Sunday, February 20, 2011

Lai Phunpi Ni Cawnglawmhnak

Kum zabu 21nk kan luh lai ah, vawleipi cu a thin a rak phang tuk. Number 1999 in tuahmi kompeuter vialte nih number 2000 hi an tlaih khawh lo sual ahcun an thirnung (seh) vialte an dir dih sual lai ti an rak phang. Biaknak lei in 2000 cu caandonghnak ah a ruatmi zong tampi an um. Nain, Pathian khuakhanning cu aa dang. 2000 chung kan luh tikah Chin miphun kan caah ruah bal lo mi thil a cang. A tthangchomi ramdang ah Pathian nih thawng tampi a kan phanhter. An rumnak a kan co ter ve. Cu rumnak hna cu Lairam ah khua a sa mi nu le pa le chungkhat le khrihfabu hna nih an tem khawh ve. Lairam inn le lo hna zong rang cur in an um ve cang. Pathian nih kan miphun lam a kan hruaining hi khuaruahhar ngai a si.
Nihin Chin National Day 2011 cu kum dang he aa lo lo. Lawmh cio kan duh. 2000 pin lei ah kumhrabu pakhat kan lonh hnu ah kumhrabu pahnihnak aa thoknak kum a si. Kumhrabu pahnihnak chungah Pathian nih kan miphun hi lawmhnak, dawtnak le remdaihnak thluachuah he lam kan hruai ko seh!
Ram le miphun caah rianttuan hi zumtu hna kan rian a si ve. Bible nih a kan cawnpiak. Kan miphun caah Pathian sin ah thlacam usih. Ramdang kan um lio ah Lai ngaknu le tlangval hna nih Lairam ah nanmah ngai in a ttap tawnmi nan nu le cu philh hna hlah u. Sunghno kan nu le hi khuazing thinlung pu in hnuk thlum a kan dinhtu an si. Bia dang in, Lairam sertu an si. Nu le pa dawt hi Lairam dawt a si. Lairam in a kan ngaitu nu awthlam ka theih mi hi Mother's Day 2009 caah ka rak ttial bal. Lai Phunpi Ni ah miphun hringsortu kan nu le kong cu rel tlak a si ve ko rua tiah a tang ah ka van langhter.

Lairam Hringtu nu upatnak (May 7, 2009)

Hringtu Nu le Ni kan phan tthan cang. Mitthlam ah tleicia kan nu le mui an cuang tthan. Lenglio nu le hna mui aa dawh khun. An thisen in hrinsormi fanu le fapa hna mit ah vawlei cung nu vialte lakah aa dawhbik nu ti dih an si. Kan nu le cio kha mitthlam ah van cuan ter hna usih.

Kan nu le nih thla kua chung a kan pawi. Lairam ahcun naupawi ruangah an i din kho hlei lo. Lo ah a kankalpi. Fing le hawr kuang kip an zawh. Thing an hlam. An phur. Facang vuitun an phur. Lo an kan thlawhpi. Thingkung cung ah kai herh can a um. An pawpi he lamcho an kai. An hni kha an paw nih a cawi. Ngalrek langh hmanh a siang lo mi kan nu le cu an tanpor cung tiang hrim in an hni aa hlim. An i veng peng. Retheih baak ah ningzak nawn in an um. Zing zan a chuak. Fa dawt ruah ah tuan te ah a tho. Fa le caah rawl a chuan. Lo ram ttuan ah a kal tthan. Thlan he inn ah a rak tlung tawn. Ram kal lio ah fa le caah thingkung kip a ngia. Theipi kung hram a bih. Theipi senduk tete a hmuh hna. "Maw, khuazing! Cu tak cu! Aw, pate caah, nute caah, cu ka thin, a ti. A thinlung cu a sertu Pathian sinah lawmhnak he a phan. Theipi cu pakhat hnu pakhat in a van lawh. A chem pah. Thianghlim tein a tuah hnu ah a hni hliah in a fun. Tlun lai aa ngaih tuk. A thilritpi cu a zang huap. Fa le dawtnak ruang ah.

Ku-tlertlur tiah thing ngalh thawng a thang. Fa le nih ka nu, an ti. Inkaa in fa le an chuak. Van zoh ah a thlan hripi he, a sam zong choi viar in, hmaikhah lo awk dengmang in. A hmai a panh tuk tthiam. Fa le nih khuhlu tal akan phurh hnga maw an ti. Sei an zoh ah zei an hmu lo. Thachia ngai an lo. A hni hliah in a fun i a paang ah a pawi mi theipi cu a van chuah. Fa le cu merh zimziam in. Nubik cu aa lawm tuk. Nun chung vanram ciamman. Mawtor he ramttha um he dang hlah. Lawmhnak cu thinlung in tah a si. Rumnak le ngeihchiah in tah a si lo. Lairam sunghnokan nu le lawmhnak cu a sangbik a si zungzal ko.

Nihin sunghno kan nu le hna lennak Lairam cu a tthing chin lengmang cang. Thing le ram a car cang. Thingphurh ah meng tam kal a hau. Theipi kung zong an tlai kho ti lo. Khuhlu hmanh nih ciam an ser cang. Hringtu nu le fahniang rual lawmhnak cu a tlau cang hnga maw? Hringtu nu hna cu an li a leeng. An dawtmi fa le hna nih mithmuh lo rili ral ram ah an pehtaak cang hna. Nu le thinlung cu Lairam lawng ah a leeng kho ti lo. Fa dawt le umnak mithmuh bal lo ram kha an ngai. Zing zan a chuak, lungleen le lileennak lawngte an si cang. Tintling cungah a co val he hmanh me rem thiam kho ti lo. Ka caah lei cung nun hi! a ti cang.

Lo ram ttuan ah kal a hau. Thing le ram nih hnawl mi ko hi a lo cang. Thing le ram cu a caah duh a nung kho ti lo. An car. An phawng dih cang. Lairam dawhtertu par ttha hna an ziam dih. Hring dildel Lairam ti mi kha phawng tululpi ah a can hnik cang caah. Ruah khawh mi dang a ngei lo. Cu ngai Lairam leen le ttuan har cu ti lawng kha a thinlung ah a khat. Pasal santlaih lo ah a phawt deng mang. An mawh lo, an mawh lo. Lairam duhnunnak a tlau cuahmah cang caah.

Hringtu sunghno nu le hna lennak Lairam cu Kanaan ram ah kan ser lai kan ti lo maw kha! ***Tho usih law sa usih. Hringtu nu hna lawmhnak caah Lairam ser tthan hna usih***

Lairam in Hringtu Nu Aw
Zan khua mawt i, tintling cungah,
Runuk na pa, he zau zawn ah
Thli lungkil in, kan hlam tawn e,
Dawt pahar hniang, hrin semmawng kha.
Hung kir hnga maw, tin lung ka nawl.

Nang liam ni cu, Lai lungrawn ah
Mitthli rual he, khua za ka cuan,
Nang len tawnnak, kan chum tual le,
Zalam tlang nih, rung hmun hna e,
Kei lungfahnak, zual ter hna maw.

Ka cung a zuang, thir zuamthiam aw,
Dawt pahar kha, phur ve maw e,
Tluang chin ah e, lan lai an ti
Kut zattial tlaih, um thiam ri lo,
Lungsak kho lo, tthen thai lai cu.

Ni thla ka rel, nang zun ngai in,
Ttuan zaang tlung lo, nang bau hnu cun,
An chim tilim, sia nu fa bang,
Tthen a fah cu, tuar har tuk ai,
Lung ngam tertu, um te hnga maw.

Ka zanmang ah, panh siarmar in,
Hung cuang ai kaw, hrin semmawng cu
Za in chan lang, ka ti zawn ah
An ka biak ttha, si ttung ri lo,
Kei lungfahnak, zual ter chin e.

Cung khuazing nu, zangfah kan nawl,
Dawt hrinhniang ca, thla za ka cam,
Rauthla in e, za cu tlai law,
Nang fadawt ttha, si ter hram ko.
Vanram nuam i, tawn lai nak ah.
Mother's Day ni ah kan nu le tthatnak lawngte ka ruat. Lairam in hringtu nu vialte hna, an fa le zun ngai in an tuar ding ning ka ruah ah ka lung a hno. An hraamnak aw ka theih teh a si ko rua. (Rev. C. Duh Kam, May 11, 2009, Mother's Day Thaizing)
Voi 63nak Lai Phunpi Ni lawmhnak caah thlacamnak he,
C Duh Kam
Chin Baptist Mission Church
Washington, DC

No comments: