free web counter
greyhound runningHurricaneRunning Ostrich

Saturday, September 4, 2010

Herh Mi Maw Duh Mi Dah?

Herh mi maw Duh mi dah?

Lamkaltu 3: 1-8 “….Phaisa zeihmanh ka ngei lo……ka ngeih mi cu kan pek lai…..”

Plato sin i fimnak a cawng mi Aristotle (384-322 CBC) cu Plato a thih hnu ah a rak laar ngaingai. Voikhat cu Aristotle sin ah fimnak cawn a duh mi pa a ra i, fimnak cawn ka duh tiah a ti. Aristotle nih tiva ah a kal pi i, ti chung ah a hnim. Zeidah na duh bik tiah a hal i, "fimnak" a ti. Ti chung ah khan a hnim than i, ti chung na um lio ah zei dah na duh bik tiah a hal than. Fimnak ka duh a ti thiamthiam. A voi thumnak ti chung ah cun a thaw dih deng, thi deng tiang in a hnim than i, a hal than, “ti chung na um lio ah khan zeidah na duh bik”, a ti i, “Thli” a ti. Aristotle nih, “na hman! ti chung na um lio zong ah na duh mi cu fimnak a si thiamthiam ko nain, tichung i na herh taktak mi cu “thli” a si a ti. (an peh rih mi bia cu hmailei ah kan peh than te lai).

Minung hi kan duh mi lawng kan theih i, kan herh mi kan mah tein kan i hngalh lo hi a poi ngaingai mi a si cang. Ti chung ah hnim a si lio i a herhbik mi cu a dawp khawh ding mi “thli” kha a si. Hi vawlei sualnak, thihnak chung i kan pil lio ah kan herh bik mi cu Nunnak a si mi Khamhtu Zisuh Khrih hi a si. Vawlei cung mitampi nih an thei lo. Thlacam he pehtlai in , tahchunnak ah --- kan fa le a fel mi, ca aa zuam mi caah cun siibawi, engineer…tbk..ngah nak ding ah thla kan cam piak hna. Mifel te a si ahcun khamhnak hmuhnak ding caah kan cam piak ti lo. Fel nak in khamhnak hmuh si lo ti cu kan theih cio ko. Fel ngai tung i Pathian a thangthat duh lo mi an tam pi. Zeidah na duh piak i, a nunnak ah zeidah a herh deuh?

Lam. 3:1-8 chung i kan hmuh mi kebei pa nih cun, Piter le Johan kha, “zei maw an ka pek rua lai ti kha a hun i ruahchan i thep lo in a hun zoh hna” a ti. Kebei pa nih aa ruahchan mi cu ei din awk, tangka, thil le ri pawl an si. Nikhat nihnih ah a ei dih, a hman dih than ding mi an si. Sau a nguh lo ding mi an si. Peter nih a pek mi tu cu kebei pa nih aa ruahchan mi silo in, a herh tatak mi mitlamtling sinak kha a pek. Nifatin mi thilri hal tu si ti lo in, a nun chung mah ten kawl hawl khawhnak mitlamtling sinak tu kha a si. Hal tu dir hmun in, mibawmtu si khawh nak dir hmun tiang a pek. Kebei pa nih aa ruahchan mi le a ngah mi aa dang! Zei dah a tha deuh?

Luka 12:30 ah “Nan Pa nih hi thil hi nan herh hna ti cu a hngalh ko” ati. Cuti a si ah, Pathian nih kan herh mi a hngalh ko ahcun kan mah duh mi lawng kan hal sual lai, thlacamding a si ti lo, tiah ruahsual a fawi te. Pathian sinah thlacam ding, hal ding a si, a palhnak um lo. Kebei pa zong a hal ko i, a ngah mi tu aa dang ban tuk in, kan nih zong kan hal i, kan ngah mi a rak i dan tikah, kan lung a donghnak hnga lo le kan zumhnak a pial sual nak hnga lo tu kha i ralrin ding a si. Cun, thlacam kan ti tik ah, hal lawng kha si lo in, amah Pathian thangthat, a sin ah lawmhnak chim, sual ngaihthiamnak hal, amah he bia i ruah hna zong hi an si ti kha kan theih peng ding le kan telh chih hna awk cu an si.

“God is the giver of the needs, not what we want”

Pathian nih thluachuah in pe ko hna seh!



Pahniang

Manila, Philippines

/////////////////////////////////

Friday, September 3, 2010

Hakha Khuathar Ah Mi A tlau

Halkha Khuathar i a ummi Pu Than Kung (kum 48) cu August 20, 2010 (cawn ninga) ni ah lo a kalnak in a chuak ti lo, a tu tiang an kawl i an hmu rih lo.
August 20 ni zingka in Khenglo ah lei va veh ah aa thawh i lo a phanh hnu in, chun ah inn ah a hung tlung than i zanlei sml. 4:00pm hrawngah a lo ah riah dingin a kal than. Zanriah aa chuan dih in Pu Lei Uk sinah (a lo pa) a va leng i a kalpah ah leikuang chungah a tla pah i Pu Lei Uk sin a phanh ahhin a pumpaluk in a cin dih. A u Pa Uk nih cun rak um ta rih Lei tilak ka va ser ta lai a ti i a va zoh kar ahcun Inn lei ah a tlun tak. Inn a tlun than ah hin an inn ah chuak ti loin Khuathar i a ummi Pi Sui Ngun Tial sinah zan sml. paruk hrawngah a va lut. Amah sinah a chimh takmi cu, " Rawl kaa chuantak cang i lo ah ka kir than lai tiah,"a ti ko na buin thu duh ti loin lengah a chuak i khuazei lei a kal zong hmuh le hngalh a si ti lo. Cuticun tlau hraam aa thawknak cu a si.
A thazing in kawl hram an i thawk colh. Lo i rawl aa chuantaakmi te zong cu ei lo tein a mah ning tein a um ko ti a si. Halkha Khuahlun, Hniarlawn, Tiphul le Chun- cung khuami zong nih kawl an bawmh ve hna. Niruk chung an kawl i a tu tiang hmuh a si rih lo. Falam Siilei ( camh) a thiammi pa nih keimah nih kan kawlpiak hna lai i 28/8/2010 zanlei ah a rak chuak than ko lai tiah a ti.
Ref::HYF Authawng

Thursday, September 2, 2010

"""SERMON Tawite"""

Bible Cangthimmi(Biathlam 3:20).Kan thinlung,kan nunnak taktak ah Jesuh Khrih hmunhma kan pe maw?
Biahramthok: ::::::Israel mi hna tuanbia ah Abraham cu an pa hrimhrim a sinak le Israel le Abraham cu Taksa in siseh,Thlarau in siseh aa tthenkho lomi an si.Nihinni nang le kei tiang zong nih Abraham cu Zumhnak lei ah kan pa tiah kan tikhawh ciomi a si.Cucaah,,,
Pakhatnak:::::(Genesis 18)chungah Abraham le Sarah le Mamre Thingzarh hna lak i Mipa pathum kong chim ka duh hmasa.Bawipa cu Abraham sinah Mamre i Thingzarh hna lakah khan a lang i khua a hei zoh tikah mipa pathum an dir ko kha a hmuh.Cu a hmuhmi hna cu direct in Pathian mifa an si kha a hngalhcolh hna i a auh hna i a inn ah tha tein Tirawl a pek hna,an ei lio tiangah an pawng tein a tthuthnawh hna ti kan hmuh.Annih nih na Nupi Sarah tah tiah an hal tikah Thlam chungah tiah a leh hna.An thawh i "Na nupi Sarah nih kumvoi atu tikah Fapa a hrin lai a ti"Sarah nih a theih tikah a ni i a zum kho lo.Sarah nih ka tartuk cang a si kho lailo ti ko hmanhsehlaw pathian bia cu a pelh bal lomi a si caah hmaikum cu tik caan ahcun Abraham le Sarah nihcun fapa Isak an hrin ko.
U le nau hna Abraham cu Pathian a zummi a si caah Mamre Thingzarh i a dirmi pathum hna kha Pathian mifa an si hrimhrim ti kha a zoh hna le cangka in a hngalhcolh hna i a innchungah a luhter hnanak thawngin Pathian Thluachuah Rosung fapa a tinco ti kan hmuh.Khrihfa,zumtu tampi le kan nih vialte hna nih aho hidah,or ahokhidah Pathian riantuantu le kan Pastor te an si ti hi kan hngal fiang taktak maw?asilo ah Pathian riantuantu le Mifa kan Pastor te hi Pathian Thluachuah a kan phorhtu an si tiah kan cohlang hna in an Lung kan lawmhter hna maw tihi i chek ding kan si.Pathian riantuantu kan Pastor te le mifa hna an Lung kan lawmhter hna lo i an ngaih kan chiatter hna a si ahcun kan Thluachuah hram a cat lai i Sunghzatlaknak kan ton lai.Pathian riantuantu ngaih a chiattermi hna khua le ram,miphun le Khrihfabu hna cu an kumvui tiang a pit.Abraham bantukin Pathian mifa hna le kan Pastor te hna hi kan inn chungkhar i kan Thluachuah petu or Phortu an si ti philh hrimhrim loin kan nih vialte hna nih kan nun i fiang usihlaw pathian Thluachuah kan co chin lengmang lai.Ramchung ramleng Senthang hna thukpiin khuaruah kan hau ko rih.
Pahnihnak:::::(Joshua 6)chungah Joshua le a mipi hna nih Jeriko an tuknak kong kan hmuh i cuchungah Joshua nih ngiathlai dingin minung Pahnih a thlahmi hna le hlawhhlangnu Rahab kong kan hmuhthan.Joshua zong Abraham bantukin Pathian zumtu tha taktak a si ve caah a thlahmi hna Minung Pahnih cu hlawhhlangnu Rahab inn i an Luh lecangka in cu Rahab nihcun Pathian mi Joshua nih a rak thlahmi hna an si ti a hnalhcolh hna caah a innchungah tha tein a luhter hna i a zohkhenh hna i Jeriko minung hna nih harnak pek dingin an rathnawh hna lio ahkhan Rahab nihcun a luatter hna ti kan hmuh.Cutikah Rahab nih Jeriko tuk dingin nan rat tikah kei le ka innchungkhar hna cu luatnak kan pe ve te uh tiah a ti hna i Jeriko an tuk tikah Rahab le chungkhar cu him tein an luatter hna ti kan hmuh.
Hawidawt Unau hna Rahab hi hlawhhlang misual si ko hmanhsehlaw Pathian mifa Joshua thlahmi Pahnih hna kha Pathian mifa an si ti kha fiang tein a hngalh hna caah le cu Pathian mifa hna cu a innchungkhar ah tha tein a tlunter hna i a luatter hna caah amah le innchungkhar zong cu Jeriko tuk ni ahcun him tein an nung kho ti kha kan hmuh caah a cung lei i Abraham,Sarah le minung pathum kong kan chim cia bantukkhan Pathian mifa hna le kan Pastor te dawt le conghhramh,zohkhenh,an Lunglawmhter cu kan Pumpak,innchungkhar,khuaram le abikin kan Khrihfabu Church,Fellowship caah kan Thluachuah hrampi cu a si ti hi kan philh hrimhrim loawkah chim ka duhmi a si.
Pathumnak::::Kan Bible cangthim(Biathlam 3:20)chung i kan hmuhmi hi kan theihtuk cangmi bible cang a si ko nain a thar tein vun ruattthan ding kan sawm ko hna.Zeicahtiah khrihfa Mi tampi kan Thinlung innka Jesuh khrih nih a kingh len ko nain kanmah nih kan thinlung innka kan hung duh hrimhrim lo i kan hrenhkanh ton caah Jesuh Khrih thinlung nunnak i um hrat lo ahcun mual kan pho zungzal ko.Jesuh khrih nihhin kan Thinlung innka hi a Leng leiin a hrenh bal lo.A leng lei in a dir i kan Thinlung innka a kan kingh i Innka ka hunh uhlaw nan chungah kan umhnawh hna lai i Thluachuah kan pek hna lai a kan ti zungzal ko nain kanmah nihhin kan Thinlung chunglei innka kan hrenh lengmang caah le kan hun duh hrimhrim lo ca ahhin Thluachuah kan co kho ton lo i culawnghmanh siloin Sunghzatlaknak,ngaihchiatnak phunphun hi kan ton tawnmi a si.Cucaah hawidawt Unau,nupa hmailei kan nunnak cio caah lamhruaitu si hram ko seh tiah Pathian Mifa,le Pathian riantuantu kan Pastor te dawt le zohkhenh,an Lunglawmhter,an hnangamter hna hi amah Pathian kan Cohlan le kan nunnakah kan chunglei Thinlung innka kan hunh i kan Luhter a si ti hi philhlo tein kan i nunpi a si ahcun Pathian Thluachuah kan co deuh hrimhrim ko lai tiah thazang pek kan duh hna.Pathian nih Sunparnak co ko seh.
Saa Hu(SCF -Assist-Pastor)
Kuala Lumpur.

Wednesday, September 1, 2010

Paku Myoh Ah Ruah Faktuk In A Sur

Paku myoh ah ruah faktuk in a sur ruangah inn (5000) hrawng ti nih an inn a hrawh dih hna i inn dang ka dangah an ni thial dih hna .Cun micheu khat cu phungki Sianginn ah an um i mi cheu khat cu sianginn ah an um rawl eiawk a ngei lo micheu khat hna cu phungki pawl nih an cawm hna tiah paku myoh um mi pa nih a chimh.Ref.Irrawady

Patluang

Aizawl

Tuesday, August 31, 2010

""2011 DV Lottery Result""

US Cozah nih kum tin te a tuah tonmi ramdang mi nih US ah (ta-ya-vun) tein an luh khawhnak ding le an um khawhnak ding ah tiah DV Greencard Visa Lottery Program hi kan theih cio bantukin a tuah lengmang mi a si.Kan nih Laimi nih hin cu tluk in kan tuah deuh rua lo i pakhat hnih cu a tuahmi zong an um pah ko lai nain mah DV Lottery nak in Refugee tu hi kan ni rinh deuh i a mikip nih an tuah.Si kho sehlaw cu Refugee lawng hi bawh lo in DV Lottery hna zong hi kum tin tein mi nung a zaa/ a thawng nih tuah ah cun a tlawmbik kum khat ah minung 9/10 nih kan hmuh khawh mi a si ve tiah ka ruah. DV Lottery in US a phanmi hi kan mah Senthang chungah kan nau nu pakhat NY ah a ummi lawng ka theih rih a mi dang an zong an um ve men lai nain. Program hi kum dang bantukin a si ah cun a ruah hlan ah an rak on tthan cang lai va si kaw a duhmi tete kan um ah cun minung tam deuh nih i sawkve uh silaw a ttha tuk lai.DV Lottery hi vanthat ah cun hmuh a foi ngaimi a si i mah hi hmuh ah cun US an phak ah hin an nih cu Greencard he an rak phan cang mah Greencard cu Refugee pawl nih US ah Kum khat le cheu hrawng kan um hnu ah kan ngahmi Permanent Resident Card (Greencard) a si.Cucaah Ram kip in US foi tein an phaknak ding le khua an sak khawhnak ding ah mah DV hi minung tampi nih kum tin an rak sawknak a si.Nikum kha keimah zong nih hoi le kawm theih hngalhmi tete minung 15 hrawng na tuahpiak ve hna nain an tlawm deuh rua pakhat hmanh kan ngah rua lo thawng an ka thanh ti lo maw si ka thei lo tu kum hi caan hna pek khawh ah cun mi tam deuh tuah piak an hau men lai.Tukum a sawkmi chung in Kawlram mi nih 2011 caah minung 369 nih an hmuh mah chung ah hin Laimi kan va i tel hnga dek maw?2011 caah a ngahmi a tam bikmi hi NIGERIA minung 6,000 nih an ngah i BANGLADESH minung 5,999 nih an ngah ve mah zat minung nih an ngah tik ah hin kumkhat ah minung pa zeizat nih dah an va i sawk lai mu DV Lottery 2011 Result Hika ah hin zoh khawh a si ko hih. Laimi zong nih kum khat ah minung tam deuh nih kan tuah ah cun tam deuh nih kan poh khawhmi a si ve caah Refugee lawng bawh lo in DV Lottery hna zong hi kan thut hmun tein pawh pah ve tuah uh si law a ttha hnga lo maw?

Monday, August 30, 2010

2010 Election Vote Pek Le Pek Lo Ding

2010 November 7 ah SPDC nih General Election for (State and Union) caah ka tuah lai a ti. Mah kong ah Vote pek lo ding le pek ding ti bantuk in ruahnak i khah lonak a um pah leng mang. Hi kong ah ka ruahnak le zumhnak pawl BBC, VOA ti bantuk ah ka chimh pah na in, zapi ni theih a si lo. Lai Forum hawikawm zapi zong nih theih a si lo ti mi a fiang ngai.Vote pek ti cu "Individual Rights" a si. "Fundamental Rights" pa khat a si. Na pek lai lo ti phung a si lo. Na pek hrim hrim lai ti phung zong a si lo. Human Rights a u pat mi poh poh nih mah cu zulh a si. Cu ruang ah World Trade Center king ah Muslim pawl nih Biakinn sak an timh tik ah US President Obama nih an fundamental rights pa khat a si tiah a ti mi a si. President Obama hi Muslim asi le si lo, Krifa a si le si lo ah kan buai a herh lo. Fundamental Freedom a zulh i, a zumh i, a pawmh mi a si le si lo ah kan buai ding tu a si.
November 7, 2010 ah General Election kan tuah lai an ti tik zong ah, Party pakhat sinak in Vote pek hlah uh ti mi zong hi a dik lo mi "Idea" a si. Tah chunnak ah NLD le Party cheu khat cu 1990 General Election ah tei tu/tling tu a n si ko. A si na in, 1990 in 2010 tiang zei hmanh an tuah khawh lo. Pu Than Sui an tei lo ti nak a si ko. Cu ban tuk party/bu pa khat khat nih 2010 General Election ah Vote pek hlah u an ti mi khi Human Rights Perspective in kan zoh ah cun a diko bak lo. An palh tuk.Zei ruang ah? NLD chung in NDF an chuah. A chuak duh tu pawl an "Individual Rights" an hmang mi a si. NLD in NDF an chuah ruang ah SPDC an tei lai ti nak a si maw? Si hlah. NLD nih kum 20 hlei a doh i, SPDC cu a tei tung lo. NDF nih a tel lai tinak a si maw? Ka thei lo. A si nain, NDF nih NLD doh ning si lo in phun dang deuh in doh an duh. Mah ban tuk in phun dang deuh in an doh duh mi na sual kan ti khawh maw? Ti khawh hlah. Zei ruang ah? An mah rights "Covo" pa khat a si.
Cu ruang ah CNF, ENC hna nih 2010 Election kong he pehtlaih in Statement an chuah. Mi tampi nih kan rel lo. Kan rel na in, kan i fiang lo. A pawi tak tak. Vote na thlah le thlak lo cu nang mah "Individual Rights" na hmang mi a si. Zapi Covo "Group Rights" Bu covo "Party or Organization Rights" a si lo ti mi kan theih aherh ngai ko.Cu caah, 2010 General Election ah Vote thlak i, Dohthlennak "Revolution" tuah a duh mi hna poh poh, lung thiang te in le, zalawng te in nan covo vote te kha hmang in, vote rak thlak ko uh. Kan tei le tei lo lawng ruah phung a si lo. Kan duh le duh lo langh ter kha first step a si. Cu hnu ah a herh mi dohthlenhnak cu kan pek than lai.Vote pek duh lo in, dohthlenhnak tuah a duh mi zong nan dik tho tho. Nan mah nawl a si. Vote pek lo in, doh thlenhnak kan tuah lai nan ti ah le, nan mah nawl tho tho a si. Nan "Fundamental Rights" pa khat pei a si cu. Na sual kan i ti khawh lo. Na dik kan in ti fawn hna lai loh.Kawl Ralkap Uknak cu kan duh cio lo i, phun tam pi in dohthlenhnak kan tuah cio tiah kan i theih thiam cio a herh.Upatnak he,
Ram Cung Thang Pa
Indianapolis, IN USA