Tuzarh November 18-20, 2009 ahkhan Mizoram khualipi Aizawl ah ramkip ummi Ethnic Chin (EC) hruaitu pawl cu a voi 2nak Chin National Assembly meeting an tuah. Cu an tuahnak ahcun a ra laimi 2010 kawlram thimnak ah zeitin dah timh tuahnak kan ngeih lai ti kong hi a bik in kan ceih mi a si tiah Chin National Concil (CNC) biachimtu Pu Ral Hnin nih a chim. Hi CNC ahhin ramkhel riantuan pawl, hriamtlai pawl, siangngakchia thing pawl le mipi leiin buu a tuah mi pawl an i tel. Germany ram, US ram le Canada ram hna in Chin aiawhtu pawl zong an i tel. Hi an tuahnak ah CNC ruahnak petu Dr Harn Yanghwe (Kawlram a pakhatnak President Sao Shwe Taik fa) zong aa tel kho ve. Cheukhat Chin ramkhel riantuantu pawl nihcun hi Assembly hi an lung a tling lo ngai i tel zong an duh lo. Cho Ethnic Concil (CEC) i an chairman Kee Le Awm nihcun hi CNC nih hin Chin miphun vialte a aiawh kho lo, ziah ti ahcun i tlukceo nak a um lo, CNC timi nihcun Chin miphun vialte a aiawh hrim awk asi a ti. Cun Matu Youth Organization (MYO) an President Van Tu zong nih hi CNC tuahmi cungah a lungtling lonak kong a chim ve. “Hi CNC hi Chin miphun a aiawh kho rih lo nain kan dih lakin kan tuanti ahcun a aiawh khawh te ko lai” tiah Pu Ral Hnin nih a ti. CNC cu 2006 kum ah rak dirhmi a si i a voikhatnak Assembly cu India ram nichuah chaklei Manipur ramthen Mount Sinai khua ah an rak tuah. CNC ah aa telmi group pawl cu Chin National Front (CNF), Chin National League for Democracy (CNLD), Mara People Party (MPP) le Zomi National Congress (ZNC) pawl an si. CNLD, MPP le ZNC hna hi 1990 kum thimnak (Members Of Parliament) ah a rak i cuh ve mi le mipi nih thimmi an rak si i CNF hi 1988 kawlram buainak ruangah ramleng a zammi siangngakchia pawl le mino pawl nih dirhmi group an si hna. (Ref: Mizzima)
No comments:
Post a Comment