free web counter
greyhound runningHurricaneRunning Ostrich

Friday, December 31, 2010

"Kum Thar Lawmhnak"


Nan dihlak cungah Kum thar lawmhnak um ko seh.Kum hlun cu a kan liamtak cang bang in Kum hlun mangttha tiah thlah hna u sihlaw Kum thar lunglawm tein don cio hna uh sih.Kum thar nih a rak i kenmi damnak le tlamtlinnak cu nan dihlak cungah um hram sehlaw Kum thar kumpi kum khat chung ah him le dam le lawm tein kan hmankhawhnak dingah Pathian sawm hna u sih.

Kum Hlun Thlahnak Hla Ngai Hna U Sih


Thursday, December 30, 2010

"CNA/F Hi Um Hlah Sehlaw"

"CNA/F Hi Um Hlah Sehlaw Chinland Ah Zeidah A Cang Lai Part2"



" CNA/F Hi Um Hlah Sehlaw Chinland Ah Zeidah A Cang Lai Part2 "

Wednesday, December 29, 2010

GCCF Conference Ah Chin Pastor Te 100 Reng Lo An Phan Kho

KL, Malaysia - Vawleicung hmunkip um Chin miphun hna nih hmunkhat te ah Pathian rian kan ttuan khawhnak dingah tiin ceihkhannak cu hmunkip um Chin miphun chungah Pathian nih chiti a thuhmi hna kan pa le minung 150 leng Malaysia ram ah an phan kho tiah kan theih. Chin ramkulh lei in le Kawlrawn um kan pa le pastor minung 70 an phan kho ti zong theih chih a si. 25.11.2010 ni in Senthang Christian Fellowship (Jalan Sg. Besi) ah nihnih chung tonbiaruahnak le biachanhnak an ngei kho hna. Tutan meting ah a kai khomi hi Pathian rianttuan liomi Pastor minung 150 renglo an si. Ramchung ramelng biaknak lei rianttuan zate minung 200 leng meting a kai khomi an si. Tutan hi a voikhatnak a si bantuk in hmunkip in a rak phan khomi kan pa le zong an i lunghmuih ngaingai hna. Atu bantuk in i tonnak cu a luancia caan in kan pa le nih Chin ram caah zeitindah rian kan ttuan khawh lai timi ruahnak an rak ngeihmi chungah Pathian lam hruainak in nihin ni ahcun hlawhtlinnak pakhat ah a hung cang.

Avoikhatnak GCCF (GLOBAL CHIN CHRISTIAN FELLOWSHIP CONFERENCE) tonbiaruahnak le civuipi ah a rak phan khomi ramleng: US in 7 , Austrilia- 5, Norway- 7, Japan- 2, Korea - 2, Singapore-1, Canada- 4, India-3, Bangladesh - 2, Thailand -2, Philippines -9, UK-1, Kawlram lei in 70 hna hi tutan ah a rak phan khomi an si. Nihinh chung meting an tuahnak ah Malaysia um biaknak lei hruaitu hna he an zate minung 200 tluk meting an tuah kho tiah kan theih.

November 26 cacawn ninga ni meting ah biachahnak an ngeih khawhmi cu 26.11.2010 ni thok in GCCF bu cu hmunkip a rami nih um ding in hnathlaknak ngeih a si. Pakhat hnih nih an chim ve mi cu “ GCCF bu hi kan dirh colh rih ding a si lo, caan sau deuh kan lak rih ah a ttha lai” tiah a timi zong an um pah. Nain meting a kaimi mitam deuh hnatlaknak in lak a si bantuk in GCCF bu cu fehter a si cang. Tutan meting ah cathluan chuahmi zong tam ngai a si. Chin ram tthanchonak ding, nubu lei, mino lei, cun mission rianttuannak ding kong hna cu ceih an si. Nov. 27 ni zarhte ni ah Jalan Alor KL Baptist Church ah zinglei pumhnak le zanlei pumhnak zong a um. Zarhpi ni tu cu mah le umnak biakinn cio ah pumh ding in khuakhan a si. Tu bantuk in biachahnak an ngeihmi cungah hmailei ah biatak in rianttuan dingin timhtuahnak zong a ra mi kip nih ngeih a si.
Atubantuk in GCCF tonbiaruahnak ah hin Ram rianttuan kan pa le CNF, CHRO hna zong rak i tel ve ding in khuakhan a rak si nain ramchung lei a rami hunhimnak lei an ruah caah an i tel kho lo tiah kan theih.



Ref:: Seihnam 455nak

CNF le Nihin Kan Miphun Dirhmun! (Part -10)

Indiana Chin community Chairman Pu Za Bik hruainak thawng in kan hlan mi Chin Community Center cu minung sawm (50) hrawnglawng kan ni tlumnak Hall fate a si nain, kan miphun lawng si loin Indianapolis khua a um mi minak- mirang, upa-ngakchia tam pi nih theih mi hmun a si. Senator office in milian pi pi le Governor office in upa nganngan zong an ra i, kan Chin upa pawl he lai an rel tti nak le khua an khan tawnak hmun a si i, mi tam pi theih lo awk a ttha lo mi hrimhrim khi a si. Nizan December 28,2010 zanlei i, hi Chin Community Center ah kan tawn mi lunglawnhnak hi kan miphun tuanbia vawlei can dongh tiang a rak tang te hnga ding thilmak pakhat a si.
American pawl an tuanbia ah a biapi bik mi inn cu Philadelphia khua i, aum mi Independence Hall khi a si. American pawl caah a bia pi bik mi a si mi British pawl kuttang in luatnak hmuhnak caah Independence Declaration an tuah nak hmun cu mah Hall pi cu a si i, kum 230 leng a hmun cang mi an phunghram (constitution) zong thla 5 chung rauh in an rak ttialnak hmun zong mah inn tthiamtthiam cu a si. Cu ve bantuk in, USA ram i, CNF pawl caah cun hi Chin Community Center hi American pawl i, an Independence Hall ban tuk cu a si ve. Thil pi pa kan tuahnak le kan khan nak bik a hmun hi mah kan Chin Commnunity Center te hi a si. Philh awk ah a ttha lo mi inn le hmun te a si i, hi inn kan rak hlan khawhnak caah a rak tawlrel tu upa pawl nan cung ah kan ni lawm.
Pu Thla Hei nih a vun phah mi Chinland Club (CC) luhnak cauknak lian pi cu, number 1000 nak zawn ah, Pu Lian Kung (Sazaci Lian Kung) fapa hniang Thawng Pi nih a min, a phone number le a E.mail pawl a vun ttial dih. Cu cangka in keimah nih CC member 1000 kan tling cang! Kumkhat (thla 12) chung ah member 1000 tlinh ding in kan thimh i, Sep.4,2010 ah kan thawk mi cu thla li chung ah kan tlinh cang! tiah ka vun thanh cang ka in, ka bia hmanh a dih hlan ah khin zaa pi in an rak au, an kut an bengh i, keimah zong ka bia peh ti lo in ka au ve. Kan ni lawmh tuk ah pakhat le pakhat kan kut kan ni tlai, lawmhnak bia kan ni chimh. Kan ni lawmh tuk ah kan mitthli zong a haa dih. Salai Tial Bawi Ling nih Japan ram tuah a Canon Camera lianpi cu aa lak i, ving ving ving ..tiah hman a rak kan thlak tluahmah. A tlawmpal ah kan Chin miphun lak ah ralbawi lianbik kan ni ngeih mi Col. Solomon nih "mah hnu hin cun kan ni thim mi tluang te le tlamtling tein, kan tuah khawh cang lai, hi CC member chungtel pakhat cio nih kan ram an dawtnak ah kan ni lawm i, Pathian nih um pi chin chin ko hna seh" tiah lungsi ngai in a chim i, kan tthutnak cio ah kan vun tthu tthan.
Zeiruang ah dah mah tluk hin kan ni lawmh? Mi tam pi kan lung a fiang lo men lai. CC member pakhat nih kumkhat ah a tlawmbik American $ 150 thawh ding a si i, member 1000 nih cun kumkhat ah $150000 USA ram chung in CNF rianttuannak caah phaisa a lut tinak a si ko. Hi phaisa hi kan miphun dohtlennak ah aa zaa maa ti ah cun a zaa naisai lo, a sinain hiphaisa nih hin kan miphun dohtlennak ah hmual tam pi a ngeih ter lai. CNF/A rianttuan tu an thabatnak tam pi a dam ter deuh lai i, an rawlttam nak tampi a tthatter lai ti cu a fiang. Khatte lei in chim ah cun hi phaisa nih hin kan miphun dohthlennak zeimaw zat a tlen hrim hrim lai tinak a si ko. CC chungtel member pakhat cio sin ah kan ni lawmtuk hrinhrin tiin, CNF USA regional Chairman aiawh in vum chimchap ka duh. Phaisa $150 hi a tam lo mi a lonain, mah phaisa $150 hmuhnak ah hin zeitluk in dah reitheih thabat in a herh i, hmuh a har ti mi hi CNF rianttuan tu pakhat cio nih kan nin theih piak ngai hna. Kan miiphun le kan ram siaherhnak, dawtnak tak tak ngeih lo in hi phaisa hi pek khawh a si hrim hrim lo.
Careltu u le nau hna, hi member 1000 chung ah phaisa $150 lawng kumkhat ah pek hi cu a tlawm tuk a ti i, a let hra in $1,500 tiang a pee mi hna an um. Cu lawng si loin, meithalttha AK-47 kan cawk piak hna tiah , meithal zunkhat man $600 a pee mi hi minung 64 USA ramchung lawng ah an um. Kan unau pa khat (a min ka philh celngel) cu AK-47 zun hnih kan cawk piak hna a ti i, $1,200 pek ding in aa tim. Hi member chung ah hin kum 12 a si rih mi kan fa le ngakchia hna in rianhmanh a ttuan kho ti lo mi kum 70,80 a si cang mi kannu le kan pa hna tiang an i tel. A fiang tuk mi cu hi CNF dohtlennak hi kan miphun zaa pi kan ni tel mi mipi dohthlenank a si i, USA a um mi kan miphun minung 1000 nih kan ttanh pi mi hna si tinak a si ko. Hi kan dohthlenank kan ttanh timi alanghnak cu kan phaisa $150 kan pek nak hi a si. Mah caah cun hi minung 1000 nih kan thawh mi phaisa $150000 hi mirum pakhat nih million tam pi a thawh mi phaisa nak in vawlei cung mi pi hmaiah sullam a ngei deuh, a hmual a fak deuh, i san a tlai deuh. Minung 1000 nih kan ttanh pi mi thil hi thil sawh sawh a si lo, ti mi hi kan pawng a um mi American mipi le an cozah pawl fiangtuk in kan hmuh ter khawh cang lai an kan ttan pi nak zong ah an tha a tho chin chin ve cang lai.
Hi CC member 1000 si ter ding hi tukum ca kan rak i timh mi lawng a si i,cansau ca kan ni timh mi cu: vawlei cung ramtthatnak a phan mi kan miphun rianttuan tu vialte hi Chinland Club(CC) chung ah lut ter ding hi a si. Hi Chinland Club tuahnak ah a kan hrawi tu Pu Thla Hei nih a ti mi cu " Vawlei cung khuazaa ramkip a um mi kan Chin miphun vialte nih kan umnak office, kan ttuanak sehzung, kan umnak khua, kan umnak ram cio in hi kawl uknak hi kan doh dih lai. Kan ram ah va kal in meithal in va doh lawng hi dohthlenak a si loh, kan phaisa kumkhat ah $150 pek hi kan umnak hmunhma cio in kawluknak kan rak doh mi cu asi ko" tiah a ti . Kan miphun u nau 80 leng nih an nunnak an pek cang mi hi CNF dohthlennak ah aa tel rih lo mi kan um sual ah cun Pu Thla Hei bia bang, kan um nak ram le hmun cio in i tel ding ah a can a tlai rih lo.
Miphun hawi hna, hi kumkhat kan ni timh mi thla 4 chung ah a tlam a tlin khawh hi, kan miphun nih kan ram kan dawt ruang ah le kan miphun kan ttanh ruang ah a hram pi cu a sinain, hi ban tuk kan dawtnak a vun langh khawhnak caah hin Col. Solomon le Pu Thla Hei ban tuk hruaitu ttha hna hi rak um hna hlah seh law a tu ban tuk hin kan tlam a tling lai tiah ka zum hrimhrim lo. America ram chung ah ramkulh (state) 14 an phan i, a khua cun khua 20 an cul. Khua khua khat ah hmun tam pi ah bia an i, thlathum chung an ni rauh. Zan ih manh lo in an um chel hi a tam i, tampi ah hawhra nih a den chel hna hi a tlawm lo.Hi hna pahnih hi kan miphun hruainak ah mi tam pi nih kan ngeih khawh lo mi, mipi hruainak pahrang ttha Pathian nih a pek hna. Hi an pahrang pawl tam pi lak ah pakhat cu: minih thin hun tuk in an vun den hna lio ah zeipawi lo in an ni um mi, mahpa kha hawi ah an ser tthan khawh nak a si. Hihi a tu hruaitu an ttuan hnu lawng ah si lo in, an ngakchiat lio Hakha le Thantlang an rak um lio te hrimhrim in an ni ngeih mi, an ni chuah pi mi a si. A tutan, hi kan hruaitu pa hnih hna i America ramchung an rianttuanak le an kan hruainak hi cu kan miphun tuanbia ah vawlei cang donghtiang a rak hmun lai i, a rak tang ding kan miphun ttuan bia dawh pakhat a si. Hi tuanbia dawh ttialnak aa tel mi CC member pakhat cio cung ah lunglawmh nak le thathawh chin chin nak he...



Nan miphun hawi,
Daniel Sakhong
Indianapolis

Ref:: From: Daniel Sakhong <danielsakhong_chinram@yahoo.com>
To: LAIFORUM@yahoogroups.com;

Tuesday, December 28, 2010

Taylor Swift, Asian Ramlei Tlawn Aa Tim

America ram ah Country-pop hlasa a simi Taylor Swift (kum 20) cu hla thar aa chauhmi “Speak Now”, zapi sin langhter dingin vawleicung ram 19 ah tlawn aa tim. Hlasa Swift cu kum thawkka February thla in khualtlawn hramthawk aa tim i kum 2011 chungah show voi 87 tuah aa tim. Feb thla chungah a tlawn dingmi ram pawl cu Singapore, Japan, S. Korea, Philippine le Hong Kong ram hna an si i March thla chungah Europe ramlei a tlawng tthan ding a si. A hlasaknak cu America ram ah donghter a timh. Taylor Swift cu chanthar mino nih an uar ngaimi nu a si i kum 2009 lioah a rak i chuahmi “Fearless” hla in tangka tambik hmutu a rak si bal.—Reuters


Ref:: Seihnam

Monday, December 27, 2010

Tan Suai Hmanthlak


Tan Suai Hmanthlak Aa Dawh Ning Hi,,, A Mang Hna A Chia Hnga Maw Ka Ti Pah.

Sunday, December 26, 2010

"Jesuh Chuahnak Kong"

Mah Drama i an piah bikmi cung Mathai 2:1-14 chung hi an si i Video Drama na zoh pah hi mah Bible ca caang hi rak rel pah te u tiah kan sawm hna.

(Mathai2:1-14 )1Jesuh cu, Judea ram Bethlehem khua ah, Siangpahrang Herod bawi a si lioah khan a chuak. A chuah tlawmpal ah cun arfi zohthiammi hna kha nichuahlei in Jerusalem khua ah khan an ra i, 2“Judah siangpahrang a si lai dingmi ngakchia a chuakmi cu khuazei ah dah a um? A arfi nichuahlei in a chuah kha kan hmuh i amah biak awkah cun atu hi kan ra,” an ti.

3Cu bia cu Siangpahrang Herod nih a theih tikah a awlok a chong ngaingai i cu bantuk cun Jerusalem khuami vialte hna zong kha an si ve. 4Tlangbawi upa vialte hna le Phungbia cawnpiaktu saya hna kha a pumh hna i, “Khuazei ah dah Messiah cu a chuah lai?” tiah a hal hna. 5Annih nih, “Judea ram Bethlehem khua ah,” tiah an leh. “Cun Profet nih a rak ṭialmi cu hihi a si:

7Cucaah Herod nih cun nichuahlei mifim hna cu a thli tein a kawh hna i zeitik set ah dah arfi kha a chuah ti kha fiang tein a hal hna. 8Cun Bethlehem khua ah khan a kalter hna i, “Va kal u law ngakchia kong kha ṭha tein va hlat u; cun nan hmuh tikah ra ka chim ṭhan u law kei zong amah cu ka va bia ve lai,” tiah a ti hna.

9Siangpahrang nih a ti hna bang cun an kal; cun nichuahlei ah an rak hmuh cangmi arfi kha a lang ṭhan i an hmaiah a kal i ngakchia umnak cungah cun a dir. 10Arfi an hmuh ṭhan caah cun an i lawm tuk hringhran. 11Inn chungah khan an vung lut i ngakchia kha a nu Mary sinah cun an vung hmuh. An khuk an i bil i an biak. Cun an zal chung khan laksawng an i chuah i an pek, cu an laksawng cu sui le frankinsen zihmui le mura zihmui an si.

12Pathian nih an mang ah Herod sin i kir ti lo ding khan a chimh hna i cucaah lam dang in an ram ah khan an kir.13Annih an kal hnuah Bawipa vancungmi pakhat cu Josef sinah khan a mang ah a lang i, “Tho law, ngakchia le a nu kha i kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih ngakchia hi thah awkah a kawl lai,” tiah a ti. 14Josef cu a tho i ngakchia le a nu cu Izipt ram i zampi awkah zan ah khan a thawhpi hna. 15Cuka ah cun Herod a thih tiang an um. Hi thil cu Bawipa nih profet ka in, “Ka Fapa cu Izipt ram in chuah awkah ka auh,” a timi bia tlinnak caah khan a si. *""Jeusuh Chuahnak Kong Drama""




Tuesday, December 21, 2010

JESUH A CHUAHNAK HMUN LE CAAN

Caan tlaitu ----------------------------- Siang Dun
Phung chimtu ------------------------- Rev. Philip Hrengling
Khamhtu khrih chuahnak ni le thla a kan phaktertu Pathian kan thangtthat. Pathian cu kan itheih lo lio zong ah dawtnak in a kan vengtu a si. Jusuh nih cun a nunnak pek in a kan tlangh. Jesuh dawtnak hi a ngan taktak ko. Jesuh zoh chih in kan nunnak lam ah hmai ah kal hna usih. CIM chungtel zumtu pathat cio cungah lomhnak kan chim. CIM a nun khawhnak cu Pathian thawng le nangmah na telnak thawng in asi. Nihin thawgttha a kan chimtu hi CIM ah caan saupi Director a kan ttuan piaktu Rev. Philip Hrengling a si. CIM can saupi a rak hruai. A mah kuttang ah chungtel tampi kan rak karh. CIM cauk zong a kan chuah pi khawh. A cungah lomhnak a tam hringhran ko. Upatnak he a kut ah caan kan pek cang.
JESUH A CHUAHNAK HMUN LE CAAN

Cathiang rel ta usih! Luke 2:4-7: Josef cu Galiliram i Nazaret khua in Judearam i Bethlahem khua an timi, Siagpahrang David chuahnak khua ah khan a kal. Josef kha khika i a kalnak cu amah kha David hrinsor a si caah a si. Cun min thlak awk i a kal ah khan a hammi Mari kha a sinah aa kalpi. A ni thla kha a tling dengmang cang i khika i a um lioah khan a hrin can kha a phan, fapa te kha a hrin i cucu fater a si. Puan in a zual i caw rawl einak kuang chungah khan a thlim- riahnak khualbuk ah khan an caah hmun a um lo. Bawi Jesuh a chuahnak hmunhma le ni le caan ahhin ziah hi tluk hin hmun a um lo? a caan pek zong a um lo ti hi ruah awktlak ngai a si. Mi lungthin ah i manh lo caan, hmunhma pek khawh lo caan theng ah Jesuh a chuah hi a ruang a um hnga maw? Pathian khuakhan maw a si hnga? minung leikap in chambaunak dah a si hnga? Jesuh a chuahnak tuanbia tawi kan hmuhmi cu a chuahnak hmun Bethlahem cu Jerusalam lei a tlawngmi hna nih an tan pahnak le an i din tawnnak hmun rem ngai a si. Jerusalem khuapi cu mikip nih hmuh le tlawn duh cio a si i, Bethlahem i tan pah cu a nuam ngai in an theih. Jesuh a chuah lio hrawngah hin Siangpahrang Awkastas nih ramchung ah a ummi vialte David hrinsor a simi milu rel dingah nawlbia a chuah. Cucaah min i thlak awkah a mi paohpaoh in anmah le an khua cio ah khan an kal. Josef zong cu David hrinsor a si ve caah min thlak awk ah a hammi Mari kha aa kalpi ve. A ni thla kha a tling dengmang cang i, khika an um lioah khan a hrin can kha a phan. Fapate cu a hrin i cucu a fater a si. Puan in a zual i caw rawl einak kuang chungah khan a thlim-riaknak khualbuk ah khan an caah hmun a um lo. Ram chungah David hrinsor vialte min thlak awkah anmahle khua cioah an kal caan cu sikaw, lampi le riahnak inn paoh cu minung an khat ko lai. Riahnak khualbuk le i dinhnak hmun zong ham cia dih a si ko lai. Kalnak le riahnak zong a cuh in i cuh dawh an si. Chungkhar unau i hmuh caan, i ton caan le hmun khat ah riah tti caan a si. America ah Thanksgiving hi November zarh donghnak a si. Cucu an sunsak ngai ve i, chungkhar i hmuhton caan le rawl dum ti caan ah an hman. Rian ah a khunh a la kho lo zong hi ni ahcun a khunh pek dih a si. Hi bantuk caan ahhin khual a tlawngmi an tam ngai i, i manh lo cio a si. Tlawmpal ah Christmas ni le caan nih a hun zulh i, rian tam aa peh. Mi paoh i manh lo cio a si. Cucaah America um Laimi holh cu ka bizi tuk ti a si. Bizi tuk cang ahcun, Pathian he zong appointment lak khawh lo, hmun le caan pek khawh lo a si. Bawi Jesuh a chuah lio hrawnghrang ahhin mikip cu anmahle rian herh ah an buai cio lai i, naute Jesuh le a nu biak chonh can zong an ngei kho lai lo ti cu mitthlam in cuanter khawh a si. Caw rawl einak kuang an hei tan pah ko zongah lungthin le pum i manh lo cio cu an si hna lai i, Jesuh tonnak hmunhma le caan pek khawh a har kho men. Atu chan cu minung pakhat le pakhat iton zong hi appointment lak hau lengmang in a um cang. Ton kan duh i, can le hmunhma na ka pe kho hnga maw? ti a si lengmang. Minung sinah cun appointment lak khawh lengmang a si pah ko nain Pathian he i tonnak dingah appointment lak hi a tlawm ngai. Khrihfabu cawlcanghnak le Nubu nih thlacamnak an ngeihmi ti bantuk hmanh ah micheu cu a hmun le a caan kan pe kho tawn lo. Tukhal pawl cu lamhlapi in an ra; an laksawng te he naute Jesuh cu a nu he khan an va ton i, cu an laksawng te he cun an biak. A caan an pek, hmunhma zong an ngei. Pathian Fapa cu hi vawlei cungah a thlite le hmun kiangte ah run inn ngei lo in a chuak. Cun khualtlawnnak puan in zual a si. Hla phuahtu Emily E. Elliot nih Hi Bible caang Luke 2:7 lakin Hlabu 85 kha a phuah. A hla bia a ttialmi cu; A caang khatnak ah; Bawi tthudan le suiluchin kha na kaltak, asinain Bethlehem ahcun ihnak hmun hmanh kha na ngei lo. A caang hnihnak ah; Vancung ah lawmhnak hla an sa; asinain vawlei ah toidornak na in. A caang thumnak ah; Vawlei ah sermi saram cenghngia le vate nih hmun an ngei; siseh Pathian Fapa cu vawlei ah ihnak hmun hmanh a ngei lo” . A caang linak ahcun; Jesuh a ttum tthan tikah, ka pawngah um tuah a ka ti lai” tiah hla dawh ngai a phuah. Hi hla nih Jesuh chuahnak hmanthlak a fianter ngai. Vawlei misual khamhtu Jesuh cu vawlei a rat lioah inn nuam le inn dawhpi kha i thim loin lothlo le sattil zuattu inn tu kha aa thim deuh. Run inn ngei lo le khual puan in zual kha aa thim deuhmi a si ko rua hih. A kum a hung upa deuh i kum 12 a si lio zongah Jerusalem lei lampi le biakinn ah a nu le pa nih an va hmuh. Inn ah siarem ngai in a um lo. A kum a hung upa hnupi zongah pakhatpa nih “Na kalnak paoh ah kan zul lai” tiah a ti i, Jesuh nih cun “Cenghngia nih kua an ngei i vate nih bu an ngei, sihmanhsehlaw Mi Fapa cu riahnak hmun hmanh ka ngei lo” tiah a ti (Luke 9:58 ). Hika Jesuh biate hi minung ruahnak in ngaih ahcun, lung a hno ngai. Jesuh nunnak lampi cu caw rawl einak kuang in vailamtahnak tiang a kalmi a si. A donghnak ahcun, an vuinak a thlanpi zong kha a lawng ko. A rian liimnak dingah hmunhma lakin le siarem tein nunnak caan hman hi a si kho hrimhrim rua lo. Atu kannih chan zongah Bawi Jesuh a chuah ni le caan cu rian tam lio he aa tong, khualtlawn caan he aa tong. Cun khuasik can a si fawn. Cu tikah Pathian biaknak a caan pek a har, tenh khawh a har; ruah can zong a um kho tuk lo. Jesuh cu hmunhma le a caan kan pek khawh lo hmanhah amah tu nih a khualtlawnnak a donghnak bik i a chimmi cu “Ka Pa inn chungah khaan tampi a um ko i cuka i nan caah hmun va timh awkah ka rak kal lai” (Johan 14:2) a ti. Vawlei ah riahnak hmun le tonnak caan a ngeih lo hmanhah amah nih cun hmun a kan timhpiak peng ko. Van innka cu a hun lai i, ahohmanh lam pawng le innka ah khuasik bu in hngah a um ti lai lo. Run rep lo ah a chuak i, riahnak hmun a ngei lomi a si ko nain, kan caah run inn dawh a kan timhtuah piaktu Khamhtu Jesuh cu thangtthat peng usih!
Philip Hrengling
Maryland , USA
Ref:: [CIM] CIM Caan Hmannak (Dec 19, 2010)
THAWNGTHA.yahoogroups.com>

Monday, December 13, 2010

Tu Kum 2010 X'Mas Kan Thinlung Chungah

Unua hna kan nunnak cio ah Pathian nih damnak he lam a kan hruai hna i tu kum 2010 X'mas dam tein kan phan tthan cang hna lai tu kum X'Mas ah hin nang zei tal i na thinlung chungah Pathian aa phuang i Pathian dawtnak zei tal in a lang maw?A tu lio caan hi Jesuh nih kan thinglung chungah hmuhma lak i um hmun a kawl lio caan a si a tang Bible ca caang hi voi khat tein van rel tthan hna uh si law.Matthai 2 :1Jesuh cu, Judea ram Bethlehem khua ah, Siangpahrang Herod bawi a si lioah khan a chuak. A chuah tlawmpal ah cun arfi zohthiammi hna kha nichuahlei in Jerusalem khua ah khan an ra i, 2“Judah siangpahrang a si lai dingmi ngakchia a chuakmi cu khuazei ah dah a um? A arfi nichuahlei in a chuah kha kan hmuh i amah biak awkah cun atu hi kan ra,” an ti.

3Cu bia cu Siangpahrang Herod nih a theih tikah a awlok a chong ngaingai i cu bantuk cun Jerusalem khuami vialte hna zong kha an si ve. 4Tlangbawi upa vialte hna le Phungbia cawnpiaktu saya hna kha a pumh hna i, “Khuazei ah dah Messiah cu a chuah lai?” tiah a hal hna. 5Annih nih, “Judea ram Bethlehem khua ah,” tiah an leh. “Cun Profet nih a rak ṭialmi cu hihi a si:

6Judea ram ummi Bethlehem khua,
  • Nangmah cu Judah ram khuapi hna lakah a hme bik na si naisai lo;
  • Zeicahtiah nangmah chung hin hruaitu pakhat, ka mi Israel mi hna tuukhal a si dingmi cu
  • a chuak lai,” a ti. *

7Cucaah Herod nih cun nichuahlei mifim hna cu a thli tein a kawh hna i zeitik set ah dah arfi kha a chuah ti kha fiang tein a hal hna. 8Cun Bethlehem khua ah khan a kalter hna i, “Va kal u law ngakchia kong kha ṭha tein va hlat u; cun nan hmuh tikah ra ka chim ṭhan u law kei zong amah cu ka va bia ve lai,” tiah a ti hna.

9Siangpahrang nih a ti hna bang cun an kal; cun nichuahlei ah an rak hmuh cangmi arfi kha a lang ṭhan i an hmaiah a kal i ngakchia umnak cungah cun a dir. 10Arfi an hmuh ṭhan caah cun an i lawm tuk hringhran. 11Inn chungah khan an vung lut i ngakchia kha a nu Mary sinah cun an vung hmuh. An khuk an i bil i an biak. Cun an zal chung khan laksawng an i chuah i an pek, cu an laksawng cu sui le frankinsen zihmui le mura zihmui an si.

12Pathian nih an mang ah Herod sin i kir ti lo ding khan a chimh hna i cucaah lam dang in an ram ah khan an kir.

13Annih an kal hnuah Bawipa vancungmi pakhat cu Josef sinah khan a mang ah a lang i, “Tho law, ngakchia le a nu kha i kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih ngakchia hi thah awkah a kawl lai,” tiah a ti. 14Josef cu a tho i ngakchia le a nu cu Izipt ram i zampi awkah zan ah khan a thawhpi hna. 15Cuka ah cun Herod a thih tiang an um. Hi thil cu Bawipa nih profet ka in, “Ka Fapa cu Izipt ram in chuah awkah ka auh,” a timi bia tlinnak caah khan a si. *

X'Mas Hla Kan Ngai Hna Lai

KNU Le Kawl Ralkap

December 11 Phaziatungsu Myone Mekahtazia khua ah kawl ralkap khahmahziah(402) Duhzinhmu hruai mi hna cu khuachung ah Bawlibaw an Bengh lio ah KNU nih an kah hna i Duhzinhmu a kehlei ban ah an khenh i thi dEng in hma a put.Cun December 12 ni zing nazi 8 AM ah KNU nih Mekahtazia khua ah an kah mi hna Kawl ralkap sitku bawmtu ding ah a rak ral mi hna le Metakhtazia khua ah a um mi kawl ralkap hna cu an ni palh i an mah le an mah an ni kah a thi mi le hma a pu mi theih khawh an si rih lo.Mekahtazia khua cu inn40 hrawng an si kawl ralkap nih an thawl dih hna i Phaziatung Myo lei ah an zam dih ti a si.

Cun kan hnu zarh chung ah kawl ralkap nih KNLA ngingchian zi la mi Buchoih Thingmawng hruaimi ralkap 6 an tlaih hna i an thah mi hna kawng ah Buchoih Thingmawng nih kawl ralbawi Buchoih TetngangU sin ah KNLA minung6 a thah mi hna tatzin 230 Duhtatzin hmu le a ralkap vialte hna a zi zut ding in kan taing hna lai i an duh lo si ah cun Thansuai sin ah kan taing hna lai a ti.Minung pakhat ah Thailand tangka in(1000000)liam ter ding in a ti.Kawl ralkap nih ngingchian zi lak ding ah a kan nawl i a tu ah an mah tu nih a kan kah than hi cu an tazia lo i a sulam zong a um lo a ti.Buchoih Thingmawng hi 2007 kum in KNU in a chuak i ngingchianzi a la mi pawl an si.A ralkap hna hi 1000 leng an phan ve.Nanganzi cu Nanganzi in phisin a hau zeitik hmanh ah hriam nam in phisin khawh a si lo a ti.Atu hi Buchoih Thingmawng ralkap hna cu kawl ralkap nih a kan kah si ah cun kah ve ding in timhtuahnak kan ngeih ve cang an ti. Ref::News.DVB


Pa Tluang
Aizawl
.

Sunday, December 12, 2010

Bawipa Cu Keimah Sin Hrimhrim Ah Hin A Um Ko

CIM Zerhpi ni Caan Hmannak (December 12, 2010)


Caan tlaitu: Hrang Hlei (St. Paul, MN USA)

Thawngtha chimtu: Pu Cung Hu (Founder/CEO of Hakha Volunteer Blood Donors Organization, HVBDO, Hakha, Chin State, Myanmar)

Nunnak le damnak a kan pe i atu bang in amah thangthat kho ding in caan tha a kan ser piaktu kan Pathian a min thangthat si ko seh! Hmasabik ah ca thiang rel hma sa hna usih:

1Tlang khi ka hei cuan hna i,khuazei in dah bawmhnak ka hmuh lai? ka ti. 2Bawmhnak ka hmuh dingmi cu Bawipa sinin a ra lai, van le vawlei sertu a simi sin cun a ra lai. 3A ka hupphengtu cu i ṭhang peng ko sehlaw, ka tlukter sawh hlah seh: 4Israel hupphengtu cu a ngu bal lo i aa hngilh bal lo, 5Bawipa nih an ven ko lai, nangmah huhphenh awkah na pawngin an umhnawh ko. 6Chun ah ni nih harnak an pe lai lo i zan ah thlapa zong nih harnak an pe ve lai lo. 7Bawipa nih ṭihnak chungin an huhphenh lai i him tein an chiah lai. 8Atu in zungzal tiang, na chuahlei siseh, na luhlei siseh, an zohkhenh zungzal lai (Psalm 121:1-8).

Thla kan cam ding mi:

  • Pathian nih nunnak le ngandamnak laksawng a kan pek ca ah amah sin lila ah lawmhnak bia chim hma sa hna usih
  • Taksa ngan dam lo ruangah lung rethei in a um mi nih Pathian pekmi ngandamnak an hmuh i hna ngamnak taktak an hmuh khawh nakhnga thla cam hn usih (e.g. kan pawng kam ah a um mi le kan hawikom, chung khat an min chim in thla cam piak hna usih)
  • Uknak that lo ruangah hremnak le harnak a tuar mi Laimi le kan Kawlram miphun tampi nih zalonnak le daihnak an hmuh khawh nakhnga thla cam usih
  • Vawilei khuaza kip i Laimi khrihfabu le an hruaitu hna le Khrih thawngtha phuangtu hna nih Khrih thawngtha kha mit hmai zoh loin an phuan ngam nakhnga thla cam piak hna usih
  • Kan ram ah zalonnak tling a um khawh nakhnga thla cam hna usih.

Thawngtha lei ah kal usih:

Nihin thawngtha a kan chimtu hi Pu Cung Hu hi mi tampi nih Lai tlang ah thi hlutnak bank (Blood Bank) a thawk tu ti in hngalh a si. A chuah nak khua Mang Nu (Hakha peng) a si i a tu a umnak cu Hakha ah a si. A nupi Ngun Sui Din (Mih Nuai) he fapa Van Bawi Lian an ngeih. A tu lio te hi, America um mi Laimi zumtu u le nau sinah a rian tuannak (ministry) kong he pehtlai in chimrelnak le bawmhnak hal pah in a tlawn lio a si. A tu lio hi Indianapolis i Laimi khrihfabu pawl sinah caan a hman lio a si. Kan sinah thawngtha a kan chimh khawh ca ah a cung ah kan ilawm.

Mi cheu nih Pu Cung Hu a rian tuannak (ministry) hi nan theih rih lai lo ca ah a tawi nak in kan vun langhter:

1. 1. December 1, 2004 ah Hakha Volunteer Blood Donors Organization (HVBDO) ti mi thi hlut bank a thawk.

2. 2. Self-support in hi rian hi arak thawk nain a rian tuan a thathnem ning kha mi tampi nih an hmuh tikah tha zaang an pek cio i nihin ah cun HVBDO rian tuannak cu mizaw le mi har, sifak san tlai lo caah nunnak le ruahchannak hrampi pakhat ah a hun ichuah.

3. 3. Nihin tiang HVBDO nih rian a tuan khawh mi cu:

a. Hakha Civil Hospital ah thi thawl 1700 leng a hlut cang;

b. Mi zaw 800 leng a bawmh cang;

c. Mino 700 leng thi hlu ding in organize a tuah hna;

d. Hakha sii zung nih thi a herh mi 98% cu HVBDO nih a pek

3. 4. Amah Pu Cung Hu hrimhrim nih thi voi 11 a hlut cang

HVBDO rian tuannak cu Pathian nih thlua a chuah i, kan Lairam lawng si loin Kawlram level tiang in min that upat peknak tampi a hmuh [e.g. General Director, Union of Myanmar Health Ministry, Yangon (2005); Chairman, Myanmar Red Cross Society Of Yangon (2008); Deputy, Union of Myanmar Home Affair Ministry, Yangon (2009)]. Cun amah Pu Cung Hu zong Kawlram journals le makazin tampi nih interview an tuah [e.g. The Myanmar Times, 2005; Health Digest Journal, 2006; Economic Journal, 2007].

Hmailei ah HVBDO nih chun mang a manh mi cu, Lai tlang khua pi kipah hi thi hlutnak bank phun a um cio khawh nakhnga a herh ning in lam hmuhsak, ruahnak pek, le bawmh chanh ding a si. Amah Pu Cung Hu he direct in chawnh le pehtlaih a duh mi nih 317-531-8199 ah chawnh khawh a si i cunghu2007@googlemail.com ah ca kuat khawh a si.

Thawngtha kan ngaih hlanah, Mang Hre nih Southern Gospel hla Step Into the Water a remnak in a tial nolh mi Ka Tih Lai Lo ti mi hla vun ngai hmasa hna usih.



DSCN0028[1].JPG

Bawipa Cu Keimah Sin Hrimhrim Ah Hin A Um Ko

Bawipa nih Profet ka in, "Ngaknu cu fa a pawi lai i a min cu Emmanuel a si lai," tiah a chimmi a tlinnak hnga caah, hi thil vialte an hung um hi a si. (Emmanuel ti cu Pathian kan sin ah a um, tinak a si) (Matt 1:22).

Bawipa a vel thawng in, CIM ah thawngtha chimnak caan tha a ka petu Pathian cu a min thangthat si ko seh! Caan a ka zaangfah tu hna kan upa tawlrel tu hna sin zong ah kaa lawm tuk hringhran.

"Maw Bawipa Jehova Pathian, na rian ka tuannak ah ka si khawh chung in le ka lungthin dihlak kan pek cu na hngalh.A tu bel hi, phaisa thazaang lei in, ka har cang caah, USA a ummi hna, ka unau pawl sin ah, bawmhnak hal hna ning law, na lung a tling hnga maw? Na ka sianh hnga maw, Bawipa. Ka sin ah na um a si le na hmai na ka hoi a si ahcun, ka kalter ko sawh" tiah ka thlacaamnak cu, caan tawite chung ah, Bawipa nih a ka theih piak i, CEBC Krihfabu hmang in, November 30, 2010 ni ah USA vawlei cu a ka lamhter.

Zaan lai ah, USA khua nganngan hna cu,vanlawng cung in it loin ka bih i ka cuanh.USA um, Laimi nih vanram naih bikcem an rak timi hi, hi pei a si ko hi ka ti. Ka lungthin ah Pathian bia a hung chuak colh mi cu, Lot le Abaraham an i thennak kong kha a si (Gen 13:9). Lot nih, khua a cuan i, Pathian dum bantuk nelrawn kha aa thim, Abaraham nih a that lonak, a tangmi, ram tha lo deuh kha a co ve. A hnu bel ah, cu nelrawn dawh cu, zam takmi khua ah a cang nain, Abaraham tu cu, ram chia deuh chung in, rumnak taktak he khua a sa. Cu nih cun, keimah caah fimnak a ka pekmi cu, "khoi ka hmun ah dah ka um tinak in, a ho he dah ka um" ti hi a si. A si! Khoi ka hmun paoh ah um ko u sih, nain, Pathian he kan um ti ahcun, hmun tha cu a tha chin lai i, hmun chia zong a tha ko lai.

December thla cu, Krihfa chim lo, fa lo hmanh nih, an i nuamhbik caan ah an can ter. Nain, Krihfa tampi kan caah ah cun, zuun ngaih caan, lunglen caan, a thimi hna theihthan caan ah kan hman theu. Hi kan mithli le ka lilennak nih, Jesuh hmu kho lo in a kan hrem (John 20:15-16, Luke 24-31). A caan ah Bawipa nih nih kan hmailei in lam a kan hruai i,tluang duahmah in kan kal kho, a caan bel ah, hnulei in kan ral a kan ven piak i, a kan zulh. Pathian ka sin ah dara maw a um lo ti lo ee tiah kan i ruat. Kan ral a chia. Kan ning a ti. Pathian dai tein a um cu, kan sin in aa then a si lo. (God's silence is not his absence).

A tu lio caan ah, Krihfa bu nih zeirel huaha lo mi, Pastor zong nih kutrit tlak duh ti lomi hna kan um hnga maw? Member sin zong in upatnak a co ti huaha lomi Pastor hruaitu hna tah kan um hnga maw? Dawtmi nih then mi hna, nu le pa nih hlawtmi hna, fa le nih kal tak mi hna, rualchan chungkhat nih rem ti lomi hna tah kan um hnga maw? Vawlei cung ah hin, keimah lawng te ka si ko cang a ti mi hna tah kan um hnga maw? Zoh tuah....!

Pathian minung taktak a si mi, Elijah kha na ruat bal maw? Israel mipi sin ah a bia a nung kho ti lo. Thah an zalh beh rih. A lungre a thei tuk. A lung a dongh caah, a tha a der, a thlep, a uai. Rawl hmanh a hlam kho ti lo. A tha a dih i, a vun hgilh kar lak ah, Pathian vancung mi nih, changreu le ti a run kuat.A tho i a ei. A chimmi cu, "keimah keimah lawnglawng hi Bawipa Profet a tangmi ka si; sihmanhsehlaw Baal profet cu 450 an si"( 1 Siangpahrang 18:22)." A za cang; a tu cu, ka nunnak kha la ko (1Siangpahrang19:4). Bawipa nih, nangmah lawng na si lo da kaw, cu tluk luamman cun, na zaang a der ee. Rawl umlonak hmun le rawl petu um lonak hmun ah da kaw, meilung in rawhmi changreu thaw taktak kan dangh khah! Zohhmanh, hawikom tampi kan nganhpiak ko khah. Israel chung hin, Baal hmai ah a khuk a bil lo i a hnamh zong a hnam lomi 7000 kaa nganh hna lai (1Siangpahrang 19:18). Ziah nangmah lawng na si tung lai lo ti kha Pathian bia cu a si.

Vawilei cung ah hin, keimah te lawng ka siko cang, a hohmanh nih an kan daw duh ti lo hi ta,dawtu le bawmchantu zong ka ngei ti lo hi ta,tanhtu le dirpi tu zong ka ngei ti lo hi ta ti in, kan hnabei a dongh lio zong ah, Bawipa Pathian nih hawikom tha a kan pek. A caan ah a Vancung mi hna an si, a caan ah a minung hna an si.

Bawipa Cu Keimah Sin Hrimhrim Ah Hin A Um Ko (Emmanuel).

Pathian nih thlauchuah kan pekpiak ko seh! Amen.



Ref:: THAWNGTHA@yahoogroups.com


Remdaih Duhnak Lungput

Remdaih duhnak lungput

Matthai 2:14, Josef cu a tho i ngakchia le a nu cu Izipt ram i zampi awk ah zan ah khan a thawhpi hna


Tu lio hrawng cu mail group pohpoh ah December thla a si bantukin Christmas sermon deuh longte kan rel cio hna. Christmas lungput zong a phunphun in an kan chim: Herod lungput, Mifim hna lungput, Mary lungput, Josef lungput, Tukhal hna lungput ti bantuk in an chim cio, an tha ngaingai hna. Tutan ah hin keizong nih Remdaih Duhnak Lungput timi in thazang la hna usih tiah kan sawm hna.


Jesuh chuah lio can ah hin Herod nih Jesuh that duh ruangah kum 2 tang ngakchia vialte thah dih ding in order a chuah. Jesuh that lo ding in luat ternak lam hi Pathian nih a phunphun in a tuah kho tuk ko: Herod kha a nunnak tiang hmanh a lak khawh ko, a lungput zong a thlen khawh ko, a rian zong in a dinh ter khawh ko, nawl ngei lo zong ah a chiah khawh ko. Herod teinak ding caah Pathian nih zei poh a tuah khawh ko nain dohnak le teirul icham in nang maw kei tiah rian a ttuan lo. Herod teinak ding caah Pathian a hman mi (hriamnam) cu Herod hrial kha a si, Matt. 2:14 ah kan hmuh ban tuk in “Josef cu a tho i ngakchia le a nu cu Izipt ram i zampi awk ah zan ah khan a thawhpi hna. Herod a hrial ter hna tikah Herod nih Jesuh cung ah le a nu le a pa cung ah zeihmanh a tuah kho ti lo. Jesuh cu Herod kut chungin him tein a luat ti kha kan hmuh.


Rian kan tuannak ah, asiloah, Khrihfa bu chung i rian kan tuannak cio le kan tthut kan dirnak cio ah hin mi dang he ihua hlah usih, dawntu si hlah ning, mi dang thil rit si hlah ning ti kan duh ah cun piahtana (problem) a si ding mi thil tuah le ttuan le i cuh le bia chim hna hi Josef le Mary nih Jesuh he Herod an hrial bantuk in hrial khawh izuam hna usih law, cucu Pathian duhnak le remdaih duhnak lungput cu si. Nang maw kei maw tiin kan i entainak le tthawn le nawl ngeihnak (power) kan icuhnak nih hin kan khua, kan riantuannak le kan Khrihfa bu hna ah hin piahtana a chuah pi tawn. Tahchunnak ah Khuabawi naa cuh ruang i nan khua a dam lo le a zawt peng ding ah cun i cuh lo a tha deuh. Senior Pastor naa cuh ruang i na Khrihfa bu a dam lo peng ding ah cun i cuh lo ding asi ko. Founder le president si naa cuh ruang ah bu tthennak le dohkalhnak a chuah ding ah cun nangmah tu kha i phet diam i, hrial diam ding asi ko. Nangmah he aa cuh mi hna an dam le khua mi le Khrihfa bu an tthat kha ilawmh awk asi ko. Cucu, tutan Christmas nih a kan cawmpiak duh mi, remdaih duhnak lungput ka ti duhmi cu asi.


Na umnak, na dirhmun, na rian te ah khan felte tu in um i zuam ko. Caan nih bia a chim ve tik ah cun nangmah kha Khuabawi, President le Senior Pastor tbt.. ah an in hlam caan a um ve te ko lai. Cu tikah cun daihnak le remnak, dawtnak le zawnruahnak a karh lai. Na rian ttuannak cu a ngan chin lai i na ram cu a kau chinchin lai.

Christmas Lomhnak le Hnangam Daihnak cu nan dihlak cung ah a thar in tlung ko seh. Amen!

PaHniang

Manila, Philippines

//////////////////////////

Saturday, December 11, 2010

Vawlei Cung Thawngpang Tlawmpal

Mi tam deuh nih cun nan theih cia mi zong asi ko lai. Na in a thei deuh rih lo mi cheukhat unau pakhat hnih caah ti bia asi. " WikiLeaks.org" a ser tu "Julian Assange" kong hi tu hrawng internet le local newspaper pawl ah a lar ngai.
A min - Julian Paul Assange
A chuahnak- Townsville, Queensland, Australia
A chuah ni - 3, July, 1971
A Nu min - Christine
A Pa min -
A Fa min - Daniel Assange ( Kum 16)
Julian Assange hi Physics le Math sianghleirun a rak si i Computer Programmer zong asi. 1995 kum, Melbourne , Austrilia a um lio ah hacking software pakhat asi mi Strobe ti Computer programme pakhat a rak ser. Mah cu vawleicung a pakhat nak free & open source( a duh mi poh nih man lo in hmannak nawl a ngah mi) " port scaner" ( internet in midang an computer chung luh nak a kawltu) a rak si.2006 ah WikiLeaks.org website cu member pa 5 he hram an thawk i a mah hi lutlai bik asi.
Australia a um hnu ah Kenya, le Tanzania ram hna zong ah a um ton. Vietnam, Sweden, Iceland, Siberia, Iraq, Belgium le US ram hna ah a a tlawngleng ton. Awards Economist Index on Censorship Award (2008), Amnesty International UK Media Awards 2009, le Sam Adams Award 2010 laksawng hna zong a hmu mi a rak si. Mah laksawng hna a hmuh nak cu thawngpang lei zalawnnak kong he pehtlaih in asi.
Vawlei cung mipi nih an rak theih bik nak le US nih an rak duh lo nak hram a thawh nak cu 2010, April thla ah WikiLeaks website ah a rak tar mi Collateral Murder ti mi video kong ah asi. Mah video cu 2007 kum ah Iraq pawl US ralkap nih an kah lio hna record video asi. 2010 kum, July ah Afghanistan ral an tuk nak he peh tlai in thawngpang 90,000 leng mipi sin ah an thanh hoi. Man hnu ah an peh chap mi US Diplomat thawngpang hna cu 250,000 leng asi cang i tampi peh in thanh, tar ding kan ngei rih a ti.
A tu cu England ah an tleih.Sweden nu pahnih a tleih hrem hna ti ruang tu deuh ah asi. Nain US nih an tleih lo ah thli te in an thah sual lai ti phan ruang ah a mah te in England palik sih ah aa ap ti in an zumh deuh.
A mah nak in a buai deuh mi cu Cyber War ti mi kong asi. Internet Freedom Activist pawl le Assange a tanh tu pawl Wikileaks website phiat le dirter a timh tu Amazon.com cu hloh an timh. Amazon tu cu an ti kho lo caah aa pehtlai mi Paypal cu kha an ti. DDoS ( Distributed Denial of Service attack)an ti mi thiam nak in an tuai ( attack) hna. Assange a tlanh tu mi le computer thiam mi nih WikiLeaks website phih nan tim ah cun internet a dih lak in nan hmaimit lawng ah a ngah lai an ti i mah website copy an tuah mi " Mirror" site pawl tam lak te an tuah cang. Mah pawl ( Hackers, Internet Activists ) nih a tu hi "Cyber War" ral kan i tu ti asi. Zei thil dah an chuahpi te hnga ti ruah ah a har ko.

Thursday, December 9, 2010

DKBA Le Kawl Ralkap

Nizan December 9 Kawl ralkap le DKBA cu an ni khat hnu ni khat an ni kahnak hmual hi a fak chin lengmang a pin chin leng mang i khuami harsatnak an tong chin lengmang.Nizan kha Tuhkhamiang Phungkyi Sianginn le Beuhakung i um mi kawl ralkap khahmahziah(401),(409) hna cu DKBA hna nih zan nazi 8 pm ah an kah hna i kawl ralkap 7 an thi hma pu mi zong an um.DKBA le cu zei hmanh hma pu mi zong kan um lo tiin DKBA Buhmu Sawsati nih a chim.Khuami hna cu zan ah Thailand ram lei ah an zam dih.

kawl ralkap Tanhkhawcu tlang cung i um mi khahlahziah(61),khahmahziah(230)le,(547) hna cu DKBA Bukyawtet hruai mi nih zing in an kah hna i zan lei nazi(2)tiang an ni kah i kawl ral kap lei(10)leng hma an put a thi mi tu theih khawh an si rih lo.Buhmu kyawtet nih a ti mi cu kan kahnak hna hi a nai tein kan kah hna mit hmuh bak in hma a pu mi hi kan hmuh hna a ti.DKBA le cu zei hmanh hma pu mi kan um lo a ti.

Cun Phalu ah nizan kha chun ni tlak an ni kah ve khat le khat lei in a thi mi le hma a pu mi theih khawh an si rih lo.Thubaw um kawl ralkap hna cu DKBA Buhmu Sanaung hruaimi nih an kah ve hna a thi mi le hma pu mi theih khawh an si rih lo.Kawl ralkap Sakhan cu DKBA tatzin(909)Buhmu hruai mi hna nih an kah ve hna i a thi mi le hma a pu mi theih khawh an si rih ve lo. .News.BNI.



Patluang
Aizawl,
Lungtinpi

Tuesday, December 7, 2010

Khrih Sin Lawngin Hmuhmi Thiltha Tuah Khawhnak!

Bawikhrih min in nan kut kan tlaih hna. Nunnak le damnak a kan petu kan Pathian a min thiang thangthat si ko seh. Haleluhjah..cungnungbik nih sunparnak co ko seh.

Tuzing ah kan nih dihlak in thlarau ti rawl ei than ding ah thimmi Pathian bia cu:

Efesa 2:10

Kannih cu Pathian kutchuak kan si i Pathian nih thil tha tuah dingah a rak kan tinh bantuk in Kri he kan I pehtliahnak thawngin thil tha cu ka tuah khawh nakhnga a kan ser than mi kan si.

Bawipa nih a bia a thar in thluchuahnak kan pek piak ko seh. Kan nolh ko rih lai. Minung cu Pathian nih amah muikeng in sermi kan si lawng siloin thlarau nunnak a ngeimi a thaw lila khan nunnak a kan pekmi kan si. Cucaah kan nun cu Kri nih a kan hlanhmi a si caah kan duh zong duhlo zong ah amah ta kan si I a duhnak kha kan tuah hrimhrim awk a si. Asinain a kan dawt tuk ruangah duh thimnak kha a kan pek i kan duh thimnak a hman khawhnak dingah a bia in a kan cawnpiak, a fapa a kan pek i thiangthlarau in kan sin ah khua a sa. Nifatinte cu thiangthlarau cu kan sinah rian a tuan zungzal i nunnak lam kha a kan hmuhsak. Asinain duh thimnak cu pek kan si caah a cheu nih cu Bawipa lam kha kan i thim i a cheu tu nih cun vawlei sualnak lam kha kan i thim. Cucaah kan duhthimnak bantuk in biaceih kan si dih te hna lai.

Kan pu Adam sinah sualnak a rak luhnak thokin minung vialte cu sualnak nih a kan uk dih. Asinain a fapa Khrih thihnak le thawhthannak thawngin Pathian thinlung ah kan nih caah pehtlaihnak le nunnak thar ngeih khawhnak lam siam piak kan si than. Cu laksawng a co mi vialte nih vawlei nih a pek khawhlo mi nunnak thar, thih a thiam ti lo i sertu duhnak kha a duhnak ngan bik ah a chia mi nunnak duhnung kha an ngei. Minung nih thiltha hi kan theih ko nain kan tuah khawhlo nak cu kan chung ah cu thlitha a tuah kho tu Krih thawngin kan hmuhmi thiangthlarau thawnnak kan chung ah a um lo caah a si.

A cung lei Pathianbia nih a kan cawnpiak bantuk in Pathian nih a fale nih a duhmi kan tuah khawh nakhnga thil tha a tuah kho mi Krih he khan a kan pehtliah ter. Cu bantuk in Krih he aipeh mi vialte cu Pathian thinlung ah ser thar mi kan si hna I cu ser tharmi nun a ngei mi poh nih cun Pathian duhmi thiltha kha an tuah khawh i Bawipa lung an ton. Cucaah kan nih vialte zong Pathian duhmi thiltha kan tuah khawhnak dingah Krih ah I peh in kan nunnak kaar hlang cio hna usih. Bawipa nih a rem a ti ahcun Pathian bia nih nu le va hi zeitindah dawt a kan fial timi kan chim te lai. Sunparnak Bawipa ta si ko seh.



Khrih ah nan dawtmi,

Tial Lian Thang

Washington DC, USA


Ref:: http://chinmino.net

Monday, December 6, 2010

THATHUT ZUAMNAK AH LAKSAWNG A HMU MI PA

" Thathut zuamnakah ra chuak cio u lo" ti mi tlang au thawng an theih tikah mi thathu tam pi hna cu lunglawmh nak ngan pi he thathut zuamnak ah an chuak cio hna i an dihlak 1000 reng lo an si ti a si. Thathut cu biatak te in an ni zuam i result a chuahtikah ai zuam huam lo mipa tu nih PAKHATNAK a hmuh ai.

Ai zuam mi dihlak in an thin a hung tuk caah zuamnak Comittee sinah biatak te in an complained tikah " nanmah cu thathut zuam nan huam, an nih cu a huam lo, cu caah an tei dih cikcek hna" tiah an leh. Cu caah a min ah "Mi Thathu" tiah an kawh beh!

Thathut cu zawtnak phunkhat a si. "Mi thathut cu Pathian nih a hmang duh hna lo" tiah Watchman Nee nih a ti.

Thathut ttih a nun zia :

1. Zinglei tuan tein thawhkhawh a si lo

2. Fimnak lei ah tthancho a har ngai

3. Thlarau zawtnak a chuah ter

4. Taksa damlonak a chuah ter

5. Sifah nak a chuah ter [ pamnak ]

6. Innchungkharah remlonak a chuah ter

7. Minih bochan lonak a chuah ter

8. Tlangval caah nupi ttha/ nungak caah pasal tha tawn khawh lonak a chuah ter

9. A rau tikah mi thil hngarnak le firnak tiang a chuah ter

10. Mi lak ah i tel huamlonak a chuah ter caah mi dang he i hlat chin lengmangnak a chuah ter I mah le mah I tuahmawh (suicide) nak tiang a chuah ter khawh.


Phungthlukbia 6 : 6 - 11, " Mi thathupa, hngerhte sinah khin va kal tuah; A umtuzia khi va ruat hna law fimnak i lak tuah. Bawi le uktu a ngei lo nain thal can ah a rawl kha a khawmh hna i rawl tuan can ah aa cawmnak ding kha a khawmh hna... Pamnak nih mifir bantuk in an tlun hnawh te lai i herhbaunak nih... an chuah hnawh lai."

Kan nih Chin mi hna cu kan pu pa chan in thathu mi an rak si lo. A teimak mi le a ttuan huam mi an rak si. Cu an teimaknak le an tuanhuamnak cungah Pathian nih thluachuah a pek hna i zohchia in pur an rak phiar bal lo. Ni hin thangthar mi no hna zong nih kan pu le pa hna keneh zulh in kan zawn cio ah a chuak mi kan tuan vo le kan dirhmun hna hi i sehchih bu in thathu lo bak in kan hmuitinh cio hlanh tiang i zuam cio hna usih. Cu cu Pathian duhnak a si i thluachuah conak zong a si fawn.





Ref::YCCF-international@yahoogroups.com

Saya Khin Maung

Sunday, December 5, 2010

"Zoh Nuam Hmanthlak"

Lai Lei Ngakchia Hmanthlak



A Pa Maw Upa Deuh A Fa


A Tlangval Pa Maw Aa Dawh Deuh A Nungak Nu

Tuesday, November 30, 2010

DKBL Le Kawl Ralkap

Nizan Nov 29.2010 Karen ram Kawkareih Myone Khudung khua le Aunglan khua kar ah kawl ral kap Khahlahziah231 le DKBA ramri hngah let a khanmi Tatzin1016 hna cu DKBA Sawlapuai hruai mi ralkap le KNU in an ni fonh i an kah hna kawl ralkap lei30 an thi i, Mithal30 an lak chih.DKBA le KNU lei cu a thimi kan um lo tiah DKBA Buhmu Sanaung nih a chim. Cun Phaziatungsu Myone Tetunglung khua le Zivun khua kar ah kawl ralkap khahmahziah410 le DKBA cu an ni kap ve i kawl ralkap lei puaichin in pa2 an thi hmapu mi zong an um.Nov29 ah DKBA phalun tatzin pawngah kawl ralkap le DKBA an ni kahnak ah kawl ralkap1 athi i hma27 nih an put.DKBA lei hma pu mi le a thi mi an um lo.News.BNI,


Patluang
Aizawl,

Sunday, November 28, 2010

Minung Ruah Khawhnak Leng In

Minung ruah khawh nak leng in
Isaiah 55:8 “Ka ruahning cu nan ruahning a si lo, ka thil tining zong nan thil tining he an i khat lo”
2010 April thla ah Malaysia ah ka kal. Ka kir lei ah Singapore Air-line ka cawk caah Singapore transit a si i Singapore ah nazi pa hnih hrawng aa din. Cu ah cun ka thil an thlen sual si men lai, Manila ka phak ah cun ka thil cu ka bawh lengmang nan a um ti loh, ka thil cu a tlau ko. Pathian, ziah zeitin dah si hnga, tiah thla ka cam, a thaizing ka va hlat than, a ngah hlei lo, zarhhnih rak kan hngak chung ti si. Pathian, zei na duh nak dah si tiah ka mawtchiat cang. Sinan, thlakhat rauh hnu ah an ka au than i; na bag kan hmu kho bak ti lo, na thil pawl zeizat man dah si lai dollar in kan in liam lai an ka ti. Dollar 150 man hrawng si lai tiah ka ti hna. Ka thil tlau mi cu bag fate si i laphehtoh, coffee, suantam..tbt…ka chiah mi 5 kilo te khi si. Dollar 300 kan in liam lai, na lungtling lai maw tiah an ka hal. Tling ka ti hna. Cu ti cun, dollar 300 cu ka ngah. Malay um mi ka u le cu, Laphehtoh, coffee pawl ei din nan ka cawk piak mi kha a tlau dih tiah ka chimh hna. Ka hoi nu May thla ah Malay ah a kal i ka u le nih ka thil tlau mi pawl cu a thar in an ka cawk piak than, an rak ka kuat than! Dollar 300 ka ngah hlei ah, ka thil tlau mi pawl cu ka u le nih a thar in an ka kuat ţhan. Malay ka rak kal lio ah hin dollar 300 bak leiba ka ngei. Cu vial te kha cham piak ding in Pathian nih khua a rak khan, a rak tuaktan cia dih mi kha ka rak thei lo. Ka bag a tlau lio i Pathian ka rak mawtchiat ning le thla ka rak cam ning ka ruat than tik ah ka ning a zak ngaingai, Pathian sinah ngeihthiamnak ka hal ţhan. Pathian min thangthat in um ko seh!Cucaah, Pathian cu minung kan ruahkhawhnak leng lei in a ţha bik in khua a kan khan piak tu a si peng. Isaiah 55:8 chung ah Pathian nih “ka ruahning cu nan ruahning a si lo, ka thil ti ning zong nan thil ti ning he an i khat lo,” tiah a ti ban tuk in, a rak si hrimrhim ko. Zeizong vial te hi a ţha bik in a rak tuaktan dih, khua a rak khan dih tak ko ti hi kan nun in fian khawh i zuam hna uh sih. Rom 8:28 ah “Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh” a ti ban tuk in Pathian nih khua a kan khan piak mi hi a ţha bik a si lengmang ko, suaisel awk a um bal lo. Zeipoh kan nun ah a rak chuak mi kha “Amen” pek khawh i zuam hna uh sih. Khatlei in kan theih awk belte cu, kan tuah ning kan zumh ning in kan ton ve, kan zun ve lai ti kha cu kan philh lo awk a tha. Kan mah tu hi zumhawkthlak tein um kan i zuam peng a hau mi si.
PaHniang
Manila, Philippines

Wednesday, November 24, 2010

"Ram Hla Rak Ngai Ve Uh"

Tu hrawng cu US lei cu khuasik caan a phan cang i lung a leng ngai.Abik in Lai lei X'mas le kum thar hna a nai cang tikah Fing le tlang hna phun dang tein an um lio caan le Fiakfairawh hna a awn caan le Phaizawng Par/Chawkhlei Par hna an par tthan cang lai kan umnak hmun le hma cio in philh khawh a si hrim lo.Tu hrawng cu keimah zong ram hla phun phai le lung leng hla hna ka lung chungah a chuak lengmang.

Cu ve bantukin Semnak Lai ram i a ummi hna zong nih ram dang um fa le chungkhar hna an ngai tuk caan hna a si ve lai tiah ka ruah.X'mas le Kum thar hna ah cun chungkhar tling lo pawl cu an i nuamnak a tling ti lai lo mu ti ruah zon ah cun zei kan ti hnga vawlei pawcawmnak le sifah ruang vawlei khua zakip ah kan vai hna mu.Vawlei ram ah tonnak caan um ti lo hmanh seh van ram tuah Chungkhar tling tein kan ni tong te hna lai tiah kan lung i hnemh ko hna uh sih.

Ram Hla Rak Ngai Ve Uh.Kan Lai nuphung Lam ah a sunglawi bikmi Khuang a cawi hmasa mi Pu Mang Sui umnak khua Lungtinpi Phaizawng fing le tlang pawl tu kum 2010 March thla ah Samuel Hrat Hmung nih Video zaihmi a si ko hih.Hla Fung 2 in ka rak tar.



Daw Su Le A Fapa An Ni Tong

Nizan Nov23.2010 zing ah Daw Aung San Sukyi a fa pa a kum33 Ku Thing Lin cu Yangon van lawng kunah a nu he dam tein an ni hmuh kho cang.NLD mino20 nih Daw Aung San Sukyi cu lungchungzi an lak piak i a fa pa cu vanlawng kun ah an va dawn.A fapa nih a ban ah NLD taseih Flag Aalan a suai mi a nu cu a hmuhter i a nu cu a nih chuak tuk i a fapa cu a zoh len an ti.
DawAung San Sukyi hi 1972 kum ah England Pa Maike he an um ti i fapa 2an ngei.1988 kum ah a nu dam lo caah kawl ram ah a rak lut i 1988 buainak he aa tong caah mipi hruaitu ah a tuan i ni hin ni tiang kawl cozah nih an tlaih i thawng an thlak nak hi a si.1999 kum ah a va pa Maike cu khensa zawtnak in a zaw i a thih hlan ah an nu he hmuh ton ding in visa a sawk ko na in kawl cozah ralkap nih an duh lo caah an nu he i hmuh lo in thlan mual a liam tak hna.
dssksonsssssss_260_220.jpg



Patluang
Aizawl,

Tuesday, November 23, 2010

Thil Cawk A Duhmi Hna Ca-ah

US um mi hna caah thaizing kip Friday Nov 26/2010 hi Thanksgiving Holiday a si bantukin thil cawk a duhmi hna nih mah ni ah hin cawk ah cun a man an thumh ni a si.A bik in Electronic thil pawl bianaah Desktop Computer/Laptop Computer /LCD/TV/Video Camera/Digital Camera/mp3 player tibantuk hna a man tlawm tein an zuar ni a si Bestbuy/RadioShak/ Compusa hna ah cun Zing lei dei hlan 5 AM in an On cang a hlan ah Laptop Computer $ 1000.00 an hauh tonmi kha $ 500.00 hrawng in an zuar lai.A tang Link ah hin rak zoh te uh law an Offer mi hna zong tling tein na kal hlan ah zoh cia khawh a si.Computer hna cu mi tam deuh nih duh cio mi a si caah Computer hna cawk a duhmi nih cu tuan tein nan i thawh lo ah cun nan ni tling sual lai lo caah tuan in thawh rak i tim te uh.

Sunday, November 21, 2010

Ahodah Na Si?

Caantlaitu: Pu Ro Thawng
Thawngṭha Chimtu: Rev Tluang Hu (Khuapi)

Lunglawmhnak:
Hmasa bikah nihin November 21 ni CIM Caanhmannak tiang lam a kan hruaitu kan Pathian min thangṭhat si ko seh.
Nihin Thawngṭha a kan chimtu ding Rev Tluang Hu a si i amah hi Khuapi Baptist Church ah pastor a ṭuan liomi a si. Pathian rian kum 30 leng a ṭuan cangmi a si. Nihin CIM ah kan rak thlahmi Thawngṭhabia hi kan hnu zarh November 14 ni ah khan Singapore ah Lai Christian Fellowship ah Thawngṭha a kan chimhmi a si i zapi nih thazaang i lak cio hna u sih tiah nihin CIM ah kan rak thlahnak a si.
Atulio hi Malaysia i Kuala Lumpur khuapi ah tuah liomi Global Chin Christian Fellowship conference ah kai dingin KL ah a um lio a si.

Thawngṭha Chimnak
Baibal Caangthim: Genesis 27:18-19
Genesis 32:
Tlaangtaar: Ahodah Na Si?



Cathiang Isaiah 52 chungah kan hmuhmi cu Pathian nih nan ruahmi le ka ruahmi aa khat lo. Nan thil tuahmi cu ka thiltuahmi he aa khat lo, van cu vawlei nakin a sang deuh bantuk in Nan ruahmi cu ka ruahmi nak in a dang seuh minung ruahnak cu aa khat lo.
Bawipa ka thangṭhat hringhran. Bawipa Jesuh sinah lunglawmhnak tampi ka ngei. Pathian nih sunparnak co ko seh. Amen! Ka lung aa lawm.
Nihin caan i chim ka duhmi cu, "Ahodah na si" timi hi ṭha tein le tawi tein i ruah hna u sih timi hi sawm kan duhmi hna cu a si.
Minung nih kan rem lo bik hna, kan huat bikmi hna hi zeibantuk an si? kan i lo cio lai lo, keimah nih na huat bikmi a um ve ko lai, nangmah zong nih na rem lo bikmi a um ve ko lai. Nain buaktlak in kan tuak ahcun kan rem lo bikmi hna hi “mahhngallo” an si, mah hngal lo pawl hi. A rum lo nain rum bantuk, a fimlo nain a fim bantuk, aa dawh lo nain aa dawh ngai bantukin a ummi pawl hi zapi nih rem lomi, mi huattlaimi an si lai dah ka ti. Keimah zong nih ka rem hna lo, nanmah zong nih nan rem hna lai lo dah ka ti. Cucaah cun nihin caan ah hin “ahodah na si, ahodah ka si” tihi ṭhatein i ruahṭi hna u sih, tihi tawi tein i chim ka duhmi cu a si.
Genesis 27 nak kan zoh tikah khan, Jacob le a pa tuanbia kan hmuh. A pa cu a tar cang, a mitkhua a hmu ti lo. A thi deng cang, fapa pahnih a ngeih hna. Kha ah khan Isaac nih a dawt bikmi cu a fa upa Esau kha a si. Esau kha a auh i a thli tein a naupa Jacob theih loin a chimhmi cu “ka fa Esau, nangmah kan dawt, atu ah na pa kei cu ka tar cang, ka mit zong khua a hmu ti lo. Cuccah cun ka fa, ka thih hlan te ah hin thluachuah pek kan duh. Cucaah cun va kal law ramlak ah, sa va ka kahpiak law, a lung, a thin pawl kha rak ka pe law thluachuah kan pek lai” tiah a ti. Esau nih “E a si, ka pa” a ti. Esau cu a rannak in ramlak ah a kal. Cu lioah cun Esau le a pa bia an i ruahmi kha Jocab nu Rebekah nih a theih hna i Jacob nu Rebekah nih cun a rannak in a fapa Jacob kha a auh i “ka fa ra tuah, Na pa le na u bia an i ruahmi cu hi bantukin a si…. Atu hi ramlak ah aa thawhka te a si. Cucaah a rannak in meheh kha va la law va that. A chungril kha tha tein va chum law, Jacob nih cun “ka nu, a si kho hnga maw?” a ti nain a nu nih cun Jacob, na thinphang hlah, keimah pei ka um ko hi” a ti. Ka pa nih a ka theih lai ko lai a tin ain a nu nih cun, “theih lo nakding cu ka thiam tuk ko” tiah a nu nih thazaang a pek ngai i a nu bia kha a el duh ti lo i a rannak cun meheh cu a thah, a cancan i a chuan hnu ah a pa sinah a kal. “Ka pa” tiah a auh. “Hawi” tiah a leh i a pa cu a khuaruah a har ngai. Mah aw cu aho aw dah a si hgna? “Ka fapa pahnih lak ah khan aho kha dah na si tiah a pa Isaac nih a ti tikah khan, a fapa Jacob nih a timi cu “ka pa, na fapa pahnih lakah khan upa Esau kha ka si” tiah a ti. Mah hi ruat tuah u si law, Jacob hi a hmaan hnga maw? Esau a si maw? a si hrimhrim lo.
Nihin ah zumtu Khrihfami tampi cu “aho kha dah na si” tihi i halnak um sehlaw “Jacob ka si” kan ti lai maw, Esau ka si kan ti lai dah! Biatak tein ruah a hau mah hi. Jacob kha a lung a hring pah. “Ziah ka fa, na khulrang ko e, atunai te pei kan chimh kha, zeikar ah cun sa cu na va hmuh? tiah a ti. Jacob nih cun, “Ka pa, na Pathian cu a tha tuk, na Pathian nih a ka umpi i a rannak in sa cu a ka pek i hi a si ko” a ti.. Jacob nih cun a zum kho hlei lo. Khoi, khoi, ra tuah. A tawinak in ka chim ko lai. A mitkhua a hmu ti lo. A rim cu a hnimh i "Aw, ka fapa a si tak ko" a ti. Ruah lopi in Isaac nih cun a fapa upa Esau ruah in Jacob kha thluachuahnak a pek dih.
Cucu zapi nih kan dirpimi Baibal chungah fiang tein kan hmuhmi a si. Jacob nih a u Esau thluachuahnak a co kan ti. Kan lungtling ngai, phungchimtu zong nih kan chim. Nain nihin ni ah chim ka duhmi cu Jacob nih hin a pa thluachuahnak a co taktak maw? A co tak maw?. Cucu ruah ṭhan a haumi a si. Ṭha tein rel hmanh! Caang 19 -21 tangah khan zoh hmanh! Isaac nih Esau cu thluachuahnak cu a pek, a pek taktak. Nain Jacob nun ah a pa thluachuahnak kha a tak in a um maw? a tak in a co maw, Jacob nun ah. Kha kha a biapimi cu a si.
Nihin ah biatak in kan ruah dingmi cu a pa thluachuahnak Jacob nih a nunnak ah a lut um taktak maw? Cathiang ah tha tein zoh hmah! A thluahchuah cu Isaac nih cun a pek ko. A tak ah cun a pa thluchuahnak a nun ah a lang lo. Rumnak, lawmhnak, hnangamnak daihnak micung bawi sinak thluachuah tling tein a pek ko nain Jacon nun zoh hmanh, zeidah a ton? Tlawmpal a rauh ah a upa cu a rak tlung i Esau cu a thinhung cang i Jacob nih maw a ka hlen, ka thluachuahnak vialte a ka chuh dih, ka thah lai ti a si. Jacob cu a thin a phang cang. A nu zong nih a bawm kho ti lo. “Ka fa, zeiti awk ṭha. Zeihmanh kan bawm kho ti lo, ka ṭa Laban sin tu ah va zaam ko” tiah a ti. Khoika hmanh ah a kal bal lomi, minaal, ngakchiapate Jacob cu ruahlopiin a pa thluachuah cu lawmhnak hnangamnak a nunnak ah um manh loin ramlak ah a pu Laban sinah a zaam ko.
A pu Laban sin a phan. Laban nih fanu pahnih a ngeih hna. Jacob nih cun tlangval note a si i a pu fanule cu a zoh, a zoh hna i a pu fale cu a duh hna. A zoh hna i ngakchia nu hi aa dawh deuh, a lunghmui ngai. “Aa ka pu, na tu pei ka si cu! Na sinah ka ra riangmang i hi na fale hi na ka pek a hau tiah a ti. A pu nih cun “Aw, kan pek lai. ahodah na duh?” tiah a ti. “Aw. Ka duhmi cu, khi nute khi a si” tiah a ti. A pu nih cun “cuti a si ahcun kum sarih chung tu na khal lai mu” tiah a ti. Kum sarih chung cu tuu a khal i “Kha ka pu, kum sarih a si cang. na fanu cu ka pe cang” a ti. “E khah, kan pek” a ti. A pupa nih cun kum sarih chuug na tuanman tiah a fanu pakhat cu nupi ah a pek i Jacob cu aa nuam tuk. Sinain a thaizing ah a tho i a zoh ciammam cun a duhmi Rachel kha a si ti lo. A thinhung tuk i “Aa, ka pu hi ziah, mahti hin a ka hlen” a ti.
U le nau, nulepa hna, chim ka duhmi cu a pa thluachuah a co nain a pa mitcaw a hlen caah zan zongah hlen a tong ve. A nunnak ah hlennak in a khat. Biatak pakhat hmanh a um ti lo. A pa thluachuah vilate khoika dah a kal dih? Zeiruangah tiah ruah lo awk a ṭha ti lo. Cucacun “ka pu, a si kho lo. Rachel kan ti i Leah na ka pek” a ti. A pu nih cun “Rachel na duh ahcun kum sarih na ṭuan rih lai” tiah a ti. “E law” a ti ve i kum hleili a ṭuanpiak.
A donghnak ah thil a um ṭhanmi cu tuu le meheh a conghter ṭhan i a pu Laban nih cun heh, tiah a hlen, a pu Laban sinum hna zong nih an rem ti lo. Cun Laban nih khan a rem ti lo tikah khan Jacob thinlung ah aa nuam ti lo, a nunnak ah. Ziah Pathian biami a si, a pa Isaac thluachuah a comi a si ko nain Jacob nun ah ziah, lawmhnak a um lo? Ziah a nunnnak ah hnangamnak a um lo? “Ahodah na si, ka fa?” a ti lioah khan “na fa upa Esau kha ka si” a ti.
Jacob sinah cun hnangamnak a um ti lo. Sihmanhsehlaw Pathian nih cun “Na pa sinah cun va kir ko, keimah nih kan um pi lai. Na thinphang hlah” a ti. Jacob nih cu a ṭih tuk. Ka kir ah cun ka u Esau nih a ka thah lai. Ka u Esau hi ka cungah a thinhungmi kha a tha cang hnga maw? Cu caan lioah Pathian nih “kir cang” a ti lioah khan Jacob cu a buai chinchin cang. Ka kir ko lai a ti i. a tawinak in kan him ah cun Jacob kha a nupi a fale le a sinum hna he khan an rak kir cang tiah a upa Esau nih a theih tikah khan aa lawm tuk i a sinum 400 he khan “E, ka naupa don ah kaa thawh lai” a ti i an kal. Jacob nih cun a thilri le saṭil hna kha ṭhen hnih ah a ṭhen hna i a sinum hna kha hmaiah a kalter hna. Jacob nih cun bia a cah hna i “ka u Esau nan ton tikah, hihi zeithil dah a si, an ti ahcun ‘na nau Esau nih nangmah caah laksawng an pekmi a si tiah nan ti lai” a ti hna. A thlahmi hna nih thawngpang an theihmi cu “Esau nih minung 400 he Jacob don dingah an ra, tiah an theih tikah rianrang in an kir i an bawi Jacob cu an chimh tikah ”Bawipa, atu hi na upa Esau cu nangmah don awkah a sal, sinum minung 400 he an ra, zeitin kan tuah lai?” tiah an chimh tikah Jacob cu a thinphang tuk cang. “Elaw, zeitin kan tuah lai, ka hlenmi kha a thinhung tuk cang i keimah thah awkah a ra ko cang” tiah a thinphang tuk cang i zeituah awk a thei ti lo, a lungre a thei tuk cang.
Jacob cu a pa thluachuah cotu a si.Thluachuah a pek ko nain a thinlung ah hnangamnak zeihmanh a ngei ti lo. Lungretheihnak in a khat, Thluachuahnak vialte khoidah an kal dih? Cu lioah khan Jacob nih thil pakhat a tuah ṭhanmi cu “Aa, a si ahcun ka satil le thilri te hi a hmuh ahcun a thinlung a ṭha ko lai tiah laksawng a tuah i a sinum hna kha hmaiah a kalter hna. Cu hnulei in a um lioah khan Jacob cu a lungre a thei ngai ko, khuaruahhar in a um lioah khan vanmi hna Pathian nih a rak thlah i a paih ti kan hmuh. Genesis 34 ah khan kha an i paih lioah khan Jacob nih vanmi kha a thlah duh ti lo. “Mipa rak ka thlah, khua a dei cang lai” tiah a ti. “Kan thlah bal lai lo, thluachuah na ka pek lo ahcun” a ti. “A si ahcun na min ahodah a si?” tiah a ti. Genesis 27 ah cun “ahodah na si a ti lioah khan Esau ka si a ti. Genesis 34 ah cun ni min ahodah na si a ti taktak tikah cun Jacob ka si’ tiah a sining taktak kha a chim cang. A sining taktak kha Pathian sinah a phuan tikah cun Jacob a si. Jacob timi cu mihlengpa, mihrokhrol pa Jacob ka si tinak a si. Hmasa ah cun mifelpa, mithawngpa Esau ka si tiah a si lomi pa a rak ti. A sining taktak kha phuan tikah cun Bawipa nih a cohlan. Mipa nih cun “Nangmah cu Jacob na si ti lai lo, Israel ti na si cang lai” tiah a ti i thluachuah a pek tiah kan hmuh.
Cucaah cun u le nau hna, nihin zanlei chim ka duhmi cu ‘ahodah na si, ahodah ka si timi hi ṭha tein i thei u sih. Pathian hmaiah kan sining taktak hi i phuang hna u sih. Kan sining i phuan loin Esau le Jacob si duh in Esau min in hal cu Pathian nih a duh lo, thluachuah kan hmu kho lai lo. Kan sining taktak kan phuan lo ahcun Bawipa thluachuahnak hi kan hmu kho lai lo.
A bikin Nihin ah chim ka duhmi cu minung nih kan hlen khawh lomi hna pahnih an um. Pakhatnak ah minung nih Pathian cu kan hleng kho bal lai lo. Pahnihnak ah nangmah le nangmah naa hleng kho bal lai lo. Voi tampi cu Pathian zong kan hlen tawn. Kanmah le kanmah zong kan i hleng tawn. Cathiang chungah “nanmah le nanmah i hleng lengmang hlah uh” a ti. Nihin ah Khrihfabu hna, nanmah le nanmah i hleng lengmang hlah uh, aa hlengmi khrihfabu si hlah uh tiah cah kan duhmi hna a si. Zeicahtiah cun ram ṭhatnak ah nan phan. Minung tampi cu Pathian kan philh tawn, kanmah le kanmah kan i philh tawn. Ahodah kan si, ti kan i philh tawn i mah hngalo dirhmun ah kan dir tawn.
Pathian thluachuah kan hmuh nakhnga Pathian hmaiah hin kan sining taktak hi i phuang cang hna u sih tihi tawi tein in chim ka duhmi a si. Pathian nih thluachuah kan pekpiak ko seh.
Amen!

Nihin Thawngṭha a kan chimtu Rev Tluang Hu cungah lunglawmhnak tampi kan ngei.
Kan Pathian nih nunkhuasaunak pe chin ko seh!
Ref:: Chin Internet MinistryNovember 21, 2010