free web counter
greyhound runningHurricaneRunning Ostrich

Saturday, February 5, 2011

**I Sumnak**


I Thess. 4:4“nan pum uk kha nan thiam awk a si,..nan thianter awk le nan upat awk a si

Fidi, fitlaw pawl hi an min an vun thang bak ah hin cun, hlan lio ban tuk in an vak, an chuak ti lo, zeisi lo in mibupi sin ah an lang duh lem ti hna lo, kan min than nak a tla sual lai ti an phang. 2000 hrawng i Zomi Theological College, Falam ah bible siangin ka kai ton ah hin fitlaw Thet Mon Myint hi dawr a hngak ton i thil cawk pah in kan hei chawnh pah lengmang ko. Nihin ah cun Yangon i an inn hmai in bawh len zong ah a mui hmuh khawh dawh si ti lo.

Yangon sianginn ka kai lio ah ka hoi pa Tan Jar nih fitlaw Khin Lay Nwe te inn ah a ka len pi i, an ka chim mi cu, “Khin Lay Nwe cu video thlak ding ti lo ah cun a leng ah a chuak bak lo,”an ka ti. Ziah ka ti hna i, "mi nih a leng ah hmuh lengmang ah cun an uar ding tluk in an uar ti hna lo” an ka ti. A min than nak a tla sual lai ti a phang!

Ka hoinu Kipte nih a ka chim bal mi cu “Sung Tin Par nih, ‘ka ngai bik mi cu hlan lio (hla tap phel kaa chuah hlan) i ka hoi le he inn hmai ah, veranda hna ah duhpoh in laphehtoh hna kan ei pah in hla kan au, kan sa mi hna kha ka ngai tuk ton ee’ a ti” tiah a ka chim bal. nihin ah cun aa sum cang, a min than nak a tlau sual lai ti a phang!

Voikhat ah Lay Phyu cu lampong i an zawr mi butikyaw kha ei a duh tuk nain, vok thau in reu mi hna si sual lai a ti i a ei ngam bak lo an ti. A aw ţhatnak, san nak hna a rawk sual lai ti a phang!

Khua a ka ruahter ngaingai mi cu: vawleicung minthang, cansau a daih lo mi, zungzal nunnak lei zong ah a nguh lo mi ruang hmanh ah hin tuah an duh mi an i sum, ei an duh mi an i sum, chuah/vah hoi le he i nuamh an i sum, inn bak ah in i khumh i video thlak tik ah chim ding mi bia hna kha heh tiah by heart in ngah ding in an i zuam hi mu…….

Nang le kei, vanram deng tiang min a thang ve mi, Thlarau in hrinthan kan si bak ah vancung in van mi hna nih hla sak piak mi, vanmi nih lawmh pi mi, kan minthannak zong zungzal tiang a nguh ding mi nih zeidah kan i sum ve? Tuah kan duh mi, ei kan duh mi, din kan duh mi poh zeihmanh i sumnak um loin Pathian duh nak he aa kalh mi hna kan tuah thiamthiam maw? Kan thinhunnak teh kan i sum maw, mi lehrulh kan duh nak teh kan i sum maw? Fak deuh in khua ruat tuah uh sih! Khrihfa kan sinak ah i biatak deuh cang uh sih. Pathian hi a ţha tuk lei lam khi si i, kan mah tu hi ‘a ka ngaihthiam ko lai’ ti phun in kan luan tuk ton. Khrih aiawhtu, Khrih ca i lamkaltu, Khrih zultu kan si i kan i sum awk zong a tam ngaingai ko.

I Thess. 4:4, 6, 7 4Nan dihlak in nan pum uk kha nan thiam awk a si, nan pum cu nan thianter awk le nan upat awk a si, 6Ahohmanh nih nan u nan nau kha an pawcawmnak rian ah hleng in deh hna hlah u, ningcang loin lemsoi hna hlah u; cu bantuk hat lonak a tuahmi cu Pathian nih dan a tat hna lai tiah kan in chimh cang hna i fak piin ralrinnak kan in pek cang hna. 7Pathian nih sualnak tuah lengmang dingin a kan au lo, mithiang si ding tu ah a kan auh.


Khrih duh nak lam kha a zul mi kan si nak hnga Pathian nih thluachuah kan pe ko seh!


Pa Hniang

Manila, Philippines

Fitlaw Nay Toe Nih Acadamy A Hmuh

2009 kum caah Kawlram Baisakup cawlcanghthiam pawl caah a sunglawi tukmi Acadamy laksawng peknak cu Kawlram khualipi thar Naypidaw ah kan hnu Jan. 23 ah tuah a si. A thiam cemmi fitlaw laksawng cu fitlaw Nay Toe nih “Moe Ngiat Einmet Myeu” timi baisakup aa thlakmi in a hmuh. Fidi a thiam cemmi laksawng tu cu pek a si lo. Baisakup thatnak dingah a bawmtu fidi chang laksawng belte Soe Pyit Thazin nih a hmuh. Fidi laksawng hi fidi Endra Kyaw Zin nih a lak lai tiah an ruahdamh ngai nain a lak lo caah thangthar mino pawl nih Internet ah an ruahnak an tar cio. (Ch: FNG)



Ref:: HYF Authawng Vol.5, No.2

Dr. Sai Mauh Kham Nih Zei Dah A Tuah Khawh Hnga?

Union of Burma/Myanmar President election cu a dih. Senior General Than Shwe nih mi tampi lu a kan fak ter ko. Khua ruah har taktak mi nung cu a si. Thein Sein, Shwe Mann, Tin Aung Myint Oo pawl an "Bo" vialte a thlaungh piak hna. An uar taktak mi uniform a phuah ter hna. An tai ah thlaih lo in an um khawh lo mi Pistol vialte a phuaih ter hna. A si nain, Gen. Maung Aye le a mah tu cu uniform he, bo he, pistol he an um ko.
2008 Constitution ning ah cun, President sin ah hin nawlngeihnak 100 ah 60 hrawng hi cu um dawh in tuak tan a si. Cu caah, President a tuan ko lai timi zumhnak kan rak ngei cio. President nih National Defense and Security Council ah lutlai tu ding cu President a si i, a mah hi Presidne tah ruah cio a si. Asinain, a bing ta ling in a kan thlai hawi. Thein Sein, Tin Aung Myint Oo le Dr. Sai Mauh Kham tu Presidents an si.

Mi cheu khat nih cun, Dr. Sai Mauh Kham hi USDP a si caah, Shan zoh zong in zoh lo, Kawl a si lo mi miphun zoh in zong zoh khawh lo a si ko lai. Kan mawh lo. Multiparty Democratic Politic ka tep lonak kum 49 a si cang. Cu ruang ah, tei cik cek lawng hi tei ah kan ruah i, democratic political nature a si mi, give and take, negotiate and compromise etc hna hi kan ruah phak tawn lo mi a si ko lai. Kan mah mawh a si lo. Ne Win duhnak a tling tu a si.

Dr. Sai Mauh Kham Vice President (2) a tling tik ah, ka lung chung ah a chuak colh mi cu, Union Government Body Act, Article 46 a si. Hi Act ning in Dr. Sai Mauh Kham hi State, Division, Autonomous Region pawl vialte in Annual Budget vialte ah lutlai a si lai. Cu cu a pawi mawh taktak mi position a si. Chin State caah Pyithu Hluttaw, Amytho Hluttaw, le Chin State Hluttaw caah kan thimh mi hna nih zei tluk in dah Dr. Sai Mauh Kham he rian an tuan ti khawh ti mi hi a bia pi ngai mi a si.

USDP a si zong ah Ralkap a si lo. 1962 in ni hin ni tiang ah Chin State Budget kong ah chimh rel khawhnak ka ngei lo. Chin State Budget kong ah Kawl a si lo mi, Ralkap a si lo mi, kan u nau tlang cung mi nih lutlai an tuan bal lo. Kan pu le cheu khat Minister/Deputy Minister level tiang an tuan ko na in, Budget kong ah duh bantuk in chimh khawhnak an rak ngei lo. An mah si lo in, One Party System palh tu a rak si.

Cu caah, Chin State chung um mipi hna nih kan thimh mi hna nih hi ban tuk in Golden Opportunity te hi tlaih thiam i, Chin State, Chin Mipi le kum 60 chung hnu a kan chawnh cang mi tlangcung mi hna le, kawl hna vialte caah, rian tuan thiam a herh ngai tiah ruah a si.

Dr. Sai Mauh Kham cu Shan miphun a si. Scholar/Physician a si. Shan Culture and Literature kong ah hruai tu a si. Tlangcung mi hna vialte he a peh tlaih mi Budget kong ah a ngan bik a si. Hi ban tuk in a bia pi tuk mi Position atlai kho tu Shan pa hi kan Chin Hluttaw Members hna sin in USDP si hna seh, CPP, CNP, ENDP, etc etc hna nih zei tluk in dah kan kawmh, kan tuan ti khawh ti mi cu, can nih a chim te ko lai.

Salai Van Lian Thang chimh bang, "politics ah permanent ral a um lo i, permanent hawi zong a um lo" a ti mi hi ka uar ngai. Senator Liberman cu, US Vice President si ding tiang in, Democratic Party nih Nominate an rak tuah mi a si na in, a hnu ah Democratic Party a chuah tak hna ko.

Zapi upatnak he,

Ngun Cung Lian
Bloomington


Source::Laiforum

Chin Baptist Churches USA (CBCUSA) Kong:

Chungtel thar khrihfabu hna kan ngeih caah le kan groupmail ah mi thar kan ngeih lengmang caah CBCUSA thawngthanhnak hi kan tuah tthan lengmang tawn. A liam cia zarh thum ahkhan crusade tuahnak ding biakinn hlan ding in kaa chok. Chin pastor pakhat he kan i tong. Kanmah Hakha lei khrihfabu hna kong a ka hal. CBCUSA ah khrihfabu 29 kan um kho cang tiah ka leh. "Nannih Hakha lam pawl cu nan ti ttha tuk lawm mam, Nan lung a rual thei tuk!" a ka ti. Kei nih saya na chimmi cu a si lem lo. Kannih Hakha lei pawl cu kan si a fah ruangah pakhat le pakhat i bawmh kan hau. Nanmah bantuk in kan ngeih deuh tikah cun mah duhduh in kan um te ko lai tiah ka leh. "Si maw, cu tin maw na ruah?" a ka ti. "A si, cu tin ka ruah ko" tiah ka leh. Ka palh hnga maw? Palh kho ka si, palh lo kho zong ka si. A hman ti tak ding cun ka ti thlu kho ve lo.

Biaknak lei in CBCUSA min in khrihfabu 30 kan um cang. Khrihfabu pakhat ah chungtel 1000/900/800 a ngei mi khrihfabu zong kan ngei. Chungtel 550 cung a ngeimi khrihfabu pariat a um. Lulak ah chungtel a tam ngai ding khrihfabu an um pah fawn. Civui hna voi thum kan tuah cang. Lai hawi lakah hngar ngai ding in i ruah a awl ngai. Nain, a chung in a tthawng deuhmi cu kan hawidang an si. A chung in an i pehtlaihnak a ttha deuh. Kawlram in ramdang tiangah a chung in tei an ma. Cacawn an teima. Hakha lei mi kan rak i nuamh lio ah ca hna an rak cawng i Chin National Day ni paoh ah lawmhnak kut kan benghpiak cang hna. Chin National Day kan phan deng i ka van telh ta. A tu tiangah kan hawidang hi cafung tlaitu, kannih Hakha pawl hi kut bengtu kan si rih. Hi ka bia hi biathup in ka ruat lo. Mino sin ah kan hawidang sining hi cawntlak an si tiin ka chim tam ngai cang. Thuk deuh in nun thiam ve usih ti cu ka duh tuk ve caah. Kan hawi dang kha ka thinlung in ka lawmhpi khawh tthiam hna. Kan miphun dawhtertu an si tiin thinlung tein ka lomh zungzal hna. Hawikom ah kan i ser kho ko. Khrih vel ruangah.


Nihin ah kannih Hakha leimi holh aa hrawm khomi hna hi USA le Canada ahhin biaknak in CBCUSA lawng hi kan i hlumnak a si. Komh mission rian kan ttuanttinak a si. Kan thlacamnak cu Khrih ah pumkhat sinak hi tthawnter in mission rianttuan hi kan duh. Kan mino hna zong nih Pathian ah duhnak thinlung ngei hna seh ti kan duh hringhran. Political le Social organization dang in hlumnak kan ngei lo. Kan herh ko. Nain, hi zong hi Pathian vel a si kho ve. Khrih zumhnak in i hlum hi a ttha bik. Nain, kan i hlumnak thazang hi kan der ter sual ahcun Hakha lei mi kan caah cun vanchia ngai dirhmun ah kan um tthan kho ve. Nihin ah lomh kan ton mi hi sau a nguh lo kho mi a si. Cu caah, Khrih zumhnak in kan i hlum cu a herh taktak. Pentecost ni ah Khrihfabu aa thokning zong a si. Kannih Hakha lei khrihfabu hna hi CBCUSA in dawtnak thinlung he i hlum hi kan herh taktak. Pathian rianttuan kan duh taktak i kan miphun kan dawt ahcun thinlung pakhat tein dir tti i a bu in rianttuan hi kan herh bik mi a si. Mi tampi caah, kan hawi dang ca zong ah kan ttuan kho ve te lai.


CBCUSC Komh Mission Rianttuannak

CBCUSA Board of Trustees upa hna hnatlaknak in CBFA nih 2007 in $20,000 hrawnghrang tein komh mission (joint mission) rianttuan a thok. A rianttuannak hna cu:

Ramleng Mission:

1) Paletwa khua ah 2007 kum in $4000/yr in ngakttah inn sak a thok. 2010 kum ah aa liim. Sifak santlailo ngakttah hna nih an hngah. Pathian Thawngttha in cawmkennak rian a ttuan cang.

2) Kanpalet khua ah Zomi (Chin) Baptist Convention le Kanpalet Baptist Association nih an cawmmi hna ngakttah hna kha $2000/yr in a bawmh hna. A tu lio ah cawmken mi ngakttah cu 55 an si. High School final a kai lio mi 7 an si cang. 2011 kum in $3000 in a bawmh lai.

3) Matupi khua ah Union Theological College kha $2500/yr in a bawmh. 2011 in $4000 in a bawmh cang lai.

4) Kanpalet Baptist Association nih Laica cawn ve kan duh i cachimtu pakhat in kan thlah u tiah CACC kha an hal caah, Melbourne Chin Church, Australia he i bawm in kyats ting 50 in inn nganpi kan sak piak. Hi ka inn ah khuate sianghngakchia kha a lak in kan um ter hna lai. Laica le Pathian thawngtha a cawnpiaktu ding Saya Mawng Ceu cu CACC nih an thlah cang. CBCUSA nih hlawh kan pek.

5) Hakha ah Chin Christian College cu $4000/yr in kan bawmh. Cachimtu hna le Bible siangngakchia a harsa mi hna bawmhnak ah hman a si.

6) Hakha-Hmandaw lamcawhnak kha $2000/yr in 2007 in tu kum tiang kan bawmh. Hi lam cu a hranpi cu aa liim cang.

7) Hakha Nawi Tidil caah bawmhnakcu $2000 in bawmh ding in aa tiim.

8) Hakha Agape Clinic ah Chin Baptist Mission Church, DC le Hakha Baptist Church, Hakha he $2000/yr in damnak rian kan ttuantti. Sibawi pakhat le nurse pakhat le innngak pakhat nih sifak santlai mizaw kha an zohkhenh hna. Sibawi man pek awk ngei lo mi Laimi sifak santlai lo kha a lak in an bawmh hna. Khuate ah an tlawng pah. 2010 cu $3000 in bawmh a si.

9) Thantlang Bethel Clinic damnak rian kha Battle Creek Chin Baptist Church, Michigan le Thantlang Baptist Church he $2000/yr in rian kan ttuantti hna. 2010 in $3000 in bawmh an si lai. Sifak santlai lo mi tampi nih awl tein sibawi an ton khawh. A lak in sii zong an pek hna.

10) Hakha Bible hrilhfiah cu Lai Khrihfa Cattialtu Phu (LKCP) nih 2007 in ttial an thok i CBCUSA nih $5000/yr in an bawmh hna. Lai Baibal thiamsang hna nih an leh cuahmah lio a si. Dr. Jones Mang Hup ttial mi Marka cauk le Dr. Sang Awr ttial mi Baptist Tuanbia le Zumhnak cu an nam cang. Hrilhfiah cauk an liim mi paoh Yangon ah an nam lengmang lai. Laimi nih kan nuhrin holh tein Baibal hrilhfiah cauk kan ngeih khawh nak ding ah CBCUSA cu rian a ttuan. Hrilhfiah vialte an ttial dih tikah Thlang Lairam ah a ummi khrihfabu vialte hi a lak in kan pek hna lai. Anmah holh in Bible ttial kho ding scholar an chuah khawh tuan lai lo caah Laica an rel khawh ahcun Bible bia zong an rel khawh lai.

11) Malaysia Chin Prison ministry: Malaysia thonginn ah a ummi nu le ngakchia hna zohkhenh le lennak cu 2009 in Chin Christian Fellowship, Malaysia he an ttuantti. Nu nih an herh mi thil he pastor te nih thonginn ah an len hna. UNHCR ah report an tuah i card an sawkpiak duahmah hna. Malaysia thonginn ah chungkhat nih len khawh lo mi Lainu hna lawmhnak mitthli a tla tawn. Hi rianttunnak cu CBCUSA Nubu nih ttuanvo an lak. An nu hawi hna bawmtu ah an cang.

12) Hakha siangbawi te thlan cu kyat ting 20 renglo in a remh. Mi nih len awk tlak tein pangpar he dawh ngai tein a um cang. Mi tampi nih thlacamnak hmun ah an hman khawh cang.

13) Bawmhmi dangdang:

(a) 2010 kum chung ah Laitlang, Kawlrawn le Thlang Laimi kangh-uhnak le thlichia nih a hrawhmi chungkhar 140 dengmang kha kyat sing 79 dengmang in bawmhnak a tuah.

(b) CBCUSA le hawikom khrihfabu hna nih 2009 kum Christmas laksawng cu ttaamnak a tuarmi Paletwa peng Chinmi sin ah an kuat tti.

(c) 2008 Lairam mautaam le mangttaam ton lio ah Chinmi dihlak sin ah $7,000 reng lo in bawmhnak a tuah.

(d) Siangbawi Dr. Johnson nih Chin Christian College ah zunngaih par kuat ding in biaro a kan vuih lio ah Laimi tampi nih CBFA hruainak in $29,010.77 man zunngaih par kuat a si.

(e) Hakha khuahlun biakinn kang sak tthannak caah $5000 a bawmh.

(f) Kawhtawng ah Chinmi tampi ti ah an paam lio ah bawmhnak a tuah.

(g) Kawlrawn thlichia in harnak a tongmi hna a bawmh hna.

(h) Mara peng ah innkang mi $300 tein bawmhnak a rak tuah bal.

(i) Haiti lihninh in harnak a tongmi chungkhar kha bawmhnak a tuah.

(k) Asho Chin thlichia tuar hna kha bawmhnak a tuah.

(k) October 2010 chung ah Lairam ah tilian (nawng) a tlung. Minung nunnak a lak pin ah leikuang tampi a rawk. Tlanglo facang a rawk fawn. Thlang Lairam ah zu nih an thlai vialte an eipiak dih hna. Lairam khuasa kan unau hna cu rawlttaam tihal in an um tthan. CBCUSA nih Falam, Hakha le Tidim miphun hawi zumtu dihlak kha bawmhnak tuah cio ding ah au ding aa tiim.

Ramchung Mission:


North America ah a ummi Chin khrihfabu hna he pehtlaih hawikomhnak a tuah. State kip ah a ummi Chin community le fellowship hna kha khrihfabu in an dir khawhnak ding le thlarau ti le rawl an hmuh khawh nak hnga, pastor hna nih an len hna. Pastor hna nih an lennak ding kha region in an i tthen. Khrihfabu kan tam cang i fel tein tuah ding an i zuam.

North America ah Chin ralzam mi hna le khrihfabu hna kha Chin pastors nih 2010 kum chungah an tlawn hna. 2011 chung ah tuah tthan a si lai. CBCUSA pastor hna nih mah khrihfabu mino hna he mah le region chung Chin khrihfabu hna kha tlawn khawh an i zuam cio. Thazang pek khawh an i zuam.


Thih le ngaichiatnak khrihfabu pakhat le pakhat an i bawm. Chungtel 400 cung khrihfabu nih $400 cio in le chungtel 400 tang khrihfabu nih $200.00 cio in thawh in thihnak a tuarmi khrihfabu kha an bawmh hna.

CBCUSA ramchung Bible sianginn kaimi hna bawmhnak caah CBCUSA scholarship program zong 2011 in $10,000 a ngei cang. February 2011 chungah scholarship sawknak ca kha EM sin ah phanh ter ding a si.

CBCUSA Minister Council zong a ngei lai. Ordination zong a pek ve cang lai. Ordination Komiti zong an tuah cang. CBCUSA civui pi ah maw, khrihfabu cio ah maw, mah duh thimnak in ordination cu pek an si lai. Pastors retreat zong Indiana Chin Baptist Church ah September 17-19, 2010 ah tuah a si. Kum fa tein tuah ding in aa tiim.

CBCUSA Youth Department nih prokrem a phunphun ngei ding in an timh. Mino gospel concert le camping zong 2011 kum ah tuah ding an i tiim. Indiana Chin Baptist Church ah September 18, 2010 zan ah CBCUSA Youth Worship Service an tuah. Mino tampi an kai.

CBCUSA Crusade:

CBCUSA BT meeting kan tuah caan paoh ah gospel crusade kan tuah lengmang. Kan miphun nih Khrih bia hi ti bang kan hal. Khrih bia hi kan nunnak ah a can ding kha kan duh caah Thawngttha chim hi tha kan pek. Khrih Thawngttha nih kan miphun hi ser sehlaw dawtnak le remnak hi kan lakah leeng seh ti kan duh. Kan thlacamnak a si. Khrih dawtnak hi kan miphun hruaitu hna nih kan ngeih ahcun kan miphun nih a tuarmi tthennak vialte hi remh khawh ding a si. Thinlung fing le tlang hna hi chimh in rual ter khawh an si lai.


Khrih rian ah,

C Duh Kam

Executive Minister

CBCUSA


Source:: rungcin@yahoogroups.com

Friday, February 4, 2011

Suu Kyi nih Chin ramkulh chungah facang le tii-pipe a bawmh hna lai


Kawlram zauk phung a lennak ding caah a cawlcangmi Daw Aung San Suu Kyi hruaimi NLD bu nih Chin ramkulh harnak a tongmi hna caah facang le tii pipe bawmhnak a pek hna lai tiah Khonumthung thanhca nih a ttial.

Kan hnu a luanciami January 10, 2010 lioah khan Chin ramkulh NLD hruaitu hna le Suu Kyi cu Chin ramkulh ei-din lei harnak a tongmi hna kongah a voihnihnak tonbiaruahnak an ngeih hnuah atu

btk bawmhnak pek ding in Suu Kyi nih a chim hi a si. Tulio Chin ramkulh chung eidin lei harnak a tongmi ah fak ngai in a denmi hna hi Thlanglei Laitlang Kanpalet peng hi a pakhatnak ah an chiah i milu thong 10 renglo caah facang bawmh hmasa i, thlakhat chung bawmh ding in timhtuahnak an ngeih kong Chin ramkulh NLD hruaitu Zobawi nih a chim. Kanpalet lei bawmhnak an pek khawh hna hnu in Paletwapeng le Thantlangpeng ramri khua cheukhat pawl zong bawmhnak cu pehzulh tthan dingin timhtuahnak a um rih tiah a chim chih. Cun, Falampeng ti a hmu rih lomi khua cheukhat pawl zong tii duhdim tein an hmuh khawhnak hnga tii pipe zong bawmh ding in khua khan a si.

Hi bawmhnak pek dingmi ni le caan cu Chin ramkulh mipi hna nih tlanglo rian an thawk hlan ah bawmhnak pek dingin khuakhan ding a si i, lo rian an ttuan hlan ah bawmh i lo rianttuan tikah zeihmanh lungretheihnak um lo tein khuakhan piak ding an si.

March thla thawk tlanglo rianttuan ding le lo vah a hauh cang lai caah lo rian an ttuan hlan ah mah bawmhnak cu tlinter dingin khua khan a si. Cucaah-cun aralaimi February thla cun Kanpalet peng in bawmhnak cu thawk cang dingin timhtuahnak kan ngei cang ko tiah Zobawi nih a chim. Hi bawmhnak pek dingmi kongah khua nu khua pa hna he i bawm in rianttuantti ding in khuakhan a si. Chin ramkulh chungah aluancia kum 2007 thawk in mau a par ruangah zu cu biatak in an rak karh i tlanglo i an cinthlakmi vialte cu zu nih an hrawh piak dih hna ruangah eidin kongah harnak an tonnak bik a si. Hiti eidin kong i harnak an tonmi kongah ralkap cozah nih nihin ni tiang zeihmanh bawmhnak pek a um rih lo.

Asinain kum 2010 November 13 ni ah inn hren thong in aluatmi Suu Kyi nih a chuah cangka in tubantuk Chin mipi eidin kongah harnak a tongmi bawmh a timh hna hi a si. —Khonumthung News.




Source:: Malaysia Seihnam 463nk

Sunday, January 30, 2011

A Ngan Deuhmi Sunpar Nak


Theihthiam ding ah nawlnak: ka sermon pawl hi tam deuh cu, ka nun i ka ton mi (life experience sharing) deuh an si i, atanglei ka sermon zong hi keimah pumpak pawrhlawt duhnak pakhat hmanh um hrim lo, ka nun i Pathian nih rian a tuan mi Amah Sunparnak langhter ka duh mi tu kha si i, na caah thazang laknak si ve hnga maw ti saduhthahnak he si.. Kaalawm.


A ngan deuh mi sunpar nak

Johan 11:6 “Lazaruh a zaw ti thawng a thei nain a umnak hmun ah ni hnih a caam rih”




Jesuh nih Lazaruh a dawt ti cu Bible ah kan hmuh kho (Johan 11:3). Lazaruh a zaw tiah an chim tik ah minung lei ruah nak in cun, “khulrang in a ra lai i a dam ter colh lai” ti hi ruah cio a si ko hnga, zeica’h tiah,mizaw dang pawl hmanh zong pei a dam ter cuahmah ko hna cu, a tu hi cu a

dawt mi a hoi pei asi cu! Sihmanhsehlaw, Jesuh nih, cu thawng a thei nain a umnak hmun ah khan ni hnih a caam rih ti a si. Minung lei in cun Pathian duhnak hi zei dah si hnga, kan i fiang kho ti lo. Jesuh a rat tik ah cun a thi cang i Jesuh cu Lazaruh a far le nih an mawtchiat: “Bawipa, hika ah hin rak um law cu, ka ṭa hi a thi hnga lo,” (John. 11:20, 32) tiah an ti veve. A thihhnu nili si zongah a thoţhan te lai ti kha Marry le Martha nih an hmu chung kho bak lo mi si.


March 26, 2004 ah kan inn a rak kangh lio ah hin Pathian ka rak mawtchiat ngaingai! Ka nunnak ah Pathian ka mawtchiat caan hi a tam ngaingai. 2006 ah Philippine ka phan, Asian TheologicalSeminary ah Master of Divinity kai ka duh i luhnak camipuai (entrance exam) ka phi, ka ong. Asinan, thlakhat $ 300 na dih peng lai an ka ti; ka u le nih thlakhat ah cu zatzat cu kan in kua kho lai lo an ka ti caah ka kai kho lo, ka lung fak ngai. Pathian ka mawtchiat. Manila Theological College andGraduate School tu ah ka kai; principal pa nih Yangon i ka dih mi 1st yr le 2nd yr ahmat cazin (transcript) kha a leh khan caah a

kum 3 nak (3rd year) in ka lut i 2007 March ah M.Div ka dih colh; M.Th kum hnih ka peh than i 2009 March ah ka dih than, Pathian thawng in. ATS ah khan rak kai kho ning law cu 2009 October long ah M.Div dih ding ka si, ziah tiah cun ATS nih cun Yangon i ka dih mi 1st yr le 2nd yr ahmat cazin (ka transcript) kha an leh khan lo caah a thawk in ka kai than hau hnga, cun kum 3 le cheu hi an kai ton cio hna. Asinan, 2009 June thla ah Doctor of Ministry cu Philippine Christian Universtiy – Union Theological Seminary ah Pathian thawngin le miphun dawtu chungkhat, rualchan, hoikom hna dirpi nak thawngin ka thawk cang. Philippines ka phak ka ah hin D.Min tiang ka kai te lai ti hi ka hmu chung kho bak lo mi si.


A zaw mi kha a dam ter ti mi nak in, a thih hnu nili ah a thawh ter ţhan ti hi sunparnak a ngan deuh.2009 October ah M.Div a dih ti mi nak in, 2009 June thla ah cun M.Div, M.Th a dih hnu ah D.Min a kai lio cang ti hi ka nunnak ah Khrih sunparnak a ngan deuh in a langh nak si ko lo maw! Pathian min thangthat in um ko seh! Nihin ah zeidah na lungrethei, Pathian thil ti ning zeidah na lungtlin lo nak um sual maw, na mawtchiat sual maw? Na hmu chung kho rih lo mi, a ngan deuh mi sunparnak lei ah dakaw Pathian nih an tinh piak i an hruai lengmang cu! Khrih fa vial te hna Pathian thangţhat pe

ng ko uh sih! Zei can poh ah Bawipa a ţha ti peng ko uh sih, zeicahtiah, a ngan deuh mi sunparnak ah an hruai peng ko.



PaHniang

Manila, Philippines

/////////////////////////////

Na Vision Ngeihmi Ning Zat Tein BAWIPA Nih Thluachuahnak An Pek Lai


Gen. 13:14-15

“Vision ngeih hi Bawipa mi le fa kan caah thluachuahnak Zeizat/Zeibantuk hmuh kan duh timi ri khiahtu le biachiattu a si. Vision a ngei lomi nunnak cu (nuamhnak a ton ah siseh harnak a ton ah siseh) a rawk ton i, Visiaon a ngeimi nun tu cu a tonmi tthil paoh ah (harnak caan zongah) a sung a pe lo” by Thawngzam, ROBERT.

Ahraham cu Lot he an i

tthen hnu ah BAWIPA nih a thawh i " Na Umnak hmun khan, nichuah-nitlak -chaklei -thlanglei vialte cuan tuah hna; na hmuhmi ram vialte kha nangmah le an tefa cu kan pek hna lai i a zungzal in nan ta a si lai" a ti (Gen.13:14-15). (Zoh = cuan = Vision) Abraham nih a cuanh khawh zat or a zoh khawhzat le a hmuhkhawh zat paoh kha, BAWIPA nih amah cu a pek dih. A zoh khawh lomi le a cuanh khawh lomi le a hmuh khawh lomi ram cu BAWIPA nih a pe lo. Amah nih zeitluk kau Vision angeih timi kha a thluachuah hmuhnak caah a

biapi bikmi rikhiahtu cu a si ai. Hallelujah!

Cu vebantukin kan nih zong zeibantuk Vision, zeitluk kau le zeizah kau dah Vision kan ngeih, timh tuahnak kan ngeih i zumhnak kan ngeih timi hi BAWIPA thluachuah kan hmuhnak ding caah rikhiahtu (biachahtu) an si ton ve. Na Vision na tinhnak le na zumhnak a ngan, a kau, a thawn ahcun na thluachuah hmuhmi a ngan lai i a tam ve ko lai. Asinain na Vision a bit tuk

ahcun na thluachuah hmuhmi le comi a bite, a tlawm te a si ve ko lai.

Abraham nih a umnak hmun in saupi le kaupi in vawlei kil li pi khi a zoh dih; a zoh ning le a hmuh ning Vision a ngeih ning zat tein BAWIPA nih ram cu a pek ve. Cuvebantukin kan umnak le hram kan i thawknak hmun: kan no lio le kan hngakchiat lio tein Vision kaupi kan ngeih ahcun Vawlei pi cu kan ta a si ko lai. Vawleipi dihlak hi BAWIPA ram ah ka ser lai timi Vision nganpi na ngeih ahcun Vawleipi cu BAWIPA nih an pek ve ko lai. Vawleipi hi a dammi ram le miphun ah ka ser hn

a lai timi Vision na no lio tein na ngeih ahcun BAWIPA nih serkhawhnak nawl le damternak thluachuah cu na kut chungah an pek hrimhrim lai. Amen!

Mithiang Pual nih cun, “ ka Saduhthah (Vision) cu Krih an theih bal lonak hmun i Thawngttha chim kha a si zungzal, zeicahtiah midang i a hram an rak thawk cianak hmun i va sak cu ka duh lo” ati (Rom.15:20). Amen! Paul cu Vision a ngeihning zat le a ngeihmi ning tein PATHIAN nih thluachuahnak cu a pek i a hohmanh nih an sak rih lonak, an thawk rih lonak le an dirh rih lonak Romram cozah pennak chung i a ummi ram vialte ah Krihfabuu tampi dirh khawhnak cu PATHIAN nih a tak in a pek ko. Amen!

Nihin ah kan Vision ngeihmi hi hmailei zeidah kan lawh lai timi le hmailei ho kan si lai-nak ding caah vui tampi cu rikhiahtu le biachiahtu an si zung zal ton. Cucaah, Krihfabu pakhat le Innchungkhar pakhat caah tiah Vision na ngeih ahcun cu pakhat te ca ahcun thluachuahnak cu pek na si ve ko lai. Peng le Tlang pakhat caah tiin Vision na ngeih ahcun cu peng le thlang pakhat te lawng aa tlummi thluachuahnak cu pek na si ve ko lai. Ram pakhat caah tiah cuanhnak le zohnak Vision kau na ngeih ahcun cu Ram pi aa tlummi thluchuahnak cu pek na si ve ko lai. Vawleipi dihlak ca le miphun vialte (minak, mirang, le misen dihlak) caah tiah cuanhnak le zohnak le hmuhnak Vision nganpi (Vawleipi aa tlummi Vision) na ngeih ahcun cu “Vawleipi aa tlummi thluachuah” cu pek dih na si ve ko lai. Hallelujah!

BAWIPA nih " ka hal law miphun vialte hi nangmah kan pek dih lai; Vawlei hi a dihlak in nangmah ta a si lai" a ti (Ps. 2.8). AMEN!

Zeiruangdah Vision kan ngeihmi ning zat te lawng cu “Thluachuah” cu pek kan si lai?

Aruang tampi lak ah pakhat cu Vision kan ngeihmi cu thlacamnak in BAWIPA sinah kan hal, cun kan hal bantuk tein kan halmi cu a kan pek; kan vision ah a um lomi cu kan hal lo, cucaah kan hal lomi cu BAWIPA nih hramhram in a kan pe lo. Tnk: Mitcaw pa nih khuahmuh ka duh BAWIPA tiah a hal tikah, na pawfah dam seh, na hafah dam seh, na luu fah dam seh, tiah JESUH nih zeitik hmanh ah a ti bal lo, na zumhnak bantuk tein dam, na mit khua hmu seh ti a si ko. Kan halmi ning tein a kan petu PATHIAN a si. Hramhram in mi a timi a si lo, duhthimnak (free choice) a kan petu PATHIAN a si. Ziah voitampi cu ka hal lomi pe ka ngah ko cu na ti men lai. Khakha hitin a si; a hlan ah maw, zeitik ah maw na rak hal bal nain na philh hnu pi-ah BAWIPA nih hal u law kan pek hna lai a titu , A BIAKAM A LET BAL LOTU PATHIAN a sinak kha ttheihthan in an pekmi tu a si deuh.

Cucaah Siang a kaimi nih nan i thawkka, nan kaika nan nolio tein Degree sangpi-pi le degree tampi le Doctor degree phunphun hna hmuh ding le ngah dingah Vision nan ngeih ahcun Degree tampi le Sangpi cu BAWIPA nih a sunparnak caah an pek ve ko hna lai. Na Vision ah Tanghra awn a si ahcun, tanghra awnnak te lawng an pek ve ko lai. Na vision ah BA le MA lawng a si ahcun mah te lawng cu na hmuh ve ko lai. Zeiruangah ti ahcun na Vision ah degree dang cu a tlum ti lo cu ta.

Na Vision ah Inn thenhnak (tanhsinyie tuah), sa thahnak, restaurants le lampawng thil zuarnak ah rian tuan te ding a si ahcun cu ka zawn ahcun rian cu pek na si ve ko lai. A cozah zungpi le UN office ah tuanding in Vision na ngeih ahcun cucu pek na si ve ko lai. BAWIPA ram ca le PATHIAN office ah tuan dingah Vision na ngeih ahcun cucu pek na si ve ko lai. Rian a kawlmi si loin midang kha Rian a pemi le rian a serpiaktu siding ah Vision na ngeih ahcun Company a ngeitu na si ve te ko lai.

Kan Vision ngeih ning le ngeih zat tein BAWIPA nih mi vialte hi thleidannak um loin Thluachuahnak a kan pek dih ve. Amen! Nang na Vision zeidah a si ne? Krihfabuu vialte aa tlummi Vision na ngei maw? Miphun vialte aa tlummi Vision na ngei cang maw? Vawleipi aa tlummi Vision na ngei maw? Asiloah nangmah ca te lawngah ma Vision na ngeih, asiloah Family-chungkhar pakhat te le Krihfabuu pakhat te lawng aa tlawmmi Vision dah na ngeih? Kan Vision ah aa tlum lomi “Thluachau” cu BAWIPA nih a kan pe lai lo i, kan Vision ah aa tlummi zat te khan a kan pek ko lai, Unau.

Nihin na no lio te i Vision na ngeihmi hi hmailei a ho na si lainak ding caah biachahtu, rikhiahtu le lam sialtu an si dahkaw!

David Siangpahrang pa nih Jerusalem Biakinn-Bawipa umnak Inn sakding ah Vision ttha le nganpi a ngeihmi cu amah chan ah a dihlak in tlinh dih lo ko hmanh sehlaw, cu a Vision pi cu a fapa Solomon chan ahcun BAWIPA nih tlam a tlinter taktak ko. Amen! Cucaah atu caan, atu nichun i na Vision ngeihmi kha, a tthat paoh ahcun nangmah chan ah na ngah dih lo hmanh ah na tefa hna chan ahcun BAWIPA nih a tlinter hrimhrim ko lai. Na Vision ngeihning zat tein BAWIPA nih a thluachuahnak cu an pek ko lai.

Abraham thluachuah a petu le cu thluachuah tling cu a mi hna sinah thleidannak um lo tein a kan hrawmh zungzaltu PATHIAN kan pa a min cu thangthat si zungzal ko seh! Amen!

Note: www.thawng.webnode.com zongah fiangdeuh in rel khawh a si.


BAWIPA Thluachuah Careltu dihlak cungah um ko seh! Amen and Amen!



Thawng

Gemany