free web counter
greyhound runningHurricaneRunning Ostrich

Sunday, March 21, 2010

Caangai Theology

Job 12:7-8 Pathian thil ser vialte nih hin an mah le an sining cio in Pathian thatning an langhter cio dih. Zumtu hna nih hin Pathian zeitluk in dah a that ti hi a sermi thil saram hna hmangin theih khawh a si. Cucu Kan Bible nih a kan cawnpiak. A ser mi saram hna sinin fimnak hngalhnak hna le nunning kan i cawn khawh ding tampi an um. Van i a zungmi va hna le saram hna nakin pei nan hngalhnak a tlawm deuh hi. Annih nih an in cawnpiak khawh hna ding tampi a um. Job 12:7”

Kan miphun nunning le zumtu nun hi cangai nun hmang in kan cawn le kan nunpi dingah ka duh ngaingai. Caangai Theology Caangai nunning hmang in Pathian dawtnak kan cawng lai.

Caangai i a sinak; ti chung ah a um kho mi le tlang cung zawng ah a um kho mi saram phun khat a si. Kumkhat ah voikhat in a phaw a thleng a zarh mi a si, an an phaw an zarh can ah hin delthawmnak in an khat an caah a harsat cem can le bawmtu vengtu an herh lio can a si. Hi lio can lawngah hin rul hna nih caangai an ei khawh hna, an phaw a vun can hnu cun Caangai tu nih rul khi an ei hna tichung i a um mi saram phun hna lak ah Caangai lawng nih rul khi an tei khawh. Saram dang cio hna bangin a nu le a pa in Pathian nih a ser ve hna. A si nain a pa le a nu i an lungput hi an i lo hna lo. Cu an lungput cu kan miphun le zumtu hna kan nunnak chungah a thupmi nunning phun khi an si. Phundang in chim ah cun kan ngeihawk i a tha mi nunning phun le ngeih cu chim lo a ruah in kan ruah lo awk nunning phun khi an si.

A Pa i nunning ; zumhtlak in a dawtmi a nupi ‘ a nu’ caah a nung. A nu nih a phaw a zarh lio can ah hin a pawngin thih ngamh in a cawngh, zeibantuk thil tihnung a um hmanhah a nu sin in a thial kam lo, a nunnak a nu a phunhawi caah a pek. Laithlang kan rak um lio ah hin ngaring kan rak dawi tawn i lung kan phawhah khin lungnih thi lak in a rial mi Cangai khi ka rak hmuh bal. Ka nu nih Caangai pa a si a nu aa zarh mi a um a cawngh caah a kal tak siang lo curuangah lung kan phawhmi nih a rial mi a si tiah a rak ka chim bal. A dawtmi a nupi hei tiko usih kaltak nakcha cun thih aa thim deuh, hihi Kan miphun hna nunnak le zumtu hna kan nunnak ah hin i temchih ding in le nunpi ding ah ka duh ngaingai.

Kan dawtmi kan miphun le kan Khrihfabu a delthawm can ah zumhtlak in a caah thih a ngamh mi kan si hna hnga maw? Harsatnak soiselnak hocernak sungh zaatlaknak a phunphun kan tawn tik zawng ah kan dawtmi kan Miphun le Kan Khrihfabu, zumtu nun ram ah Caangai pa bang a nungngam mi pasal tha kan miphun le khua le ram Khrihfabu nih kan herh.

Zumtu hna Kan Caangai pa Pasal tha cu Khrih a si. Kan delthawm lio can theng teah kan mah kan himnak ding le luatnak hnga dingah a mah le a mah a nunnak vailam cungah a khenchih. Cuticun luatnak a kan serpiak. Kan that lio can le kan dam lio can ah a si lo,” Asinain Pathian nih cun zeitluk in dah a kan dawtnak kha hitihin a langhter: kannih cu misual kan si ko rih lioah hin Khrih cu kan caah a thi. Rom 5:8 cp Heb 10:10”

A Nu i nunning phun; A phun hawi a si mi a pa i a phaw a thlen can a zarh lio can ah hin a rak ka daw i a ka vengtu le chanh tu a si ti a ruat lo. Amah kutin a Pa kha thah i ei a hmang ti a si. Curuangah a pa a zarh can ah hin a nu nih hmuh lo nak hnga ding hmun ah a thup khawh chungin a thup ti a si. Hi bantuk nunning phun hi ttih a nungtuk mi nunning a si. Kan miphun le Khrihfabu a del can hna i kilven zohkhenh um loin kan mah kut hna in kan miphun, Khrihfabu hna a hrawktu kan um sual ding hi phan a um tuk, Hibantuk ruahnak chung hin kan Pathian nih kan kilveng hram seh. Caangai nu bantuk ruahnak thinlung kan ngeih sual ahcun a rak kan dawtu kan miphun le kan khua kan ram Khrihfabu hna nih an kan thuh tak lai a donghnak ah mah hngal lo phun ah kan i chuah lai ti phan a um ngaingai.

Cun a nu nunning phunkhat rih cu a fa le an siar in an kal a hmuh tikah ‘ka fa le a siar in kal hlah u a ding tein kal u tiah’ a ti hna an ti. A mah a siar in a kal mi phun a si a hngal lo a fa le tu a hmuh hna i a mawhchiat hna. Mah hngal lo phun a si kan ti lai cu. Ka kal ning bantuk in an kal ti thei sehlaw hitin a ti hna hnga lo. A chim mi bang in zohchun awk ah a tlak lo mi a si.

Zumtu hna kan caah zoh chun awk i a tlak ngai mi nunning a kan cawnpiak tu cu kan Bawipa Khrih Jesuh a si. A mah nih ka tuah ning in tuah u tiah a kan cawnpiak, Cucu dawtnak le nunning dawh le nunning tlamtling an si. “Nan caah i zohchun awk kan tuahpiak cang hna: nan ca i kan tuah bantuk khan nannih zong nih nan tuah ve awk a si. Jonh 13:15. Cubantuk mi si awkah cun Pathian nih an kawh hna cu a si; zeicahtiah Khrih hrimhrim nih nan caah khan a in cang i ka keneh zul hna seh tiah i zohchun awk an chiahpiak cang hna 1Pet 2:21” Kan zohchun ding pasal tha cu Khrih a si.

Zumtu hna nih cun ka tuah ningtein tuah ve uh tiah midang kan cawnpiak ding kan si. Ka chimning in tuah u law ka tuah ning in tuah hlah u tiah minih an chim theu, hihi cu Khrih cawnpiak nak le zumtu nunnig he a ralkah mi an si caah kan nih cu kan mah nih kan tuah mi bantuk in midang a forhtu le a cawnpiak tu kan si awk a si. Mithiang paul i cawnpiak nak zawng ah hihi a chim mi a si ve.” Cucaah cun kei zong nih Khrih nawl ka cawn bantukin nannih zong nih ka nawl ka cawn ve u 1Kor11:1.” tiah a ti.

Caangai pa nunning cu kan miphun le Khrihfabu caah cun cawnawk le nunpi awk ah a tha ngai. Hibantuk pasal tha le nusal tha tampi in kan ngeih khawhnak lai thlacam cio hna usih. A si nain Caangai nu nunning bantuk phun cu kan miphun lak le Khrihfabu lakah a ngeimi kan um sualnak hnga lo kan Biakmi kan Pathian nih kan veng hram seh.

Cangai nun hmangin Pathian bia a hrawm mi carel tu dihlak cungah kan Pathian nih a thupmi fimnak le theihfian, hngalhnak thar in pe hram hna seh. Ca reltu nun ram ah hngalhnak thar le Kan Bawipa Khrih i a kan dawtnak le a nunning i cawn nak ah thathnemnak a um a si ah cun Bawipa Khrih tu nih sunparnak co ko seh.

A delthawmmi le santlai lo hna caah nunnak a pe siangtu kan Bawipa Khrih Jesuh khamhnak , Fapa dawt siangte in a kan petu kan Pa Pathian dawtnak le nifatin nunnak ah nunzia cawnpiak thiamtu Thiangthlarau hna ngam lam hruai deihnak cu Caangai nun hmang in nunchang a hrawm mi vial te cungah a zungzal hmun camcin ko seh.

Khrihsal,

Hrang Kam Zathang

Indaina

No comments: