Mathai 16:4 “Khuaruahharnak tuah nan ka fial, sihmanhsehlaw ka tuah lai lo”
2008 hrawng ah Philippines TV channel 9 in (mon-fri tiang) 9am ah Benny Hinn Ministry ti mi ara i ka zoh ton. Khuaruahhar in mi a dam ter hna, hnachet mi an thei khawh, a zengmi an kal kho, tehte khan mi zong an tam ngaingai.
Kan bible chung i khuaruah harnak (miracles) atam deuh pawl cu harnak ton hmasa hnu ah hmu mi deuh long te an si. Tahchunhnak ah, Israel mi pawl cu khuaruahhar ngai in rili sen an tan hlan ah kum 400 chung Egypt sal an tuan hmasa, khuaruahhar lungchung in ti a chuah hlan ah thideng in an ti hal hmasa, dar rul tar mi zoh ah cun khuaruahhar ngai in damnak an hmu hlan ah rul nih a cuk hna i ni tam non pi an tuar hmasa, mitcaw mi khua an hmu hlan ah kumtam non pi an mitcaw hmasa, kut le ke zeng mi an kal kho hlan ah kum tam non pi kal kho lo in an tuar hmasa.
Cucaah, minthang Andrew Womack nih cun (if we are after miracles to miracles, it means crisis to crisis or suffering to suffering) khuaruah harnak long te kan kawl, kan uar ah cun harnak, tuarnak kha kan kawl mi he aa lo ee a ti. Henry B. Blackaby nih cun, hmelhchunhnak caah khuaruah harnak thil hi kan hal lengmang ah cun zumhnak ngei lo lei tu khi a sawh deuh ee, a ti ve.
Cu bantuk khuaruah harnak longlong kan ti asi ah cun, kan zumhnak hna kha khuaruah harnak ah khan a um lai i , a tuah tu a minung cung ah khan zong a um sual lai ti hi phan a um ngaingai. Khuaruahhar thil tuah nak hi a herh lo ka ti mi si lo, ka doh mi zong si lo. Keimah ka nunnak hrim zong ah khuaruah harnak tam pi ka ton ve i, Pathian min ka țhangthat. Cun, Jesuh hrimhrim nih a rak tuah mi le a rak dam ter mi hna an si. Sihmanhsehlaw, khuaruahharnak tuah longlong kha an kawl cang i , an fial cang tik ah Jesuh nih “Khuaruahharnak tuah nan ka fial, sihmanhsehlaw ka tuah lai lo”(Mat. 16:4) a ti nak hna kha a si. Hihi kan theih a herh ngaingai mi a si. Nihin vawlei cungah khuaruahhar in mi a dam ter tu hna Pathian mi hman tampi an um ko. Khi pawl i an minung cung ah kan zumh nak kha i bunh hlah seh, khuaruah har an tuah khawh mi cungah khan doi hlah uh sih, khuaruah harnak hi uar tuk hlah uh sih. Pathian tu kha țhangthat uh sih.
Angaingai ah cun “khuaruah harnak” ti mi cu Pathian nawl kan ngeih lo ruang i kan tuar mi chung in a kan chanhnak ah kan hmuh mi “khuaruah harnak” nak in, Pathian nawl kan ngeih ruangah kan nun ah amah tein a rak langh ding tu kha asi. Zeihmanh tuar hmasa lo in, Pathian nawl zulh ruangah ngah mi le hmuh mi ‘khuaruahharnak’ a um ve. Kawl le uar ciammam zong a hau lo mi asi. Kan zumhnak a nun peng khawh nak hnga “khuaruah harnak thil” hi kan herh peng ah cun, cu zumhnak cu a derthawmmi zumhnak asi. Asinain, khatlei in, ‘every day is miracle’ ti mi Pathian thangthat zumhnak kha kan nun pi awk zong kan philh lo awk asi.
PaHniang
Manila, Philippines
Saturday, June 11, 2011
Malaysia Um Ramdang Mi Hna Caah Thawngpang
Malaysia ram chung ah umnak nawl angeilomi ramdangmi hna caah thawngpang tha pakhat cu Malaysia cozah nih nizah June ni 6, 2011 ah an thanh. Malaysia ram chung ah umnak nawl ngeilomi ramdangmi (illegal migrants) hi sing kul hrawng an um tiah Malaysia cozah nih an tuak. Cu sing kul aummi ramdangmi hna lakah micheu cu riantuannak nawl pek hna dingin tinhlamhnak an ngeihmi asi.
Malaysia ramchung kilvennak lei minister asimi Hishammuddin Hussein nih "Malaysia rammi sinak citizen kan pek hna lai tinak a si lo. Malaysia ram chungah umnak nawl le riantuannak nawl kan pek hna lai tinak asi." tiah AFP thawng zamh sin ah a chim.
Malaysia ram ah riantuantu chanbaunak aum caah, an ram chungah umnak nawl ngeihlo nabuin a ummi ramdang mi hna cu riantanter hna ding ah an tinh. Abik in Malaysia ram ah tlangcung lo tuahnak hmun, dumtuahnak, sehzung le inn rian tuantu ding hna caah minung an herh tuk caah, Malaysia rammi nih an herhbaumi tuahpiak mi pakhat asi.
Malaysia ram chung ah aummi ramdang mi hna lakah atam bikmicu Indonesia rammi an si i, hlawh man tlawm te lawng pek in suimilam caan saupi rian antuanter hna tiah AFP thawng zamh nih atial rih.
Minister Hussein nih hin mizei deuh khi thimi riantuannak le umnak nawl pek ding ti cu a chim lo. Ralzam hna an i tel le tel lo ding kongzong chimmi a um rih lo. Cun, Malaysia ramchung ah singkuk (2 million) aummi ramdangmi lengluang chung in micheu lawng mahbantuk pek asi lai tiah an thanh mihi asi.
Malaysia cozah nih ara laimi Jully, 2011 thawk in mah hi thilhi ahram an thawk lai tian an i ruahchan.
(Ch: APF Kuala Lumpur)
Monday, June 6, 2011
Kawlram Ah Tuluk Huatnak A Karh
" Naite i Kawlram President Thein Sein, Tuluk ram a tlawn hnuin Kawlram chungah Tuluk huatnak le remlonak a karh chin lengmang " tiah Yangon khua um Tuluk mirum pakhat nih Freedom News Group ah a chim.
Tuluk ram i Theinsein a va tlawn tan ahkhan Tuluk ralkap nih Kawlram chungah Ralhruang sernak nawl a rak pek hna. Cu ruangah hiti Kawlram minung an lung a fah khun nak asi.
Yangon le Mandalay in Tuluk mirum pawl zong nih an ngeihchiah hna cu an ram leiah an cheek cuahmah timi thawng nih Kawlram mipi an thin a phawh chin lengmang hna.
Tutan i Thein Sein khualtlawnnak ah Tuluk nih Kawlram he chawleh hnatlaknak an ngeihmi tampi chungin a ralkap pawl Kawlram chung um khawhnak ding hnatlaknak an ngeihmi ruangah $763 millions tiangtiang a cawihnak hi asi lai tiah Nitlak ram mifim pawl nih an tuak.
Kawlram chung i Cozah nih a lamkip in Internet phihnak a tuahmi cung zongah Tuluk nih cun thiamhlei ngai le palap ngai in a bawmh tawn caah cu zong cu Kawlram mino nih an huat tuk hoi i a phunphun in doh an timh peng.
Kawlram Humhimnak Vuanci ( Defence Minister ) Min Aung Hlaing cu Tuluk ralkap he bawm in Kawlram chung meihaang (oil ) chuahnak le tikhuhaang (Gas ) dawpnak hmun pawl ah Tuluk ralkap he runvennak an tuahtti.
" Hiti ningin thil a kal peng ahcun Kawl miphun nih Tuluk cung i an ngeimi huatnak a karh chin lengmang lai i a hnuah cun buainak nganpi a chuak te lai " tiah Mandalay um Sui dawr nganpi a ngeimi Tuluk mirum pakhat nih a ruahnak a chim ve. Kawlram chawlehnak vialte chungin %35 cu Tuluk miphun nih an tlaih.
Nu an tlawmnak Tuluk ramri hrawng i Kawlram nu pawl phaisa kawlnak bantuk in an hmanmi hna cung, Kawlram Cozah nih a hna ai cheh ter pengmi cung zongah Shan ramtthen le Mandalay ramtthen in mipi cheukhat hna cu an thin a linh nak a sau ngai cang.
Subscribe to:
Posts (Atom)
