Thawngzamh thawk lai ah "Ahme ram Laitlang" an sak lio.
CNF nih kum 23 tluk dothlennak a tuah hnu ah Lairam khualipi Hakha khua ah Kawl cozah he kahngolnak min an thut. Mah kong he pehtlai in kan hnu zarhte ni zanlei suimilam paruk ah khan Indianapolis mipi sin ah thawngzamhnak an tuah. Thawngzamhnak cu Indianapolis khua i Chin Centre ah an tuah. Kawl cozah he kahngolhnak minthut ah a telmi, Dr.Salai Ngun Cung Lian le CNF Lakhruak Meting a kaimi le CNF ralkap hna he ton biaruahnak a ngeimi, Salai Thla Hei hna nih CNF le Kawl cozah kahngolhnak le atu lio CNF dirhmun fianternak an tuah.
Salai Daniel Sakhong nih biakamnak a tuah lio
CNF CEC chungtel Salai Daniel Sakhong nih caantlaitu a tuan. Salai Daniel Sakhong cu tutan CNF lakhruak meting ah CEC chungtel ah thim a si caah CNF biaceihtu hmai ah CNF thantaar i tlaih in biakamnak a tuah. Thawngzamhnak cu vawleicung khuazakip zoh khawh dingah LIVE STREAMING in an thlah i, USA, Canada, Korea, Japan, Australia, Norway, Denmark, Sweden, England, Malaysia le Singapore, India le New Zealnd in minung 300 tluk nih internet online in an zoh hna. Biahaltu, bialettu an thiam caah milung a la ngaingai.
Rev. Thawngling Hmualhlun nih tha a cam lio
Hramthawknak cu Rev. Thawngling Mualhlun thlacamnak in an thawk. Pu Thlasui Tluangneh nih hruainak in "Ahme ram Laitlang" timi hla an sak. Thawngzamhnak a dih hnu ah mipi lei in biahalnak an tuah i, Dr.Salai Ngun Cung Lian le Salai Thal Hei nih an leh hna.
CNF Supreme Council Meting cu a ra laimi February thla chungah Washington D.C khua ah hlunghlai ngai in tuah an timh tiah thawngpang a leng. Mah metingah Washington D.C khuanu khuapa hna he tonnak zong an ngei lai tiah thawng thang, mipi he tonnak cu vawleicung Laimi vialte zoh khawh dingin LIVE in an thlah ve lai tiah thawngpang a len lio te a si. Cnih mphun chungin anih anih timi vialte an tlin lai caah tutan CNF Supreme Council meting cu Chin miphun tuanbia ah roling taktak a si lai tiah an chim len cang.
Aung San Suu Kyi le US Senator Pawl Tonnak
US Senator John McCain le Joseph Lieberman cu Kawlram ah kan hnuzarh ah khan an rak tlawng i, Rangoon ah Aung San Suu Kyi he tonnak an ngei. Mah tonnak ah US nih kawlram sipuazi a phihmi zeitindah kan phoih lai timi kong biapi bik in an ceih. US nih Aung San Suu Kyi lungtlinnak lawng in sipuazi an phihmi hi phoih an timh. Ralkap cozah nih ramrian tuan ruangah thongtla a tangmi vialte chuah ding, caan karlak thimnak ah dingte le thiangte in tuah ding. Tlangcung mi hna he daihnak serding. Mah an tuah hnu lawng ah sipuazi phihmi vialte kan phoih lai an ti. Kawl cozah nih cun US le Nitlak lei ram hna nih an duhning in thil kan tuah dih cang caah anmah lei tuah ding lawng a tang cang tiah ramhun Thein Sein nih Washington Post he ton biaruahnak an tuahmi ah a chim ve.
John McCain le Tura Shwe Man Tonnak
Pyituh Hluatdaw Hotu Tura Shwe Man cu US Senate le Congress riantuanning va kherhhlai dingah an sawm. John McCain le Joe Liberman cu an pahnih tein US ramhun a rak i cuh balmi an si. John McCain cu thla riat chungah kawlram a voihnihnak a tlawm a si.
Senator Mitch McConnell le Aung San Suu Kyi
US Senator vialte lakah Mitch McConnell cu Kawlram kong a tuaktan cemtu le Kawlram kongah a au bikmi a si. A luancia mi zarh hnih lio ah khan Kawlram a rak tlawng i, Aung San Suu Kyi he Aung San Suu Kyi inn ah tonnak an ngei.
Thawngzamhnak zong an tuah. Hlan lio tein Kawlram luh a duh nain ralkap cozah nih luhnak visa an pek duh lo caah a rak ra kho lomi a si. Kawlram sipuazi phihnak le UNSC ah Kawlram tazacuai ding tiang in ralkap cozah that lonak US cozah sin ah fakpi in a aupi tu a si. Ralkap cozah nih tlangcungmi hna a kahnak, nuhrin cozah vialte a hrawhnak, mithah lainawnnak kongah ralkap cozah sualnak a phung cemtu a si.
88 Chanchuak Siangakchia le Aung San Suu Kyi Tonnak
Kum 20 renglo hmun khat ah tonnak an ngeih lo hnu ah nizan ah khan a voikhatnak tonnak cu Aung San Suu Kyi inn ah an tuah.
88 Chanchuak Sianghleirun Siangakchia hruaitu Min Ko Naing, Ko Ko Kyi, Htey Kywe, Ko Anh Phwe Kyaw, Ko Jimm, Ko Pone Cho, Ko Aung Thu, Ko Mya Aye le Ko Padhat Tun hna an i tel. Tutan tonnak ah Aung San Suu Kyi le 88 chanchuak hruaitu vialte Kawlram tlennak caah hmun khat teah riantuanti dingah hnatlaknak an ngei. Ralkap cozah nih Aung San Suu Kyi le 88 chanchuak siangakchia pawl hi an ttih bikmi hna an si i, hlan ahcun hmun khat ah an thlah tti bal hna lo, tutan hi a voikhatnak hmun khat teah an thlah hna a si. Aung San Suu Kyi chan a lim cun 88 chanchuak siangakchia hna nih Kawlram an hruai te lai tiah an chim pah lengmang cang.
General Hlun Khin Ngunt Cu Lahkha US$ 5000 A Ei Lai
General Khin Ngunt cu a kawipa, Zekabar U Khin Shwe nih Myayeikngo Foundation i ruahnak petu dingah rian a pek i, thla khat ah US$ 5000 a pek lai ti a si. Zekabar U Khin Shwe cu Khin Ngunt a bawi lio ah cozah contract a phunphun a tlaitu a si i, ralkap cozah bawi pawl phaisa a thlite in a kengtu zong a si tiah an puhmi a si.
Khin Shwe cu Kawlram mirum bik pathum lak ah a telmi a si. U Tay Zar, U Khin Shwe le U Zaw Zaw cu ralkap cozah he pehtlaih ruangah mirum ah a chuahmi an si. Ramdang ah amah min in ralkap cozah nih an herhmi hriamnam, thilri dangdang he an herhhai vialte a zalh piaktu hna an si. Thla khat ah US$ 5000 lengmang Khin Ngunt a pekmi dingmi cu U Khin Shwe min in Khin Ngunt phaisa Singapore Bank ah a chiahmi a si lai tiah an zumh.
Careltu le hmanthlak zohtu nan dihlak cungah ka lawm. Caan kan ngeih tik ah kan peh than te lai. Gmial a hmangmi pawl nih cun hmanthlak pawl fiang in nan zoh kho lai lo. Yahoo ah account rak i tuah ulaw a tha bik.
Lunglawmhnak ca a tialmi nan dihlak cungah ka lawmhnak ka chim ve. Nanmah thapeknak thawng in van tenhmi a si. Tlamtlin lonak tete um aikun, a ruahzia ka thiam hriam u.
Nan dihlak siaherhnak le upathak he,
Salai Lairamthang
( Sungsung pa )
Wahsington D.C
USA
Source:: yccf-international@yahoogroups.com
Source:: yccf-international@yahoogroups.com
