Happy Merry Christmas

Dawt Mi U Nau Hna
==================================
<<>><><<>><><<>><><<>><><<>><><<>>
:<>:<>:<>:<>:<>:<>:<>:<>:<>:<>:<>:<>:<>:
><><<>><><<>><><<>><><<>><><<>><><
:<>:<>:<>:<>:<>:<>:<>:<>:<>:<>:<>:<>:<>:
<<>><><<>><><<>><><<>><><<>><><<>>
==================================

X'mas Lawmh Nak


Daih Nak Le Hnangam Nak




Nan Cung Ah Um Ko Seh!


==================================
<<>><><<>><><<>><><<>><><<>><><<>>
:<>:<>:<>:<>:<>:<>:<>:<>:<>:<>:<>:<>:<>:
><><<>><><<>><><<>><><<>><><<>><><
:<>:<>:<>:<>:<>:<>:<>:<>:<>:<>:<>:<>:<>:
<<>><><<>><><<>><><<>><><<>><><<>>
==================================
Dominic Savio Paalone

Christmas Hi Zeiti Set In Dah Kan Don?

Rev. E. Za Bik

Bible Caangthim: Isaiah 9:6 "Kan caah ngakchia pakhat achuak! Fapa pakhat peek kan si! Amah cu a kan uktu Bawi asi lai. Amah cu khuaruahhar Fimchimtu, a tthawngmi Pathian, zungzal hmunmi Pa, daihnak Bawi... ti asi lai".

Biahmaitthi:- Nitlaknak lei ram (Amerika, Europe, Canada) hna ah cun Christmas can hi cu hmunkip rian a ttuan, a ummi unau-ttafar rual hna nih an nu le pa sinah an rat i chungkhar tling i tonnak (family reunion) deuh in hman asi. Asinain kannih Laimi (abik in Laitlang ummi) caah cun ahleice in a sunlawi ning ai dang--- (i) Lothlawh retheihnak in rawlttuan kan von i liim can asi caah asunglawi khun; (ii) kum khat chung Pathian huhphenhnak thuk deuh in a kan ruah ter fawn; (iii) asinain thihnak nih Christmas can ah chungkhar a tlinter tilonak inn chungkhar ah cun lungleen le mitthli-tlaak in nungak-tlangval hna zanvah lio can ah ttahnak aw tampi aleeng tawn; (v) kum 55 in acunglei nutar-patar hna caah cun Krismas nih cun mual aliam cangmi nu le pa, unau-ttafar, hawikom dawt le no lio can kha mit-thlam ah a von cuan ter tawn caah lungleen le lawmhnak cu zatceu veve in tuar asi tawn. Asinain nihin ram dang ah a ummi Laimi nih Christmas hi zeiti set in dah kan don timi belte cu ka chim thiam ve lo, ka theih thlu lo ruangah.

Zei thil paoh hi nizan, nihin, le thaizing mit in zoh aherh. Nizan mit in kan zoh ahcun aluan ciami kum 2000 lioah hi vawlei ah Zisu Kri in a rak i phuang i kum fate vawleipi nih achuah-camtuak ah a lawmhmi Zisu thawng in "mui lak i arak i chawkmi kanmah Laimi zong nih ceunak nganpi cu kan hmuh ve cang. Thihnak thladem tang ah kan rak um; asinain atu cu ceunak nganpi nih a kan ceuh ve cang" (Isaiah 9:2). Cun nihin le thaizing mit in kha ceunak nganpi a coting ve mi Laimi kan i zoh tthan tikah, thaizing ah Laimi kan dirhmun kong a ruat mi tampi nan um lai ti ka zumh. Aruang cu...(i) kan ram uknak le sipuazi; (ii) kan Lairam kan pamh-hmaih tuk (lo-vah le loduah, inn-zuat sa-ttil caah ram khangh, khaan-bawhnak caah mei duah) ruangah kan vawlei non ttha vialte Chin Dwin tiva ah an luang dih. Cu ruangah lothlawh in pawcawmnak a zat tilo caah kan minung tiang in Kawl rawn ah chuklei in kan luan thluahmah lawng hmanh silo in nihin ah cun Malaysia in vawleicung ramkip kan phan cang. Cucaah nikum June thla an chuahmi MUKO magazine zong ah hitin maw kan Lairam cu kan kaltak thluahmah ko lai timi tlaangtar in (a) ram dang kal thluahmah attha ko ti in a ttial na, (b) a za cang, Lairam kaltak ding asi ti lo tiah a ttialna an si kha. (iii) kan Kawlram thimnak a um ko bu ah Nitlaknak lei ram kalnak ding hngak in atu ah Malaysia ah Laimi 40,000 nih an hngak ko ti asi hoi. Cucaah atulio Laimi kan dirhmun hi Lamtte-ka (cross-roads) dirhmun ah kan um kan ti zong ah kan palh lai lo. Hi hnu kum 15-20 ah asiloah thaizing ah cun Laimi kan sining le kan tuanbia hmanh hi zeidah alawh te lai ti hmanh chim awk ahar ngai le afianglo mi dirhmun ah nihin ah cun kan dir. Hihi kan thinlung ah chia bu in hi capar tlaangtar "Tukum Christmas cu zeiti sullam set in dah kan don" timi ah von kal rih usih.

Tutan Christmas ah kan don, kan thangtthatmi Bawipa cu Isaiah nih acunglei Bible caang ah min 4 a chimmi chungah hin adihlak in sermon peek ahcun asau tuk lai caah "khuaruahhar fimchimtu" timi biafang hi thuk deuh in kan ruah awk ah ka von thim. Phun dang deuh in chim ahcun... khuaruahhar fimchimtu Bawipa nih kanmah Laimi, cun abik in ral-zaam asiloah ram-zaam Laimi kan sinah zeitindah fim a kan chimh i kan thaizing caah ruahchannak a kan peek timi ruah tti awk ah tawite in von chim ka duh. Existentialist Philosophy nih ai tlaihmi a biacherhchan (main thrusts) pathum lakah pakhat cu: "ka sinak ah fakpi in bia a chimlo mi paoh cu zeibantuk thil hmanh ka caah biatak asi lo" (nothing is real unless it speak to my contextual situation) ti hi asi. Tutan ah achuah kan lawmh/thangtthatmi Fimchimtu nih pakhat cio kan sinah kutdong sawh in kan sining le tlamtlinloning a kan chimh mi a um maw?; a um ah cun zei bia dah akan chimh?; asiloah Christmas can asi ti in aphunglam sawhsawh in pumhnak ah va kal, linsa ngai le nuam ngai in Christmas ni liamter in dah tukum Christmas kan don ti hi faakdeuh in ruat tuah hna usih tiah kan sawm hna.

(i) Bible ah kir cang hna usih (Back to the Bible) :- Hihi kum zabu hleithumnak lioah Martin Luther le John Calvin (Reformation Fathers) hna nih an rak aupi i kum zabu pakulnak lioah Karl Barth nih faakpi in a aupi tthanmi asi. Abik in Matthew, Mark, Luke le John (the Four Gospels) chung i kan hmuhmi khuaruahhar Fimchimtu nih a chim, a phuanmi Pathian Bia an si. Hi Thawngttha Bia hi kan nunning a kan hmuhter khotu thla-lang le kan nunnak tahnak pedan ah hmang in fimchimtu le lamhruaitu taktak ah i laak kho usih law tutan kan Christmas hi sullam a nei ngaingai hnga. Bible hi kan nunnak thla-lang le pedan ah kan tuah ahcun zei thil kan ton zong ah "Zisu nih zeitindah a ruah hnga?" ti a kan ruah ter lai i kan thinlung le ka tuahsernak kip ah fim a kan chimh lai. Solomon zong nih: "Bawipa ttih-zahnak cu fim hramthoknak asi" a ti kha. Kan nunnak hi Pathian lamhruainak le thluachuahnak in a lam tluang seh ti kan duh ahcun Bible ah kan kir hrimhrim ahau. Hihi kanmah Hakha-Thantlang mi sinak in kan chim ah cun a hmasabik kan pale hna... Rev. Sang Ling, Rev. Sang Fen, Rev. Van Lo, Rev. Nawl Tling le hihna a von zultu Rev. Heng Cin le Rev. Hei Mang hna nih an kan vuih ta mi ro sunglawi asi.

(ii) Christmas le Kumthar hi cu Pathian thluachuahnak kan rel can asi:- Nunnak le damnak hi kanmah nih kan i peek khawhmi an si lo; Pa Pathian nih ni khat hnu ni khat a hlanh in a kan hlanhmi tu an si. Zumtu krifa kan caah cun hnulei von i her i aluan cia kum khat von zoh tthan ahcun vawleicung ah kum khat chung koko ah rel cawklo minung an thi, rel cawklo sizung ah lungrethei ngai in an um kan hmuh hna. Culioah kannih damte in kan um tikah kan Pa Pathian thangtthat lo awk attha lo. Cucaah Christmas le Kum Thar ni hna ahcun Pathian thluachuahnak kan rel i khup-bil in Amah sinah lawmhnak bia kan chim lawng hmanh siloin Zisu fimchimhning in nun kan i thok khawhnak hnga kaar-hlan kan thok ni si kho seh law Christmas le Kum Thar kan donning zong sullam a ngei kho ngai hnga.

(iii) Phaisa le thilri hi kan pathian ah ser hlah usih :- Kan pawpi he hi vawlei i kan hung chuah i kan nun chung paoh cu duh zong duhlo zong ah rianttuan le phaisa kawl cu aherh. Asinain mi tampi cu phaisa le thilri in Pathian thluachuahnak kan hmuh tikah Pathian sin in kan tlau tawn; kan thinlung chung i Pathian tthutdan ah phaisa kan chiah i phaisa kha kan pathian ah acang tawn. Cutikah phaisa kha minung hawi tah-nak pedan ah kan hman i mi zeirellonak, ruamkainak le mi thi-dawpnak ah kan hman tawn hna. William Barclay ttialmi cauk Ethics in a Permissive Society ah "Pathian theilo misual kut chung i phaisa tompi cu kap-hnih har naam asi tawn" (money in the hands of fallenmen is a double-edged razor) philh hlah usih. Kap-hnih har naam cu kap khat lei i ralrin ko hmanh ah kap-khat lei in mi a ah ruangah thi tampi achuah tikah zawtnak, damlonak a chuahpi. Cun Mirang phungthluk pakhat nih "phaisa cu sal ttha ngai asi, nain bawi puarthau asi" (money is a good servant but a cruel master) ati. Phaisa hi kan pathian asi citcet ahcun phaisa kawl i rian a kan fialning kha celh-chuaklo asi lai i mihlen, fir, le mithah zong adonghnak ah cun sual ah a kan ruah ter phah ti lailo. Khuaruahhar Fimchimtu (BZS) nih "Minung hi rawl lawng in anung lo, Pathian Bia zong in anung mi asi" (man does not live by bread alone but also by the Word of God...Matt.4:4). Hihi adik tukmi bia asi. Minung hi taksa rawl le thinlung rawl ai tluk te in asiloah sawmnga-sawmnga in kan herh.Thaithawh-zanriah rawl cu taksa rawl asi i Pathian Bia cu thinlung rawl asi. Thinlung nih pumsa a hruai. Pathian Bia nih a hruaimi thinlung nih taksa a hruai ahcun a famkimmi nunnak thei atlai ter.

(iv) Fimchimtu le Daihnak Bawi nih zeidah aa tinh? :- Tukum zong Christmas can ah athar in kan don, kan conglawmh dingmi Pathian Fapa nih hi vawlei ah a rat hnawhmi aruangbik cu hi vawlei mi kha "taksa, thinlung, thlarau" in damnak peek lawng siloin Amah lam a zulmi paoh thih-hnu thawhtthannak zong peek ding ah ara. Cucu a tinh bikmi asi. Zisu nih hi vawlei a nun lioah a hmanmi hriamnam hna cu... "dawtnak, dinnak, ngeihthiamnak, le mi har zawnruahnak" an si. Cucu hmang in Amah zultu hna nih hi vawlei kan nun lio hrimhrim ah hin Vancung Pennak (the kingdom of God) karh ter i kan vawleipi kha "dawtnak, dinnak, ngeihthiamnak le mi har/sifak zawnruahnak nih a ukmi vawlei ah can ter kha asi.

Tukum Christmas can ah Bawipa Zisu chuah-camtuak lawmhnak puai kan tuah tikah hi acunglei ka langhtermi akong 4 hi ruahchih in Bawipa cu sullam ngei te in dong hna usih tiah kan sawm hna. Lei ramkip ah a ummi Laimi kan dihlak cungah Christmas lawmhnak le Kum Thar thluachuahnak Pa Pathian sin in tlung hram ko seh ti in... hi Sermon cakuat chung hin nan kut kan tlaih hna.

Christmas Song



Note:: 2010 X'mas ah Biaknak-Hmurka Blogspot ah an tarmi chung in lakmi a si.

Kanpetlet Ah Vailam Tung An Serhsat

Miphun hawidawt vialte hna hi vailamtah tung kong hi midang zong nih an rak thlah cang ko lai na in,a hmun i a va kalmi hnanih hmanthlak le a sining tete fiangte i an va checkhlat tikah lungfahnak tampi a um cu tikah a thar in kan rak thlahthan, hi vailamtah tung a phuntu hi, Delhi khua Lai Christian Church nih an thlahmi Missionnary Rev. Chan Hmung le a hawile nih an phunmi a si. Hi a tanglei hmanthlak an phunnak hmun hi Kyin Dwe khua Mungchawng tiva ral Dai Chin miphun ram lei i an phun mi a si. Hi Vailamtah tung hi an phur hnu ah zinaan an toih i mei in an duah/khangh. Mah a hrawktu le a khangtu hna hi, CHIN PUNG miphun an si.

A tanglei vailamtah tung hi Chinpung miphun Kyin Dwe khua lei i an phunmi a si. An hrawhning cang khuami hna nih ankan chimh tikah khuaruah a tam duhngai ko tiah a hmun i a va kalmi Pu Bawi Thiang le Pu Tial Peng nih an chim. A tanglei hmanthlak ah hin a fiang ngai ko. Khrihfa biaknak le Pathian serhsatnak langhternak ah Vailamtah tungah NU Chiatha zong zohchia ngai in an suai chih.

Khrihfa biaknak le Pathian an nehsawhnak, serhsatnak an langhtermi ruangah hin, Dai Miphun khrihfa mi hna cu an thin a hung ngaingai. An karlak ah thisen luanh tianghmanh duhnak lungthin an ngei ve. Dai miphun Khrihfa minung 800 hrawng tonnak an ngei hna. Mah bantuk lio caan i daite in kan um ko ahcun an kan nehsawhnak le an kan serhsatnak hi a thang chinchin lai i Khrihfa kan Ci an kan hmih ko lai caah, kanthih le Pathian ca'h tiin minung 80 an i thim i Kyin Dwe khua Police Station (Sakhan) ah an va luhhnawh hna. Mah bantuk i kan biaknak le kan Pathian a kan serhsat piaktu (Tazakhan) hi kan kut i na kan pek lo ahcun, Kyin Dwe khua hi kan khangh dih lai tiah, an va ti hna. Cu tikah Police Sakhan Hmupa cu an hmaiah khukbilh in a tap i nan duh ahcun ka hnu, ka hmai nan duhnak paoh ah nan ka kah khawh tiah a ti hna.

Hi bantuk buainak thawngpang hi, Kanpetlet Township Baptist Assiaciation (KTBA) nih an theih tikah Khrihfa le Budhist karlak lawng siloin Miphun ning in buainak a chuak sual lai tiah, tlang an va tlak hna i, hi bantuk i kan biaknak he pehtlai in Phu kan hlam ahcun kan biaknak kalh a si caah Ca tu kan tial lai i acozah nih tlang kan tlak ko seh tiah an ti hna. Dai miphun zongnih cun a tha ko tiah an thinlinhnak cu an thumh than i, Thisen chuahlote tu in minung 800 nih min an thut leng ah Chin Vuanci minung 12 lak ah minung 8 nih minthut chih in Report ca Tamada Theinsein sinah an kuat.

Hi bantuk i buainak le harsatnak an tonmi hi Pathian zalongte in an biak khawh nak ah a can khawh nakhnga thlacamnak in bawm cio hna usih.

Lungthiangte in,

Kap Mawng

New Delhi - India


Source:: YCCF-International

BETHLEHEM

6/. Bethlehem Tukhal

Bethlehem tukhal sinah “vanmi nih Bia a chim dih in Vancung ralkap bu nganpi cu vanmi sinah an rung lang I Pathian kha hla in an thangthat. Asangbik van ah khin Pathian cu Sunparnak hmu ko she. Cun a dawtmi hna umnak vulei ah hin remnak um ko she”.(Luke. 2:11-14). Tukhal pawl minpu in kan bia ah kan luh hlan ah Ziah Pathian nih vulei a dawt i remnak a lenter?. Aho dah a dawt?. Aho le a ho kar lakah? Tlawm te vun pial ta usih.

Eden ah khan Pathian cu THA LAWNG asi. Amah ah “Atha le thalo” nuncawh/50/50 aum ve lo. “ATHA lawng” Nun; Bawipa nih Adam leitlak kha nunnak thaw apek hnu ah Eden i a sermi dum ah a chiah. Amah cu TIVA(Thlarau) in a sinah a va luang. NUNNAK THING (KRIH), nunnak rawl(Vitamin tling) a ei I a nung.

Cu kaah cun Adam + Evi le Bawipa kar ah dangtu a um lo. Atha le thalo hngalhnak thingkung kha an hmuh ko nain ei zoh in an zoh lo. An thinlung a thlu kho lo. Thihnak thingkung asi nain va ei lo ahcun thihnak asi lo. Amah belte Evi le Adam nih thei an ei hlan ah sualnak/sualter/ tluk tertu/hlengtu a um cang.

Amah duhthimnak in Setan nih van ah Pathian a doh I ngeihthiam tilo ding in Pathian nih a thawl. Cu hnu ah bia in Evi thinlung a thluk. Thinlung atluk hnu ahcun pumsa zong a dir kho ve tilo. Cuti cun thlarau zong an tlukpi I setan nunzia(titsa thinlung) nih cawlcang kho lo in a temton. Evi le Adam ah Pathian thlaru pehtleihnak chok/acat I amah Setan nun a peh. Hybrid a tuah. Pathian nih a chimh bantuk tein Evi le Adam cu Pathian Thlarau he pehtleihnak ah an thi. Sehtan muisam(nuncawh) ah an nung. Pathian thinlung ahcun mithi an si.

Cu rualrual in Setan cu minung thinlung ah a thu I a uk. Cucu Titsa thinlung hi asi. Setan cu “THALO” Amah ah um hmanh selaw, THA(THATNAK) a ngei ve. Minung zong thluachuah a pek luaimai ve ko hna. Asi nain cu thatnak cu Pathian nih a pom tilo hnu ahcun “Misual, Mithi, Lainawng, Rul, Mithi, Pathian Ral, Zeihmanh lo, Damlo, Thianglo asi. Cucu kan sining a hung si ve. Hi nun hi Pathian zong nih tompi zong a duh lo. A ngaithiam fawn lo. Thah ding ati I Eden in a thawl bak ko. Cu nun cu pumsa in kan tlinh dih. Ngakchia pa, uico nih a she I a poison nih a thisen zungzam a hlenh dih i uico thinlung in a nungmi: Nu le pa awka, dawtnak a thei kho tilomi bantuk kan si. Setan nak in a thawng deuhmi power nih a kan chuah lo ahcun mah tein chuah khawhnak thazaang kan ngei tilo. Cawhnuk le Cooffee ti chung ah a cawh dih bantuk in Setan thinlung le kan nun cu a ciahpiah dih cang. Hlennak ruang ah minung cu Setan/ nuncawh ziaza he nung ko hmanh selaw kan chungah a chiahmi Amah nunnak(ci;thaw, thlarau) ruang ah dawt a bang kho lo. Kan tlakchiatnak ah Bawipa a zaw. Alung a fak.

Cu ruangah Kanmah duhning le ruahning in si loin AMAH DUHNING tein tlanhnak lam a ser I a kan Rem. Kan phut kan tawk ruangah si loin Dawtnak nih nih a kaltak khawh lomi Amah ruangah Amah duhning te in a kan remnak asi. Cucu Vanmi nih an vun remhmi kha asi. Cu Remnak cu minung le minung iremnak si loin Pathian le minung remnak asi. Pathian iremnak nih minung hawi he remnak a um.

Alung kan va ton ruang, kan thattuk ruang, kan fel ruang, dinfel ruang, fim ruang, rum ruang, thianhlim ruang, Amah kan zumh khawh ruangah Pathian cu kanmah he irem ding in arat asi lo. Mithi, mitlau, damlo, thianglo, miruak, (hell hnompung ah khangh ding; lak tlaklo le hlawm tlak lo tiang in kan chiat ruang tu ah, Micak, mitling, Mithiang, Krih nunnak thlarau tu kha kan tlinnak si ding in ara i kan chungah a nung. A dawtmi fapa neihchun nih a um hnawhmi minung cu Pathian nih mitling, mithiang ah a chiah. Cucu Pathian le minung kan iremning asi. Kan nih cu Tuu bantuk, tangka tlau bantuk kan si. Zeitin kan tlau; khoika in kan tlau; Khoika kan um zong kan hngal lo.

Pathian cu aral asimi vulei minung he Krih ah arem ruangah a thinlung a dam I aa lawm. Bawipa lomhnak ah van khuapi aa lawm. Cu ruangah vanralkap bu nih cu teinak lomhnak hla cu Pathian nih Thlarau in a dinhmi a Krihfa bu/Zumtu a zoh khenhtu, Amah ai-awh ah a chiahmi Tukhal(hruaitu) hna sinah an phuan hmasa nak asi. Khaltu a ngeilomi tuu nih zeitin dah tirawl duhdim a hmuh khawh lai. Cu tukhal nih cun ramhring, ti rawl tha a umnak a hngalh loah zeitin dah tuu khalh khawh hna lai. Bethlehem Tukhal sinah vanmi an lang hmasa. Tukhal sinah chan le ruang nei tein an lang. Sualnak chung in thlarau le pumsa khamhnak rian asi.

Bethlehem, Tukhal David cu, ramtang (vulei aw thawng a deihnak) ah a hruutmi Tuu(minung >tuu kong kan chim tikah na lung a tliang te lai) tlot-tlau lo te in a khalh khawhnak dingah Bawipa nih Amah thawnnak hmang in Cakei, chandeih, vom thahning a cawn piak. Chaikuk le tiva lungtekep hmangin a ral nganh bak loin thah ning a cawn piak I training a pek cikcek hnu ah Isarael mipi(khaltu) uktu ah alak. A uu le cheukhat cu khuapi chungah Sawl siangpahrang ralkap an si I, ral an tei can ah ngaknu dawhdawh hna le mipi nih lamkhuang, tingtang, hlasung, le parthi he an don hna I sunparnak pek an si lio ah anih cu, mihrut, rimchia, hlapi a hmu kho lomi tuu he, Palestine ramking, lukhengkak in ni a linhnak hmun ah, a zal chungah chunchaw fun, hranthawl(tidur), a neihchun hriamnam thabik chaikuk, tiva lung, saphaw keden, le a kut ah thiangthunh tiin a tuu hna he kommi pa asi. Khuapi chungah music thawng a thei bal ve lo. Ngaknu dawhdawh hna kutnem a tlai bal ve lo. Tikhing thereng onh thawng, vate hram thawng le thingkung rampar sin in a hmuhmi Bawipa dawhnak tu kha a hawitha bik, a tingtang l e zaihla sung an si. Chandeih, cakei, vom, cenghngia, le mifir lakah a tlawng. Sawl ralkap bantuk in hriamnam le darphaw a ngei ve lo.

Cu bantuk Bethlehem ngachiapa cu (Immanuel) Pathian nih a va komh I bang loin a sinah a um hnawh cu awh. Vulei ah hin Siangpahrang nih a va kal hnawh I bang loin a um hnawhmi michia na hmu bal ve hna maw?. Cu bantuk zeihmanh lo asimi minung chungah Bawipa a um tikah khuaruahhar a sinak a langh khun. A um lomi chung thil lianngan aumter tawn. A kan tlanhnak zong hi tihin asi. Minung sinak inpawm le co zong a har reng.

Jesu chuah lio i Bethlemhem tukhal hna i a khalhmi tu hna kha, Temple ah sual thawinak ding: midang nunnak ai-awh ah thah dingmi tuu a khaltu an si ti asi. Cu caah kha tukhal hna kha sual raithawinak caah a thaumi le dotla siding tukhaltu an si tinak asi. Cu Tuu hna I an chung thawnnak thahrul thau(thau hi kan thawnnak le siksa kan tuar khawhnak asi) kha maicam cungah an khangh. Thau a ziamral lio ah meisa in cu cunglei ah Awipa caah rimthaw bik si ding in an an kai. Na chung thawnnak thau (titsa thinlung thawnnak) cu Bawipa nih maicam ah Amah nunnak thlarau mei alh in ziamral viar in a khang bal ve cang maw?. Tukhal nun cu, nun tlawm, chuan ding ngei lo nun, an thilpuan le takpum cu tuu rimchia he aa zi. Thlen le daw he tuu rimchia he, an nilak hmai ut le hmaikang he: Cu hna sinah cun Vancungmi nih lunglomhnak van hla an remh hawi. Cu hna nih cun Jesu thawngtha an theih hmasa, an hmu hmasa i an biak hmasa. Bawipa lam, a theory le thiltuahmi hi Tinchia(Math) bantuk asi.

Tukhal le tuu kong hi asau lak. Kan peh vima ……Lai

X’mas lomhnak nan cungah um ko she

Sui Chin

Ottawa



Source::YCCF-International

KAN CAAH A CHUAK

Baibal Isaiah 9:6 ' Kan caah ngakchia pakhat a chuak. Fapa pakhat pek kan si. Amah cu Khuaruahhar Fimchimtu, A Thawngmi Pathian, zungzal Hmunmi Pa, Daihnak Bawi ti a si lai.'

I. Kan caah a chuak
Kan caah timi bia hi a sunglawi tukmi a si. Jesuh Khrih a sunlawinak cu kan ca i a chuah caah hin a si. Zeitluk hmanh in thil ti khawhnak ngei sehlaw kan caah a si lo ah cun a chuahnak cu sullam ngei lo a si ko hnga. Bawi a sinak, Fimchimtu, a thawngmi, a hmunmi le daihnak bawi a sinak vialte hi kan caah a si. Bawipa min thangtha ko seh. "Kan " timi nih hin mirum, milian he sifak he a kan huap dih. Kan dih lak caah Jesuh Khrih cu a chuak.

II. Fapa pakhat pek kan si
Pathian nih a kan pekmi Fa hi fa tampi a ngeihmi lakah pakhatte a kan pekmi a si lo. Fa pakhatte lawng a ngeihmi a si. Na fapa kha Minta ဂ်ြန္စံ in kan in thlen lai i ကင္းေကာင္ (ဟာသမင္းသား) kan in chap lai, tiah in ti hna sehlaw zeitluk mui chiate, pa thlaidorte, pa hnakruh tialte, pa lu tum, pa hngawngthia, pa tawk zu le pa ngal hreu te a si hmanh ah na siang bal lai lo. Pathian nih cun thlen hmanh si loin a lak tein a ngeihchunmi a fapa kha a kan pek. Pathian dawtnak a thuhsan zia ruat than u sih. Cu Fapa cu kan i lak ah cun a kan uktu, fim a kan chimtu, a kan thawntertu, kan caah zungzal in a kan umpitu le daihnak a kan petu a si lai. Lak le lak lo cu kanmah nawl a si. Kan caah pek si hmanhsehlaw kan i lak lo ahcun kanmah ta a si kho lo.

III. Kan uktu bawi a si lai.
Uktu hi an biapi ngaingai. Vawlei tuanbia kan zoh tikah uktu thalo hna ruangah thisen tampi a luang; mitthli tampi a tla. Rawhralhnak tampi a chuak. Thanchonak lam a pit. Buaibainak le hnahnawhnak in a khat. Kan ram zong ah kan hraamnak a sau cang. Uktu tha uknak ram le miphun chung ah cun daihnak le lawmhnak a um. A lamkip in an thangcho.
Khua le ram sining nih uktu muisam le nunning a langhter. Kanmah cio zong hi kan nunning nih a kan uktu muisam a langhter ve. Tangka hmuhnak lawng a ruatmi cu tangka nih a uk tinak a si. Kan pumsa duhnak le vawlei thilri chawva hi Jesuh Khrihnak in a kan uktu ah kan i ser deuh tawn. Isik velh le lu khuai-hnachah tikah Pathian, zeitindah khua kan ruah lai? tiin Jesuh sawmnak in biachim holhrel kho le mi thawngtha kan i sawm deuh tawn hna. Anmah cu kan i ukter tik hna ah bia fakfak i hlinhnak, thin i linhter chinnak le liampalternak te hna a chuahpi.
Uktu vialte lak ah uktu tha bik cu Kan Bawipa Jesuh Khrih hi a si. Hawidawt, atutan a chuah camtuak ah uktu ah i lak hmanh u sih, hnangamnak kan hmu ko lai.

IV. Khuaruahhar Fimchimtu
Vawleicung ram a uktu vialte hna nih hin fimchimtu asiloah ruahnak cheutu an ngei cio hna. Fimchimtu le ruahnak cheutu tha a ngeimi hna cu an nunnak ah an tonmi thil kha a ton zia le a phi chuah zia an thiam.
Cu bantukin ruahnak cheutu le fimchimtu a ngeimi hna hmanh khi a caan ah cun an palh caan le lam an tlau caan a um pah theu ve. Zeicahtiah minung fimnak cu a tlamtlinglomi fimnak a si. Jesuh Khrih cu Pathian fimnak le hngalhnak a thupmi hunnak tawh a si, tiah Cathiang nih a kan cawnpiak. Sertu nih fim a kan chimh tikah sermi ah i can in fim a kan chimhnak hi khuaruahhar fimchimtu a sinak pakhat a si ve.
Vancung in vawlei ah, sertu in sermi ah a rat le aa can duh i fim a kan chimhnak ning(method) hi khuaruahhar fimchimhnak cu a si hrimhrim ko. Ram tha,ram thumnak a phanmi nih Laitlang lei khuate ah rak kir than cu a fawi ti lai lo, tiah ka ruah. Zeicatiah a chiat/that le a nuamh le nuamh lo, a fawi/har aa dang tuk cang lai. Pathian tu nih cun van kaltak in caw inn ah a chuak.
Hnap, voih le ek ,fihnungmi thildang a phunphun umlonak in cu vialte a tlinnak vawlei ah a rat le cu fihnung vialte pakhat hmanh a ngei lomi nih cu vialte a ngeimi minung ah a rak cannak in fim a kan chimhnak cu thluak phanh lomi khuaruahhar thil a si. Rungrul le tholung ah i can cu um ko rih seh, Africa minak pawl i ican hmanh khi kan ruat kho lai lo. Ui le vok ah i can hoi hna cu kan ngamh bak lai lo. Pathian dirhmun le minung dirhmun cu minung le ek nak hmanh in kan i dang deuh rih lai. Christmas hnu cun minung si loin Fapa Jesuh Khrih tu hi fim a kan chimtu ah i lak cang hna u sih. Minung fim chimhnak cu ping a su kho. Leirawi zong a hmang kho.

V.. A Thawngmi Pathian
Fapa Jesuh Khrih cu thihnak a teitu, pum he thlarau he a that khotu, vawlei hriamnam loin teinak a la khotu , a um lomi chungin zeizongte a umter khotu thawnnak a ngeimi Pathian a si. Thih tiang in inkhawhnak thawnnak a ngei. Ngaihthiam khawhnak thawnnak a ngei. Sibawi vialte lak ah sibawi, teitu vialte lak ah teitu, thawnnak vialte cung thawnnak Pathian a si. Kan tonmi thil vialte cungah teinak thawnnak thazang a kan pe khotu cu kan Bawipa Jesuh Khrih lawng a si. Chunglei he lenglei he hmuhkhawhnak thawnnak a ngei. Tuah na duhmi kha a hnatlakmi a si pauh ah cun tlolh loin an tuahter khotu thawnnak cu Jesuh Khrih sin lawngin na hmuh khawh lai.

VI. Zungzal Hmunmi Pa
Zeizong vialte hi no nakin tarnak ah, thar nakin hlunhnak ah,thatnak in rawhnak ah, nunnak in thihnak ah an kal i a hmunmi an um lo. Minung le minung ka ni dawtnak le pakhat le pakhat kar ah kan ngeihmi zumhawktlak sinak hna zong khi hmun loin an ziam tawn. Pa le fa kar, nu le fa kar, ule nau kar, kawi le dua kar le maw le fa kar lak i kan ngeihmi dawtnak le tlaihchannak hna hmanh khi an hmun kho tawn lo. Kan i hlawnh i kan i chep tawn hna.
Sihmanhsehlaw kan caah a chuakmi Fapa Jesuh Khrih i kan cungah a ngeihmi a dawtnak, zawnruahnak le zumh awktlak a sinak cu zungzal in a hmun.Abraham chan i zumhawktlak a sinak cu Khrihfa hmasa hna chan zong ah a dong lo i atu in hmailei zong ah dong loin a hmun zungzal ko lai. Van le vawlei rawk hmanhsehlaw ka bia cu a hmun lai, tiah a kan ti.
Vawleicung mifim le thil ti khomi hna cu zeitlukin thawng hna hmanhsehlaw uktu le bawi an si zungzal kho lo. Caan sin in an liam dih ko. Kannih kan Pathian tu cu a tar kho lomi, a rawk kho lomi, a thi kho lomi le zungzal in a nungmi Pathian a si. A bia ah a hmun, zumh awktlak a sinak ah a hmun, dawtnak a ngeihnak ah a hmun, zangfahnak a ngeihmi ah a hmun, a nunnak zong zungzal in a hmun i Pathian a sinak zong zungzal in a hmunmi Pathian a si. Cu Pathian cu kan caah a chuak i pek kan si.

VII.Daihnak Bawi
Nihin vawlei ah a mikip le a ramkip nih an duhmi le an kawl ciomi cu daihnak a si. I runvennak a that i himnak le daihnak a umnak ding caah tiah a phunphun in an i zuam. Hriamnam a thatha an i ser. Himnak le daihnak ding caah tiin hriamnam thatha an ser nain cucu hnangamlonak a chuahpi cemtu thil ah an cang. I kahnak le ithahnak ah an hman hna i kan nunnak hna a ngam ter lotu bik an si than. Rumnak le lianhnak in hnangamnak le daihnak kan kawl. Sihmanhsehlaw cu thil hna cu kan nunnak ah thinphannak a chuahtertu le mitkuh vuai tein a kan hngilhter lotu ah an cang lehlam. Daihnak an chuahpi kho lo.
Kan caah a chuakmi Jesuh Khrih lawng hi daihnak Bawi a si. Cucaah Daihnak a um lonak chungkhar, khua le ram le miphun cu kan nunnak le kan khua-ram ah Jesuh Khrih a um lo tinak a si. Daihnak Bawi loin daihnak a um kho lo tihi kan i fian hrimhrim a herh . Daihnak Bawi cu daihnak a duh i daihnak a sertu a si. Cu daihnak Bawi cu kan caah a chuak cang. A lak tein pek kan si.

Biafun: Dawtmi hawikom vialte, kan nunnak a hrawktu kunzazi, khaini le thil thalo dangdang hna hmanh tangka dih in kan cawk a si ah cun kan nunnak, dawtnak in a uktu ding, kan tlau nakhnga lo fim a kan chimtu ding, kan herhnak ah a kan bawm i thawnnak thazang a kan petu ding, kan caah dong loin a hmun dingmi le kan nunnak ah daihnak a kan petu dingmi ngakchia Jesuh Khrih chinchin hi cu lak tlolh hlah u sih. A man loin pekmi, kan caah a chuakmi ngakchia a si.



Pacung
Paletwa

__._,_.___

MI VIALTE CAAH THAWNGTHA

Baibal caang thim; Lk 2:1-38; Mtt 2:11

Biahmaisa

Vanrang tang hmun kip ah aa thekmi kan Lai miphun hawi dawt vialte, Vawlei nih a chuahpimi hnahnawhnak, buaibainak, harsatnak, zawtfahnak le thihlohnak ruangah lungrethei, mitthli tla le khuaci mui in a ummi nan um sual maw? Jesuh Khrih a ratnak cu mi vialte caah a si. Mi vialte caah thawngtha a si tihi Pathian bia a si. Cu thawngtha nih cun mi vialte sinah lunglawmhnak a tlunter lai. Vawlei thlichia le tilet lak in Jesuh Khrih a ratnak leiah na hmai hun mer law 'Mi vialte caah thawngtha' a sinak ka hun langhtermi Baibal caang thim chungin thazang thar hun la ve.

I. Khuate ah a chuak.(Vs 16)
Ram pakhatte lawng a ukmi Vawlei lei siangpahrang le bawi cu an ukmi ram chungah khuate taktak ah cun an kal, an tlawng bal theng lo. Zakhat lak ah pakhat te an kal phum hmanh ah an riak ngam lo,a laang in an kal. An kal caan hmanh ah khin bawi inn le mithawngtha inn ah an i thum i zaraan minung nih ton khawh le biak khawh an si lo.
Sihmanhsehlaw van le vawlei a uktu Pathian cu khuate, caw rawl einak kuang chungah aa thum. Hi nih hin Jesuh Khrih cu zaraan minung( mi sawhsawh te) sinah aa cawhmi, mi tampi ( ahopauh ) nih ton khawhnak ding lam a kawlmi Pathian a sinak a langhter. Cucu mi vialte caah thawngtha a sinak a pakhatnak.

II. Tukhal sinah phuan a si.(Vs 8-12)
Tukhal hi mi nih nautatmi le namnehmi, zeirellomi an si. Milu relnak zong ah telh an si lo, .Cucaah khua ah um loin ramlak i an riahnak hi a si, ti a si. Bethlehem ah hin nusal, pasal aa timi an um len ko lai. Sihmanhsehlaw biatak cu mi nih zeirel lomi tukhal hna sinah phuan a si i, cu biatak kong a phuang hmasabik mi minung cu minung cazin ah telhlomi tukhal hna an si.
Pawngkam nih zeirel lomi, khua le khrihfabu nih minung ah ruah set lomi thleimi (hlawtmi) kan um sual maw? Jesuh Khrih cu minung nih minung cazin ah telh lomi tukhal hna zong nih ton khawhmi Pathian a si. Cucu mi vialte caah thawngtha a sinak pahnihnak.
III. Simeon nih a pom (Vs 29-31)
Jesuh a pom taktakmi le thinlung le thlarau mit in a hmu taktakmi kan si maw? Tlangbawi Simeon nih Jerusalem biakinn chungah Jesuh cu a tang cungah a pom. " Miphun vialte zohchih in khamhnak ding na timhmi cu ka mit in ka hmuh cang,"tiah a ti. Jesuh cu khuapi ah a ummi tlangbawi zong nih ton khawhmi a si. Cucu mi vialte caah thawngtha a sinak pathumnak.
IV. Kum 84 a si cangmi tarnu (Anna) zong nih ngakchiapa kong a chim.(Vs 37)
Simeon nih ngakchiapa a pom lio ah hin Anna zong a um ve. Bawipa a tanh i biakinn a kaltak lomi tarnu zong hi Jesuh Khrih nih aa hmuhter. Tarnu nih Pathian a thangthat i ngakchiapa kong cu midang sinah a chim ve. Jesuh Khrih cu tar nuhmei zong nih ton khawhmi le a thawngtha chimtu ah a thi deng cangmi tar zong a hmang duhmi Pathian a si. Cucu 'mi vialte caah thawngtha ' a sinak a palinak.

V. Satil zong nih an hmuh.(Vs 9-14)
Caw inn ah a chuah caah caw zong nih an hmuh ve theo lai timi ruahchannak in a si. Jesuh Khrih a chuahnak hmanthlak zeimaw ah cun caw zonmg an suai chih theu hna. Sermi thildang a sia a herh lomi Pathian sisehlaw mi vialte caah thawngtha a si kho hnga lo. Zeicahtiah minung cu serrmi thildang tel loin kanmah lawng in a nung khomi kan si lo. Cucaah Jesuh Khrih cu sermi thildang zong a sia a herhmi Pathian a sinak hi 'mi vialte caah trhawngtha a sinak' a panganak.

VI. Nichuah lei mifim zong nih an biak (Matt. 2: 11)
Vawlei fimnak in a khatmi, mirum, milian zong nih ton khawhmi Pathian a si. Cucu mi vialte caah thawngtha a sinak a paruknak.

VII. Vanmi zong nih an thangthat (Lk 2;9-14)
Khrih chuahnak cu vawleimi ca lawngah si loin vanmi ca zong ah thawngtha a si. Cucu mi vialte caah thawngtha a sinak a pasarihnak.

Biafunnak:
Minung nih fa kan ngeih tikah le kan i lawmhnak thlacamnak kan tuah tikah mah chungkhat, rualchan-cingla le mithawngtha, thil ti kho deuh kha siaherh in kan sawm tawn hna. Jesuh Khrih cu cuticun a si lo. Vanmi he, vawleimi he, mirum he, mifim he, tar hna he, cawnpiaktu saya hna he, namnehmi minung hna le satil tiangin siaherhnak a ngeimi a si. Duhdanhnak le thleidannak ngei loin a kan siaherhtu a si. Cucu mi vialte caah thawngtha a sinak cu a si.
Matthai thawngtha cu Judahmi caah tialmi a si bantuk in catialtu nih Jesuh Khrih a chuahkehnak a zawt tikah Abraham in a donghter (Mtt 1:1-16). Cu nih cun Jesuh cu Judahmi chungin a chuakmi le Judahmi Pathian a si, timi lungput a langhter. Judahmi nih Pathian cu anmah Pathian le anmah ca lawngin an rak i ruah caan kha a rak um taktak.
Luke thawngtha cu Gentailmi caah tial a si bantuk in catialtu nih Jesuh chuahnak a zawt ve tikah Adam cu Pathian fapa a si, tiah a ti(Lk 3:23-38). Jesuh cu Adam hrinsor a si, Adam chungin a chuak i Adam cu mi vialte pa le Pathian fapa a si tinak a si. Cucaah Jeusuh Khrih cu mi vialte caah Pathian nih a kan pekmi Pathian Fapa a si, tinak a si i cucu "MI VIALTE CAAH THAWNGTHA " a sinak a muru cu a si.




Pacung
Paletwa

Hillary Clinton Kawlram Tlawmnak

Hillary cu ramhun U Thein Sein he Naypyidawt ramhun innpi ah ton biaruahnak an ngei. An i tonnak thutdan le cabuai zoh ah Siangpahrang thutnak bang, suihang hutmii lawng te. Than Shwe hi Siangpahrang can a duh an ti hi si dawh ngai a si rua. Nyepyidaw khua a serning, siangpahrang bantuk in inn le lo cabuai le thutdan a hunning zoh ah a lungtli in siangpahrang si cu a duh taktak ko lai ti a lang, asinain zeiruang bik ah dah puanzar hnulei ah a dup ziar kun? timi cu amah lawng nih a theih dawh a si.

Thein Sein he an ton lio ah chakum Korea he a thli tein nuclear ser nan i timh ding a si lo, IAEA phung ning te in nan zulh a herh tiah Clinton nih a chim. Thein Sein nih kawlram ah thlennak taktak tuah kan i tim ko tiah a leh ve.

Thlen duh lo lei ah a ttang tiah ruahmi Amyotha Hlutdaw Chairman U Khin Aung Myint he an i tong, sanction kong le thlennak kong, parlianment nih upadi an sermi kong te hna an i ruah. Ramrian ttuan ruangah thongthla mi vialte nan chuah hna ahcun sanction zong hmuamsam tete in kan bauh ve lai an ti. Ralkap uknak ah kan kir ti lai lo tiah U Khin Aung Myint nih amahkhan a si ko tiah a chim chih.

Pyitu Hluatdaw Chairman Tura Shwe Man he tonnak an ngei ve i, Tura Shwe Man nih ram rian tuan ruangah thongtlami kan chuah ko hna lai. Tlangcung mi hna he zong daihnak kan ser lai tiah Hillary Clinton sin ah a chim. Kan ram thanchonak caah a herhmi bikmi cu kan ram thil chuak ramdang ah kan kuat khawhnak dingah nan kan bawmh ve a hau, cun fimthiamnak (Education) ah biatak tein ttan nan kan laakpi a herh tiah a chim.

Shwetagone Pura a zoh, Hillary hi Sunday ah a chuakmi a si an ti i, Shwetapone pura i, taninganuai kil ah pangpar a chiah ve an ti.

Rangoon khua um US palai inn ah Hillary nih Aung San Suu Kyi cu zanriah dum a sawm i, anmah pahnih te lawng rawl an i hrawm. Sianginn kaiti an si an rak ti bal ka theih, an kum zong a tthirual si dawh a si. An pura le an mui zoh ka cim hna lo. Aung San Suu Kyi hi Kawlram ramhun siseh law, US rak tlawng sehlaw, US congress innpi ah khin biachim sawm hna sehlaw ti ka ruah ah keimah lawng hmanh ka lawm tuk cang.

Hillary nih Aung San Suu Kyi a zoh dan khi, a mithmai ah upatnak, zangfahnak le dawrtnak hmuh khawh a si.

Hlutdaw Kuzale minung 40 tluk nih Hillary cu an ton, NUP, NDF, USDP, RNDP, SNDP le party cheukhat an i tel, CNP le CPP tal an i tel ve hnga maw ka ti i, Laimi MP ka ngiat len hna na in an mui ka hmu kho lo. An i tel sual ahcun a hngalmi nih thawng kan thanh te u.

Amyotha Hluatdaw Kuzale pawl he an ti ton lio, Amyotha hluatdaw kuzale pawl hi Pyituh hlutdaw kuzale pawl nakin thlen a duh lomi an tam an ti i, bia an chiahmi cheukhat tete zongah pyituh hluatdaw he an ruahnak a dang theu. Aung San Suu Kyi nih cun mah bantuk ruahnak a danmi cu dah kaw democracy kan ti lengmang mi cu a si a ti.

Tuchun ah hin NLD party hruaitu hna le CRPP hruaitu cheukhat hna he tonnak an ngei lai. Aung San Suu Kyi inn ah zanriah dumtinak le thawngzamhnak zong an tuah lai.

Hmanthlak hmuh ve nan duh ahcun Yahoo mail i tuah u, gmail in cun hmanthlak nan hmu kho lai lo.

Careltu le hmanthlak zohtu nan dihlak cungah ka lawm.

Siaherhnak he,

Salai Lairamthang

(Sungsung pa)


Source:: yccf-international@yahoogroups.com

""Christmas Thawngtha""

MATTHAI THAWNGTHA DAL HNIH CHUNGIN THAZANG LAKNAK
Baibal: Matthai 2:1-12.



Biahmaithi: : Hmun kip, ram kip ah a ummi hawidawt vialte nan cungah Christmas daihnak le lawmhnak um ko seh. Matthai thaawngtha dal hnih in nan kut kan tlaih hna. Pathian nih a Fapa ngeihchunh a kan peknak camtuak december thlum kan phan than cang. Kan thinlung ong in thazang la cio hna u sih.

I. Bethlehem Vs 1
Bethlehem a sullam cu ' changreu inn 'tinak a si. Jesuh Khrih nih ," Nunnak changreu cu keimah hi ka si,"tiah a ti (Jhn 6:35). Jesuh Khrih nih nunnak changreu a sinak kha a chuahnak in sullam ngei tein a rak langhter cang.

II. Khuazei ah dah a um? Vs2
Mifim hna nih Jerusalem ah Jesuh Khrih an kawl hi minung ruahnak cun aa tlak ngaingai. Zeicatiah Judah siangpahrang a si dingmi cu Judahmi khuapi ah cun a chuah awk a si ko. Sihmanhsehlaw Cathiang nih,' Pathian nih nan ruahnak le ka ruahnak cu van le vawlei a hlaat bantukin aa hlat," tiah a timi kha biatak a si caah a chuak lai tiin an ruah lonak hmun tu ah a chuak i a um.
Jerusalem ah chuah le um loin Bethlehem tu ah, Bethlehem hmanh ah cun caw rawl einak kuang ah a chuak i a um. Vawlei mit in kan tihzah ngaimi, kan sunsak ngaimi, a sang ngai ah kan ruahmi le kan zumh tukmi hna nunnak ah hin Jesuh Khrih chuah lo le um lo a fawite. Jesuh Khrih nih a lanh takmi Jerusalem kan si sual nakhnga lo i ralring cio hna u sih. Biathlam 3:20 ah cun, "Ngai hmanh, innka ah ka dir i ka kingh....," tiah a ti. Jesuh Khrih cu kan pawngte ah hin a um ko. Thawngtha chimtu hna, hlasatu hna, thlacamtu hna, miharsa hna le lungrethei vansangmi hna nunnak hmang in kan lung innkhar a kingh tawn.

III. Amah biak awkah atu hi kan ra.Vs2
Jesuh Khrih kan kawl le Christmas kan i ngaih tikah zei ruahchan in dah kan kawl i kan i ngaih? A thluachuah hmuh duh le inuamh duh men ah a si sual maw? Judahmi nih,"Zeikar ah dah hika hi na phak manh ?" tiah Jesuh Khrih an ti lio ah khan," Nan ka kawl cu thawnnak in ka tuahmi nan hngalh caah a si lo; nan duh zat in changreu nan ei caah a si. Hi a rawk khomi rawl caah hin tuan hlah ngat u, a rawk kho lomi zungzal nunnak rawl caah ta nan tuan," tiah Jesuh Khrih nih a rak ti hna (Jhn 6:25-27). Sikmi kan si sual lai, ti ka phang.
Arfi zohthiam mifim hna nih Jesuh Khrih an hmuh le an ton khawh cu an kawl duh hnawhchannak ahmaan caah a si. Zeicahtiah a thluachuah hmuh duh le a chuah lawmhnak thlacamnak i i tel duh men ah a si lo. Biak ruah ah a si. Kannih zong biak duh ah kawl ve u sih. A arfi nichuah lei in a chuah kha kan hmuh i amah biak awkah cun ATU hi kan ra an ti. Ka ni manh deuh tikah, caan ka ngeih deuh tikah, aa relrem deuh tikah an ti lo. Kannih zong Bawipa kan kawl tikah hin biak ruah ah si ve sehlaw biak awkah cun ka si thiam deuh tikah ti loin atu ah hin biak ve u sih.

IV. Herod cu a ka lawng a si. Kaa lawng biak. Vs 8.
Thate in va hlat ulaw nan kir lei ah rak ka chim ve u; cun ka va bia ve lai a ti. Bia tha ngai le biadawh ngai a chim.Cu caah mifim hna zong nih khan an i zumhnak a si. A sinain Bawipa nih an sin lei in a kirter ti hna lo. Jesuh kong cu a hlat ve; a leh-la ve nain biak duh ah si loin thah duh ah a si. Mah zawn lawng ruahnak le thutdan thlah sian lo ruangah Jesuh Khrih a nganh diam. Jesuh Khrih a nganh ruangah mi tampi thisen le mitthli a luanter. Kaa lawng biaknak nih zumtu thinlung a khuai tawn hna.

V. An hmai ah a kal i ngakchia cungah a dir. Vs 9
Hruaitu le zumtu nih hruaimi hmai le zumlotu hmai ah kal loin kanmah tu hnu ah kan i thlai ruangah le ngakchia (Jeusuh Khrih) umnak cungah dir loin kanmah pumsaduhnak(Satan) cung i kan dir tawn ruangah midang nih Jesuh Khrih hi an hmu kho tawn lo. Cucaah Hruaitu nih hruaimi hmai ah kal u sih; Khrih cungah dir u sih. Zumtu nih zumlotu hmai ah kal in Khrih cungah dir cang hna u sih.

VI. An hmuh, an biak i laksawng an pek Vs11
Kan kawlmi Jesuh Khrih hi kan hmu taktak ve maw? Arfi zohthiam mifim hna nih cun an hmuh taktak. Kan philh lo ding ah ka duhmi cu Jerusalem an lonh hnu ah an hmuh tihi a si. Minung khuaruahnak lawnh in an kal hnu ah an hmuh. Anmah ruahnak ah cun Jerusalem ah hmuh ding a si. Nun nuamhnak. suingun ,thilri chawva tamnak khualipi ah tan loin lawnh khawh le kal khawh kan herh.
Laksawng tah kan pe taktak ve maw? Pathian nih a kan pekmi laksawng le kannih nih kan pek dingmi laksawng hi cuai ah thlai chunh u silaw zoh ngam a si hnga maw? Laksawng pek bu ah amah Jesuh Khrih hmuh lo a fawite. Christmas nuamhseihnak le chung tuan ,rawl pek men lawng ah kan i zat sual ah cun a poi ngaingai lai. Pi Ceih Hnem hi nau zoh ah laksawng te he a kal. An pi tar he biasong an tlorh. Laksawng te cu a chiah tak i inn ah a tin. A fanu nih ka nu, an fa cu aa dawh maw, a chuak thiam maw? tiah a hal. A lau tuk," Elaw ! ka fa ziah, an nau zoh pei ka philh cu," tiah a ti. Laksawng cu a chiah tak ko nain lawmhnak biasong an tlorhnak ah an fa zoh a philh. Nihin zumtu lak ah cu bantuk cu um khawh a si .
Mifim hna nih laksawng an i ken ngamnak lungput hi kan i cawn awk a si ve. An lam caan hi cu lio chan kalauk kalnak lam in tuak tikah thlanga hrawng lam kal a si,ti a si. An laksawng kha man sangpi man lawngte an si. Hi laksawng ruah ah hin mithalo (Da-miah) nih tlaihkhihnak le tuk-thahnak tiang kan tong kho tihi ruah lo awk a tha lo.Sihmanhsehlaw hmuh ,ton le biak an duhmi Jesuh Khrih caah cun harnak kan ton zong ah timi lungput he hmai ah an kal. Kannih cu laksawng pek ding cu chim lo, kan pek dinghrimhrim a simi 1/10 tangka hmanh hi sifah-harsatnak damiah ka ni chuhter i Khrih sin kan phakpi kho tawn lo.

VII. Lam dang in an kir Vs12
Lungthin tak in Pathian a kawlmi nih cun Pathian cu an hmuh i Pathian nih an kalnak ding lam a hmuhsak hna. Jesuh Khrih a tongmi arfi zohthiam mifim hna cu Khrih an hmuh hlan le an hmuh hnu an zulhmi lam aa dang. Christmas hlan kan zulhmi lam le Chrsitmas hnu kan zulhmi lam aa dan lo ah cun atu kum christmas cu Jesuh Khrih kan nganh tinak a si ko.
Khrih a tongmi cu Satan ruahnak cheuhmi lam zul loin Pathian ruahnak cheuhmi lam zul in an kal.

Kan dihlak caah a thami a um ah cun Pathian nih thluachuah kan pek piak ko seh.

Bethlehem Ah Bawipa A Chuak timi Mizo hla ngai hna uh sih


Bethlehem Arfi Ceu Dawh timi Mizo Hla ngai hna uh sih



Pacung
Paletwa

Happy Sweet December

A sunglawi tukmi Sweet December kan phan cang caah cungkhar cio le pumpak cio nan cungah Sweet December lawmhnak um ko seh.Khum khat chungah thla 12 a um mi chungah December thla hi phun dang tein a um i a thlum al mi thla tiah mirang nih an rak auh mi hi an thiam tuk hringhran December thla ah cun milung a leng i minung thinlung phun dang pi a um.Lai tlang lei thil si ning in chimah cun Thingkung Ramkung hna nih an ni dawhnak phun phun in an langhter caan a si bang kan nih cio zong kan i dawhnak kan thinlung le kan nun i langhter ve hna uh sih. Kan Bawipa Jesuh Khrih i zeiruangah dah December thla thengah a chuah hnga ti hi ka ruah ton.Zarh hnih lawng aa duh cangmi Merry Christmas sunglawi tein kan hmanh khawh cio nak dingah thla kan cam cio hna lai. Laimi le Khrihfa mi kan caah Kum khat chungah ni 360 a um i December 25 ni khat te hi kan sunsak bikmi le kan ni ngeih bikmi ni a si i chungkhar kan ni hlam ni zong a si. Ramdang hna nih kan chung le kan hlam hna bantukin kan kal takmi chungkhar hna nih an kan hlam tuk ni sunglawi a si ve.X'Mas Hla pakhat tein a tang ah rak ngai ve uh.

CNF le Nihin Burma Ram Politics!

Miphun Hawi hna,
Nihin kan ram uknak le politics um tu ning a rang ngai in aa thleng cuahmah i, mi tam pi caah cun kan Chin miphun le CNF caah hin thil ttha lei maw kan panh lai thilttha lo lei dah kan phanh lai tiin thin i dawmh in um lio can a si. Kan thin kan ni dawmh phu te cu a si ko. Hi ban tuk can ttha hi hman thiam lo ah cun kan Chin miphun kawl kut tang ah thuk chin chin in kan pil nak ding a si i, kan hman thiam ah cun kan Chin miphun dohthlennak ah meithal fungkhat puah hau lo in, kan duh mi zalawnnak, luatnak hmuh nak ding lamttha sernak ah hman khawh a si. Vawlei cung ah duh pauh in a au kho ve cang mi nihin i, kan Chin mipi le CNF hruaitu hna cawlcangh ning vun zoh ah, nihin i kan ram i aa htleng cuahmah mi uknak lei sining le CNF le Kawl i chawnhnak te hna nih hin, kan miphun caah thilttha tam pi a chuah lai tiah ka zumh. Thinphang ziar in a um mi, kan miphun le CNF a daw mi ca rel tu vialte, a tu ban tuk innka aa awn mi le kawl he Political table ah vun i chawnh ding a um hi can ttha, van ttha ah ruat hna uh sih.

Thein Sein hi a pawng ah ruahnak pee tu ttha ttha aa chiah ve caah, a thil tuah mi a dang kawl ralkap bawi pawl nakin aa ral ring deuh. A tu lio zeidah a tuah ti mipawl zaa pi theih a si i, ka chim, ka ttial ti lai lo. Kawl ramchung ramleng cathiam deuh pawl chung ah a ngamh deuh deuh mi, ka duh pauh in ka hman khawh hna lai a ti mi pawl a auh hna i, a pawng ah a chiah hna. Mah pawl ruahnak an pek nak thawng in, Thein Sein nih CNF, ENC, le tlangcung mi dang pawl nih kan au pi lengmang mi Burma ram buainak hi cabuai cung ah kan tthu tti lai i, kan ni ceih lai, tripartite dialogue kan tuah lai kan ti mi kha, president a tlin cang ka in tthuttti ding ah a kan sawm cawlh. Zeidah an rak duh timi kha ttha te in an rak kan zoh piak ti a lang. Hi zawn te ah hin, a tu kawl ralkap nih CNF he kan ni chawn lai an kan ti mi hi kan duh lo kan ti sual ah cun mah vial te kan rak au pi mi kha sullam a ngei hnga lo.

Vawlei cung dohthlen nak kan zoh tik ah, meithal in an ni kap hmasa i, a dawnghnak ah cun cabuai cung ah an thu i an chim. Hi cabuai cung tthit in chim hi meithal in i kah lio nak in a bia pi deuh tawn. American nih British a doh tik ah meithal in an ni kap i, a donghnak ah cun Paris ah an va kal i, cabuai cung ah an tthu i, luatnak cu an pek hna. Burma ram luatnak kan hmuh lai zong ah, Aung San kha London ah a raa i, cabuai cung ah an ni ceih hnu ah luatnak kan hmu. American pawl nih Paris kal duh lo i chawnh duh lo in um hna seh law, Aungsan kha London rat duh lo in um seh law, dohthlenak an tuah mi a sullam zei dah a si hnga. Mah caah cun a tu a ra lai mi can, January,2012 hrawng ah, Hakha ah Kawl le CNF an nih chawnh kan miphun zaa pi nih kan ni lawmhawk le kan duh awk a si. A cheu nih kawl cu an zer tuk i, zumh hna ding an si lo ti ban tuk zong chim a si. Pumpak i kawmh nak ah cun an zer ah cu kawmh lo ding an si ko nain, Politics ah cun kawl he hmaitawnh tein zun i tawn hi hrial khawh a si lo. Paihbual ah paih kan chuah tik ah vun i tlaihtaa, vun i pawmta lo cun i tengh khawh a si lo ban tuk in, kawl hi tei taktak kan duh hna, zalawnnak kan duh tak tak ah cun a tu ban tuk can ttha hi maw vantthat, innkaa aa awng hi tiah kan ni lawmh ding thil tu a si.

Kawl he kan ni chawnh tik ah hin thil pa hnih ruah awk a um. Pakhatnak cu zei level pawl dah an rak thlah hna ti hi zoh hmasa ding le kanmah tah zei level minung dah kan kal hnga ti hi a si. Cun pahnihnak cu zeikong dah kan ni ceih i, zeitiang level dah hna tlaknak le lungtlinnak kan ngeih ti hi a si hnga. Hi Pahnih nak hi cu kan Laimi nih nupu tthit, vangeih tik ah nu lei le pa lei man kong ah heh tiah an ni el , an ni rial ban tuk khin, aa rial khawh chung i rial a si cang hna. Hi hi a bia pi tuk mi a si. Hi zawn ah hin kawl nih an kan hlen khawh sual ah cun kan Chin miphun kawl kuttang ah thuk chinchin in kan pil kho i, kan mah nih a hman kan thiam ah cun kan miphun hmailei zalawnnak le tthanchonak lamkau pi kan phah khawh lai. Hihi cu political game tak tak a si cang lai i, political game theory kan cawn, kan theih, kan hngalh mi vial te hman can le chuah can a si lai. Cabuai cung i aa chawn mi CNF u pa pawl zong mah zawn hi cu an ni ralrin bik ding can a si lai.Paih a si ah cun kan thiam mi thachumngerh, vangkhen, khelcungchuan vial te hman dih dih can a si lai.

Chess kan ni kah tik ah khatte lei in pawn a rat ah cun, pawn in kan kham i, rang le tlang lawng te pawl cu a hnu hman ding ah kan ni chiah. A dongh nak ah Queen le King pawl cu kan hman tawn. Political talk a um tik ah veikhat in a dih phung a si lo. Chess ban tuk in one by one, step by step in a kal lai. A ra lai mi 2012 ah Kawl lei in a ra ding hi Vuangci level, Chess siseh law Bishop level hrawng an si caah, CNF kan pu le second line leaders hrawng u-pa pawl an kal lai. An bia a tluan lo sual ah cun a dih ko lai i, meithal in kan ni kap tthan lai. An bia a tluan ah cun Nepyidaw ah Theisein he i tawn ding a si tik hrawng ah khin, kanmah lei in kan pu bik Chairman Pu Zing Cung le Secretary Pu Paul Sitha cu an kal te lai. Khi kha zawn i, a tluan dih, a tthat dih hnu lawng ah remhdeihnak ti cun ti khawh a si lai i, mah zong cu zeican, zei tluk dah a si lai ti chim khawh a si rih lo. A sullam cu CNF a um peng a hau lai i, CNF a bawm tu vial te zong nan kan bawm peng a hau ti nak ka vun langh ter duh.

Kan Chin miphun le Kawl tuanbia kan zohtik ah, ram ngei mi miphun ve ve kan si tiin, miphun dang veve ai-awh nak level (nation to nation) in kan ni chawnh hi, 2012 i chawnh nak hi a veihnih nak a si lai. A veikhatnak a luan cia mi 1947 Panglong i, an rak i chawnh mi kong vun ruah tik ah, a tu a ra lai mi ah kawl pawl a zenh ziar mi kan um zong hi kan mawh lo.Panglong conference ah kan pa le pawl he aa rak i chawn mi U Nu te, Aung San te cu mah chan lio ah khan vawlei cung ah sianginn minthang ngai a rak si mi Judson College cuak an si. Kan pa le pawl Catang sang an rak si lo. Mah panglong conference lio i, kan pa le pawl bia an ni ruah mi pawl le an biachim mi pawl tuak tik ah cun an rak kan thau hringhran ko. Lung a ttha hrim hrim lo. Kan pa le nih kan miphun an rak dawtnak le an raltthatnak belte tu cu a zungzal philh khawh an si lai lo. A sinain, miphun hawi hna, nihin CNF kan pa le pawl le Kawl pawl an ni chawnh tik ah samfa tiah hmanh ttih awk le zenh awk an um lo ti lai lo. CNF caah political talk, political bargaining, political game pawl hi kan tthawn bik nak, kan ni zumh biknak a si i, a dang tlangcung mi pawl peace talk an tuah hnu ah duh pauh in kawl nih a vaivuanh hna ban tuk in a kan tuah kho lai lo.

CNF nih kawl a hal hna ding hi, a dang tlang cung mi nih kawl pawl an hna tlak pi mi hna le an hal mi hna, tthanchonak tuah tti nak sawhsawh pawl hi si lo in, a dang pi a si kho men. Thahchunnak ah, CNF nih kan chimram vialte ah duhpauh i, mipi sin taza hawtnak, bia chimnak kan pe uh tiban tuk siseh law cu cu miphun dang nih an hal tuk thleng lomi, zeitluk in dah a bia pi ti an tuak theng lo mi a si hnga. Hi ban tuk a si khawh ah cun, CNF le kan chin miphun caah cun i lawmh tuk ding thil asi hnga nain, kawl nih an duh lai maw ti ding phun ruah awk tam pi a um. Mah caah cun a tutan CNF le Kawl an ni chawnh ah hin thil a tluang dih lai ti awk ah a har ngai rih.

Miphun hawi hna, kawl le CNF kan ni chawnh mi a tluan tlauhmah a si ah cun, kawl he neih tein, rian ttuan tti a si cang lai caah, kan miphun zaa pi a nu he, a pa he kan ti khawh nak lam cio in ttan kan lak chinchin, tei kan rial chin chin a hau lai. Kan lung aa rual chin chin a hau lai i, kan thiamnak le kan ngeih chiah vial te kan miphun zaa pi nih kan chuah a hau chin chin lai. Chin miphun hi zeidah kan si ti langhter can le Kan miphun zalawnnak, luatnak caah second step ( a dawt hnihnak) lei kalnak caah i tim can a si lai. Ramdaw tu Chinland Club hawi le vial te, kawl he CNF an ni chawnh cang tiin maw, phaisa thawh daithlang lai uh cih, a tu can hi thazang chuah chin chin a herh can a si tu in tei rial chinchin uh sih. A ra lai mi Kawl le CNF i chawnhnak nih hin, kan miphun zalawnnak le luatnak lei a phanh pi tu a si khawhnak hnga thlacam cio hna uh sih law, kan lung rualnak hi langh ter chin chin hna uh sih!
Nan zaa pi sin ah dawtnak he,

Daniel Sakhong
Chairman
USA Regional Committee of CNF

( Mah ca ka ttial mi hi keimah pumpak hmuh ning a si i, CNF Party Policy a si lo)


Source:: Lai Forum.Yahoogroups.com

Harnak Chungah Hnangamnak

Theihternak: : Pathian lam hruainak thawngin zarhpizing fatin zarhkhathmanh bau lo tein sermon toite ka rak thlah nak hi kumkhat le thla thum asi cang. Pathian thawngin ka sianginn kai zong a dih cang caah hmaizarh in cun ka tlung cang lai. A can hman tein le zarhfatin punghman tein cun ka rak thlah kho ti lai lo, a ruang cu, ka room ah internet um ti lai lo, cun kawlram cu theih bang in electric punghman ngah lo tikah kan duh can ah computer kan hmang kho ti lo, cun, internet a man in va hman a hau cang lai, lai lei ah cun Sunday ni hi cu i manh lo ngaingai a si fawn tikah, nihin hi punghman tein le caan hman tein ka rak thlah ton mi ah cun a donghnak si ko lai. Thlacamnak tu in i bom hna uh sih law, Pathian nih a herh a ti ah cun punghman tein, pehzulh tein thlah khawhnak lam zong a tuah te ko lai! Sermon toite a rel ton tu, a rel tu nan dih lak cungah a Bia Thiang hi nun ter seh law, a thluachuah phuntling he in um pi ko hna seh!

Harnak Chungah Hnangamnak

John 16:33 "daihnak nan hmuh nak hnga,……….. vawlei nih hin har nak an pek hna lai, sihmanhselaw ttih hlah uh, vawlei cu ka tei cang" tiah a ti.

Hmasa bik ah Daniel 3 hi kan dih lak in rel ta hna uh sih. Cu longlong ah a tanglei kan chim mi hi kan i fiang kho deuh lai.

Hi Judah tlangval hna pathum Shadrak, Meshak, le Abednego hna an tuan bia chung in, ni hin kan khrihfa si nak ah i zoh chunh ding tam pi hna lak ah :Pathum in langhter ka duh:

Pakhatnak ah: An Zumhnak

Pathian an zumh nak hi khuaruah har asi. Zeicatiah cun, Pathian nih "Nebukkhadnezzer Siangpahrang nih meiphu chung ah an paih hna lai i, kan khamh te hna lai" tiah bia a kamh ta hna lo ti cu a fiang. Zeicahtiah cun, an leh nak bia fang kan zoh tikah, " a kan khamh khawh ah cun a kan khamh ko lai, a kan khamh lo hmanh ah" an ti. Cu caah Pathian nih bia a kamh ta hna lo ti cu a fiang, asinain, an zumhnak cu khuaruah har a si ko. Ni hin ah kan nih zum tu hna cu, Pathian nih bia tam pi a kan kamh. Cathiang chung ah Pathian nih bia a kan kamh mi tam pi a um. Asinain, kan zum ngam lo. Shadrak, Meshak, le Abednego hi zoh hna hmanh, Pathian nih zeihmanh bia a kamh cia hna lo nain, an zumh nak a ṭhawng tuk. An zumh nak hi, i zoh chunh awktlak hrimhrim a si.

Pahnihnak ah: Zumh Awk Tlak an si nak

Hi tuan bia ah hin kan theih awk pakhat cu, Siangpahrang nih milem hmai ah a kun ter mi hna hi, ni fa tin a si lo, zarhkhat voi khat zong a si lo i, thlakhat voi khat zong a si lo. Milem dedication tuah ni (phuntpuai kan ti lai cu) long ah a biak ter mi hna a si. Asinain, Shadrak, Meshak, le Abednego hna cu, cu voi khat te biak ding, kun ding zong an duh lo. Mi nung hmai le Pathian hmai ah zumh awk tlak in an nung. Pathian hi khoika poah ah a um ti mi le, zei kan tuah poah ah a kan hmuh, a kan theih ti mi hi cu kan theih cio ko lai dah! Kan rian tuan nak ah, kan hawi le sin ah, kan mah long kan um lio ah, tangka hna kan tlaih nak ah, thil hme te ah si seh, thil ngan pi ah si seh, Pathian hmai le mi nung hmai ah zumh awk tlak in kan nung maw? Milem hmai ah ka kun lo kan ti ko lai, zuu hmai hna ah kan kun maw, thatlo nak a phunphun hmai ah kan kun maw? voi khat te kan ti mi zong hi a poi ngai lai dakaw? A ho hmanh nih an ka hmuh lai lo kan ti maw? Shadrak, Meshak, le Abednego cu voi khat te zong an ti lo., Pathian hmai ah zumhawktlak te in an nung peng. Hi Judah tlangval pathum hna "zumhawktlak an si nak:" hi i zoh chunh hna uh si. Tlangval te dakaw an si rih. Na fel ahcun na fel man cu na hmuh hrim hrim lai.

Pathumnak ah: Harnak Chung ah Hnangamnak

Meiphu chung paih an si hlan ah cun, hri in an ṭem hna i, zalonnak an ngah kho lo. A sinain, meiphu chung an paih hna hnu ahcun, zalonnak an hmu. An ṭem nak hri te long a kang. Zalong te in meiphu cung ah an tlawngleng kho. Khat lei in chim ah cun meiphu chung ah hnangam nak an hmu. Nihin ah, Satan nih a kan ṭem ton nak hri vial te Zisuh nih a kan chah piak dih cang i, hi vawlei cung kan nun chung har nak phun za kip chung ah um ko hna hmanh uh sih law, Zisuh he cun, hnangamnak, daihnak le lomhnak he kan leng ti peng kho cang. Cu hnangam nak cu kan ngei maw?

Vawlei cung hi har nak long te in a khat hrimhrim ko. "Duh tlin lo nak ram" an ti i a hman taktak ko. Mi rum nih rum chin lengmang a duh. Fimnak a cawng mi zong nih sang deuh chin lengmang duh asi. Khrihfa a si lo mi caah ka vun tuak tikah hin hnangamnak hrimhrim a um lo. Mi rum pawl khi an hna a ngam lai tiah na ruah ko lai, an rum deuhdeuh an lung re a thei deuhdeuh. Ṭhat lo nak in a khat mi vawlei: zerngeihnak, mi zawmhtlaih nak, kei mah ti mi thin lung ngeih nak, mi ṭhan chonak phih ti ban tuk hna hi, Zisuh kan chung ah a um lo ah cun kan tei kho lai lo i, hnangam nak zong kan ngei kho lai lo.

Har nak na ton tikah na ngeih chia hlah, zeicatiah, Zisuh nih pei, Vawlei nih har nak an pek hna lai a si cu. A lomh hmanh kan ni lawmh deuh ding a si ka ti. Zeicatiah cun , Pathian fa pa Zisuh nih a rak chim ta mi bia kha kan cung ah a tlun ve tik ah, a fa kan si nak tehte (witness) a langhter deuh tu khi asi.

A dongh nak ah Zisuh nih "ṭih hlah uh, vawlei cu ka tei cang" a ti. Zeithil kan ton poah ah, zei ban tuk har nak kan ton poah ah, Zisuh i bo chan in hnangam te in um kha vawlei tei cu a si. Cu cu "Har nak chung i hnangamnak" cu a si.

Pahniang

Manila, Philippines

/////////////////////////////

Abraham Pathian, Isak Pathian, Jakob Pathian

Exo. 3:6 Kei cu na pa i a Pathian, Abraham Pathian, Isak Pathian, Jakob Pathian kha ka si,”

Kei hi Ciainn khua ah ka chuak. Ka nu le ka pa khua asi mi Dongva le Phaipha le an rak tthan nak khua Hmawngtlang khua hna ka phan tikah: na pa he (or) na nu he hawi kom tuk kan rak si, na pa he bawlung chuih tti mi kan rak si, na pa he kan i kom tuk, kan rak i daw tuk tiah a ka ti mi hna sin ahcun, ka pa a hawi ttha le an rak sinak nih khan ka hna an ka ngamh ter i keimah inn um bantuk tein ka um i, ka ngamh hna, ka tlaihchan deuh colh ve hna. Ka phanh ballonak khua hna i: na pa a hawi ka si, na pa he kan rak i kom ngaingai tiah an ka ti ahcun ka hna a ngam ngaingai i ka ngamh deuh colh ko hna.

Exo. 3 chung ah Pathian nih Moses cu ruah lo piin (Moses nih aa tinh lo mi, aa theih lo piin) a rak chawnh tikah, Pathian nih amah tein theih hngalhnak a tuah colh mi cu: Kei cu na pa i a Pathian, Abraham Pathian, Isak Pathian, Jakob Pathian kha ka si,” ti hi asi. Pathian nih Abraham, Isak le Jakop hna sinah khuaruah harnak phunphun a rak tuah, a rak zoh khenh hna, thluachuah a rak pek hna i, biakamnak zong a rak pek hna. Cu hna i an Pathian cu Moses a pa zong nih a rak biak, cucaah Pathian nih na pa i a Pathian ka si, a ti nak zong kha asi. Moses caah a hna ngam deuh ngai lai, asinpi deuh ngai lai i a tlaihchan colh deuh lai! Pathian nih kan pipu hna, kan hmai i a kal chung mi hna nun in a kan cawnpiak, a kan chawnh lengmang ton.

Cu hna i Pathian cu nihin ah kan biak mi Pathian hi asi ve! Aa thleng bal lo mi Pathian asi: Abraham, Isak, Jakob hna i Pathian, David thluachuah pe tu Pathian, Moses hruaitu Pathian, profet (Elijah, Elisha) hna hmangin riantuantu Pathian, ca thar chung i lamkaltu hna hmangin khuaruah harnak le thawngtha karh tertu Pathian cu nihin ah nang le kei nih kan biak mi Pathian cu asi ve. Cu tlukin a Lianngan mi Pathian, huham ngei mi Pathian, sunpar lianngannak he a khat mi Pathian cu kan nih kan nunnak ah teh kan hmai i a kal cang mi kan pipu hna bantukin a sunparnak cu kan langh ter kho ve maw? zeite hmanh kan langhter kho ve lo ahcun Pathian kan zumhnak hi kan i check tthan a hau ngai lai. Hlan lio i kan pipu hna sinah a rak tuah mi bantuk bak kha a tuah tthan ve lai kan tinak cu a si lo nain, zumhnak in kal nak lam thluan ahcun khuaruahhar nak, Pathian sunparnak le tehte khan ding tete cu ngeih lengmang ding le hmuh lengmang ding kan si. Pathian nih a hruai mi le a um pi mi kan si ahcun kanmah kan sining le thil kan tuah kho mi nakin thil lianngan deuh a tuah kho lengmang ding mi kan si.

Cucaah, Abraham Pathian, Isak Pathian, Jakop Pathian ti mi nih a kan hmuh sak mi cu: zumnak lei in kan pa, kan pi, kan pu hna nih an kan hmuh ter mi Pathian lianngannak kha nihin ah nangmah ca zong ah asi ve, na langhter kho ve, zeicahtiah cun kan biak mi Pathian hi aa khat mi asi i aa thleng ballo mi Pathian zong asi. A toinak in chim ahcun, an mah sinah cutin ka rak tuah, nang zong zeihmanh phang hlah, ti hi asi ko. A tuah lo belte ahcun kan mah lei chambau ruangah le an mah bantukin Pathian kan rak tlaihchan lo, bochan lo ruangah asi ko hnga!

Pahniang

Manila, Philippines

//////////////////////////////

Um Har Ah

Awl Zannak Lam Kawl Hlah Uh Sih

Awl zannak lam kawl hlah uh sih1 Samuel 26:10, Bawipa nih a thah te ko lai; a si lo ah a thih ni cu a phan te ko lai; a si lo ah raltuknak hmun ah a kal lai i a lo tlau te ko lai
Thintoi le lungran ruangah hin thil tuah sual mi le palh sual mi a tam khun ton. Pathian nih a caan a khiah mi (timing) kan hngak khawh ti lo ahcun palhnak le thil tuah sual nak a chuak lengmang ko. Kan bible chungah Pathian (timing) a hngak kho mi le a hngak kho lo mi tiah kan hmuh hna. Pakhatnak ah, 1 Samuel 13:7-14 chungah, Saul cu Pathian timing ningin a ra mi Samuel kha a hngak khawh ti lo caah amah rian a si lo mi khanghthawinak kha a tuah. Cutikah Pathian aa lawm lo, Saul cungah Pathian thinhunnak a tlung. Pahnihnak ah Pathian timing a hngak mi David cu 1 Samuel 26:6-11 ah kan hmuh khawh. Saul nih hin David hi zer a ngeih caah thah ding in a kawl. David cu a nunnak caah a tli lio mi asi. Cu lio ah cun, a ral si mi Saul cu a ral kap pawl he an i hngilh cuahmah lio ah that ding in Abishai nih “Pathian nih nihin ah hin na ral cu na kut chungah an pek ko; cucaah fei in voi khat chunhte ah amah hi vawlei ah bunh chih ko ning, voi hnih ka chun lai lo,” tiah a ti. Sihmanhsehlaw David nih Abishai cu, “Amah kha hrawk hlah; “Bawipa nih a nun bangin, Bawipa nih a thah te ko lai; a si lo ah a thih ni cu a phan te ko lai; a si lo ah raltuknak hmun ah a kal lai i a lo tlau te ko lai” tiah a ti. Angaingai ahcun, David cu prophet Samuel nih Siangpahrang na si lai tiah chiti a thuh mi a rak si cang (1 Samuel 16:12-13) tikah, lawlawse siangpahrang asi mi Saul cu thah sehlaw, a tlik zong hau ti lo i, Pathian nih lam ttha a ka serpiak mi bak si, ka kut chungah Saul nunnak a ka pek tiah ruah awk a fawi tuk ngaingai mi asi. Abishai a chim mi zong hi ruah awk tha le a hman ngaingai mi a si ko nain, Pathian timing tu cu a rak si lo. David cu awl zannak lam a kawl lo i, Pathian khiah piak mi caan (timing) tu kha a hngak! Kan nih hna zong, rian kan tuan nak ah, thil kan tuah nak ah, a bikin chawleh nak (sipuazii) kan tuah nak ah thil dik lo in tangka tam deuh le fawi ngai in ngah nak ding hna asi ahcun Pathian duh nak asi hnga maw ti zong ruat ti lo in Saul ban tuk in Pathian duh lo nak kha kan tuah sual awk a fawi ngaingai ko. Pathian sin ah ruahnak hal le thlacam zong um ti lo in, kan thinphan ruangah, sungh ding ttih ruangah, tangka ruang hna ah Pathian timing hngak ti lo in thil kan tuah sual ah cun Saul bantuk kan si ko lai. Thil awl zannak (phiat lan = shortcut) in tuah ding ah hneksaknak hna hi kan nunnak ah voi tam pi a ra ton. David nih cun cu hneksaknak cu a tei khawh: siangpahrang sinak ah awl zannak lam a kawl lo, Pathian timing tu a hngak.Kan nih hna zong zei kan tuah poah ah awl zannak lam nak in, David bantukin kan i ruahchan tuk mi thil pakhat a rak si zongah Pathian timing tu kha a hngak mi kan si khawh nak hnga Pathian nih thluachuah rak kan pe cio ko seh!

Pahniang

Manila, Philippines

//////////////////////////////

Bawipa bochan, Nun I zoh than

Sam. 37:4-5 Bawipa kha i bochan uh law nan lungthli tum kha an pek hna lai. Na nunnak kha Bawipa pe law, amah kha i bochan law amah nih an bomh lai

Bawipa kan i bochan ahcun kan lungthli tum kha a kan pek hlei ah, amah nih zei kan tuah mi poah ah a kan bom rih lai. Nithaizing ah kan dih lak Sam 37 dih lak hi rel hrimhrim hna uh sihlaw, kan nun i zoh than hna uh sih. Bawipa kan i bochan taktak maw, a kan timh piak mi lam ah teh kan kal maw ti hi kan nun i zoh than hna uh sih.

Parpar hi abu te in an um tikah, asi lo le, pangpar um in ningcang tein chiahtikah zoh aa dawh hringhran. A hmu tu hna thinlung a nuam i mi thinlung adam ter. Khi pangpar khi pakhat tete, phunkhat tete in ram chung ah an um cio tikah zoh aa dawh tuk lem lo. Asinain, abu tein an vun chiah i an vun ţamhmawih tik ah aa dawh khun i a hmutu, a zohtu caah zoh aa dawh i thinlung zong a nuam. Mirang phungthluk ah ‘Hnawm ti mi hi a um lo, a mah a umnak ding hmun le zawn te i a um lo mi lawng khi hnawm an si,’an ti. Pangpar pakhat hi zeltluang hna ah rak um sehlaw a um nak ding hmun a si ti lo caah hnawm ah aa cang ko. Cucaah, kan um nak ding hmun i kan um lo tik ah midang caah hnawm si sual a fawi te, cucaah kan um nak hmun le kan tuah mi pawl hi i zoh than lengmang ding hi a herh ngaingai.

Mifim Socrates nih cun, Un-examining life is not worth to live (nun i zoh/ i check than lengmang nak a um lo mi cu nun a phu lo) a rak ti. Ho dah ka si, zeidah ka tuah, zeidah ka tuah awk asi ti mi hi i theih ngaingai a hau. Khrihfa mi nih kan um lo nak ding hmun ah kan um awk asi lo. Bible ca Pathian Bia in kan nun kan i zohthan lengmang a hau. Keimah hmuh ton mi ah: Philippines ah hin sianginn kai ding in kan ra cio hna i, siang hngakchia asi mi nih cun, ca kha a pakhatnak ah a tuah, a zoh, aa zuam chih ding asi ko. Zeicahtiah, kan rat mi hrimhrim hi sianginn kai dingin kan ra mi asi. Micheu cu, sianghngakchia an si le si lo hmanh theih khawh an har ngaingai cang. Dih ding caan ah dih ti lo, ca zong tuah ti lo, tangka harsa ruang ah le si fawn lo tibantuk kan um pah len. Cu bantuk cu un-examining life zeidah ka rak tuah ti zong a tuak ti lo mi a si cang i, hnawm bantuk asi cang caah, mi caah retheih a si cang. Kan lam kan i palh lo ding hi a herh ngaingai ko. Cucu, sianghngakchia lei kap in tahchunhnak va siseh law, thil dang, rian dang lei zong in kan um nak hmun le kan tuah mi thil hi a dik maw ti kha i zoh than lengmang kan hau.

Khrihfa a si mi nih cun, ka nun hi Pathian ka bochan i ka zumh tak maw, hmurka longin dah ka chim, keimah tuah khawh mi ah cun keimah duh ning longin dah ka kal ton ti mi hi i zoh than lengmang kan herh ngaingai mi asi. Pathian kan zumh ngam tak lo i, kan i bochan lo poah ahcun hnawm kan si ko, cu tikah Pathian nih cu hnawm cu nidongh ni ah hell ah a hlawnh te ko hnga. Cucaah, kan khrihfa nun hi nifatin Bible ca he i zoh than lengmang hna uh sih. Sam 37 cu rel dih hrimhrim hna uh sih. Bawipa nih thluachuah in pe ko hna seh!

Pa Hniang

Manila, Philippines

/////////////////////////////

] Mizoram Ah Saikel Firtu Chin Miphun Pakhat An Tlaih

Mizoram Champhai peng Ngur khua um sangchung mipi hna nih Saikel a firtu Chin miphun minung pakhat pa cu 27.10. 2011 ni ah an tlaih kong thawng kan theih.

An tlaihmi Saikel firtu pa cu Kawlram Chin ramkulh Tedim peng Suanzang khua mi Nang Khan Pai i a fa Thang Khan Kim (32) a si. Khuami hna nih nawlngeitu palik kut ah an ap tiah theih a si.

Mizoram thawngthanhnak,tadinca zongah Ngur khua ah meihol a rawmi Suanzang khuami hna nih Thang Khan Kim cu Ngur khuami hna sinah an ripawt le khua upa hna nih a tu bantuk i an tlaih hi a si tiah an langhter.

Nawlngeitu palik nih an chek(sit)nak ah mah saikel an firnak,a hmuh ah hin Tedim peng Suanzang khuami minung (3) le Kalaymyo peng Pyingdawtha khuami pakhat zong an i tel tiah theih a si.

An firmi saikel cu Kawlram ah an phurh,an luhpi le Tedim peng Ngalbual khuami sang upa Eng Thang le Nang Suan Mang te sinah kan zuar tiah an chim kong zong theih a si. Mizoram chung i saikel a firmi hna hi a bikin Kawlram mi an si hna i, an firmi thil, saikel hna cu Kawlram chungah an luhpi hna le man deng tein an zuar ṭhan hna tiah theih a si.

Dinnak kha a cat lomi tiva bantukin luanter camcin ko u.(Amos 5:24)

Salai Biak Lian Thawng
Svolvær

Norway


Sorce::Metkhuabo@yahoogroups.com

Malaysia Seremban Ah Laimi Inn Mitha Lo Pawl Nih An Bauh

October 25 zan suimilam 10 hrawng ah Palik uniform an i hruk i minung 3 nih Hakha peng Haiphai khuami Pu Sui Sang le Pi Par Men inn ah an kal i innka kan on uh nan kan on lo ahcun kan bauh lai tiah an ti i an buah an tihtuk hna i an zam tak hna, inn tawh cu an bauh i inn chungah an lut thil an lak mi cu.
01. Tangka RM 1300. sui hna ton 1 mobile 2 bawngbi zun 4 Angki zun 2 le shut-case 1 le tower ti bantuk thil dangdang hme tuai pawl .

Cun inn chung kawl pawl sin ah an kai than i innka cu an bauh i kawlpa cu an tuk an velh i a tihtuk hna caah inn cung dot hnih in a zuang, an thil le tangka pawl cu an lak piak ve.

Dawtmi careltu hna, Malaysia i kan Laimi kan tuarmi a har ning le a fah ning hmuh hman pi i inn bauh piak i thil lak ko zeihmanh tinak lam ngei lo in zam tak i duh pauh in kan thil an kan chuh le an kan lak piak cu lung a fak ko thla camnak in bawm cio hna u sih.



James Biak Peng
Malaysia


Source::LAIFORUM@yahoogroups.com