thlakhat voikhat hrawng thlah te ko a ka ti i hna a ka tlak pi lo. Nihin ahcun Pathian thawngin kumkhat a tling cang. A karlak tete ah khual zong ka tlawngpah ton nain asikhawh chungin pehtonh tein thlah khawh ka rak i zuam peng. Ka room in internet a ngah lo can hna zongah ka hawi le room in asi khawh chungin thlah khawh dingin kaa zuam peng. Ka rian pakhat ah ka rak ruah i, ka ministry pakhat ah ka rak ruah. Cucaah, thla rak ka cam piak peng ve uh ti kha nan dih lak sinah sawm le nawl kan duh hna. Voikhat cu ka hawi Chinese pa he Luzon (Philippines ram chung) lei ah khual kan tlawng i kan riahnak ah internet um ti lo, sundayzing le asi cang. Sermon thlah ka hauh cang nak kong kha ka hawipa cu ka chim i a rannak in a motor he internet umnak lei ah kan va tli colh. Hi hna hi keimah nih ka tuah khawh mi si lo, Pathian nih khua a khan dih mi tu kha asi. Minung nih kan tuah khawh, kan ti khawh kan ti mi hi a rak si hrimhrim lo. Jesuh nih Johan 15:5 chungah, keimah loin nan tuah khawh mi zeihmanh a um lo ati bantukin, zeizongvialte hi Amah thawng longlongin asi ko.

Cucaah, Pathian sinah duhnak taktak he kan i timh asi ahcun, Amah nih zeizong vialte tlam a tlin ter dih ko lai. Pathian nih a zoh mi cu thil dang si lo, kan thinlung Amah caah si maw, kan pek maw, ti mi longlong kha asi. Pathian he ahman mi thlarau lei i pehtlaihnak ngeih ding tluk in a herh mi vawlei cungah zeihmanh a um lo. Cu nun cu ahopaoh ngei hna seh ti a kan duh. Asinan, kan minung sinak, derthawmnak nih a kan tei lengmang i keimah ka ti khawh, ka tuah khawh, ka kawl khawh, ka thiam, ka sang kan i ti sual lengmang. Cu tikah, kan tla than lengmang.

Cucaah, Paul nih a kan cawnpiak mi, zeizong vial te hi Pathian thawng longlong in asi ko ti mi hi kan nun ah i tlaih peng uh sih law, Amah tu kha sunparnak pe lengmang ko uh sih tiah sermon tawite kumkhat tlin nak lawmhnak bia chim bu he thazang lak pah ding in kan sawm hna.

Sermon rel ton tu, thla a ka cam piak tu nan dih lak sinah lawmhnak tampi ka ngei, Pathian nih thluachuah in pe chinchin ko hna seh!

Pahniang

Manila, Philippines

/////////////////////////////