free web counter
greyhound runningHurricaneRunning Ostrich

Thursday, July 2, 2009

P.Cung Lian Thawng Le Laump4 I Tonnak

P. Cung Lian Thawng le Pu Mang Cung Nung (Laimp4) itonnakSLP: Na konglam tawifel te-in na kan chim kho hnga maw?
TB: Pu Za Tlung le Pi Oliver (Thantlang Farrawn) i an fa pathumnak ka si. Thantlang ah ka chuak, Hakha ah ka thang. 1999 kum ah tanghra ka awng na-in University a pih lio a si ca-ah Malaysia ah ka kal. Kum thum dengmang ka um hnu ah ka kir than. 2008 ah nupi ka ngei, a min cu Van Thla Cer Hniang (Cer Cer ) ti ah hawi nih an auh na-in kan nih cu Honey ti-in kan i au veve. 2009 March 21 ah Australia ram, Adelaide khua ka tlawn kar ah fanu te kan ngei, a min ah Cung Hlawn Par ti ah ka pa nih aa sak.
SLP: Australia ah cun zeidah na va tuah?
TB: Laimi mautaam paam bomhnak ca-ah CHRO hruainak in Concert tuah i hla sak dingah an ka sawmmi ka si.
SLP: Mautam bomhnak tha na pekmi cungah kan i lawm. Hla le muzik lei ah na luhning, cawnnak hna na ngei maw, zei ti te-in dah nai thokning a si?
TB: Ka hngakchiat lio te in ka pa nih chungkhar pumhnak a kan tuahpi peng. Khrihfa hla bu khi kan sa tawn i a thlite (aw fir) in hla kan sak ah hin a rak kan sik. "Thangpi in sa u" tiah a rak kan ti tawn. Cun ka naupa hi ka puakpah in Lai zuun hla khi ka rak sakpiak bu-in ka awih tawn. Hla hi voi khat an ka sakpiak ahcun ka rak thiam colh. Taang riat hrawng ka cawn lio in hla sak ka huam taktak khi a si na-in ka aw chuahning khi au sawh khin ka au. 2003 ah CACC nih an chuahmi "Ka Tlei Kho Lo" timi tepphel ah a voi khatnak an ka sawm i kaa tel ve. Cu hnu cun mi nih an van ka theihnak a si. Tang riat ka cawn lio ah ka pa nih piano tum hi saya Tha Uk (Zion pianist) sinah arak ka cawnter. Malaysia ka um lio,
2001 ah cawnnak (tintaan) thla hnih tluk ka kai. Cun Laitlang ka tlun hnu in Yangon ah Piano le Violin le Vocal khi kum khat chung dengmang ka cawng .Cunticun hla le miuzik lei kai thokning te cu a si.
SLP:Hla hi fung zeizatdah na phuah cang?
TB: Fiang te in ka thei thlu lo, fung 70 leng cu a si ve cang.
SLP: Mino te nih mah zat lengluang hla nan phuah cu uar na um bak. A tum lei hi tah na thiam dih maw?
TB: Mah diriam tawk cun ka tum ve ko. Bass hi keimah studio ah ka tum pah. Piano zong ka tum. Violin hi ka thiam na lo in ka tum pah tawn. Drum hi cu computer in ka tum.
SLP: CD le VCD chuah cangmi ah voi zeizatdah nai tel? Nangmah te lawng in chuahmi na gei maw?
TB: Hla phel CD, VCD, DVD ah hin March, 2009 tiang ah voi 30 a tlinnak bak a si. Keimah te lawng cun ka chuah bal rih lo. Hla chuah dingah hin bawmtu ttha hna a herh ngai i zapi kan ca-ah cun a fawi lo.
SLP:Na nupi hi muzik lei a tuimi a si ve maw? Zei ti te in dah nan i uarning a si? Na sah hnu ah maw an uar, an uar na theih hnu ah dah na sah? Si lo ah chungkhat fonhtonh mi dah nan si?
TB: Kan nu hi hla ngeih a huam taktak mi a si hlei ah a sa pah tawn ve. A nih hi Pathian hla lawng a ngai i a sa. Ta le far bang in kan rak tlong leeng ti lengmang ko i sau nawn te, cu hnu cun a thlite in kan i duh veve ko hme cu.
SLP: A thlite duh veve in langhngan duh ah a van i thialning te cu na kan chim siang hnga maw?
TB: Na biahalmi hi kan leh lengmang ahcun na ka phuanter dih sual lai, cu kong cu za cang ko seh.
SLP:Kan halmi a luan sual ahcun rak ka ngaithiam. Bia dang ah, Stage cung hlasak lio ah pangpar oih khi a herh na ti maw?
TB: Herh tuk hmeteh. Pangpar pek le oih ah khin a satu zong kan hlasak kaa a thaw deuh tawn. A si na-in zuri hna nih hlasa thiam lo tiang in tuaitam deuh ahcun ing a puang pah ve. Cun, oih tam mi um, oih lo mi um fawn ahcun puai a zapi khin aa dawh tawn lo.
SLP:Zei hla na sak ah dah na thinlung taktak in na tuar (feel) bik? Pathian hla ah maw, zunn hla ah dah?
TB: Ka lungtak te-in ka sakmi cu ka tuar (feel) ning aa khat ko ka ti na-in Pathian hla cu Pathian hla deuh a rak si ko, a thlarau deuh hrimhrim ko.
SLP:Stage show nan tuah caan ah a harnak le a nuamhnak?
TB: Laitlang ah instrument thilri kan ngei lo tuk lawmmam. State show kan tuah ah hin thilri hlannak ah hin ka har cem. Biakinn kip ta kha kan va hlan hna. Mino ta, CE ta, Biakinn ta, kan hlan tikah Phungphai cio khi an rak ngei hna i mah duh bantuk in hlan khawh an si lo. Nawlngeitu upa an thimmi hna kha va nawl lengmang an hau. Cu tikah tha a baa, sian lo zong a um fawn. A nuamhnak cu thilri a tha mi kan van hlan khawh, a satu he tha te cawn hnu ah palh lo te-in van sak khawh ah khin a nuam.
SLP:VCD nan chuah tikah a harnak le a nuamhnak?
TB: Thaba ngai in kan hun chuah hnu ah a zuarnak ah hin a har ngai, lungre zong a thei, ruahning bantuk in aman hmuh a um bal lo. A nuamhnak cu kan tuahmi VCD mi nih an cohlan khawh, an uar, a fak hna an van kan fak thulh ah khin kan i nuam ngai tawn. Hngakchia hna kan lo pah ve ko cuh.
SLP: Hlasak thiam a poh mi hna cu an rum va si kaw, Lai hlasak thiam nih pawcawmnak tiang an hman khawhnak lai zeidah a herh?
TB: Laimi vialte nih Laibia le Laihla kan dawt i hlaphel an chuahmi kan rak cawk cio ahcun pawcawm khawhnak lam a um ve ko. Ramdang hna in show tuah dingah nan kan cah khawh lengmang ahcun pawcawmnak tlak ngai asi fawn hnga. Tampi chuah, tampi zuar, aman tling te hmuh khawh, ahcun a satu ca zongah a tha hnga, Laimi ca-ah kan hla a thangcho fawn hnga. Copy tuah kan hmanmi nih hin market a hrawh ngai fawn. Malaysia ah VCD kan chuah tikah Kawl dawr nih an fir (copy) ve i man fawi deuh hna in a zuar. Pawcawmnak tiang a phak khawhnak ding cu mipi thinlung ah ai hngatmi a si.
SLP: Lai hla hi copy an tuah tuk ti thawng kan theih le zei tin a si.
TB: An tuah tuk hme teh.A luan cia mi kum 3 hrawng lio ah khan keimah ka tawlrel mi khuai hi Shine Internet ka thut lio ah hin mi pa khat nih a rak kuu ter hna i an ku piak ko,Cu lio firtu nignzak lo ,Hmutu ning zak phun khin ka ning a rak zaak tuk.Na in tu kum 2009 hin cun ka thin a hung tuk
cang .Tam tuk an kan kuu piak .Bianabia pakhat ah HPH VCD hi nan theih cio men lai ti ah ka ruah,Thantlang khua ah hin kanmah nih kan zuar i 10 hmanh kan manh lo.Na in inn kip i Video ngei mi nih a ngei lo mi an tawm te taktak khi a si ,Zei ruang ah a si hnga kan ti kan hlat tik ah ka u nau pa hmanh nih khuai tam tuk hi a kuu ti tahwng ka theih i ka lung a fak tuk.An thei lo tuk ruang ah maw an kuu si lo le zei hmanh ah an kan rel lo tuk khi hme dek a si hgna ka ti.Hakha khua zong ah a si ve thiam an zual .A tu tiang kan manh mi hi khuai 350 hrawng a si,Na in a ngei mi inn hi a
tawm bik ah 800 cu an si ko lia ti in kan tuak.Cucu kan hlat tik ah cunputer a ngei mi le a cheu internet dawr a tuah mi nih hin tam tuk an kuu piak ti a si ko.Kanmah kan theih hngalh mi an si .A ho te khi dah a kuu ti hi kan theih pah cang ko hna .A tu cu cangia paster kan taar cang ,Lai khuai chuak poh poh kuu lo ding kuu theih si le a herh ning in rian kan tuan cxang lai kan ti.hihi tam pi in theih ter kan hau ru ka ti. Hakha ah Lian Conputer internet a tuah tu khi lai khuai an kuu ter ah cun a ngei tu va chim hna u law.ok an ti lawng ah kan kuu lai an ti hna ,Cu hmanh ah cun kuu mna 500 kan i laak lai i 2500 hi a ngei tu kna pek lai an ti. Cun mercy internet,Pu Jame khi cu kuu an fial sual ah cun a thah deng hna.,Keimah hmanh nih an hmai ka khap han lo.I an nih khi i zoh chun ding an si.an mah pa hnih lawng lawng khi lai khuai a kuu lo mi a tu tiang ka theih mi an si rih,.Cu ca ah cun khuai an kan kuu an kan fir piak mi hi fir ah an ruat rua lo a si rua ka ti fir hmanh ah lang hngan fir hmu tu ning zak a si hian thei rua lo el an kuu mi a si rua.Na si ning nai u pat ah cun lai khuai poh poh cu kuu ter ti fawn hlah.Zaan tim khua mang ah hngilh thiam lo in ka ruah mi bia ka chim.
SLP: Solfa, tonic solfa zei tluk dah na thiam, na cawng bal maw?
TB: Pu Biak solfa cawnak ah ka tel pah lengmang. Ka theih lo kar ah ka thiam diam ve ko. Cun 1-2-3 note kan ti mi khi 90% hrawng cu ka thiam cang men lai tiah ka ruah. Staff note khi cu tlawm pal lawng ka thiam ka tum kho lo ka tial khawh pah lawng a si.
SLP:Hlasak ah ramdang ah zeizatdah na kal cang, khua zei ram ah?
TB: 2008 ah Malaysia ah voikhat, atu 2009 ah Australia ah voikhat hi an si .
SLP:Lai mipi sinah hla kongah biacah na duh mi?
TB: Phuah hna u sih, sa hna u sih, tum ti hna u sih, hla bia hman lo mi kan phuahmi le theih setsai lo in hla kan tialmi khi tha te in a theimi nih kan chim than u law ka duh. Laimi cu hla lei ah kan no tuk rih ca-ah ruah nak pek lengmang kan hau ko.
SLP: Lai seino hna sinah biacah na duh mi?
TB: Kan bia, kan ca, kan holh le kan hla le kan music pawl hi tlau lo te-in a than chinnak lai kan umnak cio in cawn le thiam le dawt tim cio hna u sih.
SLP: Ramdang phan Laimi sinah biacah na kan duh mi?
TB: Ramdang a phanmi hi kan in ngai tuk hna. Lai hlum kan tlawm tuk cang. Ramdang ah ka rak um bal ve cang ca-ah nan kan ngaih lai ning khi ka theihthiam tuk. I ngai ko hna u sih law, I tleihchan peng ko hna u sih. Nan lung chung te ah Laitlang hi rak caam peng ko seh.
SLP:A donghnak bik ah, Laimp4 hi na zoh bal maw? Zei ruahnak dah cheuh na kan duh?
TB: Nai te Yangon ka um lio ah ka hawi nu nih a ka chimh lawng in ka theihmi a si. Lai hla vialte quality control tuah nan timhmi cu ka rak I lawm tuk ve. A chung hla nan chiahmi hna khi a ngeitu nawl nan hal ta hmasa hna maw, zangfahnak te-in theih ka duh ko.
SLP:Bia na hun kan hal ve ca-ah kan i lawm, hal awk tlak ngai zong a si. "A chung hla khi a siang lomi nih kan chim ulaw kan hloh than lai", kan ti ko hna. An hla kan chiahpiak hna ruang ah ai lawmmi an tam deuh suaumau. "Kei ka hla zong rak chia ve u" ti'n a kan fialmi an um len. An zuar lio mi hna cu kan chia ve lo. Lungsau te-in bia na kan leh ca-ah tampi kan i lawm.
TB: Nan rian tam lakah keimah hna biahalnak nan ka tuah ca-ah Laimp4 nan cungah kaa lawm tuk ve.

Wednesday, July 1, 2009

EBB BAIBAL lEHNAK - IV





Biahalnak: Mithi mi hna an thlarau khi an thih lecangka in khawika dah a kal, Hell/ Vanram a kai colh maw, asi lo ah thlan hmun ah dah aum?
Bialehnak: Protestant Khrihfabu kan zumhnak ahcun mithi hna an thlarau cu an thih le cangka in dinhnak hmun (Paradise) timi ah an i din chung ti in kan zumh. Paradise timi cu Abraham a umnak kha asi i vancung timi he a sullam aa khat pah ko nain vancung ngaingai asi rih lo tiah kan zumh. Cucu minung lei kap hmuh ning le zumh ning asi. Mirum pa le Lazaruh tuanbia (Luke 16:19-31) ahkhan mirum pa cu hell chungah a tla tiah a ti hi Lazaruh cu vancungmi nih Abraham pawng ah an zuanpi tiah a ti. Hi tuanbia ah Abraham umnak hmun kha Paradise asi tiah Bible thiam pawl nih an chim. Cun vancung khua ngaingai hi minung nih an phan rih lo ti a fiannak cu Bawi Jesuh hrimhrim nih John 3: 13 chungah "Vancung i a rung tummi mi fapa dah ti lo cu a hohmanh vancung i a kaimi an um bal lo" tiah a ti. Na biahalmi kan leh cang rua tiah ka ruah.
Biahalnak-2: Zu din hi a sual na ti maw? Cun kuak le khainii hi teh zeitin dah na hmuh ning a sual maw? Zu le kuak le khaini kong he pehtlaih in vei tampi Laimi sin ah cawnpiaknak le bialehnak ka ngei bal cang. Laitlang lei Bible conference te hna zong ah vei tampi ka chim cang. Zu le Kuak le Khaini hi Bible ca nih va zu ko uh, va ding ko uh tiah kan forh hmanh seh law pumsa ngandamnak (physical Health) lei kap in kan zoh tikah hi thil hna hi cu ngandamnak ah a bom lo mi le zawtnak a chuahter tu ansi ti kha mi vialte nih kan theihmi asi. Kuak zuk hna hi cu vulei cung pumpaluk nih an khamh thluahmah cangmi asi. Vanlawng dinhnak (airport) hna hmanh ah kuak zuk ahcun in khan dang te kal hnu ah zuk khawh asi. Kuazuknak nih cuap cancer le a dangdang zawtnak a phunphun, khuhhring zawtnak te hna tiang a chuahter. Zu dinnak timi zong hi a phunphun in a um. Laimi nih zu kan timi cu zureu, zupu, zufa, zu hui tibantuk fongvei le facang in tuahmi zu pawl ansi. Cun nitlak lei zu timi ah, Beer, Whisky, Rum, le Wine ti bantuk zong hi zu phun ah annih tel dih ko. Zei thil poah hi a hman kan thiam ahcun sitha an si kho ve ko nain a hman kan thiam lo ahcun rawhnak le thihnak zawtnak ansi ton. Laimi cu zu hi nuamhnak caah kan din ruang ah zu kan din tikah i sik i velh le i tuk i den kan hmang. Aukhuan le buaibai zong kan hmang chih. Cu ruang ah Siangbawi te chan hi zu hi Laimi thanchonak a dawntu bik pakhat ah an hmuh ruangah zudin hi an rak khamhmi asi. Cu ruang ah Khrihfa si hnu ah zu a dingmi cu Khrihfa in an rak phuah than ton hna.. Bible ca ahhin zu ding hlah ti zong a um i zu va ri hlah ti zong a um ve ko (Efesa 5:18, Phungthlukbia 23:31). Zu din le zu rit nih minung caah rawhralhnak, zawtnak le thathnemlonak tampi kha a chuahter caah Bible nih i sum ding le din lo ding ah forh aa zuammi asi. Zu a dingmi kan si ahcun zei bantuk tinhnak in dah zu hi ka din ti kha fakpi in ruat hmasa uh sih, nuamhnak caah fangfang ah zu a dingmi kansi ahcun a rannak in kan ngol a herh. Cu lo ahcun kan nunnak a hrawktu kan ral nganbik asi lai. Khrihfa ram thenkhat, tahchunhnak ah, Germany ram te hna ahcun misur hang (wine) din hi an nunphung pakhat asi i cu caah Khrihfa an si hnu zong ah wine cu an din peng ko.
Cu bantuk in Beer din zonghi Japan miphun hna caah an nunphung asi va caah Khrihfa an can hnu zong ah Japan Khrihfa nih beer an ding ko. Asinain Pathian tihzahnak le sikan ning tein hman thiam kha annih zuam. A thangchomi ram poah ahcun zu rit lio le zu din lio ah motorcar an mawng bak lo. Tuzan cu zu kan din caah motor ka mawng lai lo tiah zumhtlakte in an chim. Kannih Laimi cu kha bantuk kha kansi lo, zu kan din ah kan puarhrang, mizei kan rel lo, aukhuan le buak kan hmang. Tlawmpal te kan dinmi hmanh khi tampi a dingkho mi bantuk in kan ri kho. Zu din ruang ah vule cung ah a chan a saumi kan hmu rih hna lo. Keimah thirual zu a dingmi a nungmi an um ti lo, an thi tuan dih ko. Zu ding innchungkhar a rummi ka thei bal fon hna lo. Zu din cu sifahnak phurhtu asi. Cathiam lo zu din le cathiam zu din aa dang rih. Cathiam lo zu din cu an rau lo, an rawk colh. Cathiam le mifim zu din cu ngandamnak caah an hman. Mah chungkhar ah siseh, innpa chakthlang siseh, midang siseh harnak an pe lo, an buai lo. Cu caah na biahalnak a phi cu, zu din le kuatzuk cu Bible lei he, ngandamnak lei he kap hnih in khapmi thil asi.

A rianthiang ah,
Rev. Dr. Samuel Ngun Ling
MIT, Yangon