Sunday, January 1, 2012

2012 Ah Kan Nun Lam Hruaitu


Bible Relnak:
"Zeitindah kan nun ti kha tha tein i zoh u. Mihrut bantuk in um hlah u, mifim bantuk in um u. Atu kan nikhua hi caan chia a si caah caan tha nan hmuhmi paohpaoh kha tha tein hman i zuam u. Mihrut si ti hlah u, Bawipa nih tuah hna seh ti an duhmi hna tu kha tuah i zuam u. Zu ri hlah u, zu cu nanmah hrawktu lawnglawng a si ko, Thlarau tu khan khat deuh u." Efisa 5:15-18)


BIAHMAITHI

2011 cu tlaih khawh lo in a liam ko cang. 2011 chungah mirum, mifim, bawi le upa tampi an thi. US ah apple computer, Ipod a thoktu Steve Jobs, Maj. Kadafi, Kim Jung IL tbk hna an liam. N. Korea pres. Kim Jong Il nihcun Communist a dir khawhnak hnga mipi a hrem hna i, Czech pres. Vaclav nihcun Mipi an dir khawhnak hnga communist uknak a hrawh. Cubantuk cun 2011 ah kan i ruah bu in siseh, kan i ruah loin siseh kan tuahmi vialte kha 2012 ca le kan thih hnu tiang caah thlaici kan tuhmi an si dih. Mi nih a tuhmi cu a zuun ko lai (Kalati 6:7). 2011 i kan tuah ciami cu remh le let awk a tha ti lo nain 2012 caah cun caan tha kan ngei rih, 2012 ah zeitindah kan nun lai?


1) Leicung kan nun Caan hi a tawituk:

Kan nunnak hi minmeibantuk, tikhu bantuk, thiamtleng bantuk, pangpar bantuk, ram bantuk men a si. Zingka a par i zanlei ah a uaimi bantuk lawng a si (Isai. 40:6-8). Kan nunnak cu kum 70-80 lawng a si (Sam. 90:10), asinain cu zat hrimhrim kan nung lai ti awk a tha lo, kan chuahka zong ah thih khawh a si. Bawipa, "kan nunnak hi zeitluk indah a tawi tihi kan hngalhter law kan fim deuh lai (Sam. 90:11). 2012 hi kan thih kum hei si sual sehlaw khoika ahdah kan kal hnga, Bawipa ton dingah timhcia kan si hnga maw?


2) Kan chan hi caan chia a si:

Voikhat cu ABC-usa EM nih a ka thawh i, "Pastor Van US ram ah laar le minthan na duh ahcun biatak chim hlah, mi duhmi lawng chim law cucu a si ko tiah a ka ti. Atu kan chan cu chimtu zong nih biatak nak in mi theihduhmi chim caan le a ngaitu zong nih biatak nak in capo luala ngaih duhdeuh caan a si. Nihmanungbik ahcun, "... Mah zawn lawng ruatmi,Pathian nak in nomhnak a duh deuhmi, biaknak hi a lenglei lawng in i tlaih i a chung ummi thawnnak taktak a duh tung lomi, cawn le hngalh a duh nain biatak a hngal kho lomi" (2Tim. 3:1-7). Kan pawngkam ummi miphun dang hi zoh ah Biakinn a panhmi an tlawm tuk cang, phaisa an ri dih. Kan nih Laimi tah zeidah kan ruahmi, sehchihmi, tinhmi le duhmi taktak a si hnga? Lungfim kan herh


3) Bawipa duhnak theih le tuah.

Nebukhanezzar nih amah dinmi le eimi Zu thawthaw le sa thawthaw a pek ko hna nain Daniel le a hawile nihcun Bawipa duhnak an theih i an dingei duh lo (Dan. 1). Tuchun Laimi tampi nihcun vanthat kan ti men hnga? Bawipa duhnak tampi lak ah Paul nih a cunglei ah a chimmi cu, "Zu ri hlah u .. thlarau in khat u" ti a si. Hika Paul cawnpiaknak ahhin kan tuah lo dingmi rian-zu rit lo (Passive) le kan tuah dingmi rian- thlarau i khah (Active) tiin then usih law, thlarau i kan khah lo hmanh ah zurit tal cu kan hrial awk a si. Cun Bawipa duhnak tiah kan ruahmi thiltha tuah ciocio hmanh ah Mary tuahmi bantuk i "a tha deuhmi le a hmunmi thiltha" (Luke 10:42) kan i thim deuh awk a si.


Biadonghnak


Mizeidah/ahodah ka si (who am I) ti hi kan sining i fian taktak lo ahcun zeitikhmanhah Pathian dawtnak hi kan fiang taktak kho lai lo. Fapa tlau cu "a lung a hung fim (when he came to himself) i," a lung a fim hnu lawngah a pa dawtnak kha a fiang (Luke 15:17) i a pa sinah a kir than. Kum a thar cu lawmh awk a si ko nain khatleikam ahcun kan thihnak ding kum khat kan naih deuh tinak a si. Cucaahcun 2012 cu kan sining, kan caan le Bawipa duhnak hngal in Bawipa lei ah i mer dingin kan sawm hna. Kum Thar Lawmhnak nan cungah um ko seh, Amen.

Van T Lian
Houston, TX
USA



No comments: