ATHA LE THALO HNGALHNAK THING (Setan hmuhsaknak)

Zei ruang ah dah Krih nih a tuar a herh

Apeh...............................

Setan cu Pathian sinah aum lio ahcun Archangel ti asi. Pathian sin I aum lio ahcun Krih dawhnak thomh I fimnak sangpipi pekmi arak si. Sihmanh selaw mah sinak ah lungtlin lonak, duhfah hakkauhnak le Pathian bantuk siduhnak in Pathian tei a timhnak ruangah Evi le Adam Eden in thawl an si bang, van in thawl asi ve. (Ezekial.28:12-14, Isaiah. 14:12-20). Pathian sin a um lio hrimhrim tein Pathian nih a cohlan khawh lomi nunzia le duhnak dang, amah sinak ah a lung a tling kho lomi, mi dufak, hakkau, amah zawn lawn ruahnak in a khat. Minung lakah kan hmuhmi thatnak, sualnak ziaza cikip a thoknak sual ti hna asi. Mi awt/hngarnak le nahchuahnak in a khat. Pathian cungah um duhnak, ‘keimah’, timi lungthin angei. Van ah aum lio hrimhrim tein mitlau le Pathian kalh in a nung cang hih. An hlonh hnu zong ah a tuah khawh lomi cu Pathian duh zong asi. Pathian a doh I hlonh asi hnu ahcun Pathian nih amah ah pommi le cohlan khhawmi a ngei tilo. Atuahmi cu amah ruah ah thiltha sihmanh selaw Pathian nih a pawm lo ahcun sual asi. Cu sualnak cu Pathian nih a ngaithiam lo. Hlohhral tu a timh. Amah ruah ah thatnak nih Pathian phung le nawlbia a zul kho lo. Atlinh fawn lo.

Moses Nawlbia nih khan Setan nih a ukmi minung titsa thinlung tuahsernak nih cu nawlbia cu a zulh khawh lo zia a langhter. Achung ah setan tihna a luang I thlarau nih cencilh lomi minung nih Nawlbia cu a zul kho hrimhrim lo. Pathian nih sualnak cu a ngaithiam fawn tung loh. Minung cu thah ding asi. Cu ti cun minung a thi lai nain sualnak cuu a thi lai lo ti a fiang. Cu ruang ah minung ai –awh ah saram tu a thawng a sang in an thi. Saram thisen in tlanhnak a ser piak lengmang nak thawng in misual cu Pathian nih a zuah. Minung chungah setan thu ko hmanh selaw, Pathian nih a kutchuak minung cu thah lengmang nih siang ai hlah kaw, a nunnak ding ah Amah nih a cohlanmi le a duhmi thisen(Krih tlanhnak muithlam a kengmi dotla saram thisen in luatnak lam tu a sial piak thihnak in a khamh tawn. Pathian nih minung hiti ko I a dawt hi unau khuaruahhar asi na ti ve lo maw. Amak in maktling khuaruahhar dawtnak asi. Krih ah fiang uarmar in hmuh/rel te lai.

Nawlbia cu um hlah selaw, sualnak cu sual a sinak a lang hnga lo. Zeica tiah tahnak caah Nawlbia um lo ruangah asi. Kawlram ah kan um lio ahcun nu le pa nih fale an vuak, an bengh, an cumh, an kingh hna I, a ho nih zei ah rel asi lo. Chimh hrin cawnpiaknak pakhat ah kan ruah. A sualnak kan hmu lo. Nitlak ram kan phan I, cu bantuk a tuahmi nu le pa cu palik kut an phan. An tuahmi cu anmah ah thil tha, fale duhsaknak asi ko nain mirang ram Family nawlbia le phung nih a pawm lo caah fale a vuami nu le pa cu sual puh, fachuh, leicawi an huah tawn. Cu thil hna, Laitlang ah ka caah sual asi lo cu Family Nawlbia/phung a um lo ruangah asi. Asi nain Nitlak ram ah ka tuah ahcun Family phung ruangah misual ka si nak a lang. Cu bantuk in Setan zong amah ruahnak ah phungtha atimi le nunnak um ve hmanh selaw Pathian nawlbia le phunglam asi lo ahcun, Pathian nawlbia le phunglam in tah tikah sualnak, mithi, mizaw, mitlau, micaw, keibai, zeng, phar, misual, lainawng, mifir, le chiatnak vialte an I pumhnak hnompon: chungthu lengnaal, thlan, rungrul le tholung nih a bomhmi hnompon, muihnak le thihnak vialte pa asi. Cu bantuk nunnak a ngeimi Setan nih cun Eden/ Dum zong hi ka ta tiin hmun arak cuh ve I, Pathian cu lang hngan in a doh. Atang tahchunhnak ah hin a fiang ngai.

Laitlang ah khin fur canah paa kan hrawng tawn. Pachia pakhat cu thihnak asi ti ka theih ruangah ka hrial. Mi chimnak in thihnak asi ti ka hngalh. Amah ah thihnak poison um hmanh selaw, ka ei lo ahcun ka caah thihnak asi lo. Thihnak asinak a fiannak cu ka eihnu I ka thihnak ah alang. Tahchunhnak ah, ka hawinu, ka pasal he arak iduh bal cangmi nih, acung ah a lungfahnak kha keimah hmang in lehrul cham a duh ziar ruangah thihnak asi ee tiah ka lanhtak mi paa cu thihnak asi lo, eiko tiseh law: Cu paa(musroom) cu amui zoh ah aa dawh. Sen lingleng tein a um. Mit a hlang. Ka hawinu bia zumh sual ah, kei nih ka chumh I ka ei. Ka ei hlan ah ka cungah zeihmanh a tuah kho lomi thil cu ka kaa chungah ka vun ituh, ka khai I ka dolh. Ka paw a vun phan. Ka pawpi nih arak rial zau I ka thisen zungzam ah a vun kuat cang cun, cu hlan ah thiang hirhiar tein a umkal mi ka thisen cu tur(poison) nih anoih dih I thianglo an hung si dih. Cu poison nih cun ka chungah a tuan lio ah, a ziaza zong lengah an hung lang ve. Ka paw afak. Ka luakchuak, ka lungmit, ka mit amal, ka lu a fak, ka thawchuah a tet I a rauh hlan ah lungfim loin ka tlu I ka thi.

Ka pasal arak lawi I a vun ka auh. Ka let tilo. A vun ka hmuh cun a ka auh, a ka hninhsaih, zeiti a ka tuah zongah mithi nih cun zei ka hngalh tilo pinah ka thi ti hmanh ka hngal tilo. Cu ticun can tlawmpal te chungah miruak le tongh tham fihnung ka hung si colh. Cu cangka cun ka pumsa ah midang an rak chuak ve. Ka nundam lio ah cawlcang kho loin thisen ralkap nih arak temton mi hna, ka pumchung zawtnak rungrul pawl cu le ….thisen ralkap vialte an thi dih cang I ral an um tilo ti thei ciammam hna kaw, a kenkip in an rak tho I ka pumsa cu duhtawk in sawksam hram an thok. Ei hram an ka thawk. Cu ticun ni hnih thum chungah chunglei in ka rawhnak cu lengah a chuak I ka thu, ka nam colh. Cuti ka si hnu ahcun midang cu chimlo, nizan ah a ka pawmtu ka pasal ca hmanh ah fihnung le tongh har ka si cang. Keimah nih mithi ka si le silo hmanh ka hngalh lo lio ah ka pasal thinlung ahcun mithi, zeihmanh lo ka si cang. Zeitluk duhdawtmi hmanh siseh law, a thinlung le a innchungkhar in a ka thawl I vulei ah a ka phum a hau. Athinlung le a mit hmuh ah mithi, miruak, mitoih, mithu asi cang komi kha a nunchung umpi khawhnak ding lamdang a um tilo. A thinlung ahcun leitlak he ka dang tilo. Cu ticun ka duhnak tel loin a thinlung le chungkhar in chuah le dawimi ka si. Cucu Setan dinhmun asi.

Kan vulei pumsa zong rul a pek. Leidip na ei lai ati. Vanah Eden ah chiah a tim tilo. Pumsa cu setan sinah thlan ah pek asi cang. Tuan lio ah mirang ca in Dr. Bawi Uk Thang nih a vun thlahmi kha kan re cio dek maw. Africa ram ka khat ah Setan(khuachia) a bia I, zumtu hrawh ding ah fakpi in rian an tuantermi pa kong asi. Cu pa nih cun Khuachia(setan) thawnnak an ngeih khawhnak ding training an pek lio hna ah miruak a toih cuahmahmi zong an eiternak kong a chim. Luak bak loin an ei a hau. An luak ahcun cu test cu an sung I a dang an kai kho lai lo. Kan pumsa cu leidip asi I setan setan covo ah a pek lawlaw. Krih ah Amah nunnak thlarau chungah a kan hrin hnu tu ah chunglei in Krih nunnak thlarau nih nifatin siamthar lengmang bu in Amah mizia lawhnak taktak a phak tiang a tundin, a hruai, a thianter I Amah umnak inn temple ah a canter hnu hmanh ah kan thihni ahcun pumsa cu a hlonh I kan thlarau tu vantaksa in a thomh I a kalpi. Minung zong minung kan sichung te lawng kan iduh I mithi kan sini ahcun ihlonh asi. Minung le minung hmanh thih hnu ah kan iduh tilo ahcun Eden tlukchiat hnu ah Bawipa Thlarau le Amah muisam lawhnak ah a thinlung ah a thi cangmi cu Vancung inn chungkhar ah ka mo, ka dawt, tiin chiah awk a tha lo. Toihnak, thutnak, tholung, rimchia, nih van chungkhar a zawtter dih hna lai. Pathian nih minung cu zeitluk hmanh in daw cukmak ko selaw, Amah thinlung ah mithi asi hnu ahcun a siang nalo ruangmang in vulei ah a thawl hna-nak asi. Cucu thihnak thingthei umtu ning asi. Cu caah thihnak thei tlai a eimi Evi le Adam hrinsor pohpoh thihnak fa kan si dih ve. Hihi Thihnak thingkung a chia le a tha hngalhnak thingkung nih a tuanning le Evi le Adam an tluknak dinhmun asi. Cross thihnak kaltang in Krih nunnak kan co hlan nun asi. Midang ah belh hlah. Pathian le Bible nih hin ka ihngalh lomi nangmah le keimah kong dahkaw an chim.

Kan sining kan fian lo chung poh cu dawtu dawtnak a sunlawi zia, a rilzia, a thuhzia kam hngal fiang kho lai lo. Kan hgnalh lo ahcun lomh awk zong kan hngal lo. Lawmh tlak zong ah kan ruatlo lomhnak zong kan ngei kho ve lo.

Bawipa nnih sunparnak co ko seh.......

Peh than ding.....

Sui Chin


Source::LAIFORUM@yahoogroups.com