KAN CAAH A CHUAK

Baibal Isaiah 9:6 ' Kan caah ngakchia pakhat a chuak. Fapa pakhat pek kan si. Amah cu Khuaruahhar Fimchimtu, A Thawngmi Pathian, zungzal Hmunmi Pa, Daihnak Bawi ti a si lai.'

I. Kan caah a chuak
Kan caah timi bia hi a sunglawi tukmi a si. Jesuh Khrih a sunlawinak cu kan ca i a chuah caah hin a si. Zeitluk hmanh in thil ti khawhnak ngei sehlaw kan caah a si lo ah cun a chuahnak cu sullam ngei lo a si ko hnga. Bawi a sinak, Fimchimtu, a thawngmi, a hmunmi le daihnak bawi a sinak vialte hi kan caah a si. Bawipa min thangtha ko seh. "Kan " timi nih hin mirum, milian he sifak he a kan huap dih. Kan dih lak caah Jesuh Khrih cu a chuak.

II. Fapa pakhat pek kan si
Pathian nih a kan pekmi Fa hi fa tampi a ngeihmi lakah pakhatte a kan pekmi a si lo. Fa pakhatte lawng a ngeihmi a si. Na fapa kha Minta ဂ်ြန္စံ in kan in thlen lai i ကင္းေကာင္ (ဟာသမင္းသား) kan in chap lai, tiah in ti hna sehlaw zeitluk mui chiate, pa thlaidorte, pa hnakruh tialte, pa lu tum, pa hngawngthia, pa tawk zu le pa ngal hreu te a si hmanh ah na siang bal lai lo. Pathian nih cun thlen hmanh si loin a lak tein a ngeihchunmi a fapa kha a kan pek. Pathian dawtnak a thuhsan zia ruat than u sih. Cu Fapa cu kan i lak ah cun a kan uktu, fim a kan chimtu, a kan thawntertu, kan caah zungzal in a kan umpitu le daihnak a kan petu a si lai. Lak le lak lo cu kanmah nawl a si. Kan caah pek si hmanhsehlaw kan i lak lo ahcun kanmah ta a si kho lo.

III. Kan uktu bawi a si lai.
Uktu hi an biapi ngaingai. Vawlei tuanbia kan zoh tikah uktu thalo hna ruangah thisen tampi a luang; mitthli tampi a tla. Rawhralhnak tampi a chuak. Thanchonak lam a pit. Buaibainak le hnahnawhnak in a khat. Kan ram zong ah kan hraamnak a sau cang. Uktu tha uknak ram le miphun chung ah cun daihnak le lawmhnak a um. A lamkip in an thangcho.
Khua le ram sining nih uktu muisam le nunning a langhter. Kanmah cio zong hi kan nunning nih a kan uktu muisam a langhter ve. Tangka hmuhnak lawng a ruatmi cu tangka nih a uk tinak a si. Kan pumsa duhnak le vawlei thilri chawva hi Jesuh Khrihnak in a kan uktu ah kan i ser deuh tawn. Isik velh le lu khuai-hnachah tikah Pathian, zeitindah khua kan ruah lai? tiin Jesuh sawmnak in biachim holhrel kho le mi thawngtha kan i sawm deuh tawn hna. Anmah cu kan i ukter tik hna ah bia fakfak i hlinhnak, thin i linhter chinnak le liampalternak te hna a chuahpi.
Uktu vialte lak ah uktu tha bik cu Kan Bawipa Jesuh Khrih hi a si. Hawidawt, atutan a chuah camtuak ah uktu ah i lak hmanh u sih, hnangamnak kan hmu ko lai.

IV. Khuaruahhar Fimchimtu
Vawleicung ram a uktu vialte hna nih hin fimchimtu asiloah ruahnak cheutu an ngei cio hna. Fimchimtu le ruahnak cheutu tha a ngeimi hna cu an nunnak ah an tonmi thil kha a ton zia le a phi chuah zia an thiam.
Cu bantukin ruahnak cheutu le fimchimtu a ngeimi hna hmanh khi a caan ah cun an palh caan le lam an tlau caan a um pah theu ve. Zeicahtiah minung fimnak cu a tlamtlinglomi fimnak a si. Jesuh Khrih cu Pathian fimnak le hngalhnak a thupmi hunnak tawh a si, tiah Cathiang nih a kan cawnpiak. Sertu nih fim a kan chimh tikah sermi ah i can in fim a kan chimhnak hi khuaruahhar fimchimtu a sinak pakhat a si ve.
Vancung in vawlei ah, sertu in sermi ah a rat le aa can duh i fim a kan chimhnak ning(method) hi khuaruahhar fimchimhnak cu a si hrimhrim ko. Ram tha,ram thumnak a phanmi nih Laitlang lei khuate ah rak kir than cu a fawi ti lai lo, tiah ka ruah. Zeicatiah a chiat/that le a nuamh le nuamh lo, a fawi/har aa dang tuk cang lai. Pathian tu nih cun van kaltak in caw inn ah a chuak.
Hnap, voih le ek ,fihnungmi thildang a phunphun umlonak in cu vialte a tlinnak vawlei ah a rat le cu fihnung vialte pakhat hmanh a ngei lomi nih cu vialte a ngeimi minung ah a rak cannak in fim a kan chimhnak cu thluak phanh lomi khuaruahhar thil a si. Rungrul le tholung ah i can cu um ko rih seh, Africa minak pawl i ican hmanh khi kan ruat kho lai lo. Ui le vok ah i can hoi hna cu kan ngamh bak lai lo. Pathian dirhmun le minung dirhmun cu minung le ek nak hmanh in kan i dang deuh rih lai. Christmas hnu cun minung si loin Fapa Jesuh Khrih tu hi fim a kan chimtu ah i lak cang hna u sih. Minung fim chimhnak cu ping a su kho. Leirawi zong a hmang kho.

V.. A Thawngmi Pathian
Fapa Jesuh Khrih cu thihnak a teitu, pum he thlarau he a that khotu, vawlei hriamnam loin teinak a la khotu , a um lomi chungin zeizongte a umter khotu thawnnak a ngeimi Pathian a si. Thih tiang in inkhawhnak thawnnak a ngei. Ngaihthiam khawhnak thawnnak a ngei. Sibawi vialte lak ah sibawi, teitu vialte lak ah teitu, thawnnak vialte cung thawnnak Pathian a si. Kan tonmi thil vialte cungah teinak thawnnak thazang a kan pe khotu cu kan Bawipa Jesuh Khrih lawng a si. Chunglei he lenglei he hmuhkhawhnak thawnnak a ngei. Tuah na duhmi kha a hnatlakmi a si pauh ah cun tlolh loin an tuahter khotu thawnnak cu Jesuh Khrih sin lawngin na hmuh khawh lai.

VI. Zungzal Hmunmi Pa
Zeizong vialte hi no nakin tarnak ah, thar nakin hlunhnak ah,thatnak in rawhnak ah, nunnak in thihnak ah an kal i a hmunmi an um lo. Minung le minung ka ni dawtnak le pakhat le pakhat kar ah kan ngeihmi zumhawktlak sinak hna zong khi hmun loin an ziam tawn. Pa le fa kar, nu le fa kar, ule nau kar, kawi le dua kar le maw le fa kar lak i kan ngeihmi dawtnak le tlaihchannak hna hmanh khi an hmun kho tawn lo. Kan i hlawnh i kan i chep tawn hna.
Sihmanhsehlaw kan caah a chuakmi Fapa Jesuh Khrih i kan cungah a ngeihmi a dawtnak, zawnruahnak le zumh awktlak a sinak cu zungzal in a hmun.Abraham chan i zumhawktlak a sinak cu Khrihfa hmasa hna chan zong ah a dong lo i atu in hmailei zong ah dong loin a hmun zungzal ko lai. Van le vawlei rawk hmanhsehlaw ka bia cu a hmun lai, tiah a kan ti.
Vawleicung mifim le thil ti khomi hna cu zeitlukin thawng hna hmanhsehlaw uktu le bawi an si zungzal kho lo. Caan sin in an liam dih ko. Kannih kan Pathian tu cu a tar kho lomi, a rawk kho lomi, a thi kho lomi le zungzal in a nungmi Pathian a si. A bia ah a hmun, zumh awktlak a sinak ah a hmun, dawtnak a ngeihnak ah a hmun, zangfahnak a ngeihmi ah a hmun, a nunnak zong zungzal in a hmun i Pathian a sinak zong zungzal in a hmunmi Pathian a si. Cu Pathian cu kan caah a chuak i pek kan si.

VII.Daihnak Bawi
Nihin vawlei ah a mikip le a ramkip nih an duhmi le an kawl ciomi cu daihnak a si. I runvennak a that i himnak le daihnak a umnak ding caah tiah a phunphun in an i zuam. Hriamnam a thatha an i ser. Himnak le daihnak ding caah tiin hriamnam thatha an ser nain cucu hnangamlonak a chuahpi cemtu thil ah an cang. I kahnak le ithahnak ah an hman hna i kan nunnak hna a ngam ter lotu bik an si than. Rumnak le lianhnak in hnangamnak le daihnak kan kawl. Sihmanhsehlaw cu thil hna cu kan nunnak ah thinphannak a chuahtertu le mitkuh vuai tein a kan hngilhter lotu ah an cang lehlam. Daihnak an chuahpi kho lo.
Kan caah a chuakmi Jesuh Khrih lawng hi daihnak Bawi a si. Cucaah Daihnak a um lonak chungkhar, khua le ram le miphun cu kan nunnak le kan khua-ram ah Jesuh Khrih a um lo tinak a si. Daihnak Bawi loin daihnak a um kho lo tihi kan i fian hrimhrim a herh . Daihnak Bawi cu daihnak a duh i daihnak a sertu a si. Cu daihnak Bawi cu kan caah a chuak cang. A lak tein pek kan si.

Biafun: Dawtmi hawikom vialte, kan nunnak a hrawktu kunzazi, khaini le thil thalo dangdang hna hmanh tangka dih in kan cawk a si ah cun kan nunnak, dawtnak in a uktu ding, kan tlau nakhnga lo fim a kan chimtu ding, kan herhnak ah a kan bawm i thawnnak thazang a kan petu ding, kan caah dong loin a hmun dingmi le kan nunnak ah daihnak a kan petu dingmi ngakchia Jesuh Khrih chinchin hi cu lak tlolh hlah u sih. A man loin pekmi, kan caah a chuakmi ngakchia a si.



Pacung
Paletwa

__._,_.___