"Ka Rak Uar Ngai Tonmi Hla"

Mirang hla hna hi a biafang le a sulam theihset lo zong ah an Music hna le an hlasak hna an thiamkho tuk caah ngaih duh cio a si bang in keimah zong ka rak uar ngaimi a si ve.Cu lak ah mirang hla a sami hna lak ah pakhat a luan ciami Kum7 hrawng ah ka uar bikmi hna lak i aa tel vemi cu Shania Twain hi a si.Cu lak ah a hla ka rak duh ngaimi cu a tang hi a si rak ngai ve te.


Apa hnihnak a sakmi lak ah a tang hi ka duhmi a si veve thiam2.Shania Twain ka rak uar tuk ah hin ka nung chung ah US hna ka phak ah cun a kut tlaihkhawh ding hna ka lung chung in ka rak i ruah ton.Nukum ah kan upa pakhat Pa Fung nih Shania Twain a kut ka tlaih tiah a ka ti i ka ngar ngai a ka tlaihkanh cang dam in kan um ah cun tlaih can zong cu a um ve te ko lai.


Rak ngai chun vete law na uarci hna a si hnga dek ma?A si lo kho men minung cu a thak a duhmi kan um a thlum a duhmi kan um ve btk in kei cu ka uar tuk ko hih::

Kawlram hlasak thiam Tun Tun a piangthar cang

Kawlram hlasak thiam Tun Tun (Iron Cross) cu US California ah a um i Pathian thlarau riantuannak thongin Biatak a theih i piantharnak a ngei cang. A nih hi Kawlram ah 1995 kum hrawng thawk in a min a rak lar taktak mi rocker pakhat asi. A hlasak mi lak ah 25 minutes timi Michael Learn To Rock hla kawl hla in phuah than mi ko hi a rak lar ngai. A nih hi aaw rau, awsang in hlasa kho mi a si hlei ah aaw hi a kekkuai mi aw in a chuah i aa phun dang ngai mi hlasak thiam pakhat a si. Pathian hla zong tamlak te record arak i tuah kho. Iron Cross miuzik bu ah arak i tel ve mi a si i nihin ni tiang a min thang peng rih ko.

US a phak hnu ah paw damlonak in fak lak tein a zaw i sizung ah aphan. Cu hnu cun Pathian dawtnak a thei i hrinthannak a ngei ti si. Pathian nihdamnak a ka pek than tiah a zumh i, a dam khawh in Pathian hla lawng a sa cang.February ni 13 ni ah khan Washington DC khuachung Calvary Baptist Church i Kawl pumhnak kum 13 tlinnak an tuahnak ah a rak phan ve i, tette khannak le hlasaknak a ngei. Pathian hla sak mi hna le a biachim mi hna cu mipi thinlung asuk tuk hringhran ti si.

Anih hi US ram California State ah a um i, a umnak State in Washington DC hi vanlawng in suimilam 8 bak zuan a si. Washington DC ah zan suimilam 10 asi ah hin California lei cu zanlei 7 lawng a si rih. Mah tluk in aa hlatnak hmun in cun Pathian thawngtha phuan ding ah hla thangthatnak hla sak ding caah tiah Washington DC lei ah thlacamnak he ka ra ee tiah Tun Tun nih cun a chim chih.

Atu Washington DC khuachung i Calvary Baptist Church ah Kawlpumhnak an tuahnak ah hin Pastor Rev. Saw Le Htoo hi church Pastor a si i, Kawl holh in pumhnak an ngei. An nih khrihfa bu hi Kawlram lei in arak phan mi Pastor le Biable sianghngakchia hna heh tiah a zoh khenh ngai mi an si.

Tu kum ah an khrihfabu 13 tlinnak caah siseh Haiti i harnak a tong mi hna caah siseh Gospel concert an tuah i cu ka hmun ah cun Me Me Gee le Htoo Alin, cun Kabyar Bweh Hmu, Tun Tun, Yatana Oo hna an rak phan ve kho i Pathian hla saknak an ngei. Tu tan ah hin Iron Cross in Myo Gyi le Khin Maung tanh zong DC ah an um lio a si nain Gospel concert ah cun an rak chuak kho lo.(Ref:: cyona.info)

Kawlram Ah H1N1 Zawtnak A Chuak Tthan

Kawlram khualipi thar Naypyidaw ah H1N1 zawtnak a chonhmi an karh tiin Irrwaddy thawngthanca nih a tial. Hi a zawmi chungah hin rampumpi ni tuahnak ah a ra mi tlangcung mi zong an i tel. Hiti zawtnak a chuah hi cozah thanhca nih cun a tial duh lo caah zeizat seh an zaw ti fiang in an thei kho rih lo. Rangon khua zong ah February 7 tiang ah H1N1 zawtnak in minung 27 an zaw.












Atam u cu N.Dagon in sianginn kai lio ngakchia an si.Cu lawng si loin Dagon siangngakchia 2, Shwepyitha sehzung tian`uan mi 3, Hmawbi biaknak lei sianginn ah 6, Mingladung ralkap siangngakchia 3 sin ah H1N1 zawtnak an hmuhchap. Hiti zawtnak a um lio ah cozah lei in khamhnak ding zeihmanh na tuah lo caah zawtnak a karh lai kan phang ngai tiah siibawi Zaw Ye Myint nih a chim. H1N1 zawtnak hi Kawram chung i an hmuh hmasa bik cu 2009 June thla ah a si i Singapore in a rak tlungmi kum 13 simi ngakchia nute sin in a si. Hi zawnak hi Maxico ram ram um vok hna in minung sin ah a karh i ni 71 ah kawlram a phan.(Ref:Irrawaddy)


Seihnam Malaysia

(Indiana Ah CDN An Tuah Lio "Lai Paih")

Hnuk Cancer Le Pabaw Chuahnak Kua Cancer Kong

Doreas Biak Tin Thluai

(UNCHR community Health Worker)
Cancer kan timi hi zeidah a si?

Minung kan pum ( tit, ruh, vun tibantuk) a sersiam tu cells aa funtom mi kha i funtom loin an i then, cu a then mi cells pawl cu a karh lengmang tikah cancer dirhmun ah an i cang. Cu ruangah cancers cu aa funtommi cells a then mi pawl (Arawk mi pawl) in aa thawk.

Cancer hi phunhnih in a um.
1. Benign (Tih a nung lomi) le
2. Malignant (Tih a nung mi) an si.

Malignant cancer cu kan thikal zul in kan pum kaa dangdang zong an phan i cancer ah an i chuah khawh. Cancer hna lakah nu nih an ngeih a tam bikmi cu Hnuk Cancer (Breast Cancer) a si. Cun pa nih an ngeih khawh ngaimi cu Pa baw chuahnak kua cancer (Prostate Cancer) a si.

Hnuk cancer (Breast Cancer)
Hnuk cancer cu Benign zong a si kho, Malignant zong a si kho. Nuphung a hngal cangmi,
a bik in kum 15 cung asi cangmi paoh nih ngeihkhawh a si. Cikor zong in a chuak kho mi zawtnak a si.









Hodah fawi deuh in a ngei kho?

1. Kum hlei hnih a tlin hlan nuphung a hngalmi
2. Kum 55 hnu lawngah thi a pit mi
3. Fa a ngei bal lomi
4. Fa ter kum 30 hnu lawngah a ngei mi
5. Sa a thau mi tamtuk a ei mi hna nihhin an ngeihnak lam a fawi deuh.
A cung lei zeihmanh a si bal lomi zong nih ngeih khawh thiamthiam a si ve.

Zawtnak hmelchunhnak

1. Zak, zak tang le hnuk pawngkam ah a bo lai
2. Hnuk muisam, a faat ngan aa thleng lai
3. A kuar, a bo in hnuk titsa zong dik toin a um lai
4. Hnuk hmur a pil lai
5. Hnuk hmur in thi, a hang dang pawl a chuak lai

I zohkhenh ning

Kum 40 a tling cangmi cu mammograms tiah kawhmi hnuk cells pawl i zoh ternak in i chek ah a tha. Cun nuphung a thei cangmi nu paoh, mah tein hnuk muisam kokek zeitin a si le a tu hi tah kokek ning a si maw si lo ti kha thlalang zoh in itonghnak (tha tein kut in a bo mi um le um lo i tongh i dah) ding, aa thleng mi a bomi tibantuk hmuh sual ahcun siibawi sinah izoh ter ding. Nuphung hngalh dih zarhkhat chungah i dah ah aa thei bik. A bo mi cancer a si ter kho mi kha cancer a si hlan i na thlop ahcun a dam than kho. Cucaah hnuk cancer kan ngeih lonak hnga a hlan kan in siibawi te sinah i ceih cio hna usih.

Pabaw chuahnak kua cancer (Prostate Cancer)
Prostate cancer cu Malignant cancer a si. Prostate cu tilhmu a bomi in aa thawh. Cu a bo mi cu duhsah tein a thang i cancer a sinak lai kum tampi a rau. Cu caan chung cun kan pum ka dangdang ah a karh i cancer a si ter khawh. Biana ah thin, cuap, ruh cancer tibantuk a chuak kho.

Hodah Fawi Deuh In A Ngei Kho

1. Kum 50 cung pa
2. Hormones ruangah
3. Folate pum chungah a tlawm tuk ruang ah
4. Cawhnuk le Calcium tamtuk a ei mi hna hi a dang nak in ngeihkhawhnak lam a fawi deuh.

Zawtnak Hmelchunhnak

1. Zunsip nih ei (tlawmte in zun a chuak lengmang mi)
2. Tu le tu zun chuah (Abik in zaan ah)
3. Zun thawh tikah til a lin, a fak lai
4. Keng, tawk le khawmruh a fak
5. Hartuk in pa baw chuah ( Baw chuah tikah tuar tuk le fah tuk khi)

I Zohkhenh Ning

Cawhnuk le Calcium tamtuk ei lo ding. Folate aa telmi eidin piak ding, cu hna cu
1. Antam, baarang, an tam hnahnem, a hringmi haanghnah
2. Ahring mi kawpi par, fangvoi, pawrpahlok
3. Facang, changreu, khohsuai
4. Be phunphun
5. Sathin
6. Banhla, misur, theithu, rungtaban tibantuk hna hi ei piak lengmang ah a tha….

Hmaizarh ah peh than ding.

Faiceu Media Group
Malaysia

Karen Ralzam Pawl An Umnak Ah An Kir Tthan

Thailand cozah nih a nor tuk hna caah a celh lomi Karen ralzam minung 300 leng cu an umnak Karen ramthen lei ah an kir than tiah kan hnu nili ni ahkhan Thai le Kawlram ramri ummi sinin theih a si. Hi ralzam 300 hna hi Tak Province, Tha Song Yang District i Mae U Su ah a ummi an si i 2009 June thla ah Karen hriamtlai pawl le Kawl ralkap pawl an i kah lio ah a rak zammi 3000 chungah aa tel ve mi an si. Kir cu an duh hrim lo, nain kir dingah nor an si peng caah an kir a si tiah Thailand Burma Border Consortium (TBBC) in Sally Thompson nih a chim.

Karen miphun caah Karen ram cu tih a nung tuk, hnangamnak a um lo caah minung covo phu pawl le ramkip ah a ummi buu pawl nih Karen ralzam hna caah Thailand cozah sinah nawl piak an si ko nain zei cu aa hlei rih lo. United Nations High Commissioner for Refugees (UNHCR) nih Tha Song Yang District i a ummi Karen ralzam pawl cu ton dingah nili ni kha timhtuahnak a ngei. (Ref: Irrawaddy)

Faiceu Media Group

Malaysia

Dalai Lama nih US President a ton

Tibet biaknaklei hruaitu Dalai Lama cu US President Obama ton dingin Feb 17, 2010 ah US lei a kal i tlamtling te in Feb 18, 2010 ah biaruahnak an ngei. A bikin an i ruahmi cu Tibet miphun cawisannak, nuhrin covo le biaknak lei ah zalawnnak hna hi an i ruah. Dalai Lama cu kum 75 a si cang in Tuluk in 1959 ah India lei a zam. US ram ah Tibel ralzam pawl he zong Tuluk kumthar an hmang ti. 2007 ah US President hlun G.W Bush zong ah tonnak a rak ngei. (Ref:CNN)

Faiceu Media Group

Malaysia