Thursday, January 12, 2012

CNF Raibawi, Tongmangham Solomon Thang Ding Hakha Tlunnak


Kum 23 chung ram le miphun caah nunnak thap in ramtang ah rian a tuanmi CNF raibawi Tongmangham Solomon cu Kawl cozah he kahngolhak ceihmai dingin Hakha khua a phan i, kum 23 chung a kal taakmi sunghno a nu he ton thannak hmanthlak ka hmuh ah ka khuasik saisem a chuak. Keimah si ve ning law ti ka ruah ah ka mithli a hai.
Ram caah nunnak a pemi ka u, Salai Sang Hlun [ CNF Vice Chairman], Ka hawi, Salai Sang Za Hmung [ RIT Sianghleirun a rak kaimi] A Thiang [ 88 buai lio Falam khua i tuahmi Chin Student Union Metingah ah Hakha aiawh in a telmi ] Salai Uk Lian Thang le Salai That Ci mithlam ah an cuang hringhren. 88 buai lio ah a telmi Dr. Sui Khar le Pu Ral Hnin zong kum 23 hnu ah chungkhat sahlawh rualchan hna he dam tein ton thannak caan a ngeih caah kan lawmpi hna nain thlanmual ah a liam cangmi hna chungkhar caah cun ngeichiatnak zuun in kan zawt ni a si.
A tangah Tongmangham Solomon hmanthlak siaherhnak he kan kuat chin hna.
Sunghno A Nu he Kum 23 Hnu Ah
Sunghno nu le dawtnak cu khuaitizu bang a thlum zungzal ko lai.
Hakha Khua Chungkhat Sahlawhrual Chan le Sang le Zawl Hna Zong Nih An Philh Lo
Hakha Sizung Hmai Ah
Atu Lio Lai ramkulh Vuancichuk Pu Hung Ngai He
Hakha Mipi He Ton Biaruahnak
Tuzan ah hin ralkap cozah nih thong a rak thlakmi 88 chanchuak Sianngakchia hruaitu, le ramriantuan ruangah thong a tlami hna an chuak hna lai tiah thawng a thang, an chungkhar hna nih thong innka in an bawmh lio hna a si. Thaizing zingka ah an chuah le chuah lo kan hngalh te lai. Dide rak ngai cio u.
Ram caah nunnak a pemi hna upatnak he,
Salai Lairamthang
( Sung Sung pa )
Washington D.C
USA


Source:: yccf-international@yahoogroups.com

No comments: