MI VIALTE CAAH THAWNGTHA

Baibal caang thim; Lk 2:1-38; Mtt 2:11

Biahmaisa

Vanrang tang hmun kip ah aa thekmi kan Lai miphun hawi dawt vialte, Vawlei nih a chuahpimi hnahnawhnak, buaibainak, harsatnak, zawtfahnak le thihlohnak ruangah lungrethei, mitthli tla le khuaci mui in a ummi nan um sual maw? Jesuh Khrih a ratnak cu mi vialte caah a si. Mi vialte caah thawngtha a si tihi Pathian bia a si. Cu thawngtha nih cun mi vialte sinah lunglawmhnak a tlunter lai. Vawlei thlichia le tilet lak in Jesuh Khrih a ratnak leiah na hmai hun mer law 'Mi vialte caah thawngtha' a sinak ka hun langhtermi Baibal caang thim chungin thazang thar hun la ve.

I. Khuate ah a chuak.(Vs 16)
Ram pakhatte lawng a ukmi Vawlei lei siangpahrang le bawi cu an ukmi ram chungah khuate taktak ah cun an kal, an tlawng bal theng lo. Zakhat lak ah pakhat te an kal phum hmanh ah an riak ngam lo,a laang in an kal. An kal caan hmanh ah khin bawi inn le mithawngtha inn ah an i thum i zaraan minung nih ton khawh le biak khawh an si lo.
Sihmanhsehlaw van le vawlei a uktu Pathian cu khuate, caw rawl einak kuang chungah aa thum. Hi nih hin Jesuh Khrih cu zaraan minung( mi sawhsawh te) sinah aa cawhmi, mi tampi ( ahopauh ) nih ton khawhnak ding lam a kawlmi Pathian a sinak a langhter. Cucu mi vialte caah thawngtha a sinak a pakhatnak.

II. Tukhal sinah phuan a si.(Vs 8-12)
Tukhal hi mi nih nautatmi le namnehmi, zeirellomi an si. Milu relnak zong ah telh an si lo, .Cucaah khua ah um loin ramlak i an riahnak hi a si, ti a si. Bethlehem ah hin nusal, pasal aa timi an um len ko lai. Sihmanhsehlaw biatak cu mi nih zeirel lomi tukhal hna sinah phuan a si i, cu biatak kong a phuang hmasabik mi minung cu minung cazin ah telhlomi tukhal hna an si.
Pawngkam nih zeirel lomi, khua le khrihfabu nih minung ah ruah set lomi thleimi (hlawtmi) kan um sual maw? Jesuh Khrih cu minung nih minung cazin ah telh lomi tukhal hna zong nih ton khawhmi Pathian a si. Cucu mi vialte caah thawngtha a sinak pahnihnak.
III. Simeon nih a pom (Vs 29-31)
Jesuh a pom taktakmi le thinlung le thlarau mit in a hmu taktakmi kan si maw? Tlangbawi Simeon nih Jerusalem biakinn chungah Jesuh cu a tang cungah a pom. " Miphun vialte zohchih in khamhnak ding na timhmi cu ka mit in ka hmuh cang,"tiah a ti. Jesuh cu khuapi ah a ummi tlangbawi zong nih ton khawhmi a si. Cucu mi vialte caah thawngtha a sinak pathumnak.
IV. Kum 84 a si cangmi tarnu (Anna) zong nih ngakchiapa kong a chim.(Vs 37)
Simeon nih ngakchiapa a pom lio ah hin Anna zong a um ve. Bawipa a tanh i biakinn a kaltak lomi tarnu zong hi Jesuh Khrih nih aa hmuhter. Tarnu nih Pathian a thangthat i ngakchiapa kong cu midang sinah a chim ve. Jesuh Khrih cu tar nuhmei zong nih ton khawhmi le a thawngtha chimtu ah a thi deng cangmi tar zong a hmang duhmi Pathian a si. Cucu 'mi vialte caah thawngtha ' a sinak a palinak.

V. Satil zong nih an hmuh.(Vs 9-14)
Caw inn ah a chuah caah caw zong nih an hmuh ve theo lai timi ruahchannak in a si. Jesuh Khrih a chuahnak hmanthlak zeimaw ah cun caw zonmg an suai chih theu hna. Sermi thildang a sia a herh lomi Pathian sisehlaw mi vialte caah thawngtha a si kho hnga lo. Zeicahtiah minung cu serrmi thildang tel loin kanmah lawng in a nung khomi kan si lo. Cucaah Jesuh Khrih cu sermi thildang zong a sia a herhmi Pathian a sinak hi 'mi vialte caah trhawngtha a sinak' a panganak.

VI. Nichuah lei mifim zong nih an biak (Matt. 2: 11)
Vawlei fimnak in a khatmi, mirum, milian zong nih ton khawhmi Pathian a si. Cucu mi vialte caah thawngtha a sinak a paruknak.

VII. Vanmi zong nih an thangthat (Lk 2;9-14)
Khrih chuahnak cu vawleimi ca lawngah si loin vanmi ca zong ah thawngtha a si. Cucu mi vialte caah thawngtha a sinak a pasarihnak.

Biafunnak:
Minung nih fa kan ngeih tikah le kan i lawmhnak thlacamnak kan tuah tikah mah chungkhat, rualchan-cingla le mithawngtha, thil ti kho deuh kha siaherh in kan sawm tawn hna. Jesuh Khrih cu cuticun a si lo. Vanmi he, vawleimi he, mirum he, mifim he, tar hna he, cawnpiaktu saya hna he, namnehmi minung hna le satil tiangin siaherhnak a ngeimi a si. Duhdanhnak le thleidannak ngei loin a kan siaherhtu a si. Cucu mi vialte caah thawngtha a sinak cu a si.
Matthai thawngtha cu Judahmi caah tialmi a si bantuk in catialtu nih Jesuh Khrih a chuahkehnak a zawt tikah Abraham in a donghter (Mtt 1:1-16). Cu nih cun Jesuh cu Judahmi chungin a chuakmi le Judahmi Pathian a si, timi lungput a langhter. Judahmi nih Pathian cu anmah Pathian le anmah ca lawngin an rak i ruah caan kha a rak um taktak.
Luke thawngtha cu Gentailmi caah tial a si bantuk in catialtu nih Jesuh chuahnak a zawt ve tikah Adam cu Pathian fapa a si, tiah a ti(Lk 3:23-38). Jesuh cu Adam hrinsor a si, Adam chungin a chuak i Adam cu mi vialte pa le Pathian fapa a si tinak a si. Cucaah Jeusuh Khrih cu mi vialte caah Pathian nih a kan pekmi Pathian Fapa a si, tinak a si i cucu "MI VIALTE CAAH THAWNGTHA " a sinak a muru cu a si.




Pacung
Paletwa