free web counter
greyhound runningHurricaneRunning Ostrich

Saturday, September 18, 2010

BIAKNAK HE PEH TLAI IN


“Kirhfa” kan ti le cang ka in kal tak awk a tha lo mi cu Roman Catholic krihfabu hi a si. Kan unau Catholic pakhat nih “RC cu a hram pi pei ka si cu!” a ti mi hi a hman tiah prove khawh mi thil tampi a um ko. Catholic Chrihfabu I an zumhnak, an ruahnak le an theologies pawl hi a ropi ngei ngei ko. Biaknakdang kong he pehtlai in an theology zong hi rel ah hin a tha tuk hrinhran. Cu an theology le tuni protestant pawl nih biaknak dang he peh tlai in kan ngeih mi theology hi a rak I peh tlai mi a si tiah ti khawh a si. Vatican nih biaknak dang he pehtlai in a chuak mi ca (documents) pathum a um. Cu hna cu: Nostra Aetate, Dominus Iesus le Lumen Gentium an si. Hi pathum hrambunh in Catholic pawl nih biaknak dang an hmuhning hi a tawite in kan vun zoh hna lai. A bom tu ah Catholic theologians a si mi Karl Rahner le Hans Kung I an theologies zong a tawinak in kan vun zoh chih lai cu.
Lumen Gentium kan zoh hmasa bik lai. Hi Catholic document ah hin kap hnih in kan hmuh khawh. Pakhat cu Catholic nih hin an krihfabu (Roman Catholic Church) hi a biapi ngei te ah a chiah. Mi pakhat nih (a zeibiaknak poah poah) nih khamhnak tling a hmuhnak ding caah hin Catholic member a luh a herh ko ti lei kap in a kal pi tiah ti khawh a si. Cu he peh tlai in Tipilinnak (water baptism) le Bawipa Zanriah (Eucharist) hi a biapi tak tak ah an chiah mi a si fon. (section 7, 8, 11). A dang pakhat cu biaknak dang hi upatnak le tihzah nak an pek fon. (section 15). Jews pawl in an biaknak a si mi Judaism le Mulims biaknak zong hi upatnak an pek. Vawleicung bianak dang dang zong ah hin a tha mi le a dawh mi thil, biadik le biahman tampi a um tiah an pom fon. A si nain cu an ngeih mi thil tha te te hi Pathian an theih/hmuh khawhnak ding caah lamkaltu men men a si tiah an ti fon. (Section 16). Cu caah cun Chrih nih a kan fial mi rian, khamhnak thongtha bia hi kan phuan a herh ko tiah an feh ter. (Section 17).
Dominus Iesus kan zoh tik zong ah hin Catholic Kirhfabu hi mipakhat nih khamhnak tlamtling a hmuhnak ding caah a herh tuk mi thil pakhat ah a chiah thiam thiam ko. Tipilinnak (Water Baptism) le Bawipa Zanriah (Eutachirst) hi a herh tak tak mi zulhawk thil ah a chiah ko. (Section 16,17,20) Biaknak dang hna zong an ngeih mi zumhnak le ruahnak pawl te te zong hi thiltha ah a hmuh piak ve ko hna. Cu hna nih cun khamnak tlamtling lei ah cun a hruai kho hna lo a ti. A ruang cu cu hna ah hin a hman lo mi thil (superstions le error) a tel caah a si a ti. Cu caah biaknak dang pawl he hin biaruah le ceihmaitinak (Religious Dialogue) hi kan ngeih a ho tiah hna a tlak pi. Biaknak dang pawl he biaruahnak/ceihmainak kan ngeih tik ah hin kan I khat ko (equality) hi kan ngeih a ho a ti. Si nain kan I khat ko tinak a sullam cu minung kan sinak (the equal personal dignity) tu kha a si I, kan doctrine le Jesuh kan zumhnak ah a si lo tiah a ti fon. Jesush cu lam, biatak le nunnak a si nak hi kan phuan a ho ko ti hi a si ve thiam thiam ko. (Section 22)
Nostra Aetate rel ah hin lung a hmui ngei te. Judaism, Hinduism, Muslim le Buddhism pawl I an zumhnak pawl le nifatin an nunnak ah an hman mi pawl hi thil tha an si tiah a pom. Cu caah Chrihfa pakhat nih zumlo tu biaknak dang hna sin ah khamnak thongtha a phuang pah bu in cu hna pawl biaknak nih a ngei mi thil tha te te hi hmuhkhawh le theih khawh an zuam ve lai ti a si. (Section 2)Ka lung a hmuai tuk mi cu Muslims pawl cung I a ngeih mi thil hi a si. Hnulei (past) ah Iralnak le Idohnak ngei ko hmanh u sih law, kan philh ti hna lai I, vawleipi ah hin daihnak (peace) le thilhman (justice) a um nak ding caah kutsih in riantuan ti hna u sih tiah an ti hna. (section 4) Biaknak ah a um mi kan unau hna hi kan dawt hna hrim a ho tiah an feh ter. (Section 5)
Catholic an ca tial pawl hi rel awk ah le theih fiang awk ah cun a har ngei mi thil a si. Cung lei ka vun tial mi zong cu keimah I fiannak le theihthiamnak in ka vun tial mi a si. Kan vun zoh mi ah a fiang mi cu Catholic pawl nih an Chrihfabu member sinak hi a bia pi ngei ah an chiah ko. Baiknak dang I a um mi hna nih khamnak an hmuh nak ding caah hin Catholic Krihfabu hi a biapi tak tak ah an chiah. Biaknak dang nih hin an ngeih mi zumnak nih khamnak lei a hruai kho hna lai maw? ti cu biahalnak a ngan pi a si. Hi an ca pawl (documents) ning a si ah cun “a hruai kho hna lai lo” ti lei kap hi a si ko tiah ka ruah! A si nain cheukhat nih “a hruai khawh ko hna” tiah catholic theology nih cun a kal pi an ti ve hoi.
Catholic theologian minthang tak tak a si mi Carl Rahner nih cun “supernatural existencialism” ti mi cung ah theology pakhat a chuah. Minung hi natural soh soh kan si lo. Pathian nih hin khuaruah in ser mi kan si a ti. Pathian I a zangfaknak (Grace) hi mi pakhat cio sin ah khuaruahar in langter a si tiah a ti. Minung sinak a pin lei tiang thieh khawhnak (transcendent revelation) a kan pek ti a si. Cu nih cun Pathian theihkhawhnak le hngalhkahwhnak tiang a kan hruai khawh tiah a ti. Cu theihkhawhnak nih cun khamhnak lei tiang a kan hruai khawh a ti. Cu ti a si ah cun biaknak dang hna nih hin Pathian nih serchihmi chung ah a tel mi theihkhawhnak nih khamnak an hmu kho tinak a si lai cu. Na cohlang kho ma? Cu caah cun zumhnak dang mi nung hna kha“thiehkhawh lo mi Kirhfa “ (anonymous Christian) an si tiah Rahner nih a chuak pi mi a si. Si nain Krih cu an theih le an cohlan cu a ho thiam thiam ee a ti. Pathian zangfaknak le dawtnak a tlingnak tak tak hi cu Krih hi a si ko a ti. Cun cu Krih cu Kirhfabu (Church or Catholic Church) ah hin a um ti a si. Cu caah Catholic krihfabu pi nih an rak zumh mi “khamhnak cu Krihfabu ah a um” ti mi hi Rahner nih a kal tak ti awk ah a har ngei mi a si. Rahner nih hin Pathian khamhnak hi mi zapi caah a si I an sin ah a phuang ko tiah a ti ko, nain khatlei ah cun Kirh le Chrihfabu a herhnak kong kha a dirpi thiam thiam.
Minthang theologian a si mi Hans Kung nih a ti ve mi cu Carl Rahner I “theihkhawh lo mi krihfa” a ti mi nih hin krihfa kan zumhnak a si mi khamhnak cu krihfabu lawng ah a um a ti mi lei kap a kal pi a ti. Biaknak dang hna kha “nan theih lo caah a si, krihfa nan rak si diam cang’ tiah a ti hna mi a lo a ti. Biaknak dang hna he biaruahnak (dialogue) kan va ngeih tik ah “krihfa pei an si ve ko cu” ti mi ruahnak nih khan biaknak dang pawl an thinlung ah khan ibiataknak kha a tlau ter a ti. An ruah mi cu kan chim len zong ah “krihfa pei nan si ve ko cu” tiah krihfa nih an ruah ko lai caah hin kan chim mi hi an caah suallam a ngei lo tiah an ruah ti a si. Cu caah Kung nih a chuak pi mi cu “Pathian” (theocentricism) cung tu ah hin khamhnak hi dir pi deuh u sih law a tha men lai a ti ve. Khamhnak hi Chrihfabu le Krihfa lawng ah a um ti mi kha si lo in Pathian sin tu ah a um ti uh sih law a tha deuh lai tinak a si. Biaknak dang I aum mi kan unau hna hi khamhnak chung ah I tel kho ve hna seh ti duhtuk ah a si rua. Si nain Kung nih a donghnak lei a vun chuak than mi cu krihfa kan ti mi cu Krih kha kanmah pumpak caah siseh, vawlei mi vialte caah siseh a sang bik ah a chia mi kan si ee a ti. Mivial te khamhnak caah hin “Kirh” kha a biapi tuk ah a chiah thiam thiam ko. Cu caah Kung nih “Khamhnak I amaruh cu Krih ah a um” (christocentrism) ti lei a dirpi tiah catial min thang pawl nih an ti.
Cunglei kan vun tial mi kan zoh tik ah hin Roman Catholic pawl hi kan hram pi hrim an sinak a lang tiah ka hmuh. Chrihfa kan zumhnak (khamhnak) ah hin kan unau a si mi biaknakdang pawl zong hi zeitindah kan telh ve khawh hna lai tiah a rak ruat hma sa mi an si. An theology le an ca (documents) pawl rel tik ah hin biaknak dang pawl nih thiltha, biahman, biadik tam pi an ngeih ve caah kan upat hna awk a si ti si. Sertu Pathian nih a mah an theihkhawhnak hnga ding caah Azangfaknak kha biaknakdang hna cung ah tampi a langhter ko tiah an pom. Si nain khat lei ah fak piin an dir pi ve mi cu khamhnak tlam tling cu Kirh le Kirhfabu ah a um ti hi a si ve. An duhnak cu Kirhfa hna nih hin Krih cu “a ka khamh tu a si” ti nak in “kan zapi tein a kan khamh tu a si” ti tu in phuang hna seh ti a si.
Unau hna! Laitlang ah cun Catholic le Protestant hi a dang tuk ah kan ruah. A hman ko! Kan I dannak zong cu a um len ko. Sihmanhsehlaw Catholic hna hi Protestants pawl nih “kan hrampi le zumhnak ah kan pa le an si ko” tiah kan zumh le cohlan a herh ko ti cu mah ka tial mi hmanh nih hin a langher ko hih. Cu caah krihfa a si mi poah poah nih upatnak kan pek hna awk a si ko ka ti. Sengthang kan dihlak zong nih upatnak pe hna u sih. Lungkhat tein Pathian caah le kan miphun caah kutsih buin kalti zungzal hna u sih tiah kan som hna! Pathian thlachuah kan zapi te cung ah phanhram ko seh!
Note:
1. Protestant pakhat nih a hmuhnak le a relnak a tial mi a si caah palhnak le hmuhsualnak a um kho mi a si. Cu ti a um ah cun a tial tu keimah palh a si ko lai caah keimah tu hi ka ngeithiam ko uh tiah nawl kan duh hna!
References:
Knitter, Paul F. No Other Name? A Critical Survey of Christian Attitudes Toward the World Religions. Maryknoll, New York: Orbis Books, 1986.
http://www.urbandharma.org/pdf/NostraAetate.pdf
www.vatican.va/roman curia/congregations/cfaith/documents/rc con cfaith doc 20000806 dominnus-iesus en.html
http://www.scborromeo.org/docs/lumen gentium.pdf

Na Unau
Thawng Hei
AGST
Manila, Philippines

Tuesday, September 14, 2010

Rak Zoh Ve Te Uh!

""Caw""



""Naa""


""Rang""



""Ar""

Pathian He Teitu Kan Si

Pathian He Teitu Kan Si
Bible: 1Johan. 5:4-5; Filli. 4:13


Biahmaitthi:

Minung kan nunnak ahhin teinak hmuh le teitu si hi kan herh taktakmi a si. A sungmi/tu si lengmang hi a duhmi kan um lai ti ka zum lo. Azei bantuk zuamnak hmanh ah teitu si hi kan i tim dihmi le kan duh dihmi a si. Vawlei kan nun cu thil phunhnih karlak ah a nungmi kan si i, zuammnak puai i a telmi bantuk khi kan si ko.

Teitu si hi kan nunnak ah a bia rak pit (important) tuk hlah sehlaw cu nunnak hi sullam tling a rak ngei hnga lo. Vawlei ah hin thil phun hnih a um peng. Teinak le sunghnak: Nihin ah nang tah, Teitu si ma na thim lai, Teimi (asungmi) si dah na thim lai?

Teitu si na duh ahcun Teinak Bawi kha na nunnak ah uktu Bawi ah na ser ve a hau. Vawleicung ah Teinak tling taktak a ngeitu pakhat lawng a um, cucu Krih Jesuh a si. Na nunnak ah Teinak hmuh na duh ve ahcun cu Teinak Bawi cu na nunnak ah hmunhma pe law, Uktu ah siter law, amah he cun teitu na si zungzal ko lai. Amen.

Mithiang Pawl nih cun Filipi 4:13 ah Thawnnak a ka petu Krih thawngin thil zeipaoh ka tuah khawh, ka teikhawh dih ko hna a ti. Mithiang Johan nih cun Krihfa ka si aa ti ve ttung i zumhnak der a ngeimi, negative mindset a ngeimi: Vawlei mi pei kan si cu zeitindah Pumsaduhnak le vawlei harnak cu kan tei khawh lai a timi hna kha challenge (sikhaw) a tuah hna.

Vawlei hi hodah a tei kho lai? ti hi a si. A phi (answer) a chuah thanmi, a pekmi cu hihi a si; Jesuh cu Pathian Fapa a si ti a zumhmi lawng nih Vawlei cu an tei khawh. Zumhnak in Vawlei cu kan tei khawh a ti (1John. 5:4-5). Amen! Zumhnak cu hopaoh nih phaisa pek hau loin ngeih khawh, hmuhkhawhmi a si.

Asi-ah hodah kan si kun?

Kan nih cu mi sawsawh kan si lo. Krih kan zumhnak thawngin kan nih cu Pathian he teitu kan si cang. Hallelujah! Kan nih cu teitu kan si. Thihnak teitu, harnak teitu, vawlei teitu, pumsaduhnak vialte teitu, sualnak teitu, mah le mah aa teitu Krih kan zumhnak thawng le kan nunnak ah Thaing Thlarau hmunhma kan peknak thawngin kan si cang. Amen!

Zumtu nih cun harnak le tukforhnak hi ton phung a si. Harnak le tukforhnak kan tonmi cu kan tlukthainak ding ca, kan rawhnak ding ca, Pathian kan philhnak ding ca le kan sunghnak ding caah si loin teinak kan hmuhnak ding caah le kan nunnak hmangin Pathian Sunparnak a langhnak ding ca tu ah a si deuh ton.

Mithiang Peter zong nih Ti le Thlarau in a hrinthar cangmi hna nih cun, tluk khawh le tlau khawh, kal sual khawh a si lo nak /zia kha fiang tein a langhter. 2Peter 1:10, “Cucaah ka u le ka nau hna Pathian nih an kawhnak hna le an thimnak hna kha nan chungah fehter chinchin ko u; cu tin nan tuah ahcun an tlu bal lai lo” a ti. Cu nih a langhtermi cu Krih ah a hrinthar cangmi hna nih cun Vawlei sualnak vialte, harsatnak vialte, tukforknak vialte le thihnak Teitu kan sinak kha a si. A kalsualmi le a tlau thaimi cu Krih ah a hrinthar taktak lo ca tu ah a rak si, a tlau le a kalsual si loin a Hrintharmi nun chihkhat te a rak i cawn le a rak i hlan tu khi a si deuh. Khamhnak cu vuikhat ah zungzal ca a si. (Jh.3:16).

Jesuh Khrih nih zumtu hna kan caah thla a kan campiaknak Johan 17:15 chungah kan hmuh khawh. A cammi cu; hi mi pawl hi Harnak tong lo ding in le Satan tukforhnak tong lo ding in khamh hna kan ti lo, asinain an tonmi Harnak le tukforhnak kha tei khawhnak pe ko hna tiin a kan campiak. Cu caah harnak le tukforknak tong loding hi Bawipa nih a kan duhpiakmi si lem loin, harnak chung tu ah teitu si ding ah Jesuh nih a kan duhpiakmi a si deuh. Amah hrimhrim kha thihnak le harnak teitu cu a si. Amen.

Zeitindah Teitu cu kan sikhawh kun lai?

Johan 6:16-21 le Matthai 14:22-36- cung kan zoh tikah Jesuh ticung a kalnak kong kan hmuh. Jesuh nih a zultu pawl kha anmah lawng in Tilawng in rili khat talei ah a kal ter hna. Thlichia le tilet a tho Zultu pawl cu an thinphang. Jesuh ticung i a ke in a kal kha an hmuh tikah “Mithla” a si tiah an ti i an thin a phang i an ttih; Cutin an thin a phan i ttihnak in an khah lio caan ah Jesuh nih a thawh hna i “Nan thinphang hlah uh, Keimah pei ka si cu hnangam tein um ko u,” a ti hna. Cun Jesuh cu lawng chung ahcun an luhter i luklakte ah an i tinhnak hmun cu an phan.

Cu Tuanbia nih a langhtermi cu: A chel chel ahcun Pathian nih hin kan zumhnak hi a tak maw si, tak lo ti hngalhnak caah kanmah te lawng in a kan kalter ve ton. Harnak hna hi Pathian tel lo cun kan nunnak ah kan tong colh ton. Asinain cu bantuk harnak kan ton caan ah Jesuh nih “ttih hlah u nan sin ah kan umpi ko hna” a kan ti ve. Amen.

Hika zawn ah Lawng nih a langhtermi cu kan Lungthin kutka a si. Zultu pawl nih Jesuh kha Bawi a si ti an theih lawng siloin an Lawng chungah khan an luhter i, hmunhma an pek. Cu vebantukin Pathian Thiang Thlarau a um ko, kan sin ah a um ti lawng ngalh le zumh menmen hi a za lo, kan nunnak ah kan sawm a hau, kan lungthin kutka kan hun piak i Pathian kan chungah kan luhter, hmunhma kan pek, uktu ah kan chiah ahcun kan tihnak vialte a kan tei piak dih lai. Krih Thlarau kan chung a um tik ah kan nih cu Teitu kan si (1John. 4:4) “kan chung i aummi Thlarau kha vawlei mi a simi hna chung i a ummi thlarau nakin a thawng deuh” a ti. Thlarau Thianghlim kha kan nunnak ah hmunhma kan pek i, amah chungah kan nunnak kan chiah dih tik ah kan nih cu Jesuh teinak cu kan i hrawm ve i, teitu vialte lak ah teitu kan si. Pathian he teitu kan si, Hallelujah!

Ruakung (Bamboo) nunnak nih a kan cawnpiakmi

Pathian Thiang Thlarau kan chung i a um hnu cun Ruakung bantuk kan si. Rua cu step by step in a thang, A hrampi cu a fek, a nih cu flexible a si, cucaahThlichia zeitluk a hran zong ah awl tein a tlu kho bal lo. Thlichia a hrang deuhdeuh aa tthui deuhdeuh, nain a hram kha a sawsawh in a tlawng lo, a tlu lo. Sermi thil vialte hi Pathian lamkaltu an rak si dih ko (Rom. 1:19-20).

Mah Ruakung a langhtermi cu: Zumhnak a langhter. Cu Ruakung bantukin kannih zong Zumhnak ah hin nitin Step by step in kan tthan ve awk a si. Thlichia=Harnak; caan ah kan Zumhnak a fek i a thawn chin peng ahcun zeibantuk Harnak ton hmanh ah kan tlu kho lai lo, ziah ti ahcun Pathian Thiang Thlarau kan chung i a um caah, Teitu kan si. Pathian cu Teitu a si i, Teinak cu PT ta a si. Filipi 1:28 teinak petu cu Pathian a si a ti. Amen.

Harnak caan i tei kan i zuam lo ahcun Pathian Sunparnak langhter kan duh lo asi. Phungtlukbia 24:10 ah “Harnak caan ah na der ahcun na der taktak a si” a ti. Harnak ton loin teinak hmuhkhawh a si lo. Cucaah harnak caan ah a dermi si loin a thawngmi si i zuam hna u sih. Cu ti cun Pathian nih si hna seh ti a kan duhpiak fon. Harnak ton a duhlomi cu Jesuh Krih teinak a hram duh lomi an si. Kan harnak hi Jesuh nih kan ca i a tuarmi he tahchun ahcun chimh tlak asi rih lo. Cu harnak vialte cu Krih nih Vailam ah a khenhchih dih cang hna caah, harnak kan ton caan ah a kan bomhkhawh. Krihfa nun timi cu, Rua bantuk in step by step kan tthan awk si. Ruakung cu a tthang deuhdeuh i a tanglei ah a par le a hnah vialte kha a tum tthan. Cu ve bantuk Zumtu hna i kan teinak cu toidornak a si. Keimah timi lungput kan ngeih lio caan khi kan ral kan sungh lio caan te a rak si. Toidor nun cu teinak a si.

Harnak caan ah Pathian nih Zeitindah a Kan Hnemh Peng Ton?

Pathian nih harnak caan ah aw nem tein a kan hnemh peng tonnakmi Bia cu “Tih Hlah Uh” nan nih cu teitu nan si cang ti hi a si. Harnak kan ton caan le tukforknak kan ton caan paoh ah kan pawng tein Jesuh nih ttih hlah u a kan ti peng ve. Cu ti “Ttih hlah u” a kan ti tikah sullam tampi a ngei.

Thlarau lei ah kan pa pakhat a simi Rev. Dr. Steven Hre Kio nih cun “Ttih Hlah Uh” timi sullam hi phunthum in a langhter. A phungchimnak “Miphun Damnak” Cauk (p.268) chungah kan hmuh khawh. Ttih hlah uh a kan ti; zeiruang ah?

1) Pathian cu kan ttih ding vialte a Teitu asi caah hi ti a kan tinak hi asi;
2) Pathian cu kan herhmi vialte a kan pe khotu Pathian asi caah asi;
Kan herh caan ah daihnak le hnangamnak a kan pe khotu asi caah asi fawn. Pathian cu Hnemtu BAWIPA asi hoi. Amen!
Cucaah Unau vialte hna kan nih nih Vawlei ah zeidah kan ttih awk a um ti? Vawlei harnak le buainak le hnahnawhnak hna hi kan i teiter ti lai maw? Harnak ton hi tah kan tih rih ko lai maw? Ralkap ttha cu raltuknak chungah an i thei bantuk in Zumtu ttha cu harsatnak le tukforknak caan ah kan i thei ve. Nang na dirhmun zeitin? Pathian dah ti locun vawleicung ah ttih dingmi hohmanh an um lo ( Isaiah. 8:13). Jesuh nih pum cu a tthat kho ko nain thlarau a that kho lomi cu ttih hlah u, asinan pum he thlarua he a pahnih in a tthat khotu Pathian Thlarau tu kha ttih deuh u a ti. Amen.

Krih he teitu kan sinak hi kan theih fian taktak ko ahcun, Pathian kan sin ah a um le kan lungdongh le harnak kan ton caan ah a kan hnemtu BAWIPA kan ngei ti mi kha philh hna hlah uh sih! BAWIPA min thangthat si ko seh!

Biadonghnak:

Asi-ah Vawlei cu ahodah a tei kho? Jesuh cu Pathian Fapa a si ti zumhnak a ngeimi lawng lawng nih an tei khawh (1Jh.5:4-5). Ka u le ka nau, ka nu le ka pa vialte hna atu suimilam caan ah cu ti kan zumh ahcun Pathian nih a Thiang Thlarau in a kan um pi lai i, Khrih he Teitu kan si zungzal ko lai. Kan tonmi harnak nak in a ngan deuhmi le a thawng deuhmi Pathian a si. Teinak cu BAWIPA ta asi! Bawipa a nunnak ah a sawmmi hna le Krih thlarau a nunnak ah a ngeimi hna cu amah Pathian he cun Teitu kan si ve. Bawipa min thangthat si ko seh! Teitu kan si. Amen!


By Olivia Biak
Germany

Karen Ralkap Le Kawl Ralkap

Karen Miahwati District kawlevuah ah kawl ralkap khahlahziah (97) le Karen ralkap KNLA tatzin(201) nizan thla Sep.13 zan lei suimilam 3 ah an ni kap I kawl ralkap pa 3 an thi pa 3 nih hma an put.

A thaizing thla14 zing suimilam 6 ah kawl ralkap thiamthiam khahmahziah(97) le KNLA tatmaha(201) cu Kanele khua pawng ah an ni kap than i kawl ralkap lei hma pa 4 nih hma an put .Mah chung ah hin Bothum pa a te vel ve an ti.KNLA lei cu zeihmanh hma pu mi zong kan um lo tiah KNLA Buhmu Sawkyiawng nih a chimh.Kawl ralkap pawl cu an kir lei ah KNLA nih a kan kak tthan sual lai ti an phan tuk caah kanele khua mi30 cu lam piah ding in an hruai hna tiah Buhmu Sawkyiawng nih a chim.(Ref::BNI)



Patluang

Aizawl

Sunday, September 12, 2010

BBC Thawngpang Ruangah Suu Kyi A Lungre A Thei

Nai Sep 2 ni, Mae Sot khua ah an dirhnak kum 70 a tlin camtuak an tuahmi BBC cu hmaikum thawk in Kawlram ah thlah ti lo ding a si kho men timi thawngpang he pehtlai in Suu Kyi a lungrethei ngai tiah a sihni Kyi Win nih a chim. BBC Kawlram ah chuah cu chuahman a fah tuk lawng si loin a ngaitu an tlawm tuk tiah British thawngzamhca The Guardian nih cun a tial. British Culture chungtuan Jeremy Hunt nih cun kumkhat ca World Service ah euro pound 264 million kan dihmi hi kan thumh lai le thumh lai lo biakhiahnak a um rih lo tiah a chim. Nain Cameron cozah nih cun suaichungmi phaisa (budget) zatuak 25 thumh an i timh tikah BBC Kawlram thawngpang chuah ti lo ding a si kho men tiah thawng a leng. Ngiahlaitu pawl nih cun BBC thawngthanhnak Kawlram in lak, asilo le phaisa thumh cu ralkap cozah teinak (laksawng) pakhat a si te lai tiah an chim ve. (Ref: Mizzima)



Faiceu Media Group

Malaysia