free web counter
greyhound runningHurricaneRunning Ostrich

Saturday, May 30, 2009

Aung San Suu Kyi Tazacuainak

Laithuam he Aung San Suu Kyi





Ralkap cozah nih Aung San Suu Kyi cu rampi daihnak le runvennak phung a buar tiah taza an cuai. Aung San Suu Kyi nih May 26 zing ah khan Insein thonginn biaceihnak zungah thil sining vialte cu ca in a tial ciami kha a rel piak hna. Mah ca cu NLD nih zapi theih ding in nihin ah an chuah.

Aung San Suu Kyi Chimmi

Aung San Suu Kyi nih, "Nov 30, 2008 ah Pu Yattaw kan inn a rak luhnak cu Daw Khin Khin Win (Suu Kyi sin-um) sin ka theih. Mah kong cu December 4, 2008 ah khan, Dr. Tin Myo Win ( Suu Kyi sibawi) sin in cozah sin ah theihternak ka tuah. Mah lio ah ralkap cozah nih mah kong he pehtlai in chekhlatnak le biahalnak le dantatnak zeihmanh an rak ka tuah ka thei lo. Inn pawng dum chungah mizeimaw an luh ahcun a rannak in repawt nan pek lai tiah ralrinnak zong an kan pe bal lo.

A voihninak Pu Yettaw a rat hi May 4, 2009, zinglei lawng ah ka hmuh. Inn pawng in chuah dingah ka chim nain, "khua a dei cang caah, atu i ka kir ahcun an ka tliah sual lai, cucaah zantim tu ah ka kir lai," tiah a ti. "Zan a phan i, a dam lonak ruangah zankhat ihnak nawl a ka hal.

Atu lio ka ttuanti hawl tampi cu, upadi ning lo le, zangfahnak um loin thong kum tampi an thlak hna. Ahohmanh pakhat khat ruangah tlaih khih le thongtlak i huah ding cu ramrian ttuannak ah ka dirhmun a si lo ruangah caan khat chung dornak ka pekmi a si. Pu Yettaw hi zeidah a tinhmi a si le, zeidah a duhnak a si timi hi ka thiehmi a si lo, mah a ratnak kong cu May 7, 2009 ah Dr. Tin Myo Win a rat tikah nawlngeitu hna sin ah thawng ka pek te lai tiah ka tim nain, Dr. Tin Myo Win ratnak nawl pe loin palek pawl tu an rak ra.


Aung San Suu Kyi Inn


Nov.30, 2008 lio ah a rak cangmi (PU Yettaw a voikhatnak a luh) kong he pehtlai in ahmuh a nganmi kha hmeter, ahmuh hmemi cu dihter ti a si bantuk in kan inn chungah a lutmi hna siseh, kan inn a congtu ralkap si hna seh, ahohmanh harnak ton ka duh hna lo caah ka tuahmi a si, mah ka tuahmi zong cu nawl ngeihtu nih duhlonak le soiselnak zeihmanh a um lo caah nawlngeitu hna nih a tha in an pom tiah ka ruah.

Tazacuai tu lei in minung pakhat nih a chimnak ah, kan inn himnak caah cozah lei le Aung San Suu Kyi lei in kaphnih in ttuanvo kan ngei tiah a chimmi cu a si lomi a si.


Ram hrawktu hna ral in, ivennak upadi pohmah 22 ning in, hrennak upadi kha na buar," tiah an ka puhmi nih hin a huap kho lo," tiah phun hnih in a chim.

Tazacuai tu hna nih an chimning le an ka hrennak phung vialte zeihmanh ka buar lonak a fiang dih ko.

Mah an ka hrennak upadi zong hi 1974 lio ah sociallist cozah nih an rak sermi phung ning in an tuahmi kha tazacuai tu nih an chimmi a si i, mah upadi cu 1988 lio ralkap cozah nih nawlngeihnak a laak thawk in a rawk cangmi upadi a si.


Yettaw MI Pawl Nih Bia An Hal Lio

Atu mah bantuk thil a cangmi cu, a kan kilvengttu hna an rian fel lo le santlaih lonak a si nain ahohmanh dantatnak an tuah hna lo i, keimah lawng dantat le tazacuai cu ttanhmi an ngei caah a si.

Cucaah tazacuai tu hna nih an ka puhmi sualnak vialte hi ka tuahmi pakhat hmanh a um lo tiah a chim.

Thaizing ah Pu Yettaw nih a chimmi kong kan peh than te lai.

Siahernak he,

Salai Lairamthang
Washington D.C

Thursday, May 28, 2009

Suu Kyi dan bawhpelh puhnak rel pehzom



Laimi tampi kan lungput ah Pathian rian hi pastor le Reverend min aa bunh lomi he aa pehtlai lomi ah kan chiah lengmang tawn. Caan tampi ah cucu thil poi ngai a si. Pathian rian cu a thiangmi ah ruah a si i Pathian rian tiah kan ruah lomi rian a tuanmi cu zei paoh a tuah ko zongah a poi lo phun in kan kal pi tawnmi hi kan palhnak ngaingai a si tiah ka ruah. Laimi nih thlarau rian le taksa rian tiah rian hi a tlangpi in phun hnih ah kan then. Kan rian kan danter lawng si loin Laimi kan lungput ah kan nunning hrimhrim danter kan hmang. Zu, kuak, khaini le rit hainak a phunphun hna hi Pastor le Reverend min aa bunh lomi hna caah cun tuah phung a si tiah kan ruah nain pastor min aa bunhmi nih a tongh citcet ah cun a thlir bak in kan thlir tawn hna. Misual taktak ah ruah an si colh. A ngaingai cu thil thalo tuah cu a ho ca hmanh ah a thiang hlei lo i a ho ca hmanh ah a thur hlei fawn lo.

Myanmar Institute of Theology ah M.Div ka rak kai lioah Internship cu Shan ram ah kan kal hna. Shan ram kan ti nain Kachin tam u an umnak khua a si. Ka thinlung ah phundang piin khua a ka ruahter. A ruang cu an khua ah dawr zuar ni hi zarhkhat ah nithum a um i dawrzuar ni a si paoh ah cun pastor te zong dawr an zuar hna. Biakinn le biaknak he aa pehtlai mi rian paohpaoh cu anmah pastor te nih an tuah dih ko nain dawr zuar ni a si paohpaoh ah cun an mipi hna he hmunkhat ah riankhat an tuan ko. Mipi lei in zei tin nan ruah tiah biahalnak ka ngeih hna tikah an pawcawmnak caah cun rian an tuan ve ding a si tiah lungthiang taktak in an ka leh.

Voikhat cu an pastor pa nih internship a kalmi group pawl a kan sawm i Karaok dawr ah hla kan va sa hna. Wine an i cah i wine a ding kho deuh lomi caah fruit juice an kan cah piak. Kan va phak ah hin mino tete tampi an rak um i an vun kan humh in "saya, sayamah te an ra kan kianh hna lai" an ti i an tho dih. "Ziah hi pastor pa hi mah bantuk hmun hna ahhin a kan kal pi hnga aw" tiah keimah le keimah khua tampi ka ruat. A hnu ah cun an Khrihfa sining ka zoh i ka uar ngai hna.

Kan tuanmi paoh hi Pathian rian a si ka ti tikah kan zapi te hi pastor le hruaitu kan si dih lai ka ti nak a si lo. Chim duhmi cu kan office kan tuanmi cu aa dang a si nain nunpi mi nunzia (ethical life) ah hruaitu le hruaimi hi kan i dan awk a si lo. Pastor caah tuah lo ding tiah kan ruahmi cu pastor a si lomi zong nih kan tuah ve ding a si lo i, kan ca zong ah a tha lomi a si ve ko.

Cucaah kan tuanmi rian paohpaoh hi Pathian rian an si hna caah a thiangmi rian le a thiang lomi rian tiah rian hi phun hnih in then ding an si lo. Cu pinah Pathian pakhat kutchuak sermi minung ciocio kan si ko hna caah le kan zumhnak thawngin thiam a comi zumtu lawng te kan si ko hna caah, kan office aa danmi nih kan nunning a kan danter awk a si lo. Cucaah cun Pastor hna le mipi hna hi kan office ah kan i dang hna nain kan nunning ding phung ah aa dang ding kan si lo, aa khatmi kan si awk a si.

Wednesday, May 27, 2009

CIM Thawngtha


(May 24, 2009 Sunday)

Thawngtha chimtu: Rev. Si Thar

Caantlaitu: Pastor Lal Cung Awi

CIM thawngthabia aa hrawmmi zumtu u le nau vialte hna,

Salm catialtu nih cun “Bawipa hi zeitluk in dah a that ti kha nanmah tein va kawl cio hmanh u, amah chungah himte in a um mi cu a lung aa lawm(34:8),” tiah a ti. Nihin zong Bawipa cu pumpak kan cung cio ah a that zia kha a thar in ruat than hna u sih.

Thawngtha chimtu: Nihin i thawngthabia a kan chimtu ding cuYangon Lautu Baptist Church ah pastor a tuanmi Rev. Si Thar a si. A tu hi Korea ah Presbyterian College and Theological Seminary ah Th.D. ( Missiology) a tuah lioa si. Korea ram a phanh in a tutiang Chin Christian Fellowship, Korea ah pastor a tuanpiak hna. Amah hi keimah pumpak he zong kumli chung Baibal sianginn kan rak kai ti i, siangngakchia a hawi le nih kan u bantuk ah kan ruah i kan bochanmi le kan i zohchunmi a rak si. A nunning, a thinlungput, le Bawipa aa bochanning hi zumhawktlak le bochan awktlak ngaingaimi pasaltha pakhat a si. Dawtnak in Lianpi pa ti zong in auh khawh a si. Hi bantuk in CIM thawngtha chim dingin a caansunglawi a kan peknak cungah kan i lawm hringhran. Atu cu thawngtha chimtu kut ah kan caan kan pek cang lai. Thawngtha aa hrawmmi dihlak cungah Bawipa thluachuahnak tlung hram ko seh! Amen.

“Thazaang”

Bible thim mi:

1. Psalms 46: “Pathian cu kan i dawrnak le kan thazang asi.”

2. Habakkuk 3: 19 “Bawipa ka Pathian cu ka thawnnak hram asi.”

Lunglawmhnak: A thluachuah chung ah a kan hruai zungzal tu kan bawipa Pathian a min thangthat in um ko seh. Hi CIM online thlarau thazang laknak program ah tuzing caan a hmang kho mi zumtu unau pumpak nan cung cio ah kan bawipa Pathian nih thluachuah in pe cio hna seh. Hi caantha a ka pe tu, program tlaitu, kan Pastor Lal Cung Awi cung zong ah a hlei in lunglawmhnak ka ngei ti zong chim ka duh fawn.

Kan thim mi Bible biathiang he pehtlai in tuzing kan i ruah ding mi thawngtha bia lei ah kan lut colh hna lai.

Thazaang: Thazang kan ti mi hi nunnak chung in a chuak mi asi zungzal. Nun tung i thazaang ngeih lo ahcun santlai mi nun asi hnga lo. Cu thazaang ti mi cu dictionary ah kan zoh ahcun, Thazaang ti mi cu pumasa, thinlung, ziaza hna i an power asi tiah ati. A thi mi nih cun cu power cu a ngeih kho ti lo. Kan pum a nun lawng ah cu power cu a nung ve. Hi a cung i kan chimmi pumsa, thinlung, ziaza hna ah hin pakhat khat a bau, a zaw, tlam atlin lo ahcun minung pakhat ca i a za mi, a tha mi, a tling mi thazaang a chuak kho ti lo.

Minung i kan nunnak sullam a ngeih ter tu cu cu thazaang cu asi. Cu pumsa thawnnak,thluak fimnak le ruah khawhnak,ziaza thatnak thazaang hna cu hmang in Pathian dawt ding asi tiah Deut 6:6 nih fiangte in a kan cawn piak. Cu hna cu hmang in kan minung hawi dawt ding asi tiah John 13 nak nih a kan cawn piak than.

Hi “thazaang” ti min nih hin minung nunnak a sersiam i a dawh ter. Kan ram a sersiam i miphun zong a tundirh. Ni hin vawleicung ah ram minthang ram rum asi kan ti mi ram cheukhat hna hi an ram, an toh mi vawlei pi, a that tuk caah si lo in, a minung i“thazaang” kan ti mi nih cun an ram hi a sersiam i a tundirh ti mi cu zapi kan theih mi asi ko.

Ni hin vaw lei ramkip a cul dih ve cang mi Laimi phun i kan “thazaang” hi zei bantuk tahnak in ka tah i zei tluk tiang dah kan phan ti mi hi a biapi ngaingai.

Hlan lio kan pupa hna miphun dang lak ah an rak i langh khawh venak cu ralkap rian ah a rak si i, cu kan pupa hna nih cun Union of Burma rawkral lo ding in an rak dirkamh khawh. Anmah le chan te ahcun pumsa, thinlung, ziaza thazang ah thawnnak an rak ngei i zohchun awk tlak in an rak nung. Miphun dang bawi pawl nih an miphun hawi cathiam le holh thiam tampi an um ko nain, ca le holh lei ah chambaunak tampi a ngeih mi kan lai mi theng te kha an nunnak himnak he aa sai mi an motor mawng tu le an bodyguard hna ah tampi an rak hman hna.

Ni hin kanmah hna chan ah Laimi zeidah kan lawh hna? Pumsa, thinlung, ziaza ah kan thazaang a thawng maw? Pakhat khat ah kan bau sual ahcun tlamtling lo in a nung mi “Laimiphun” kan si sual lai ti hi phan a um ngaingai.

Vawlei kan pumsa nunnak ah pumsa, thinlung, ziaza ah a dam i a thawng mi si i zuam uh sih law kan pu kan pa hna nih miphundang hna lak ah zohchun awh le tihzah awk tlak in an rak nun bang in ni hin kanmah hna nih vawlei miphun pi hna lakah hin kan “thazaang” langh ter ve hna uh sih. Johan 13 nih a kan cawnpiak mi tlin ter i zuam hram hna uh sih.

Kan thlarau nunnak zongah cu pumsa, thinlung, ziaza thawnnak “thazaang” cun kan Pathian daw in; kanmah nih Pathian thim mi miphun tiah kan i ti bantuk in, Pathian nih “Ka mi hna” tiah kawh mi si awk in nun i zuam hna uh sih. Deutronomy 6:6 i cawnpiaknak tlin ter i zuam hna uh sih.

Psalms ca tialtu le prophet Habakkuk nih an ti bangin Pathian cu Laimi phun i kan i dawrnak, kan thazaang le kan thawnnak si zungzal hram ko seh.

Sunday, May 24, 2009

Tamil Tiger Pawl An Ciam Hnik

Nizan May 18, 2009 ah Sri Lanka ram chaklei vialte ah Tamil Eelam timi ram dirh ding in kum 25 leng ramtang ah hriamnam he dohthlen nak kawl in Sri Lanka cozah dohtu LTTE lutlai Velupillai Prabhakaran cu cozah nih " kan thah cang, Sri Lanka ram cu terrorist kut in a luat cang" tiah TV in a vun thanh tik ah khuaruah har ngai asi. LTTE - Liberation of Tamil Tigers Eelam timi cu vuleicung ah minthang ' hriamtlai cozah do buu" an si. Kum 25 chung ral an thawh nak ah minung thimi hi 70,000 leng an si i nikhat ah minung pakhat hi LTTE ruang ah thah peng asi ti nak asi.

Velupillai hi kum 54 asi i LTTE nihcun pathian tluk in an tih i a nawl an ngeihmi asi tiin reporter cheukhat nih an tial tawn mi asi. LTTE nih kumkhat ah US$ 300 million an hmuh pengnak zong hi zeidangnak in ramdang ah an kaltermi Tamil Expatriates pawl nih LTTE caah an hlutmi hrim hi atamtuk ti asi. Cu pin ah South Asia rilicung ah cun duhpoh in atlongleng kho an si tik ah "cozah doh thlen ding in hriamtlai dang pawl nih hriamnam an cawk tik ah Tamil Tigers pawl hi aphurh piaktu hna le a zuarhtu hna asi caah phaisa tamtuk ahmu mi asi. Cun Tamil Tigers pawl cu an dihlak in an hngawng ah cyanide poison dur te ani oih i cozah ralkap i tleihter nak cun " poison hi an din lai i na ni that dih lai " tiah Velupillai nih ati hna. Tutan an thah ah hin Ambulance in an tlik pi lio asi i a mi zumhbik Marine Colonel Soosai timi le Intelligence Chief pa zong an thah chih hna ti asi. Afapa zong thih dawh ngai asi ve.
Tutan LTTE an vun sungh phutnak cu January in tutiang ah ngol loin cozah ralkap nih avun den nak hna tik ah Tamil mipi tamtuk an thi. Acheu chimnak ahcun thla 4 chung ah minung thong 7 leng an thi cang ti asi. British Foreign Secretary David Miliband nih' Kap hnih in mipi an thahtuk hna caah Sri Lanka hi " War Crime Tribunal" tiang ah chuah pi ding tiang achim.

Velupillai nih a palhnak tiah ruah mi cu:


1. 1991 kum ah India Prime Minister Rajiv Ghandi cu Tamil nu pakhat afial i mah pumpek bak in atai ah bom aa ngerh dih i Ghandi cu athat ter hna tik ah Southern India ummi Tamil pawl nih LTTE an tanhnak hna kha a zor phut.
2. Sri Lanka cozah nih 2002 " Kaphnih meithal ngol chungnak= Cease Fire" atuah pi hnu ah Northern Sri Lanka cu ' Independent siloin ' Autonomous Region ' tluk in mah te uknak le cozah i sernak nawl a pek mi kha aduh lo. Eelam ram caah thisen aluang cangmi vialte hna zeirel lo ah ka cang lai ati i mah ' Autonomous uknak kha arak duh lo tik ah Sri Lanka nih zakhat ah zakhat tluk in an ram vun cheu i Sri Lanka le Eelam ram tiah International Border vun cheu ding kha an duh ve lo.
3. Sri Lanka president tiang a thahter hna i hmunkip ah community leader zong hi tamtuk athah hna tik ah ' Terrorist' in hmuh asi.
4. 1998 ah Sri Lanka cu Buddhism biaknak azuum mi asi i cu lak ah Buddhist pawl nih Athianghlimbik in an ruah mi Pura ' Temple of the Tooth ' timi cu bom in ava puahter dih hna i vuleicung ramkip le abik in Buddhist ram nih Tigers an huatnak hna zual.
5. 2004 ah Velupillai mizumh bik asimi Col Karuna cu LTTE in ralkap tampi he an chuak. Cu tik ah Vellupilai nih 2005 Sri Lanka Election kha fakpi in duhlonak avun langhter nain Tamil Tigers aremlo bik pa Mr. Mahinda Rajapaksa timi pa tu cu Sri Lanka president ah ahung kai i atu ah LTTE pawl cu Mr. Mahinda nih sum phomh in avun phomh hna i Velupillai tiang a nunnak avun laak hi asi.
Mi tampi nih Velupillai cu athi lo, Sri Lanka cozah nih lih in achim mi asi ko tiah an chim len i DNA zong thatein test nak tuah hmasa hau ti asi. Asinain tutan Sri Lanka nih LTTE avun den ning hna cu kawm chung ah erh khumh in aphih hmasa hna hnu ah sa hren tuk in atuk dih hna i LTTE pawl caah luatnak lam ahar ngaingai mi asi. Vuleicung ah 'Tamil Pawpi' tiin caankhat arak thangbik pa cu meitil phalh bang a ciam ruangmang ko cang rua.