Tuesday, September 14, 2010

Pathian He Teitu Kan Si

Pathian He Teitu Kan Si
Bible: 1Johan. 5:4-5; Filli. 4:13


Biahmaitthi:

Minung kan nunnak ahhin teinak hmuh le teitu si hi kan herh taktakmi a si. A sungmi/tu si lengmang hi a duhmi kan um lai ti ka zum lo. Azei bantuk zuamnak hmanh ah teitu si hi kan i tim dihmi le kan duh dihmi a si. Vawlei kan nun cu thil phunhnih karlak ah a nungmi kan si i, zuammnak puai i a telmi bantuk khi kan si ko.

Teitu si hi kan nunnak ah a bia rak pit (important) tuk hlah sehlaw cu nunnak hi sullam tling a rak ngei hnga lo. Vawlei ah hin thil phun hnih a um peng. Teinak le sunghnak: Nihin ah nang tah, Teitu si ma na thim lai, Teimi (asungmi) si dah na thim lai?

Teitu si na duh ahcun Teinak Bawi kha na nunnak ah uktu Bawi ah na ser ve a hau. Vawleicung ah Teinak tling taktak a ngeitu pakhat lawng a um, cucu Krih Jesuh a si. Na nunnak ah Teinak hmuh na duh ve ahcun cu Teinak Bawi cu na nunnak ah hmunhma pe law, Uktu ah siter law, amah he cun teitu na si zungzal ko lai. Amen.

Mithiang Pawl nih cun Filipi 4:13 ah Thawnnak a ka petu Krih thawngin thil zeipaoh ka tuah khawh, ka teikhawh dih ko hna a ti. Mithiang Johan nih cun Krihfa ka si aa ti ve ttung i zumhnak der a ngeimi, negative mindset a ngeimi: Vawlei mi pei kan si cu zeitindah Pumsaduhnak le vawlei harnak cu kan tei khawh lai a timi hna kha challenge (sikhaw) a tuah hna.

Vawlei hi hodah a tei kho lai? ti hi a si. A phi (answer) a chuah thanmi, a pekmi cu hihi a si; Jesuh cu Pathian Fapa a si ti a zumhmi lawng nih Vawlei cu an tei khawh. Zumhnak in Vawlei cu kan tei khawh a ti (1John. 5:4-5). Amen! Zumhnak cu hopaoh nih phaisa pek hau loin ngeih khawh, hmuhkhawhmi a si.

Asi-ah hodah kan si kun?

Kan nih cu mi sawsawh kan si lo. Krih kan zumhnak thawngin kan nih cu Pathian he teitu kan si cang. Hallelujah! Kan nih cu teitu kan si. Thihnak teitu, harnak teitu, vawlei teitu, pumsaduhnak vialte teitu, sualnak teitu, mah le mah aa teitu Krih kan zumhnak thawng le kan nunnak ah Thaing Thlarau hmunhma kan peknak thawngin kan si cang. Amen!

Zumtu nih cun harnak le tukforhnak hi ton phung a si. Harnak le tukforhnak kan tonmi cu kan tlukthainak ding ca, kan rawhnak ding ca, Pathian kan philhnak ding ca le kan sunghnak ding caah si loin teinak kan hmuhnak ding caah le kan nunnak hmangin Pathian Sunparnak a langhnak ding ca tu ah a si deuh ton.

Mithiang Peter zong nih Ti le Thlarau in a hrinthar cangmi hna nih cun, tluk khawh le tlau khawh, kal sual khawh a si lo nak /zia kha fiang tein a langhter. 2Peter 1:10, “Cucaah ka u le ka nau hna Pathian nih an kawhnak hna le an thimnak hna kha nan chungah fehter chinchin ko u; cu tin nan tuah ahcun an tlu bal lai lo” a ti. Cu nih a langhtermi cu Krih ah a hrinthar cangmi hna nih cun Vawlei sualnak vialte, harsatnak vialte, tukforknak vialte le thihnak Teitu kan sinak kha a si. A kalsualmi le a tlau thaimi cu Krih ah a hrinthar taktak lo ca tu ah a rak si, a tlau le a kalsual si loin a Hrintharmi nun chihkhat te a rak i cawn le a rak i hlan tu khi a si deuh. Khamhnak cu vuikhat ah zungzal ca a si. (Jh.3:16).

Jesuh Khrih nih zumtu hna kan caah thla a kan campiaknak Johan 17:15 chungah kan hmuh khawh. A cammi cu; hi mi pawl hi Harnak tong lo ding in le Satan tukforhnak tong lo ding in khamh hna kan ti lo, asinain an tonmi Harnak le tukforhnak kha tei khawhnak pe ko hna tiin a kan campiak. Cu caah harnak le tukforknak tong loding hi Bawipa nih a kan duhpiakmi si lem loin, harnak chung tu ah teitu si ding ah Jesuh nih a kan duhpiakmi a si deuh. Amah hrimhrim kha thihnak le harnak teitu cu a si. Amen.

Zeitindah Teitu cu kan sikhawh kun lai?

Johan 6:16-21 le Matthai 14:22-36- cung kan zoh tikah Jesuh ticung a kalnak kong kan hmuh. Jesuh nih a zultu pawl kha anmah lawng in Tilawng in rili khat talei ah a kal ter hna. Thlichia le tilet a tho Zultu pawl cu an thinphang. Jesuh ticung i a ke in a kal kha an hmuh tikah “Mithla” a si tiah an ti i an thin a phang i an ttih; Cutin an thin a phan i ttihnak in an khah lio caan ah Jesuh nih a thawh hna i “Nan thinphang hlah uh, Keimah pei ka si cu hnangam tein um ko u,” a ti hna. Cun Jesuh cu lawng chung ahcun an luhter i luklakte ah an i tinhnak hmun cu an phan.

Cu Tuanbia nih a langhtermi cu: A chel chel ahcun Pathian nih hin kan zumhnak hi a tak maw si, tak lo ti hngalhnak caah kanmah te lawng in a kan kalter ve ton. Harnak hna hi Pathian tel lo cun kan nunnak ah kan tong colh ton. Asinain cu bantuk harnak kan ton caan ah Jesuh nih “ttih hlah u nan sin ah kan umpi ko hna” a kan ti ve. Amen.

Hika zawn ah Lawng nih a langhtermi cu kan Lungthin kutka a si. Zultu pawl nih Jesuh kha Bawi a si ti an theih lawng siloin an Lawng chungah khan an luhter i, hmunhma an pek. Cu vebantukin Pathian Thiang Thlarau a um ko, kan sin ah a um ti lawng ngalh le zumh menmen hi a za lo, kan nunnak ah kan sawm a hau, kan lungthin kutka kan hun piak i Pathian kan chungah kan luhter, hmunhma kan pek, uktu ah kan chiah ahcun kan tihnak vialte a kan tei piak dih lai. Krih Thlarau kan chung a um tik ah kan nih cu Teitu kan si (1John. 4:4) “kan chung i aummi Thlarau kha vawlei mi a simi hna chung i a ummi thlarau nakin a thawng deuh” a ti. Thlarau Thianghlim kha kan nunnak ah hmunhma kan pek i, amah chungah kan nunnak kan chiah dih tik ah kan nih cu Jesuh teinak cu kan i hrawm ve i, teitu vialte lak ah teitu kan si. Pathian he teitu kan si, Hallelujah!

Ruakung (Bamboo) nunnak nih a kan cawnpiakmi

Pathian Thiang Thlarau kan chung i a um hnu cun Ruakung bantuk kan si. Rua cu step by step in a thang, A hrampi cu a fek, a nih cu flexible a si, cucaahThlichia zeitluk a hran zong ah awl tein a tlu kho bal lo. Thlichia a hrang deuhdeuh aa tthui deuhdeuh, nain a hram kha a sawsawh in a tlawng lo, a tlu lo. Sermi thil vialte hi Pathian lamkaltu an rak si dih ko (Rom. 1:19-20).

Mah Ruakung a langhtermi cu: Zumhnak a langhter. Cu Ruakung bantukin kannih zong Zumhnak ah hin nitin Step by step in kan tthan ve awk a si. Thlichia=Harnak; caan ah kan Zumhnak a fek i a thawn chin peng ahcun zeibantuk Harnak ton hmanh ah kan tlu kho lai lo, ziah ti ahcun Pathian Thiang Thlarau kan chung i a um caah, Teitu kan si. Pathian cu Teitu a si i, Teinak cu PT ta a si. Filipi 1:28 teinak petu cu Pathian a si a ti. Amen.

Harnak caan i tei kan i zuam lo ahcun Pathian Sunparnak langhter kan duh lo asi. Phungtlukbia 24:10 ah “Harnak caan ah na der ahcun na der taktak a si” a ti. Harnak ton loin teinak hmuhkhawh a si lo. Cucaah harnak caan ah a dermi si loin a thawngmi si i zuam hna u sih. Cu ti cun Pathian nih si hna seh ti a kan duhpiak fon. Harnak ton a duhlomi cu Jesuh Krih teinak a hram duh lomi an si. Kan harnak hi Jesuh nih kan ca i a tuarmi he tahchun ahcun chimh tlak asi rih lo. Cu harnak vialte cu Krih nih Vailam ah a khenhchih dih cang hna caah, harnak kan ton caan ah a kan bomhkhawh. Krihfa nun timi cu, Rua bantuk in step by step kan tthan awk si. Ruakung cu a tthang deuhdeuh i a tanglei ah a par le a hnah vialte kha a tum tthan. Cu ve bantuk Zumtu hna i kan teinak cu toidornak a si. Keimah timi lungput kan ngeih lio caan khi kan ral kan sungh lio caan te a rak si. Toidor nun cu teinak a si.

Harnak caan ah Pathian nih Zeitindah a Kan Hnemh Peng Ton?

Pathian nih harnak caan ah aw nem tein a kan hnemh peng tonnakmi Bia cu “Tih Hlah Uh” nan nih cu teitu nan si cang ti hi a si. Harnak kan ton caan le tukforknak kan ton caan paoh ah kan pawng tein Jesuh nih ttih hlah u a kan ti peng ve. Cu ti “Ttih hlah u” a kan ti tikah sullam tampi a ngei.

Thlarau lei ah kan pa pakhat a simi Rev. Dr. Steven Hre Kio nih cun “Ttih Hlah Uh” timi sullam hi phunthum in a langhter. A phungchimnak “Miphun Damnak” Cauk (p.268) chungah kan hmuh khawh. Ttih hlah uh a kan ti; zeiruang ah?

1) Pathian cu kan ttih ding vialte a Teitu asi caah hi ti a kan tinak hi asi;
2) Pathian cu kan herhmi vialte a kan pe khotu Pathian asi caah asi;
Kan herh caan ah daihnak le hnangamnak a kan pe khotu asi caah asi fawn. Pathian cu Hnemtu BAWIPA asi hoi. Amen!
Cucaah Unau vialte hna kan nih nih Vawlei ah zeidah kan ttih awk a um ti? Vawlei harnak le buainak le hnahnawhnak hna hi kan i teiter ti lai maw? Harnak ton hi tah kan tih rih ko lai maw? Ralkap ttha cu raltuknak chungah an i thei bantuk in Zumtu ttha cu harsatnak le tukforknak caan ah kan i thei ve. Nang na dirhmun zeitin? Pathian dah ti locun vawleicung ah ttih dingmi hohmanh an um lo ( Isaiah. 8:13). Jesuh nih pum cu a tthat kho ko nain thlarau a that kho lomi cu ttih hlah u, asinan pum he thlarua he a pahnih in a tthat khotu Pathian Thlarau tu kha ttih deuh u a ti. Amen.

Krih he teitu kan sinak hi kan theih fian taktak ko ahcun, Pathian kan sin ah a um le kan lungdongh le harnak kan ton caan ah a kan hnemtu BAWIPA kan ngei ti mi kha philh hna hlah uh sih! BAWIPA min thangthat si ko seh!

Biadonghnak:

Asi-ah Vawlei cu ahodah a tei kho? Jesuh cu Pathian Fapa a si ti zumhnak a ngeimi lawng lawng nih an tei khawh (1Jh.5:4-5). Ka u le ka nau, ka nu le ka pa vialte hna atu suimilam caan ah cu ti kan zumh ahcun Pathian nih a Thiang Thlarau in a kan um pi lai i, Khrih he Teitu kan si zungzal ko lai. Kan tonmi harnak nak in a ngan deuhmi le a thawng deuhmi Pathian a si. Teinak cu BAWIPA ta asi! Bawipa a nunnak ah a sawmmi hna le Krih thlarau a nunnak ah a ngeimi hna cu amah Pathian he cun Teitu kan si ve. Bawipa min thangthat si ko seh! Teitu kan si. Amen!


By Olivia Biak
Germany

No comments: