Hringtu Pa Le Ni Tuanbia Tawi

1909kum, khuasik thla a vundih i tthal khuapau a hun luh caan ah khin Sonora Dodd cu Zarhpi ni pumh dingah Biakinn ah a kal i aa pum. Cu ni cu “Hringtu Nu le Ni” a si caah phundang deuh le sunglawi ngai in pumhnak caanhman a si. Thawngttha chimmi Pastor nih Hringtu nu le kong he pehtlai in thawngttha a chim tik ah hringtu nu le hna cu innchungkhar ah an biapit ning le, fa le cungah nunnak pek tiang ngamh in dawtnak na ngeih ning, cun fa le hna nih hawi an lawh khawh ve nak hnga ti in harsatnak tampi lak ah rianhrang ttuan in fa le cungah dawtnak an langhternak kong kha fak piin a chim. Cu ti i Pastor pa nih nu le kong tthatnak le nu le nih fa le cungi an ngeihmi dawtnak kong a chim tik ah Sonora nih cun zeihmanh a thei fiang kho ti lo i lungaw ttawm ngaiin Pastor chimmi thawngttha cu a ngai. Zeiruangah Sonora nih hringtu nu le dawtnak cu a theih khawh lo ti a siahcun anih cu a ngakchia lio tein hringtu nu nih mual a liamtak hna caah nu dawtnak le nu zohkhenhnak pakhat hmanh a thei manh lo. Sonora te hi unau 6 an si i cu an unau 6 cun apa pakhat lawng nih a zohkhenh hna. Apa nih William Smart ti a si i ralkap in pensen a lami a si. Cutite cun pahmei dirhmun in anu nih a roh takmi hna fa 6 cu hringtu nu can in siseh, hringtu pa can in siseh, harsa ngaingai in a rak cawmken hna i a kan zohkhenh hna. Cu caah Sonora caah cun a pa William Smart cu a pa zong a si i a nu zong a si. Cu lio caan cu ram chung ral a thawh dih kaa a sitik ah fa 6 zohkhenh chimlo, mah pumpak pawcawmnak ca hmanh ah ei le din a har lio caan a si. Cu lio caan chimlo, nihin kan dirhmun hmanh ah hin hringtu nu lo in fa 6 zohkhenh ding cu a fawi hrimhrim lomi thil a si.Cuni pumh a dih tik ah Sonora nih cun fak piin khua a ruah tik ah hringtu a pa nih harsat tuk lio caan ah harsa tuk le rethei tukin Sonora te unau 6 a rak zohkhenhmi hna a ruah tthan tik ah hringtu pa le zong hi hringtu nu le bantukin upat pek awk an tlak hrimhrim ve ko tiah a ruah caah A Voi 1 nak Hringtu Pa le Ni cu June 19, 1910 ah USA ramkulh, Washington peng, Spokane khua ah a sunglawi ngai in a rak tuah. Zeiruangah dah Sonora nih hringtu pa le ni cu June thla thengte ah a tuah ti asiahcun Sonora hringtu a pa William Smart cu June thla chuahmi a si caah asi.Cu ti i Sonora nih hringtu pa le ni a rak thawkmi te cu duhsah duhsah tein hmunkip le kaa kip te ah rak tuah cio ve lengmang a si. 1924 kum ah cun USA President Calvin Coolidge nih hringtu pa le ni cu ram chung tuah awk ah a tlakmi thil a si hrimhrim ko tiah hnatlaknak le thazaang peknak a rak chim. Cun caan saunawn a rak rau i 1966 a rak phak tik ah cun USA President Lyndon Johnston nih June thla zarh thum nak cu hringtu pa le ni siseh tiah minthuhnak le thawngthanhnak a ngeih. 1972 a rak phak tik ah, President Nixon nih June zarhthumnak cu Hringtu Pa le Ni ah ser i ramchung ah pehzulh in tuah siseh cang seh mithutnak le thawngthanhnak a ngeih. Cuticun Sonora Dodd nih hringtu apa upat peknak caah June thla i a rak tuahmi Hringtu Pa le Ni cu nihin ni tiang kan vawleipi nih pehzulh in June thla zarh thum nak cu Hringtu Pa le Ni tiah sunglawi ngaiin caan hman zungzal a si.Sihmanhsehlaw, ni hin kan vawleipi nih Hringtu Pa le Ni tiah a titik ah hin fa a ngei i pa dirhmun in innchungkhar ah a dirmi hna lawng siloin fa a ngeih lo zongah siseh, kum le khua in mino a si zongah siseh, pawngkam caah maw, Khrihfabu caah maw, khua le peng caah maw, siloah ram le miphun caah maw tiin pa dirhmun ah a dirmi kan pa le hna zong kha upatnak pek nak an ngeih hna i hringtu pa le ni ah sunglawi ngaiin laksawng zong pek chih an si cang. Cu a si caah hawidawt unau hna, hi vawlei caan tawite kan nun chung ah hin kan innchungkhar caah maw, kan khua le kan peng caah maw, kan Khrihfabu caah maw, siloah ka ram le kan miphun caah pa dirhmun in kan dir khawhnak lai zuamnak le thlacamnak in hmailei ah kar hlang hna usih.Hringtu Pa Le Ni caah Baibal Catlang ka thimmi: Phungthlukbia 23:22-26 "Nangmah an hringtu na pa kha a bia va ngai, na nu kha a tar tikah va serhsat hlah. Biatak kha vaa cawk law zuar ti hlah, fimnak, cawnpiaknak le hngalhthiamnak kha i cawk hna. Miṭha mi hna an pa cu aa lawm ngaingai lai; fapa fim a hringmi pa cu a fapa hna cungah khan aa lawm lai. Na nu le na pa cu lawmhter hna, nangmah an hringtu cu lawm tein um seh. Ka fapa, ka bia cu i chingchiah hna law ka nunning hi i zohchunh tuah."Hringtu Pa le Upatnak tampi he,

Danny Bawi Thianhlun

Chicago,

USA