free web counter
greyhound runningHurricaneRunning Ostrich

Saturday, May 21, 2011

Jesuh Fuh Duhnak Hmun


Luka 24:15 “Jesuh hrimhrim nih khan a hei fuh hna i an sinah cun a kal ve”

Laimi hi capo seih cu kan hmang bak. Ram dang kan phan zongah hawi le kom hna he a bu piin kan ni ton hna si cun capo seih rumro asi ko. Sau non pi tiang kan thu hna i capo kan seih mi kha ramdang mi nih an kan hmuh tikah an khuaruah zong a har pah ngaingai. A bu pipi in bia i ruah, pakhatkhat hna i ceih ţi hi a ţha ngaingai mi si, idea ţha zong a chuak. Hibantuk a bupi in bia i ruah kan hman mi ah hin kan i ceih mi (topic) hi Pathian kong lei deuh ah thlen uh sih law zeitlukin dah a ţhat lai ti hi ka ruat ton.

Luka 24:13-35 hi Jesuh thawhţhan kaa hrawng i Kleopas le a hawi nih Emmaus khua lei an kal cuahmah lio ah Jesuh kong bia an i ruah mi le Jesuh cu an sinah a rak langhnak kong asi. Luka 24:15 “Cu ti i bia an i ruah lengmang i an i ceih lengmang lioah cun Jesuh hrimhrim nih khan a hei fuh hna i an sinah cun a kal ve” a ti. Hinih hin a langhter mi cu, hawi le kom he bia kan i ruah lio i Jesuh kong kan i ceih asiahcun, Jesuh nih cu a um kho ve ti lo i, a rak kan fuh ve lai. A kong kan ceih, a Bia kan i ruah tikah a rak kan fuh ve ti cu a fiang ngaingai. Cucaah Jesuh fuh duh nak hmun cu: Amah kong i ceihnak, A Bia i ruahnak, Amah thangţhat nak hmun hna kha an si. Cun, Luka 24:27 ah “amah kong aa ialmi vialte kha fiang tein a chimh hna” a ti. Cu ve bantukin Amah kong le a Bia kan i ceih tikah kan theih khawh lo mi zong Thlarau Thianhlim in a kan fian ve lai.

Khrihfa asi mi nih biakinn chung chim lo in; a lengah, kan hoi le he kan i tonnak ah, lam kan kal ţi nak ah zei kong dah kan i ceihbik ton? Kleopas le a hawipa hi Emmaus khua lei an kal cuahmah lio lampi cung i Jesuh kong bia an i ruah mi asi. Kan nih teh, capo long maw kan seih peng rih ko lai? Kan um nak, kan biachim mi le ruah mi hna hi Jesuh nih fuh duhnak hmun a si maw? Jesuh kong kan i ceih i a bia kan i ruah ah cun kan sin ah a kan fuh colh hlei ah, kan fian lo mi hna zong Thlarau ThiangHlim in a kan fian ter lai.

Kan inn, kan lo, kan rian tuan nak, kan sianginn kai nak, kan um kal nak hna hi Jesuh fuh duh mi hmunhma ah ser hna uh sih.



PaHniang

Manila, Philippines

Friday, May 20, 2011

Zisuh Atum Than Lai An Ti


Friday, 20 May 2011 16:16 | Written by Suihleng | | Print |

US khua nganbik New York khua chung ah Khrihfa bu cheukhat in zumtu hna cu zalam ah an chuak lulh hna i, mikip kha zisuh atum than canglai timi catlap an pek hna i, May ni 21 zarhteni ah Zisuh arung tum than cang lai 'Rapture' atlung cang lai tiah an chim. Mah khawh hin biaceihnak aum lai i October thla ni 21, 2011 tik ah vawlei pi cu arawk lai tah Harold Camping timi bu nih an thanh. An mah nih hin Family Radio timi US ah mi tambiknih an ngaih lengmang mi Khrihfa Radio channel zong in mah hi kong hi an thanh lengmang.

Mah hi cawlcanghnak hi Dr. Harold Egbert Camping timi kum 90 asi cangmi nih ahruaimi asi. Amah hi Family Radio lutlai zongcu asi. An zung hi California ah aum. Anih hi Bible sianginn arak kaimi asi lo. Theology zong thathi tein acawng balmi asi lo. University of California, Barkely siangiin in BSc degree ala mia si. A mah hi Christian Reform Church (CRC) khrihfabu chungtel asi. Reform Church cu Calvinism timi Calvin pomnak azul mi an si. Asinain Harodl nih cun 'Total depravity timi' a zum lo. Ahawi le dang hna hi an i bawm i Callifornia i FM Radio station pakhat an cawk i Gospel hla le thawngthabia hna an rak thlah. 1961 thawk in Family Radio timi cu an rakthawkmiasi.

An tuak ningcang

Harold Camping nih hin 2009 thawk khan Bawi Zisuh arak tumthannak ding ni le caan an tuak. "Pathian nih Noah sin ah vawlei cu ni 7 chung ah ka hrawh lai" tiah arak chim. Noah chan ah khan vawlei cu arawk taktak rih lo. Peter cakuat ah Pathian caah nikhat hi ni 1000 bantuk asi, arak ti. Aluanciami kum 4990 kum lio ah hin Noah sin ah Pathian nih mahbia cu arak chim mi asi. 4990 kum ah cun ni sarih (kum 7001) fonh ah cun 2011 achuak an ti.

Khrihfa Bible ca chung ah cun Zisuh tumthannak ding ni le caan hi tial le chimmi a um lo. Zisuh zultu hna nih Zisuh raktumthannak ding ni an hal tik ah Zisuh nih alehmi hna cu "Pa Pathian lawnglawng nih atheih" ati hna. Asinain, tahchunhnak tampi he arak chimh hna. Cun, Thawngthabia cu vawlei khuazakip ah phuan diih, mikip sin ahtheihter dih hnu ah caan donghnak asi te dingmi kong hna zong Bible ca nih achim.

Harold Camping nih cun an mah tuakning ah hin Zisuh chimmi bianabia 'parables' chung hna in siseh, Deniel cauk le Biathlam cauk chung hna in cherhchan an lak i, Zisuh tumthannak ding ni le caan hi an tuak.

Mr. Camping nih ABC News ah a chimmi cu -"May ni 21, 2011 nih Zanlei suimilam 6:00pm ah hin Vawleicung ah lihnihnak fak piin a um lai i, thlanmual vialte cu an i ong dih lai."

Asinain, khrihfa tampi nih cun an tuakning cang hi Bible ca he ai khat lo an ti. Zeicaah tiah cun, Zisuh tumthannak ding ni le caan hi Pathian dah tilo aho hmanh nih an thei lo tiah Bible caah achim. Mi cheunih cun Harold hi akum upa tuk cang caah akhuaruahning hi hngakchia bantuk ah alung akir thancang, adik ti lo an ti. Mi cheunih 'Nal Prophet' asi an ti.

Harold Camping nih cun, "May 21, 2011" ni ah hin 'Judgement Day' timi Pathian Biaceihnak ni asi lai tiah achim. (Ch: ABC News, Wikipedia)


Source::Globalchin.org


Ngandamnak Theihthlei

Florida University i sii lei kherhhlainak a tuahtu Nam Dang le Japan a hawi le pawl hna nih sangphaw-hnah hi cancer zawtnak thlopnak dingah a ṭha tiah thawngthanhnak an tuah. Sangphaw hnah hi a car a si ah a hring a si ah lakphak chok bantukin tisa he i dinh ah cancer zawtnak a damh khawh tiah kherhlainak an tuahmi in an hmuh. Sangphaw-hnah nih hin hnuk cancer, cuap cancer, ril cancer, thin cancer, takphin zawtnak pawl hi a damter khawh tiah an chim. Cancer zawtnak i thlopnak ahhin sii-ai in i thlop le thil dangdang hmang in i thlopnak in sangphaw-hnah in i thlop hi a ṭha deuh. Aman zong a fawi bikmi a si tiah an chim.

Sangphaw-hnah lawng si loin a thei zong hin Vitamin phunphun: Vitamin A, C tbk, pawl hi an i tel. A thei chung i a ummi amu tete zong kan sam hi a nahter deuh. Sangphaw-hnah hi a kha ko nain kaa thawk lo, pawpi fah, raifanh, hrawmfah, orfah zawtnak pawl hna i a damh khawh. Vawlei pumpi nih sangphaw-hnah hi an hman cang. Asia continent ram pawl hi a hmang bik an si tiah Nam Dang nih a chim.

Kan takpum chung theihtlei

Nikhat ah kan lung hi voi 103,689 a tur peng.
Nikhat ah voi 23,045 kan thaw kan chuah.
Nikhat ah kan thi hi meng 1,680,000 a luang.
Nikhat ah kan tin 0.00007 inches ( let-mah ) a ṭhang.
Nikhat ah kan sam 0.01715 inches a ṭhang.
Nikhat ah ti 2.9 pounds kan din. ( ahaang kan dinmi vialte aa telh chih )
Nikhat ah rawl 3.25 pounds kan ei.
Nikhat ah kan thlan 1.43 pints a chuak.
Nikhat ah minung pakhat nih biafang 4,800 kan chim.
Nikhat ah voi 10,000,000 kan mit kan ṭheh.
Nikhat ah minung pakhat nih voi 15 kan ni.
Nikhat ah kan kuttin hi kan keitin nak let 4 rang in a ṭhang.
Nikhat chung i kan ih lio caan voi 25.4 kan khupthal kan i let.
Vawlei cung minung ah tlik ṭhawng bik hi suimilam 1 ah 30 kilometres ( meng 18 ) a tli kho.
Vawleicung minung zatuak ah 10 hi ai cakeh ( kehdak ) an si.
Hathioa lio ah kan lungtur second 1 aa din ta.



Source:: csomalay.org

Sunday, May 15, 2011

Kan Tonmi Thil Zeitindah Kan Lehrulh Ton?

Kan ton mi thil zeitindah kan lehrulh ton?

Luke 6:35 “an cungah khan hatnak tuah u”


Nifatin kan nunnak ah kan ton mi thil pohpoh hi, kan holh in (or) kan tuahsernak in lehrulh (response) peng a si. Ţhatnak in lehrulh khawh asi, daitein umpiaknak in lehrulh khawh asi, cun ţhatlonak zong in lehrulh khawh asi. Zeitindah kan lehrulh ton i, zeitindah kan lehrulh lai ti cu kanmah le duhthimnak kha asi ko lai. Bible nih fiangtein a chimmi cu, “mi nih a tuh mi cu a zun ko lai” a ti (Gal. 6:7)


Rev. J. Stuart Holden cu ral kap a tlak lio i ral chung an um lio ah, zan khat cu a hawipa nih a khuk aa bil i thla a cam. Cutikah, “miral chiapa, zei thla dah na cam len” tiah thla a cam mi a hawi pa cu kedan a cheh. A thaizing ah a hawipa nih cun a chehnak mi a kedan te cu thiang tein a ţawl piak i a ihkhun tang te ah a vun chiah piak. Ţhatnak in a lehrulh. Cubak nih cun, J. Staurt cu a lungthin a kekkuai, a lung aa thleng i nihin ah cun Pastor minthang pakhat ah aa chuah cang ti asi.

Ka hawi pa James P. Bik cu zingka tein a tho i, mirang ca ka aw chuah hi ţha deuh seh tiah, aw chuah in mirang bible a rel ton. A um ţi mi a hawi pa nih, ‘mi thawh hlan ah hna na chet tuk’ tiah a sik. Aw chuah ti lo in a rel ţhan. Daiten um piak nak in a leh rulh. Nihin ah James cu khua le ram, khrihfabu caah Pathian mihman bak asi ti cu, keimah pumpak in tampi ka hmuh khawh.

Jesuh nih cun a thah tu pawl caah, “ka Pa, ngaithiam ko hna, zei kan tuah ti an thei lo” tiah thla a cam piak hna. (Luke 23:34)

Steven zong lungin a cheh tu hna caah thla a cam: A khuk aa bil i fak piin a au i “Bawipa, hi sualnak hi an cungah khing hlah,” tiah a ti (Lam. 7:60)

Nihin ah ral zong kan ngei lo kho men, lung in cheh tu, a kan thah duh tu zong kan ngei lo si ko lai. Asinan, khi pawl thengtheng kha ti duh mi si lo in, nifatin kan ton mi thil pohpoh hi kan duh zong duh lo zong ah, kan holh in maw kan tuahsernak in dah lehrulh peng a herh mi asi. Cutikah kan nih teh kan ton mi thil poh: kan riantuannak ah, kan boss le cungah, kan hawi le sinah, kan saya/mah te cungah, kan pongkam kan um nak poh zeitin dah kan lehrulh ton/lai?

Rick Warren nih “vawleicung kan rak chuah hi Jesuh i tehte (witness) ţha si ding in asi” a ti bang in nifatin kan nunnak ah Jesuh nih a kan cawnpiak mi nun, Pathian fa kan sinak kha kan langhter a herh ngaingai. Cutikah, mi nih Khrih zultu, Pathian fa kan sinak kha kan nun ah an hmu lai i, cucu kan nun in a Bia kan phuan nak le a tehte kan sinak kan langhter mi cu a si. (Luke 6:27-36 hi rel hrimhrim hna uh sih)

Kan tonmi thil poh hi Pathian duhnak hal in le ţhatnak lei in a lehrulh kho tu kan si cio nak hnga, Pathian nih thluachuah rak kan pe cio ko seh!


PaHniang

Manila, Philippines