free web counter
greyhound runningHurricaneRunning Ostrich

Wednesday, February 29, 2012

Chin National Front Supreme Council Meeting

Laimi chan tuanbia ah roling dingmi CNF Supreme Council Meting pi cu Washington D.C ah tuthla 23 le 24 ah khan tlamtling tein an tuah. CNF Supreme Council Chairman Dr.Za Hlei Thang, Pu Lian Uk, Salai Kip Kho Lian, Pu Tang Nang Lian Thang le Secretary General Pu Zing Cung hna an i tel kho. Supreme Council chungtel a simi, Pu Zo Tum Hmung, Pu Benjamin Turing le Pu Thang Nang Kee le CEC chungtel Dr. Salai Ngun Cung Lian, Salai Daniel Sakhong le Salai Thla Hei, CC chungtel Pu Thawng Za Lian hna zong an i tel [Keimah hngalhmi lawng an min ka tial hna.]
Februay 25, zarhte ni ah Washington D.C Metropolitan Area um mipi he tonnak kan ngei kho. Pu Bawi Cung nih caantlai tu a tuan, CBMC Church Chairman Pu Lal Bat thlacamnak in kan thawk. Pu Kip Kho Lian, Pu Tang Nang Lian Thang, Pu Lian Uk le Pu Thang Ning Kee le Salai Daniel Sakhong hna nih biatawi chimnak an ngei.
Salai Thla Hei nih CNF Emergency Meting an tuahnak kong he pethlai in mipi sin ah fianternak a tuah. Mah hnu ah Dr.Salai Ngun Cung Lian zong nih Kawl cozah he kahngolnak an tuahmi kong fianternak a tuah ve. Kahngolnak timi cu " A sungh pek zong a si lo, a ngianhkhan zong a si lo, Surrender tuah zong a si lo, atu zong kan hriamnam kan i tlaih peng ko, hmailei zongah kan duhmi kan hmuh lo hlan kan i tliah peng ko lai. Kahhngolnak timi cu tuchun zongah a rawk kho, thaizing zongah a rawk khomi a si. Cabuai cungah Kawl cozah he ton biaruah ngeih khawhnak dingah kum 23 kan ngah cangmi a si. Kan thiam ah kan thiamning, kan fim ah kan fimning in kan ngah dingmi a si," tiah a chim
Pu Lian Uk Biachim Lio
Pu Lian Uk nih Daw Aung San Suu Kyi le Kawl cozah cu zumh thlu ding an si lo, Aung San kan i zuamh sual i a thih tik ah atu kan phan, Aung San Suu Kyi zong a thi khomi a si, amah kan i zumh sual ahcun a thih hnu ah zei a can lai kan chim kho lo" tiah biahalnak an tuahmi kha a leh hna.
Dr.C.Duh Kam [ Executive Officer, CBC-USA ] nih ram le miphun caah nunnak a pemi hna CNF le kan ram caah thlacamnak a ngeih piak hna.
Mah hnu ah chuncaw hrawmnak kan ngei, a dih hnu ah mipi sin in duhmi bia halnak tuah a si i CNF Supreme Council Chairman hna le CEC lei upa hna nih lungsau tein an bia an leh hna.
Pu Thang Ning Kee Biachim Lio
Keimah Hmuning:
Salai Kip Kho Lian hi a min lawng ka theih, a mui ka hmu bal lo, a mui ka hmuh i, ka zoh lengmang ah a biachim, umtu hoiher ka hmuh ah Kawl nih "Tawhlanzi Tama" an timi bak ka lawhter. A biachim ah a biatak, fiangpup fiangpup in bia a chim. Greek ram in zaukphung [democracy] a thawknak in Chin National Day a thawhkeh nak tiang petlai tein a kan chim i kan lung a hmui ngaingai. Lungrual a herhnak kong a kan chimh, atu bantuk thil biapi kan ton lio caan i kan lung a rual lo ahcun caan nih a kan kal taak lai" tiah a chim. CND ah biatawi chimnak an pek nain a dam lo caah chim caan a ngei kho lo.
Pu Tang Nang Lian Thang Nih Washington D.C Ah CND Biachim Lio
Pu Tang Nang Lian Thang
Biachim a thiam, mi pumrua tha, muidawh a si caah rumra a ngei. Mipi hruaitu ding ciamman a si ka ti. 1989 kum CNLD dirhtu ah a rak i telmi a si. Kawl nih "Nannganzi Tama" an timi bak khi a si. A biachim ngaih a nuam. Tluang thluahmah in bia a kan ruah khawh. Chin miphun dothlennak ah Hakha lei mi cu mi tam deuh nan si caah ram le miphun caah thih ngamhmi nan tam deuh tiknak a ti. CND ah biachimnak an pek, tawite fiangte in a chim i a ngeih kan cim lo. Laimi lungrualnak caah a herhning in riantuan aa tim.
Pu Thang Ning Kee
Pu Thang Ning Kee hi a mui cu ka hmu bal na loin a min ka hngalh zungzal mi a si. Thlanglei mi nih an i bochan ngaingai mi an pa pakhat a si. Mi lungthin tha taktak a si lai. Khrihfabu hruaitu le Pathian rian a tuan balmi a sinak zong a lang, Pathian a bochan taktak mi a si. Laimi lungrualnak a duh tuk ti kha a biachim in hmuh khawh a si. Laimi lungrualnak caah biatak tein riantuan hram a thawk lai nak kong zong a chim i, mah nih cun kan tha a kan numhter khun. Hakha lei mi cu pacan dirhmun ah nan dir a hau. Mi tam deuh nan si caah mi cungah dawtnak le zawnruahnak faak deuh in nan ngeih a herh," tiah chim.
Tedim peng ah CNF nih zung on dingah timhtuahnak an ngeihmi kongah Tedim lei upa cheukhat hna nih an duh lonak a langhter mi kongah mpi lei in biahalnak an tuah i, supreme council nih an ceih i, biachahnak an tuahmi statement cu Pu Thang Ning Kee nih an kan rel piak. Tedim peng ummi mipi duh lomi CNF nih ka tuah lai lo tiah an chim. An Statement chuahmi cu a tanglei chinworld.info ah an thil chihmi ka rak taar chih. A tanglei link te khi ram hmet te ulaw Kawlca in rel khaw a si.
Keimah Caah Roling Hmanthlak
Laimi kan pale hna he philhlonak hmanthlak tete hi rothil bantuk ah i chiah ka hmang ngaingai. Pu Hrang Nawl, Pu Cin Sian Thang, Salai Ram Ling Hmung, Dr.Salai Thun Than, Pu Lian Uk tbk he hman kan i thlakmi ka bukbau ah ka chiah theu hna. Tutan kan pale zong hman ka thlakpi hna, keimah lawmh in ka rak i lawm. 2011 Decemger thla i CNF Emergency Conference an tuahmi cu Pu Lian Uk nih " Falam khua in a rak thawkmi, Chin National Day an thawknak bantuk a si e" a ti. Atu bantuk in Laimi hi a luancia mi kum 10 ah khan kan lung rak i rual kho sehlaw hmai ah kum 10 kan tli cang hnga.
Ka Caah Roling Hmanthlak
Surpreme Council Hruaitu Hna he
Pu Nang Lian Thang He
Careltu le hmanthlak zohtu nan dihlak cungah ka lawm. Chim le rem sualmi le ttial sualmi a um ahcun atu tein ngeihthiam kan hal sia hna.
Upatnak le Siaherhnak he,
Sungsung pa
[ Salai Lairamtang ]
Washington D.C
USA

Source::yccf-international@yahoogroups.com