free web counter
greyhound runningHurricaneRunning Ostrich

Saturday, October 3, 2009

Pathian nih in hal seh law zeitin dah na leh hnga?

Na nunnak a dih i na hei thi. Na thlarau cu Vancungkhua ah sertu Pathian he an vai tong. Pathian nih-
1. Ka fa vawlei nanun lio ah thluachuah tampi he na nunlam kan hruai i ka rak in zoh khenh. Nang ka caah zeidah na rak tuah?

2. Ka fa vawlei na nunlio ah mizaw, fak tampi na pawngah an rak um i an cungah zangfah nak voi zeizat dah na rak ngeih?

3. Ka fa chawleva tampi le satil arva tampi ka rak in pek i na minung hawi caah nang zeizat dah na rak hman ve?

4. Ka fa chungkhar tha thluachuah ka rak in pek i an daw biktu nu le pa zong ka rak in pek an caah nang teh dawtu na rak si kho ve maw?

5. Ka fa nacung i minih thatlo nak an rak tuah mi cu na rak i cinken peng, nangmah nih micungah na rak tuahmi that lo nak teh naa cin ken ve maw?

Nang zeitin dah na leh ve hnga?????( Ref:: biaknak kong.blogspot)

Friday, October 2, 2009

Baltimore khua ralzam zung kum 10 tlinnak ah Kawlram kawng chimnak

Maryland State ah Kawlram mi tamngai, abik in Laimi tamnak Baltimore City ah ralzam zohkhenhnak center kum 10 tlinnak cu tu thla 24-25 ah khan Baltimore khua Eastern Ave ah tuah a si.

Cu center cu Baltimore Resettlement Center tiah an auh i NPO a simi IRC ( International Rescue Committee), LSS ( Lutheran Social Service) le Baltimore City Community College le State lei Social zung hna an i bawm i (partnership) in ralzam hna caah rian an tuannak a si. IRC zung tizong ah mi tampi nih theih a si, cun LSS zung ti zong ah a si thotho. Malaysia, Thailand le India in a rak phan mi Kawlram ralzam mi hna, US ram chung ah ralzam sinak asawk cuah mah mi asylum seekers hna caah rian a tuan mi center a si. Bhutan, Nepal, Iraq le Africa rampawl in a ra mi ralzam tampi hna caah rian a tuancuah mah mi center asi.

Mah cu BRC kum 10 tlinnak ah cun Kawlram aiawh in Open house ah bia tawi chimnak ngeih ding ah an ka sawm bantuk in ka chuak kho ve. Kawlram in a ra mi ralzam hna kawng biahalnak le bialehnak, Malaysia le Thailand le India hna i a um mi ralzam hna kawng biahalnak le bialehnak an ngei i, ka si khawhtawk in le ka chim khawh tawk in, hmanthlak pawl, video pawl langhter chih in ka chim.

Cun, Kawlram rawl phun hnih in kan chuah pi.

Mah hi puaituahnak ah hin, Baltimore IRC zung i executive director Robert Warwick le staff vialte le LSS upa dihlak(LSS-National Capital Area hotu nu) le staff pawl, Department of Social Service in upa, BRC a rak dirh hmasa tu upa hna pahnih le lawyer pawl, BCCC in principal le a dang Baltimore khua ah upa tampi an rak chuak kho. Hmunhma a bi caah abiapi mi minung taktak lawng an chuak kho, i biatawi chimnak te te an nei cio dih. Cun refugee sponsor a pe cuah mah mi khrihfa bu han le adang bu hna zong in an ra cio dih hna.

A caan tawite chung ah Kawlram kawng a bik in tlangcung mi hna kawng chimnak ka ngei kho i Kawlram in arakzam mi ralzam hna vialte caah a bik in Chin miphun hrang ah thathnem santlaihnak tlawmpal tal um hram ko seh tiah saduhthahnak ka ngei. Hmanthla pawl ka hin zoh khawh asi lai

Kai lawm,
Peter Biak Lian Sang ( Ref:: Laica in tialmi cabia le thawngpang)

Wednesday, September 30, 2009

Chicago Ah Pu Cung Cin A Rak Tlawng

Laimi chung in Kawlram pum paluk tiang ah a min a thang ngaimi Kawlram minta Ye Ko Ko te an chan lio hrawng ah mui le sam in siseh pumrua le thazang lei in siseh minn thang ngaimi kan ngakchiat lio i a min kan rak theih lengmang mi Pu Cung Cin khuapi cu a luan ciami thla ah khan Chicago ah a hawipa mirang pa he an umnak CANADA ram in an rak tlawng.Kan ngakchiat lio ah Khuapi Cung Cin tiah kan rak theih lengmang mi a si caah hmuh lai hi ka duh ngaimi ah aa tel vemi si kaw keimah btkin hmuh a duh ngaimi nan um theu lai tiah lungsia herh in ka rak in tar piak hna.***Van B Lian***



US Nih Burma Ramkomh Cung I A Ngeihmi Tlaihfung Thar

A luancia thla sarih thok khan US nih Burma ramkomh cung i kan ngeihmi tlaihfung (policy) nihhin kan itinhmi a kan phanhpi lo caah kan zoh tthan lai tiah thawng an rak thanh i Burma kong ah mithiam hna, khuaza mibu hna, Congress le midang tampi he kau ngai in caihhmainak an ngeih hnu ah kan lim cuahmah cang tiah thawng an thanh. Kan hnu UN Meeting lio i Burma Hawikom (Friends of Burma) hna itonnak an ngeih lio ah Secretary Clinton nih a vuapvap in a chim i nihin ah Kurt M. Campbell,
Assistant Secretary , Bureau of East Asian and Pacific Affairs, nih fiang deuh le cipciar deuh in chimphuannak a ngeih.

Kurt Campbell chimmi cu a tawinak in hun zoh hmanh usih;

“Kawl ralkap hruaitu hna nih US he pehtlaihnak (engagement) ngeih ding an duhnak an langhter i cu an duhnak cu fiang deuh in hngalh kan duh. North Korea he an ipehtlaih ca zong ah ttha deuh in zoh an hauhnak asi fawn. Cucaah kan itinhmi hrampi kan fehter tthan.

Burma ah zaukphung (democracy) a um ding hi kan dirpimi asi. Aung San Suu Kyi le ramkhelrian ruang i thongtla vialte chuah hna ding le tlangcung miphun hna cung i harsatnak le buainak vialte zong dihter ding le remdaihnak a chuah khawhnak ding ah biaruahnak ngeih ding lam kawl ding ah kan izuam lai.

Burma nih vawlei huap in ttuanvo a ngeihmi (international obligations) a zulh ding ah kan hnek lai. Burma nih kan itinhmi lei ah tthanchonak a ngeih ahcun kan ipehtlaihnak duhsah in kan karhter lai.

Pehtlaihnak kan tuah dingmi ahhin a biapi in Kawl ralkap nawlngeitu hna he hlangfang (direct) in biaruahnak ngeih kan duh. Kan biaruah dingmi ahcun Burma ram ah zaukphung le minung covo a um khawhnak ding kong aa tel lai.

Khenkhamnak (sanctions) kong ahhin Kawl ralkap nih ram thlennak dingah a herhmi tthanchonak an ngeih hlan cu kan ngeih ciami khenkhamnak hna hi kan hmunhter rih lai. Kan duhnak nan kan zulhpiak lawng ah khenkhamnak hi kan dihter lai tiah kan chimh hna lai.

2010 i thimnak tuah an timhmi kong ahcun thimnak an tuah dingmi hi a zalongmi asi lai tiah kan zum kho lo nain a herh tiah kan ruahnak pawl cu kan chimh ko hna lai.

Hi rianttuannak caahhin ram dang pawl he ttuanttinak ding lam kan kawl lai.

Kan zohtthanmi tlaihfung hna tlamtlin ding hi a har ngaimi asinain lungsau in ttuanrel khawh kan izuam ko lai.”

A cunglei langhtermi pin ahhin halbia le lehbia an ngei i a lehmi hna tampi lakah a biapimi pakhat cu Burma he pehtlaihnak caah Hotu (Burma Coordinator) hi phung ngeihcia ningin thim a hauh caah aa tlak bik ding minung kan kawl cuahmah lio asi tihi asi.

A ra laimi Sept. 30 ahhin US Senate Foreign Relations tang ah kan hnu deuh i Burma a tlawngmi US Senator Jim Webb hruainak in biaruahnak (hearing) ngeih ding asi i cu tik ahcun Burma kong hi chimrelnak le caihhmainak ngeih tthan ding asi.

US nih Burma cung ah a chiah tharmi tlaihfung hna nih zalonnak a kan phanhpi ding le phanhpi lo ding cu caan nih a kan chimh te ding asi caah kan dihlak lungsau in hngak usihlaw zalonnak kan hmuh khawh nakhnga kanmah le si khawh tawk cio in ttuanrel itim hna usih.

(A cunglei bia pawl hi careltu hna siaherhnak he a fawinak in lehmi an si caah chirhchan ding na duh ahcun mirang in an ttialmi HIKA tu hi irinh ding asi lai)*** ( Rrf::Thuro Cazual)***

Tuesday, September 29, 2009

Iran Nuclear Bom Ser Tinhmi Nih Vawlei A Tuai

Kum fatin tuah tawnmi UNO meeting khuakhannak cu kan hnuzarh ah New York ah tuah asi thil dang kong an ceihmi lakah Iran nih Nuclear Bom tuah aa timhmi kong nih a tuaitam ngai hna.

Iran nih (Uranium enrichment) hmun hnih ah an tuahmi an vun thanh i vawlei pi an lungretheih a zual. Nuclear thazaang in mithahnak bom le Meivannak seh ti in phun 2 ah ser khawh asi. Cucu tuah khawhnak caah a hran a herhmi cu Uranium enrichment asi. Mah hi ngeih hnucun pakhat chingchang hi fawi te in ser khawh asi. Iran nih Nuclear bom si loin Meivannak ka ser lai tiah a chim ko nain, vawlei nih Nuclear Bom tuah ding an lung hrinh ngaimi asi. Hi hna nih bom tthalo an ingeih asi ahcun a hman taktak lai i vawlei ah rawhralnak le buainak a chuahter lai ti vawlei nih an phanmi asi.

Cu tinhmi lunghrinh i a um ko bu ahcun, nizan le nihin ah lam hlatpi tiang a phan kho mi rocket (missile) cu an vun hnihsak, an thil timi nih abik in nitlak ram hna an thin a hunter chin leh lam hna. A thil ti an ruah tikah nitlaklei nih an duhpaoh in rak ka namnet hna hlah seh tiah tluang a khawnmi asi tiah an ti.

Tuzarh cacawn nili ni ah Geneva ah Iran cu Nuclear Bom tuah lo ding kongah US le ahawi le ram nga nih ton an timh. (Cu hlan ah hmai tonh in an tong ballo) US ramdang lei lutlai Pi Hillary Clinton nih tahchunnak phun in a chimmi cu “Iran cu kan hnihsak lai, a awn lo a sungh asi ahcun a paw kan reh colh lai” a ti. France le UK zong nih Iran cu fak nawn tein kan rengh ahau ko cang tiah an ti. Iran he tonnak Germany ah tuah an itim fawn. Iran nih Nuclear bom tuah lo ding an chimmi a ngeih lo asi ahcun nitlak ram hna nih a pawcawmnak khenkhamnak faaklak in tuah an timh, cucu Tuluk le Russia nih an hnatlak pi ballomi, atutan ahcun an hnatlakpi dawh ngai in cheukhat nih an zumh hna.

Iran a umtuning nih Israel a lungre a theihter ngaingai ko. Kan hnu zarh zarhte ni ah Israel lei nih an chimmi cu, “Iran hi vawlei nih tthate in kan leh a hau (bom a tuahnak hnga lo), cucu kan ipalh hrim lai lo.” Asinain, ralkap thazang in a hlankan in va phomh ding tu cu an chim duh ziar lo. (Israel nih Iran cu a cheih te ttheu lai tiah micheu nih an lunghrinh).

Kan hnuzarh UNO khuakhannak ahcun vawlei Nuclear Bom in ti lo ding in rianttuan ding in lungrual tein hnatlaknak an ngei hna. Pu Obama nih aa lunghmuihnak hitin a chim, “hi bom tthalo a dih hlan lo cu rianttuan kan idin lai lo a ti.” Asinain, France President Nocolas Sarkosy nih “kan biakhiahmi a ttha asinain kan mitka hmaika ah ram ram hnih nih an tuah cuahmah fawn hoi (Iran le N. Korea), cun zei setsetdah kan tuah lai timi hmuitinh kan ngeih lo caah eikhim barkhim chuahpi dawh kan si loh” tiah a ti.

Kan Inn pa Tuluk an pu Hu Jinto nih cun kan ingeih cia Nuclear Bom cu kan hrawk lai lo, cucu hi tin a ti “kanmah ivennak ah kan herh hna, vawleicung ah a karh lonak ding tu cu kan izuam ve lai tiah” a ti.

Nuclear Bom mah zat hi an ngeihmi sidawh asi an tining cu; US-5,236 Russia- 3400/ France-350 UK-200 China-200 Israel-200 Pakistan- 70 India-50 N.Korea-12 hna hi an si. ( Ref:: Thuro Cazual)