free web counter
greyhound runningHurricaneRunning Ostrich

Friday, October 30, 2009

Simon Ci Lian le Pu Mang Cung Nung (Laimp4) itonnak

Pu Mang Cung Nung















Simon Ci Lian





MCN: Zei hlan cem ah na tuanbia tawi theih kan duh ko.

S.CL: Ka nu le ka pa cu, Pu Lian Tawng (Dongva) le Pi Ngun Men (Tluangram) an si. Matupi khua ah ka chuak.
Cawnnak lei ah hin B. Th. ka awng. Atu hi Indianapolis, USA ram ah ka um.

MCN: Na mui hmuh hlan in na hla cu kan rak ngeih len cang, na aw a tha, na thiam bak. Hla le miuzik lei ah na luhning?

S.CL: Kaa lawm tuk. Ka aw a tha, ka thiam tiah kaa ruah bal lo. Hla tu cu ka hngakchiat lio tein ka rak duh cang. Lai hla sak ding ka rak theih tuk hna lo caah Kawl hla deuh ka sa tawn. Kan pawngkam ah Lai hla a rak tlawm hlei ah mah lio ah khan Lai hla a rak sami pawl cu out of date phun ah khin kan rak ruah hna. A fawinak in kan chim ahcun thangthar Lai mino tam deuh nih Lai hla kan rak zahpi ti khawh asi. Hla lei hi ka huammi zong asi, cun Laihla sak le Laihla tam deuh kan ngei khawh hi Lai cabia kilven ah aa tel ve tiin ka hmuh i Lai hla sak lei ah ka rak i tel venak cu asi.

MCN: Lai bia le hla zahpi lo ding in cawnpiaktu nan rak ngei lo maw?

S.CL: Ngei ko. Ka caah cun pakhatnak ah ka pa asi. Cu lio ahcun Lai ngaknu tlangvaal kan i lenkai ah khin Kawl holh deuh kan rak uar i kan rak hmang deuh. Lai holh in bia kan i ruah hmanh ah khin a zatcio cu Kawl holh deuh a rak si ti khawh asi. Hi kong ah hin i thinh ding le khua ruat deuh ding in nu le pa cheuhkhat hna le biaknak lei hruaitu pawl, tahchunhnak ah CACC, Khrihfabu, tbt... pawl nih an rak kan chimhrin pah peng tawn ko.

MCN: Kawl bia le hla nih seino vialte a rak in dolh dengmang ko hna lo mei?

S.CL: A kan dolh deng tak ko. A ruang bik cu Kawl ralkap uknak nih Lai miphun kan sinak (biaknak, nunphung, ca, holh, tbt...) kha hlohthlau piak an rak kan timh, khat lei in cun kan ruahnak a rak bit zong asi pah. Chan karlak ah kan ca, kan holh, kan hla cu a thazaang a der i a mithmai a rak bi. Tahchunhnak ah Lai tlangvaal nih Lai ngaknu kha a thinlung chung ummi dawtnak bia phuan a duh caan ah Lai holh tein "Kan dawt tuk" ti le "Kan duh tuk" ti kha tlamtling lo ah rak ruah deuh khi a lo. "I love you so much" ti le Kawlholh in "a yan chit de kua" hei ti khi a thlum khun i a tlamtling khun ah kan rak ruah rua ka ti.

MCN: Cu bantuk dirhmun in zeitindah Lai holh hi na thiam thanning asi?

S.CL: Kan lung a hun fim deuh hnu ah "Lai holh hi zahpi ding asi lo" ti ka hun hngalh. Cuticun keimah pumpak hrimhrim nih Lai ca, Lai holh, Lai hla le Lai nunphung thiam i hman a herh ti ka theih. Mah ruang ah Lai ca biatak tein ka rak cawng. Pathian dawtnak thawng in ka tlamtling lo buin thal sianginn khar caan tete ah Lai ca chim zong ka rak kal tawn ve.

MCN: Laihla duhnak na hun ngeihning te cu tah?

S.CL: Cu ti ka hun duh hnu cun Lai hla cu ka tial i a sak zong ka sa pah. A karlak ah a ka bawnchantu tete zong tampi ka ngei hna, an min cu ka chim dih kho hna lai lo, an cung ah kaa lawm tuk ti hi chim ka duh. A bik in Pi Bawi Cin cung ah kaa lawm. A nih hi a hmasa bik Lai hlasaknak leiah ka ban a ka hruai i a rak ka luhpitu asi.

MCN: Hla hi CD le VCD in zeizatdah na chuah cang?

S.CL: Pumpak lawng in cun kaa chuah bal lo. A bu in a chuak cangmi cu 5 asi. A rauh hlan ah a chuak ding pahnih ka ngei. Mah zong cu a bu thiamthiam in asi.

MCN: Concert hi voi zeizatdah na kai cang?

S.CL: Concert hi kaa tel ve tawn i, a voi tu cu zeizat set dah asi kaa fiang ti lo.

MCN: A tum lei hi na thiam chih maw?

S.CL: Ka thiam lo, mah sak ding tum tiang lawng ka thiam.

MCN: Hla tah na phuah ve bal maw? Fung zeizatdah? Na hla lakah a zeidah na duh bik?

S.CL: Hla cu ka phan pah ve tawn i, fung 50-60 hrawng asi. Ka duh bik ti cu a um lem lo ka ti khawh tawk a tha bik in ka phan ve hna i ka duh dih ko hna

MCN: Hlasak thiam ah na uarmi pathum min? (Lai, Mirang le a dang)

S.CL: Hla sa pawl cu ka uar dih ko hna, a bik in Lai hla sa pawl ka uar khun hna. Pakhat na ti ruang ah pakhat lawng ka chim lai, Dawt Hlei Hniang. Mirang ah cun Aerosmith, cun a dang pakhat cu kawl hlasak thiam Myo Kyi asi.

MCN: Hla le miuzik lei hi cawnnak na ngei bal maw?

S.CL: Hlasak cu ka cawng bal lo. Tonic solfa tu cu G. Biak Nawl sin ah ka rak cawng bal.

MCN: Lengno rual theih duhmi kan hal tuah lai. Ngaknu sahmi hna na ngei cang maw, aphi hna na duhning in an pe maw? Zeitikdah nupi thit nai timh?

S.CL: Ngaknu cu ka ngei cang ko. Zei a cang te lai ti cu ka hngal kho lo. Thitnak kongkau tu cu Pathian nih ka caah a ka duhpiakning in asi te ko lai. Anih zong hi Pathian aa bochan tukmi asi ti tu in in let ko ning mu.

MCN: US Lengno hna caah thawngchia asi ne cu. Chimbia ka theih tawnmi cu, "Thitumh taktak hlan ah cun i laan khawh asi ko rih" an ti. Ralrin deuh nan hau lai tinak asi cu. Bawipa nih samhri in sih ko hna seh. Bia dang ah, Hla nan sak tawn ah a nuamhnak le a har na tinak zeidah an si?

S.CL: Ruahnak na ka cheuh caah kaa lawm. Kan hla tha tein kan thiam i, a tumtu zong nih tha tein an kan tum thiam piak ah khin hlasak cu a nuam tiah ka ruah. Thinlung taksa ngan dam pah lo lio i hlasak cu a har pah ko. Laimi kan dirhmun ah cun pakhat le pakhat kan i theihthiam caan ah khin a nuam khun ko.

MCN: Hla na sak lio i pangpar pek khi a herh na ti maw?

S.CL: A herh tuk cu ka ti lo nain a sual lo ka ti.

MCN: Hmailei ah VCD thar chuah nai timhmi an um maw?

S.CL: Kaa tim ko, caan tha a um ahcun kaa chuah te ko lai.

MCN: Nangmah an uartu na fans hna sinah bia cah na duhmi?

S.CL: Tha a ka petu nan dihlak cungah thinlung tak in kaa lawm tuk. Pathian nih thluachuah in pe hna seh. Laibia, Laihla, Laica a nun peng khawhnak lai pakhat le pakhat i bawmchan peng ko hna u si.

MCN: "Zuu hi din thiam ah cun a poi lo" na ti ve maw?

S.CL: Um, kei ka ruah ve ning ahcun, zei paoh nih a mah le caan, hmunhma le sining tiin rikhiahnak a ngei ko tiah ka ruah i, na chim bang cun cu rikhiahnak cu an theih an hngalh i a din thiam taktakmi hna caah cun a poi lo ti khawh asi ko hnga. Nain Laimi tam deuh kan caah cun zuu hi mualpho ningzahnak a kan petu le a kan hrawhhraltu a si ruangah din lo tein um khawh hi a tha ko tiah ka ruah.

MCN: Laimi vialte sinah biacah na kan duh mi?

S.CL: Keimah nakin khua ruat thiam deuh lawngte nan si ko i, lungchung siaherhbia tu ka chim lai. Pathian theih hngalh taktak i a duhnak hi kan duhnak nganbik ah kan chiah khawhnak hnga thla cam u si ti hi pakhatnak asi. Nu le pa hna nan fa le nih Lai lungput tha kan ngei peng nak hnga rak kan daithlanh hlah u. Lai holh, Lai ca, Lai hla le Lai nunphung kan theih i kan thiam khawhnak hnga rak kan cawnpiak u. Miphun lungrualnak lungput kan ngeih khawhnak hnga rak kan chimhrin u.
Lai mino hna sin ah ; Miphun dang holh in a holhmi le nunphung dang in a nungmi hna karlak ah nifatin a ummi kan si caah fimkhur deuh tein i ralring hna u si. Pakhat le pakhat i bawmchan hna u si. Ram a ngeimi kan si, miphun pakhat sinak tling tein a ngeimi kan si philh hlah u si. Nangmah le keimah kan rampi nih a kan bochan, kan si khawh tawk in dawt khawh i zuam hna u si.

MCN: Caan na kan pek khawh caah laimp4 min in lunglomhnak tampi kan ngei.

S.CL: Bia na ka halnak cungah tampi lomhnak ka ngei ve.(Ref:: Laimp4)

Tuesday, October 27, 2009

Tuanbia In Thazaang Lak A Zuammi Caah,

Tlangvaal Lian nih ngaknu Sui cu a duhtuk hringhran i zaantin ti awk in duhnak bia a va ruah lengmang. Kum khat hnu ah Sui nih nangmah le keimah kar ahcun a tlam a tling ko tiah ka ruah nain an hringtu na Nu lung bel ka tong kho hnga maw ,tiah bia a leh. Lian nih mah zaan i khua a ruahmi cu ka Nu pei a rak tih ziar ko hi ka thah lai tiah a lung ah a hungchuak colh. An namtong har bik aa lak i a dawtu le a cawmtu a Nu cu a ihnak ah a hngawng a va tan. A Nu thiangthunh aa lak rih i a hngawng in a sawh ,a tanmi a Nu lu cu a ngaknu Sui nih a ka zum lo sual lai tiah zaan tim hnu ah a va tlik pi.
Lampi ah voikhat fak ngai in a rilh pi lio ah a Nu lu lih cun aw neem tein" Ka Fa naa khawng sual maw "tiah a chonh rih. Ziah, a nung rih hi a ti i lungtum in a den cikcek rih . Sui sin ahcun a va phan i , Na tihmi le na huatmi ka Nu cu a hngawng ka va tan colh i na ka zum lai lo tiah ka rak in zoh ter ta, thaizing kan vui colh lai i, hmaizarh cu kan i um cang lai a ti.
Sui nih ,Ziah... Na Nu cu ka huat ka ti tung lo,A lung ka tong kho hnga maw ti lawng pei ka chim ko kha ," mah le hringtu nu hmanh a that ngam mi cu kan va ngam lai lo" tiah a ti tik ah Tlangvaal Lian nih a Nu Lu cu inn ah a kirpi than i a bunh len zongah nunnak a ngei kho ti lo.

Vakok; Laimi nih Vakok cu kan hmelchunhnak ah kan hman i thihtiang Dawtnak ngeih ding Vakok nupa hna tuanbia kha lak a si rua.

Thitum; Thitum kutsih thlacamnak i Biakam kan tuah tik zongah Nu le Va hi thihtiang chiatnak thatnak ton ah i dawt ding tiah biakamnak tuah a si.

Lian a Nu dawtnak cu thihtiang lawng hmanh siloin a Fa a rilh tik ah hngawng tan cangmi a lu karau hmanh nih aw neem tein" ka Fa naa khawng sual maw" tiah a ti khawh rih.
Bawi Jesuh zong nih Vailam cung i a thih hnu hmanh ah nang le kei nihin tiang a kan dawtnak kan tinco rih hi....

Pathian Riantuantu nih kan nun chung lawng hmanh siloin kan thih hnu hmanh ah khin Khrihfabu caah dawtnak a ngei kho mi si kan herh,
Ram le miphun caah riantuantu dihlak zong mah thiamthiam,

Thih tiang lawng Dawtnak a ngeimi cu relcawk lo aa si cang lai, Laimi nih Thih hnu tiang dawtnak ngeih khawh a si ti hi kan nunnak ah kan cohlaang kho cio hna hnga maw?

Careltu dihlak cungah lawmhnak he.(Ref:: YCCF-International)

F.Za Thang
Malaysia

Sunday, October 25, 2009

"BIANGNO CUNG IN,ZANTTIM MITTHLI"

A fekmi Dawtnak cung ah tthentu um hlah seh tiah biakamnak he,pa Hre le Suite cu khuami nih bochan veve mi zohchunh awk in,aa duhmi tthen caan aphan ai,Lai lei khuasak tintuk har,kal hlah law tiah ka tta tiah Suite nih thlauhngam ti hlah,nu le pa nih,pa Hre cu ram dang kal an fial ai cang,pa Hre akal lai zaan cu mitthli he,duhbia an phai.pa Hre akal hnu cu Suite cu a caah thlacam piak in caan ahmang tawn.pa Hre zong cu phaisa kawl in tlun lai le Suite he anuammi chung khar ser lai cu asa duhthah asi ve.semrel ngai le fel ngai in chaw akawl.caan tlawmpal arauh ah,pa Hre cu ramthumnak kal kho ding arak si ve ai cang.alungchung cun tlun tthan cu aduh ngai ko nain,lai lei khuasak har kan nun har kan philh lai,Suite zong sifak fa te asi ve nain,ka caah asung tukmi dawtnak angei.ka auh lai i,kan pa hnih te in kan kal te lai,lung tiah lungduh cu aphai tawn.Suite zong nih pa Hre ramthumnak kal ding atheih cun um thiam ti hlah,zeitik dah aka cah te lai tiah alungthli tum cu sum khawh lo in aruat tawn.khuami zong nih anmah pahnih tawn lai cu an lungthli tum ngai asi ve hoi.Pa Hre nu le pa nih cun Suite cu,an duh tuk ai lo,ram dang kal ding ah cun,ca thiamsang deuh,mi si kho deuh,Phun saang deuh tiah an lung thli asi ve cang hoi.pa Hre nih Suite rak hal cang uh ati lai cu,an phang ko cang.caan arauh hlan ah pa Hre nih cun ,..helo..helo..ka nu le ka pa nan dam maw?UNHCR nih na nupi chuahpi an ka ti cang i,Sui...a vun ti bak ah anu nih cun,ka fa zeitin ee..ka fa,ka nu vei..vei..Suite kha inn rak kai cang uh law aherhmi phaisa kan kuat cang hna lai,ti asi cang ko...anu le pa cu an ni zoh i,nangmah nih chim tiah an ni thiah cang,a nu nih cun ka Fa nu le pa biangaih hi hmai lai thluachuah hmuhnak asi.kan chimh ta lai vei kha,..ca thiam asi,amui zong ai za bak,Bawiphun zong an si,..Suite nak cun kan duh deuh tiah avun ti zan cu,pa Hre ngilh lo in Suite cu amitthlam ah cuang in khuaza ruah bu in,lungkuai in,biangno cung aluang mi mithli nih ador dor in,ka tumhtahmi vial te an lo dih ko lai maw/..ti-in..nu le pa bia al aduh bak lomi le asi fawn.Suite he kan ni co lo ah cun,nun hnawhchan ka ngei lai maw/..ti ai cang.
Suite nih mah thawng avun theih cun,santlai lo fa asi mi nih dang khat,ka tumtah ngam lo ding maw,na rak si ko cang pa Hre,tiah i hngilh kho lo in zan ttim avun phanh cun,mitthli he,teliphone chung in lungduh an phai tawnmi,an bia hna pakhat hnu pa khat aruat tthan i, lunghno in,akan tthentu um hlah seh kan ti mi vialte khoika aloh dih cang,.tin zan khua cu vun dei ko.khuami nih pa Hre le Suite mah thluk aa duhmi i co lai lo ding an vun ruah ah an kong phai a dai ti lo.an pa hni kar ah dontu cu zei asi hnga ti ruah cio in,lung afak cio hna,..Pa Hre caah nupi an tthit piak ni cu,Suite cu,..ka celh lo ee,ka caah zanttim mithli long maw/asi ko lai ti-in,.....Khah lungleng pah buin ZAMTIM MITTHLI Milla Dawt Hniang sakmi ngai pah tuah hna uh si law.
(Unau hna,Dawtmi he tthentu,chungkhar he tthen tu,)hna hi zei thil in dah a sum kan tah tawn hnga tihi ka ruat tawn.**** Piter Pa****DC****