2010 Report (CDAC)

Chin Disciplinary Action Committee (CDAC)

3B,Jalan. Khoo Teik Ee, Off Jalan Imbi

55100,Kuala Lumpur.

2010 Report (CDAC)

Biahmaithi

A masa bik ah akan umpi pengtu Pathian a min kan thangthat.Malaysia ram ah kan chin miphun aphan mi hna nunzia dawhnak ding caah le him te in kan um khawhnak ding caah CDAC nih kanmah le kan ti khawhtawk tiang in pumpek rian kan tuannak ah palhsualnak kan ngeihmi a um ahcun Bawikhrih min in ngeihthim kan in hal hna.

CDAC rian kan tuannak nihhin kan miphun caah thiltha tampi a chuahter i pumpak minung zongnih sualnak chungin an i chuahphah i thatnak lam an zul,CDAC riantuannak thawng in Malaysia mipi hna le kanmah bantuk Refugee a si ve mi miphun danghna sin zongah mithmaitha kan hmu,cu caah CDAC riantuan nak hi Malaysia ram ah chin miphun kanum chungpoh cu kan thawnter chin lengmang a herh, chin miphun a si mi pohpoh nih kan miphun kandawt ahcun CDAC riantuan nakhi thazang pe u sih law lungrual te in tuanti hna u sih.

CDAC lungput le riantuannak

CDAC pumpak cio nih CDAC rian kantuan tikah kan miphun caah santleihnak tlawmte tal ka ngei ve hnga maw tiin miphun dawtnak thinlung he an caan le an chawva an ruahnak an thazang an peknak a si.CDAC nihcun sualnak pohpoh kha adoh i a sual mikha sualti lo dingin a cawnpiak hna i a chimhhrin hna,a ral mihna le a si vel mihna lakkar ah remnak a ser,harsatnak a tong mihna kha a bomhkhawhtawk a bomh hna,miphun dang hnanih namnehnak ankan ngeihtik ah kan miphun an dirhkamh,anmah caah si lo in midang caah rian an tuan,miphun caah thatnak a chuahding a si ahcun thangchiatnak le harnak kha a ing i miphun hmaiah raltha ngai in a kal.

Pehtleihnak le riantun ti nak

CDAC le CCF

CDAC le CCF cu chungkharkhat bantuk in hmunkhat te ah rian kantuan,Pathian sinah thla an kan campiak i minung lei in ruahnak zong tampi ankan cheuh,CDAC nih rian kantuan khawhnak ding caah thlakhat ah Rm 500 akan bomh,CCF cungah kan i lomhnak hi chimcawk lo a si,Pathian nih CCF cu thluachuah pe chin ko seh .

CDAC le CRC

CDAC le CRC cu unau chuakti bantuk in hmunkhat te ah rian kantuan.kan herh kanbau nakpoh ah ankan dirpi i ankan bomh,thlakhat ah Rm 300 le CDAC card hi ankan tuahpiak,thazang in siseh ruahnak in siseh ankan bomh,Pathian nih kan miphun caah hmang chin ko hna seh.

CDAC le ACR

CDAC le ACR hmunkhat ah kanthu i CDAC riantuannak a thawn deuhnak ding caah a lamkip in ankan dir pi,thazang an kan pek CDAC nih tuanti u sih a ti mipoh ah ankan bomh,Pathian nih kan miphun caah hmangchin ko hna seh.

CDAC le CSO

CDAC le CSO hi rian thate in kan tuan ti,CSO nih media lei in ankan bomh,cachuah kan herh mi le kan thawngpang hi seihnam ah ankan tialpiak,ruahnak le thazang zong in ankan dir pi,Pathian nih thluachaunak pe chin ko hna seh.

CDAC le Pengtlang riantuan tu pehtleihnak.

CDAC le Pengtlang kip hi pehtleihnak kanngei dih,CDAC chungah a tel mihna pengtlang hna cu HPH,TPF,Zophei,Lautu,Zotung,Mizo,Matupi,Mindat,Dai,Mara,Senthang,Mi e,FRO,Hriphi mah vial hi CDAC chung tel kan si dih,Pathian nih pengtlang kip cungah thluachuahnak pe ko hna seh

CDAC le UNHCR

CDAC le UNHCR hi riantuan ti khat bantuk kan si,an kan dirhkamh i anmah zongnih CDAC hi an kan bochan ngai,CDAC cu Refugee,A cozah le UNHCR lakkar ah hlei bantuk nan si ankan ti,UNHCR nih trainng ankan pekPathian nih an riantuannak ah thluachuah nak pe chin ko hna seh.

CDAC le Police

CDAC le Police hi kan i peh tleihnak hi a fek ngaingai cang,zeitik hmanhah harnak ankan pe bal lo pin ah bomhnak kan halhna ahhin ankan bomh zungzal,CDAC cu rian akan bawm tu nan si ankan ti,kan i bochan taktak hna.Pathian nih thluachuahnak pe chin ko hna seh.

CDAC le Mipi

CDAC le mipi hi kantang ti,CDAC cu mipi sal kan si,mipi nih ankan bochan,Buainak a um poh ah ankan ouh,CDAC cu a tihzong an kan tih,khuakip i chimh angai lo mihna hi CDAC sinah anrak chuahpi hna,CDAC um lo ahcun Malaysia cu kan si kho lo an ti.pakhat hnih nihcun a rem lo mi anum khomen ko,Kan mipi pumpak cio cungah Pathian thlauchuahnak um ko seh.

CDAC le pumpak pehtleihnak

CDAC riantuan nak thate in a theithiam i kan konglam a kanhlat i kan zungah thazang a rak kan pe tu hna le thlacamnak in siseh chawva in siseh a rak kanbawm tu hna anum,Dr, Chum Awi,Pastor Cung Cin,Rev,Za Fet,Pi Sui Cin,Pu Tawk Thang,Sayamah Sui Phir,Rev Re Ce,Rev Sai Fung,Pastor Mang Lian Sang,Peter Ngai Dam,Pu Jhon Kham,Pu Bawi Lian,Pu Van Lian Chawn,Rev Lal Pek Lian,Rev Za Thang,Rev,Sa Hu Rev Tuan Cung,Saya Kap Pum Thang Rev Harm Cung Hnin,Pu Lal Siam Mawi hna hi an si,an cungah kan i lawm Pathian nih thlauchuahnak pe chin ko hna seh.

CDAC Member le riantuannak hmunhma

CDAC member hi minung 320 kan si Block (18) ah commitee kan ngei,block (18) ahhin mipi hi 25,000 tluk umnak ah rian kan tuan.

2010 chung CDAC nih chimhhrin mi le cawnpiak mi hna.(2010 February to 2011 March)

Remarks

1. Zuri hnahnok kan chimhhrin mi 380 an si
2. Nu lepa kar lak biaceih piak mi 21 an si
3. Tleihhrem case 7 an si
4. Mithat lai nawng mi 2 an si
5. Namte a chun mi 4 an si
6. Mifir kan tleih mi 13 an si
7. Sitha lo a hmang mi chimhhrin mi 6 an si
8. Nu tha lo chimhrin mi 5 an si
9. Hngakchia nu lepa chimkhawh lo mi 8 an si
10. CDAC nih Zohkhenh mi 17 an si
11. Kawlpa a vami hi minung 160 hi kantheih khawhtawk an si.
12. Sitha lo a zu mi hi minung 27 hi kan theihkhawhtawk an si.
13. Zunih a hruh ter mi hna hi minung 34 hi kan theihkhawhtawk an si.

Malaysia ah a ummi hna kan miphun kilvennak ding caah i bawm cio hna u sih.

Lal Siam Mawi

Chairman

CDAC

Malaysia

Source::Metkhuabo@yahoogroups.com

US Zong An Mah Nih An Sermi Nuclear Kongah An Lungre A Thei

Vawleicung ah a rum bikmi ram le a fim bikmi ram ah kan ruahmi US zong anmah nih an sermi lila thil ruang ah an lung re a thei i cheu khat cu an umnak hmun ah an i zuam ve ti lo. Vuleicung thilri hna hi cu, kanmah nih kan sermi lila hi kan caah tihnung ral a rak si ko hna.Japan ah Nuclear sehzung a rawh bantuk in USA Nuclear sehzung hi rawk ve sehlaw US cozah nih a mipi pawl hi a kan chanh manh hnga maw? timi hi USA ah mifim pawl an biahalnak a si cang.

US ram ahhin Nuclear sehzung hi 25 a um. Nuclear sehzung cu khuapi chung in meng 25 hrawng a hlatnak ah an chiah. A pawmkam ah khuapi hna i minung 100,000 leng an umnak khuapi pawl an si hna.A dang khuapi 98 hi meng 50 a hlatnak ah an um. Cheu khat cu a naih deuh ah a ummi khuapi zong an um.McGuire timi Nuclear sehzung hi Charlotte, North Carolina in meng 15 a hlatnak ah a um. Ginna Plan Nuclear sehzung hi Rochester le New York in meng 17 a hlatnak ah a um. Fort Calhoun Nuclear sehzung hi Omha, Nebrasaka in meng 18 a hlatnak ah aum. Turkey Point Sehzung hi Miami in meng 25 a hlatnak ah a um ve.

US ram chung ah minung tam bik an umnak pawng ah a ummi ( The Plants) Nuclear Sehzung cu "Entergy's Indian Point Energy Center" an ti i Buchanan, New York ah aum. A dang sehzung pa hnih hi New York in meng 25 a hlatnak ah an um. Mah nuclear sehzung in meng 10 chung ah minung 310,000 khuasa an um. Meng 50 a hlatnak chung ahhin 20 millions khuasa an um.Japan bantuk in Nuclear sector ( Sehzung) hi rawk sual sehlaw meng 50 chung ah a ummi 21 millions minung hi zei ti hmanh in kan chanh khawh dih manh hna lai lo tiah Nita Lowey nih a chim.A bik in Indian Point sezung pawng ah a ummi hna hi harnak an ton khun lai tiah an ti. Indian Point sezung in meng 10 kaukap ah a ummi hna cu sehzung hna rawk sual pingpang sehlaw tiah zam tak ning zong an chimh hna. Cucaah, Japan bantuk in Nuclear accident hi um pingpang sual sehlaw, zeitindah mipi ralrinnak kan pek hna lai i zeitindah mipi pawl hi him tein meng sehzung in meng 50 kaukap ah a ummi hi kan chanhmanh hna lai timi cu biatak tein an i ruah lio a si cang. CC: CNN

Note:::: Hika Link Click law Enter your address or ZIP code: tangah khan na ZIP Code ah cun Nuclear sehzung pawng meng zeizat a hlatnak ah dah na um kha fiang tein an chim lai.

Pathian Mithmai Zoh Nun

Pathian Mithmai zoh nun

Sam. 5:3 “Zinglei ah ka aw kha na ka theihpiak: nichuak kate ah na sinah thla ka cam tawn i na ka lehnak kha ka hngah tawn”

Nihoipar(Sun-flower –Neciapan) hi zingka tein ni achuahnak lei a hoi peng i nitlak tiang, cu caah kannih lai in cun nihoipar ti a si.

1996 kum, thal ah ka pa he kan khua (Cia-inn) ah Nihoipar (sun-flower—Neciapan) dum kan tuah. Kan dum cu a ţha tuk lem lo. Pakhat pahnih a ţha mi te ka zoh tikah: zingka tein cun nichuah lei bak ah khin an hoi an cuanh dih. Par dang nak in aa dawh khun nak cu ‘aa rual tein nichuah lei ah an hoi dih’ nak hi a si.

Kan nunnak ah khuadei ka in Pathian mithmai zoh te in kan nun ah cun kannun hi duh a nung mi nun, hawidang nak in aa dawh deuh mi nun kan ngei lai ti hi hi par nih a kan cawn piak. Ka hoi pa saya Sum nih “nangmah ni zakhat na tuah tuan mi nak cun, Pathian nih minit pakhat a tuah mi kha santlai ţhahnem deuh a si lai, cucaah zingka na thawh kaa ah hin zeitluk na ca a tam, tuah ţuan ding tam na ngei zongah Pathian sin khukbil thlacam i amah he bia i ruah hmasa hi cu philh hrim hla” a ka ti. A hman ngaingai ka ti! Pathian nih hin kan thazang, kan fimnak, kan thiam nak le thil kan tuah khawh nak hi a herh mi si lo. Kan thinlung kan pek mi le amah mithmai kan zoh hmasa mi tu kha a duh mi si, cu hnu ah kan tlam a tling lai, kan hlawh a tling lai. Nihin ah Pathian rian kan tuan kan ti nak ah Amah Pathian he bia i ruah, thlacam can pek hna hi kan philh kan huam lo can hna a um kho men. Zeitluk kan rian a tam zong ah Pathian mithmai zoh hmasa, kawl hmasa, chawnh hmasa hi i zuam hna uh sih! Devotion kan tuah mi zong hi i hnawh hlah uh sih. Zingka tein thlacam hi dai thlang hlah uh sih!

David Siangpahrang nih cun, “Zinglei ah ka aw kha na ka theihpiak: nichuak kate ah na sinah thla ka cam tawn i na ka lehnak kha ka hngah tawn” a ti. Kan nih teh amah ban tuk in Pathian kan duh maw, kan kawl maw, Amithmai kan zoh hmasa maw, kan hngak maw?

Jesuh nih ‘a ngan bik si a duh mi nih cun a hme bik kha a tuah lai’ a ti. Cun zultu hna i ke zong amah bak nih a ţawl piak hna (John 13:1-17). Nihoipar cu a thei fang a ţha deuhdeuh si le tang ah a kun deuhdeuh ve. Hinih hin kan rum deuh, kan fim deuh, kan ţhat deuhdeuh ahcun mi taang ah i dor ding Khrihfa nun kha a kan cawn piak. Pathian mithmai zoh nun nih cun keimah ka tuah khawh, keimah ka ti khawh ti mi hi a chim ti lo, amah ah i uahpi ding hrimhrim pakhat hmanh a hmu ti lo, zeicahtiah cun zeizong vialte kha Pathian thawng longlong in a tuah khawh mi si i Pathian min sunparnak pek ding long kha a ruah mi le a tuah mi a si cang.

Pathian mithmai zoh nun a ngei mi si hram ko uh, Bawipa nih thluachuah in pe ko hna seh!

PaHniang

Manila, Philippines

Arab Pawl Dothlennak Cuan Tuah Usih!

Tunisia le Egypt ram mipi nih zaang ennak-tello mipi cozah doh-alnak “nonviolence civil disobedience” hmangin cozah dothlennak an tuahmi ah hlawhtlinnak an hmuh bantuk in Libyan pawl tah an hlawh a tling ve lai maw? Nihin Arab mipi pawl nih dothlennak an tuah cuahmahmi hi cu mi tampi thinlung ah an um i, Libyan mipi zong nih teinak hmu ve hna seh ti duhpiak cio an si. Libya dih cun, Bahrain le Yemen von i thleng ve hna sehlaw, cun… Saudi Arabia hmanh khi zauk phung uknak ti lengmangmi “democracy” uknak phung dothlennak mei-alh nih hei kangh ve hna seh ti an duhpiak cio hna.

Mah duhsalam mihrem uknak phung aa tlaihmi Arab Muslim bawiziik pawl an bawi tthutnak cabuai in mipi nih hriamnam tel lo bakin, lamcung ah au in doh-alnak an tuahmi bantuk khin Kawlram mipi zong nih tuah ve hna sehlaw, hei i biatak deuh ahcun, hlawhtlinnak “an hmu ve ko lai,” “nan hmu ve ko lai,” “kan hmu ve ko lai” tiah Kawlram kong khuaruattu, miphundang experts pawl he, Kawlmi he Laimi he ruah cio dih asi. Pu Pualva zong nih Egypt ah mipi nih doh-alnak an tuahmi kong a kan theihter pah in Kawlram kan sining a rak cuaichun chih lengmang tikah, kan ram sining kha kan mitthlamte cun kan hei cuanter khawh deuh cio ve.

Tunisia le Egypt tthangthar mino pawl nih mak kho taktak in an cozah dothlennak an tuah tikah, non-violence doh-alnak ah pu bik ah ruahmi Pu Ganhdi min an char leen lo. Pu Ganhdi nih cutin a kan chimh, Pu Martin nih cutin a kan cawnpiak an ti lo. Facebook, Twitter le Mobile Phone hmangin uktu tthalo doh-al tti dingin an ipehtlai hna i, aa thawkmi asi tiah an ti. Serbian mino te pakhat nih Internet le cell phone hmangin mihrem uknak phung a doh ngammi nih thazaang tthawnnak a pek hna ti si. Asinain, ttha tein an hun kherhlai tikah, Arab mino hna nihhin American Cathiam pa Gene Sharp (kum 83) nih a rak ttialmi The Politics of Nonviolence Action timi a cauk chungah a telhmi ningcang tuahning “methods” fung 198 a ttialmi chung khan biatak tein doh-al ningcang an i laak tiah an ti. Gene Sharp cattialmi pakhat Laiholh zongin Kam Lo timi (si ko rua ka ti) nih a lehmi a um ve cang!

Tunisia le Egypt nihcun “nonviolence civil revolution” in cohzah an doh tikah zohdawh ngai in an hlawh a tling nain, Libya tu ah cun, cozah nih hriamnam phunphun hmangin raltuk bakin chimh dih a timh hna tikah, “non-violence” lawngin doh-alnak nih a nguh hna lo i, teinak tiang hmuh khawhnak dingah cun, zeidah “kenreet” ichiahmi ngeih asi siloah, lenglei in bawmhnak a um lai maw, hriamnam in tah a rak dohmi an um ve lai maw timi ruahnak phun khat a pek hna.

Atu liote hi BBC le VOA tbk ah Arab pawl daan icawn ve dingin Kawl pawl heh tiah bia an iruah lio asi ve. Blog ah zeidah kan ttial, Face Book ah zei kong dah kan iruah tbk an iceih cuahmah! Arab pawl bantuk in Kawl mino pawl an ralttha hna seh ti an duh. Kawlram mi bloggers pawl le Face Book a hmangmi hna vialte, twitter a hmangmi tbk Internet in Social Network ipehtlaihnak ah santlai ngai in ram thlennak ah hmang kho han seh ti an duh.

Ramchung le ramleng ummi hna nih thawngpang hei ipeknak lawng si loin, ning ngei in rianttuantti khawhnak le rampi dothlennak ah ihrawmnak ah hmang kho ve seh ti an duh.

Zeitindah nan ruah cio? Kawlram nih Arab pawl model icawn awk a ttha lai maw? Aung San Suu Kyi nihtah zeitindah a ruah ve hnga?

Atu lio bantuk caan ah Kawlram dothlennak ah rian a ttuanmi hna nih heh tiah mipi sinah ca ttial awk asi. A bikin Pu Lian Hmung Sakhong tbk le Elaisah Vanhnie tbk pawl nih heh tiah mipi sinah fimnak le cawnpiaknak ca tehna an thlah leen awk asi ka ti. Nihin Laimi kan caah cun, e-group (a sawhsawhte a lo nain) hi hmual a ngei bikmi asi rih ko lai tiah ka zumh. BBC le VOA in aumi nak hmanhin hmual ngeih deuh dawh asi! Hehe…capo biatak!

Upatnak he,

Ceupi

Source::YCCF-International@yahoogroups.com

Kawlram Cozah Thar Biakamnak An Tuah

Tuchun March 30, 2011 Pyidaungsu hlutdaw meting an tuahmi ah cozah thar cu biakamnak an tuah cang. Hluatdaw meting cu zing sml 11:00am in an thawk i minit 15 a rauh hnuah president thar U Thein Sein nih biakamnak cu a tuah. Vunci dangdang hna zong biakamnak an tuah cio. Cun biaceih bawi, sihni bawi le tangka chektu hna zong hmun khat ah biakamnak an tuah.

Cun State Peace and Development Council (SPDC) nih phung sernak nawl, uknak nawl le biaceihnak nawl pek an sinak le SPDC an hrawhnak thawng an hun thanh. SPDC tang i a ummi state le division uknak, peng, khua le sang uknak Peace and Development Council zong hrawh dih an si.Sihmanhsehlaw atubantuk SPDC an hrawhmi le uknak chanhnak ah Senior General Than Shwe cu a ra lo.Cun president thar nih ram zeitin kan hruai lai timi biachimnak zong a ngeih i cu lakah ralkap uktu ralbawi zong a thar thlen a sinak hluatdaw ah a hun chim chih.President thar biachimmi ah cun chawlehthal lei ah lei le sehlei thancho ter ding le rampi kilkamhnak dingah ralkap bu thawn ter ding, ramdang bantuk in thawnnak ngeih ding caah rammi paoh nih ralkap ah luh cio ding timi a chim.

Cun ramkong he pehtlai in 2008 phunghrampi a duh lomi ramchung ram leng bu hna nih phunghram remh nan duh ah cun phungphai he aa tlak ningin remh i zuam u. Phungphai he aa tlak in remh a si nakah phungphai he a kalh ahcun hnonpiak a si fawn lai. Chan he a tlak mi phungphai, fimcawnnak, ngandamnak, chawlehhrawlnak zongah a chambau mi phungphai hna cu kan remh lai tiah a chim fawn.Sihmanhsehlaw ralkap uktu thar thlenmi ah cun an min langh ter an si lo. An dirhmun lawng chim an si.Cozah thar cu dirh a si ko nain ralkap cozah uknak i uktu ah aa telmi minung thiamthiam nih tam u cu hmunhma an lak than.Pyidawngsu hlutdaw tel in hlutdaw dangdang hna zong thaizing in cun meting ngol a si cang lai caah anmah le khua cio ah thaizing cun an kir cang lai.Ref:VOA

Source::Minmeizam.Blogsport

Lungsi Hnangam Tein Um Le Ngeihmi Thil Hmuh Thiam

Filipi 4:12: “lungsi hnangam tein um kha ka thiam cang”

Pakhat pa nih laitlang i minung rak si nak cha cun, US i uico rak si hmanh ka duh deuh a ti, an ti. Ram thangcho nak i um hi mivanţha tinak maw asi? Mivanţha kan ti mi hi zeikhidah kan zoh tiah bia hal nak um seh law kan chim mi aa dang cio ko lai. Asinain, Pathian a zum, khamh aa fiang i zumhnak he a kal mi pa/nu cu mi van ţha asi. Khrihfa mi nih cun mivantha le mivanchia kan tah nak zong hi bible a kan cawmpiak ning in kan tah awk a si. Lai khuate lei um mi internet le computer zong thei lo mi, Pathian a zum i aa bochan tuk mi, zumhnak he a kal mi pa kha, “mivanchia” kan ti kho lai maw? Ti kho hlah! khuapi le ram thangcho i um mi – motor, phone, internet tbt..in um i rian tuan peng, Pathian thang ţhat le pumh zong ngei kho ti lo, thei ti lo in um kha teh mivantha kan ti lai maw? A si hoi lo!

Voikhat ah mirumpa nih a fapa kha misifak hna um nak lei ah a kal pi i, ‘mirum innchungkhar in a rak chuah hi zeitluk dah mi van ţha a si nak’ kha theihter le piah a duh. Misifak um nak lei cu an phan i, a pa nih cun a fapa cu bia a hal:

Apa: : ka fapa, zeitindah, na hmuh ton ning (lesson na ngah mi) rak ka chim tuah.

Afapa: : uico pakhat kan ngei, an nih pali an ngei.

Tikholhnak tili (swimming pool) kan ngei, an nih tiva tampi an ngei.

Meiinn (lanterns) kan ngei, an nih arfi le thlapa an ngei.

Kan nih rawl kan cawk, an nih an cin mi te an ei (cawk hau lo)

Kan inn himnakah hruang kan kulh, an nih hawikom nih an kulh hna

Encyclopedia kan ngei, an nih Bible long an ngei an rel i an hna a ngam tuk

a ti, ti si. Apa nih aa ruahchan mi bantuk in a rak hmu ti lo. Nihin ah hi fapa te nih thil a hmunh ban tukin hmuh thiam kan herh ngaingai.

Kan ngeih lo mi longte kan zoh ah cun kan hna a ngam kho hrim lai lo. Mi kan hngar lai i, kan lungre a thei lai. Ngeih mi thil zong hi hmuh thiam i Pathian tu kha kan thangthat peng awk a si. Cucaah, khuate um mi si uh sih, khuapi um mi si uh sih kan vanchiatnak le kan vanthatnak kha kan umnak hmunhma, kan tuahtuan mi le kan ngeih mi kan hman mi thil ri in tah hrim hna hlah uh sih. Pathian kan thei lo i, kan zum lo, a bia kan nunpi lo ah cun khuate zong ah, khuapi le ramthangcho zong ah mivanchia cu kan si ko lai. A hohmanh nih a hopaoh kha a zawmhtlaih awk asi lo, Pathian nih a kan dawt dih! Pathian tu kha dawt le, a bia nunpi i tinh peng i ngeih mi thil hmuh thiam le lungsi hnangam tein um kha a kan duh piak mi asi i, mivantha cu kan si.

Philipi 4:12 “Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh,tam tuk ka ngeih ah siseh, tlawm tuk ka ngeih ah siseh,lungsi hnangam tein um kha ka thiam cang”

PaHniang

Manila, Philippines

////////////////////////////////

"Libya Ram Buainak Le Qaddafi Kong"

Hi pa hi, kum 40reng lo ram le mipi phaisa a ei, ai khon caah a rumbak ve. Ramkip ah phaisa ai chiah, hmunkip chawlehnak ah Sharer tampi a nei fawn. Bianabia ah Inter Milan FC khi amah nih 7% a ngeih. Norway Bank ah 2billion a ngeih, ram dang tampi ah a ngeih rih.

Dictator ciocio ah, amah thengte an tuk le an tlaangtlaakmi himeiti/zinaan ruangah a sibik ko tiah expert tampi nih an chim hrim. Asinain, Iraq kha an tuk i Zinaan ruah ah a si ko, an ti nain Zinaan in an hmuhmi maw tamdeuh ral an tuknak i an sunghmi dah? tiah bia halnak a um fawn. Cu bantuk in Zinaan ruangah an tuk ti khi si ko seh law, ram tampi i fonh in an tukmi a si i hi ral nih tampi sungh zatlaak a chuah pi tthan ko lai, tiah an ruah rih. Abianaah, atu raltuknak vanglawng jet-fly pakhat nih suimilam pakhat chung van i zuan man khi kroner in 50,000 a dih. Dollar 1 ah Kroner 6 in hei tuak...

Cun, hi raltuk nak ding ah USA nih commando/ttuanvo a la duh lo. Mizei nih a lak lai tihi nizan tiangah hngal a si lo i Strategy ai tello mi raltuknak a si tiah, an sawisel fawn. Tuni tu ahcun, NATO nih hi Operation caah ttanvo lak ding in USA, UK le France cu an lungtling cang i NATO nih ttuanvo a lak hnik tiah Guardian nih chim. Gadafi tlaih/thah duh ah atu bantuk in ralkap thazaang in Libya ah kan luhmi a silo, mipi kham ruah ah a si bik ko, tiah NATO siseh UN nih an chim peng rih.

Hi lio ah, NATO chungtel a simi Germany le Turkey nih hi bantuk operation cu an hna tlaakpi lo. Tel an i tim lo. Hi operation hi caan saupi a kal te lai, tiah an ruah cio. Norway zong NATO chungtel sinak in le UN chungtel sinak in vaanglawng 6 le minung 100 in an itel ve. (hmanthlak na zoh khawh cun, Norway jetfly a si.)

Tu bantuk caante hi, caan rem ah ser in Israel le Gaza an i phomh ve. Cawnni hnihni ah Israel nih Gaza a kah i mi an thi, hma an pu. Jerusalem ah nihin Bomb a puak hoi i bus pakhat chung minung an thi tthan. Cu ve bantuk in, Kawlram zong, Than Swe le a naule nih tlangcungmi an den cuahmah ve hna, caan rem laa in Nuclear siseh an thazaang an rak i serh. UN, NATO le internation org`s nih an zoh l o karte caan a rak la, an ti.

Tawite ttial kai tim nain, ka biasau sual.

Upatnak he

Bawi

Froland

Source:: YCCF-International@yahoogroups.com

Atulio Libya Ram Buainak Le Qaddafi Kong!

Colonel Qaddafi timi pa cu Libya ram kha kum 41 chung kan pu Pu Than Shwe cha in a uktu asi. September 1969 ah Than Shwe chain Libya uknak power cu hriamnam hmang in a rak lak i a tu tiang Libya ram cu a duh ning poah in auk. Libya ram hi vawlei tang in achuakmi oil atamtuknak hmun asi tik ah mah kha oil in khan vawlei chawva cu tam taktak kum fatin ahmu. Kum khat ah an rammi nih an hmuhmi hi minung pakhat ah $15000 tluk asi tiah world bank sin in hmuh asi i Chile, Mexico le Poland ram pawl nak in tamdeuh ahmu mi ram asi.Libya ram a uk le cangka in American ram hi a hua ngaimi asi i a bia le hla in American chiatnak hi achim peng.

1979 ah US Thanzung (Embassy) cu mei in an rak khangh nakin US nih Libya he pehtleihnak angeihmi arak phiat. Mah cun 1986 ah German ram Berlin ah bomh an rak hmanh i mah cu bomb nih cun US minung pahnih le German minung pakhat nunnak a rak lak. Mah cu thawng cu US nih avan theih tik ah a thin hung tuk i Libya khuahlipi asi mi hna Tripoli le Benghazi timi khua pahnih ah bomb a rak thlak bel. 1988 ah Pan Am Flight 103 tiah auhmi US vanlong cu bomb in arak tthuat ve tthan i minung 270 tluk nunnak a rak liam.

February 2011 ah Libya rammi hna nih Libya hmun zakip ah dohalnak tuah an thawk i mah ni cu Colonel Qaddafi uknak kan duh lo nak kan thinhannak kan langhter ni tiah an ti. February 21 ah UN General Secretary Ban Ki-moon le Hillary Rodham Clinton hna nih dohalnak atuahmi Libya mipi hna cu kap ti lo ding in nawlnak an tuah. February 22 ah Qaddafi nih cun thin hun buin “Keimah cu Libya tuanbia, dohnak, cozah thlennak, le luatnak hna atuah ka si” tiah achim."Caan tlawmpal aruah hlanah dohalnak atuahtu pawl cu kan tei colh hrimhrim hna lai" tizong achim chih.

February 25 ah an mah Muslim biakinn in dohalnak atuah tu minung thong tampi hna cu an rak chuak i Qaddafi cozah tthlaknak dingah an khuahlipi asimi Tripoli khua ah lamzawh aunak an tuah i mah a tuahtu pawl hna cu Qaddafi aralkap pawl hna nih meithal in an kah hna. Mah cu ti cun dohalnak atuahtu Libya mipi pawl cu kah hram athok thluahmah cang hna.March 4

ah Qaddafi cozah nih adohtu pawl he Zawiya timi khua cu icuh dingah faktak in atuk hna. Zawiya timi khua hi oil chuahnak khua tiah auhmi asi i mah kahdohnak ah cun a tlawmbik minung 35 nunnak aliam lai tiah theih asi.March 5 ah daite in Tripoli le Zawiyah khua I dohalnak atuahmi hna cu meithal in a kah hna pinah Zawiyah le Ras Lanuf timi khua pahnih hnu a mah adotu phu he an I cuh I an I kap. Atlawmbik minung 35 nunnak cu a liam lai tiah theih asi.March 7 ah aral pawl hna cu dohnak dingah raldohnak ttheng, Helicopters, raldohnak vanlong pawl hna ahman hna I faktak in aphomh hna. March 8 ah cu ti cun nichuah lei he nitlak lei he vanlong cung in a mipi pawl hna cu bomh he meithal he a nolh tthan hna. March 9 ah UN lei in no-fly zone tiah an auhmi hi ka zawn hmuh ah cun a ho vanlong hmanh azuang kho lo timi le a ho vanlong hmanh a chuak kho lo timi vanlong zuannak le chuaknak nawl phihnak tuah ding ah biaceihnak an ngei. Si hmanhsehlaw Qaddafi nih mah cu nawl cu ka zul lai lo tiah a chim ve.Nitlak rampawl nih kan ramchuak oil pawl hna an duhtuk caah doh an kan duh i asi tiah achim.

March 10 ah Qaddafi ralkap pawl nih a dotu pawl hna cu vanlong in le rocket in faktuk in a kah hna caah a dotu pawl nih an celh ti lo i Ras Lanuf khua cu an zaam tak. March 11 ah US nih Qaddafi cu a power ngeihnak in dawitthawl khawhnak dingah Steps panga tuahding zapi sinah theihternak an tuah. March 12 ah Arab League timi nih UN sinah No-flight zone tuah dingah nawlnak atuah March 14 ah Qaddafi ralkap nih nichuah lei khua asimi Ajdabiya cu bomh in a tthuat thluahmah lioah Zawiya khua dotu pawl hna cu a mah sin ah i surrender dingin afial hna. March 15 ah hin G-8 timi ram tthawng pawl biaceihnak an ngei nain no-flight zone kong he pehtlaiin hnatlaknak an ngei kho lo.

March 16 ah nichuah lei kam asi mi minung ting tampi umnak Benghazi khua pawng pawl hna cu bomh in hehtiah a phomh chih tthan hna. March 17-18 ah United Nations Security Council nih Libya mipi an humhimnak kilvennak ah Qaddafi cozah cu a herh ning paoh in phomh ve dingin nawlchahnak an tuah. Mah le cangka Libya cozah nih kahngolnak ka tuah lai tiah a phuan colh ve. US, Britain le France nih kahngolnak lawng aza lo na ralkap vialte na kirter hna lawng ah tiah an ti colh.March 19 ah zeitin dah Qaddafi hi dohnak kan tuah ning si lai timi biaceihnak Paris khua ah Bratain, French, African le Arab hruatu pawl an tuah. US nih Tripoli, Misurata le Surt khua pawl hna i Libya Qaddafi cozah nih an hriamnamchiahnak, an set-tuai-yi zung pawl hna cu Tomahawk timi raldohnak seh in a kah thluahmah ve. March 20 ah US le EU pawl hna nih an raldohnak tinbaw pawl hna le vanlong pawl hna cu Libya ah tam deuhdeuh in an kuat chinchin. Qaddafi nih a raldohnak hriamnam pawl hna a tongh khawh lo nak dingah tiin Benghazi khua i a hriamnam vialte cu an kah piak viar i a hriamnam vialte cu an puak viar. March 21 ah Qaddafi cozah nih US le EU pawl nih an kan tthuatnak nih mipi nunnak tampi a liamter tiah thanhnak an tuah colh. Asinain US le EU nih zei bantuk mipi hmanh kan that hna lo tiah an chim ve. (The New York Times chungin lakmi asi).

Kan peh tthan te lai.

Khah Mangttha rih kun uh!

Nan Hawi,

Kolatt

Syracuse University

New York

Source:: YCCF-International@yahoogroups.com

Asean Nih Visa Pakhat Lawng Ser Aa Tim

Asia nichuah thlanglei ram 10 komh Asean ram nih a tulio Eurupe ram bantuk khin ramdang khuatlawng mi pawl caah visa pakhat lawng chuah ve ding in timhtuahnak an ngei. “Visa pakhat ca lawng na sawk lai nain Asean ram vialte mah visa hin na tlawn dih khawh lai” tiah Asean chungtuan Eddy Krisneidi nih a chim. 2009 lio cazin ning ah ramdang khuawtlawng pawl hi sing 65, Asean ram ah an rak phaan i cu laak ahcun Malaysia hi a tam bik ramdang khualtlawng pawl an phanhnak ram a si. Cu khawh cun Thailand, Singapore, Indinesia, Vietnam, Phillippine, Cambodia, Laos, Myanmar le Brunei hna an si. Khualtlawng pawl thinlung a la mi hmun pawl cu Cambodia tupi chung i a ummi Angkor Wat biakinn, Indonesiaram Bali rili kam le Asia minung khuasak tlawnlen ning pawl hi an si hna. Hi kong a hrilhfiahtu pawl chimnak ahcun hi visa chuah khawh nak ding caah a fianglo mi tampi a um, a ruang cu a cheukhat ram pawl ahcun a thangcho lio mi Democracy ram pawl an si i, cun amah lawng in a pak mi ralkap uknakKawlram zong a um tik ah harsatnak tampi a um tiah an chim. A cheukhat khualtlawng pawl nih fawitein visa an cawk khawh nain a cheukhat ca tu ahcun hmanthlak le catlap dang pawl hal in a zarh hnu lawng ah an chuah piak tawn hna caah til harsa ngaingai a si. Asinain hi visa chuah khawh nak hi khualtlawng bu pawl nih an duh piak hna I hi nih hin Asean ram vialte caah hlawknak a chuah ter lai, Thailand hi ramkhat le ramkhat pehtonhtu hlei bantuk asi lai caah a bik in hlawknak a hmu khun lai. Khualtlawn ning cu a fawituk lai nain hi thil hi a fawimi asi lo, a ruang cu ramkhat cio nih an mah le ramdang phungphai Policy an ngeih cio tiah Malaysia khualtlawnnak lei 2nk lutlai Arul Das nih a chim. Cucaah hi dirhmun tiang phanh khawhnak caah kum tampi a rau rih lai. Ch:Striat Times



Source:: Vaurawng Voi75nak

Libya Ram Buainak Kong

Ui hrut bantuk a si ko, a lung a khong tak tak tiah an timi Gaddafi cu US, French, le British "air-forces" (van ralkap) nih an phawmh cang. Gaddafi cu mipi duhnak zulh ding in Nitlak lei ram pawl nih an chim lengmang ko nain a duh nemmam lo. Libya mipi nih Queen Elizabeth an duh bantuk in an ka duh ve ko tiah a ti lehlam.
UNO nih "No-fly Zone" cohlang in Libya mipi humhim ding biachahnak an ngeih hnu zong ah Tapung pawl umnak Benghazi vanlawng dinnak cu hmiahpi (missiles) in a kah thiam thiam rih caah French, British le US nih a rannak in an phawmh cu a si.Libya ram chung buainak cu kan hnu February thla ah khan a thawkmi a si. Middle East ram le North Africa ram hna ah cozah duh duhlohnak an langhter lio ah a thawk vemi a si.Libya mipi nih Gaddafi cozah an duh lohnak cu rianngeilo ( unemployments) a karh tuk pinah ram chung hungchonak zei hmanh a tuah lo tiah kum 42 chung Libya a uk cangmi Moammar Gadhafi cozah cu dihter cang in mipi thimmi democrecy ram ah ser ding in mipi nih an au hnawh cu a si.Mipi auhnak cu Libya ram khualipi pahnihnak a simi Benghazi timi ah February 16, ahcun an thawk i cozah dotu buu nih Benghazi le a dang nichuahlei hmun cu kanmah nih kan ukmi hmun ram a si tiah an ti ve.Tapung nih hmunhma an laknak Benghazi le nichuak lei ram pawl cu Gadhafi ralkap nih helecopter le air-force bak in mipi umnak Benghazi khua ah bomb an thlak. Mipi nunnak le mipi covo zeirel loin cozah duhlohnak a langhtermi le cozahdotu tatung cu a kah hna. Cucaah, mipi pawl nunnak khamh a herh ko tiah UN nih a ruah caah No-Fly-ZOne kong cu a rannak in UN Security Council ah an hung chuahpi cu a si. A si nain Gadhafi nih Benghazi ah ralkap ka thlahmi hna hi mipi harnak pek si loin ralhrang (Al Qaeda) pawl ka dohmi hna a si tiah a ti ve.Gadhafi cozah nih tapung pawl cu Helecopter le Air-force lawng si loin vulei ralkap, Tanks le ralkap thazaang bak in Benghazi ahcun tapung cu an hun doh hna. Mipi zawnruahnak ngei loin kah thlawrh in a kah hna tikah innlo tampi a rawk pinah minung nunnak tampi a liam. Cucaah, Libya mipi tampi cu an nun himnak caah Egypt ramri lei ah an zaam hna. Libya ram buainak cu that lei si loin chia tlei a panh caah tapung le mipi nih "International Community" bawmhnak hal in an au cu a si. UN nih UN security Council chungtel 15 lak ah chungtel 10 nih No-Fly ZOne cu cohlang a von si i Libya mipi humhim ding in hma kan lak cang lai; Libya ram chung buainak ah kan i thlak cang lai tiah biachahnak an ngei cang ka tein Gadhafi nih "cease-fire" (kah-ngolnak) cu a au, nain a ralkap pawl nih mipi umnak ah bomh an thlak thiam thiam rih.

Cucaah, French le Arb ram pawl nih kahnak hi ngol cang law tiah ralrin an peknak cu a si.Cease-fire a au hnu tiang ah a ralkap nih mipi umnak ah bomb an thlak thiam thiam rih caah le zarhte ni ah mipi umnak ah bomh a thlak rih i civil minung 10 hlei an nunnak a liam caah, a rannak in French nih a von phawmh colhnak hna cu a si.Nitlak lei ram US, British le French nih Gadhafi ralkap umnak ah "Tomahawk missiles" an timi hmiahpi 110 cu an thlak. A herh ning in thlak rih ding in timhtuahnak an ngei. "Amah rammi hna a nawngtu lei ahcun kan dir awk a silo, a herh ning le a dikning tein rian kan tuan awk a si" tiah British Prime Minister David Cameron nih a chim. "Coalition" (komhmi bu) hna nih No-fly zone hmun cu a him khawhnak hna tha tein kan i zuam lai tiah an ti.US, British le French nih an phamwh hnu zong ah Gadhafi cu a lung a thumh hlei lo; nitlak lei ram pawl hi an i chir te lai a ti lehlam. Kanmah ram chung buainak ah a lengleimi an i thlak awk a silo tiah a ti. Libya ram ah ralkap thazaang he an rak luhmi zong hi a dikmi a silo, a phung zong a si lo tiah TV in bia a chim. Ka thih tiang ka do hna lai i mipi zong nih keimah aiah thih ding in tim cia an si tiah a chim chap rih fawn. "Libya hi nan ram a silo" tiah UNO cu a au hnawh ve hna.Atutan Libya buainak ah nitlak lei ram an i thlakmi ahhin French cu a ralrin ngai; cucaah, Arb ram pawl hruaitu vialte cu Zarhte ni ah ruahnak a hal hmasa hna. Libya buainak ah a lengleimi i thlak hi Arb ram hruaitu zong an lung a tling. Hmailei zei dirhmun dah an phan lai aho hmanh nih chim khawh a si rih lo. Ref: CNN News ( March 20, 2011) ah a chuakmi thawngpang a si.

Ref::http://www.globalchin.org/

Ralvennak ah Dir

Habakkuk 2:1 “Ralvennak innsang ah, khan ka va dir lai i, kulhnak vampang ah khan, ka va um lai; Ka sinah zeidah a chim lai ti kha ka va hngak lai”

Titanic movie cu kan zoh bal cio ko lai dah! A movie um tu ning ah, tilawng hmailei lam a cuanh tupa a mawngtu (watchman) nih a hmailei kha ţha ten zoh lo in, fidi le fitlaw an i hnamh mi (vawlei sualnak) kha a zoh nakah tikhalpi (iceberg) a hmu manh ti lo i, tilawng nih cun mah tikhalpi cu a pah (taingh) i tilawng a rawknak le a pil nak cu si. Hmailei lam cuanhtu nih cun a hmailei kha ţha tein a zoh ding si ko.
Jesuh cu kan lam asi i, kan hmai lei a kal chung mi zong asi, kan hmaiah a dir mi zong a si i, kan hmai in a kan hruaitu zong asi. Amah long kha zoh peng ding asi. Peter cu Jesuh a zoh lio long ah ti cung ah a kal kho i, kehlei vorhlei thlichia le tilet a zoh lio ah cun ti chung ah a pil thluahmah ko (Mathai 14:29-30). Jesuh zoh bu long in Thlarau leiah hmai kal khawh a si.

“The watchman’s job is vital” an ti i, ralvengtu hna rian cu thihnak le nunnak he aa pehtlai ti asi. A hman ngaingai! Ralvengtu pakhat nih ţha tein a ven lo i, a daithlang, a ngut ,aa hngilhtak asi ah cun a ral pawl an rat zong a thei ti lai lo i a ralkap hoi hna sin ah ralrinnak zeithawnghmanh a thanh kho ti hna lai lo caah an ral pawl nih fawi tein an tei hna lai, an thi dih ko lai.

Ralvengtu nih a rian kha ţha tein a tuah hau, a tuah lo ah cun Ezk. 33:6 chung ban tuk a si lai. “Sihmanhsehlaw ralvengtu nih ral an rat a hmu nain a muko kha tum lo in zapi kha ralrinnak a pek hna lo ahcun, thahmi paoh kha an sualnak pi he thah chih an si ko lai; sihmanhsehlaw kha hna an thih ruangah khan ralvengtu kha mawhchiat a si lai, a ti.”

Kan nih khrihfa hna zong ralvengtu kan si (Ezk. 3:16). Kan pum, kan nunnak caah ţha tein ral kan ni ven a hau. Ţha tein kan ni ven lo ah cun kan ralpa satan nih a rak kan luhhnawh lengmang ko lai. Ralvennak ah dir uhsih, ţha tein ral veng hna uhsih! Cu ralvennak i kan um tikah Bawipa nih bia a kan ruah ve lai (Habakkuk 2:1)

Pa Hniang
Manila, Philippines

//////////////////////////////

Purpose Driven Life by Rick Warre

Bawi Krih ah dawtmi U le nau hna,

A luanciami kum 10 chung ah kan vawlei ah kan hna theihnak lawng siti lo in le ca uk le news chung lawng ah kan relmi si lo in, Television, youtube, internet etc.. hna thawngin kan mit hrimhrim nih a hmuhmi rawhralhnak a phun phun, cuhna lak hmanh ah cun 2001 September 11, New York le Washington terrost attack (keimah ka mithmuh hrim hrim a si ve), Hollywood movie bantuk dahra tiawk in a tak tak a si mi, minung a thong a sang in chikkhat ah an loh dih ko lawng hmanh silo, Twin Tower pi an cimh cuahmah hna i minung tampi in dot zakhat hna in an zuan nan hei hmuh cio tik ah,......2004 Decmber ah Tsunami nih Inoinesia Sumatra, Thailand Phukhet hrawng le Srilanka a vun den ciammam i minung 300,000 renglo an vun loh diam ko zong cu kan vun hmuh hoi. Cu tlawmpal ah kan mah Kawlram hrimhrim zong ah 2008 May thla ah Cyclone Nargis nih zankhat ah minung 100,000 leng muthla bantuk in an nunnak a vunlak zong cu kan vun tuarpi ve hna hnu ah,...... 2010 Haiti ram nizannai lihin, le a tuah Japan ram ah Lihnin le Tsunami nih cankhat te ah minung 10,000 leng an nunnak a lak pin ah a hrawhmi in le lo a man in tuakcawklo, relcawklo, cu chinchap ah nuclear thazang an khawnnak a puak mi nih hmacung ah i khawnchap bantuk in an nganfah a henh in a henh mi hna zohtik ah, zeitindah u le nau hna, nan hei ruah ve cio?

Hi bantuk can lio hna ah hin a hopoh khua kan hei ruat ton cio ko va si kaw, cu lawng lo ah, kan mah pumpak, chungkhar, cingla rualchan, hawikawm tha hna nih thih le lohnak maw, ngeihchiat zatlak vansang aunak hna maw, a si lo ah kan hawile kan dawt mi hna nih an kan then tik ah lunglen, ngeihchiatnak hna maw? Zeimaw can ah cun van kan zoh ah a sang theu i, vawlei kan zoh ah a pit kan ti ton a si lo maw? Ralthawhnak ram kip ah kuanvai ruang ah, landmine ruang ah, bomh a puak mi ruang ah, van in ruahdomh in a tla mi bomh hna nih ther cikcek in kan thla an hlauh tik ah, cu lawng si lo in, kan duh mi thil ruang ah kan nunnak, kan thazang, kan ruahnak le ngeihchiah vialte thap in kan tuah mi thil hna kan ruahbantuk in a hung si lo i, aho hlei mawhchiatawk theihlo can ah siseh, ei le din awk ah thaizing a chuak hoi lai? zeihe kan chuan lai tiah lung rethei in kan van a san can hna voikhat lawng a si lo, cansau pi a hun i thua thluahmah tik ah, kan damlo ruang ah, fahnak le nganfah phunphun nih a vun kan temtawn tik ah hram riangmang buu le hacang rialbu in kan um theu tik ah, mizeimaw kan hawi cheukhat hna cu an ton mi thil le lung retheihnak an phorh khawh lo tik ah an nunnak cu hramhram in an donghter i mual tampi nih an kan liamtak a si lo maw?....

Zeihe ka chuahchan?????? tiah kan vun hram riangmang ton a si lo maw! Cutik ah minung sinak in mi van kan hai chel, ngeihchiah kan hai chel, adonghnak ah cun Pathian duhnak hi tah zeidah a si hnga aw? tiah biblical explaination kan kawl ton. Zei ca ah dah hi vawlei ah hin ka rak chuah? Keimah ruahnak le hnatlaknak tel ve lo in hi vawlei harsatnak a ka phorhtertu hi an um maw? A ho dah a si hnga? Kan biaknak cung zong ah lunghrinhnak kan ngei a si lo maw? Cu tik ah, u le nau hna, nan ca ah siaherhnak nganpi pakhat he hi attachment i ka thil mi ca uk te hi nan rel ve rih lo ah cun, nan ca ah thazang an petu a si ve sual hnga maw?

Purpose of Driven Life a tialtu pa hi Rick Warren a si i, President Obama bible cauk tl;aihin bia a kam tertu pa kha a si. Mah ca uk hi vawleicung ah an zuar khawhmi cauk lak ah "best seller" record a hmu mi a si i, holh puntampi in an leh cang. Nizan nai te Thailand karat lai ah, ka hawipa nih va relve te law tiah siaherhnak te he a ka chimh caah, cauk dawr ah $ 16 in ka ca i cawk colh. March 10 ah Canada in Thailand ka rat pah ah Japan ram ah harnak ka tong Tsunami ruang ah. Nikhat ah chapter pakhat lawng rel ding in a tialtu nih a kan chimh ca ah, March 11 ah cun chapter 2 ka rel cang. Katon mi le ka relmi katuakchunh tik ah Pathian nih minung kan nunnak kong fiang te in a ka hngalhter. Ni 7 a si cang. Chapter 7 ka rel cang. Relchap thluahmah ka duh a si na in, a mah a tialtu chimh ning te in rel kaa zuam ca ah, hi hnu ni 33 relrih ding kaa baa. Chapter 40 a um ca ah, ni 40 chung ah na rel lai ti a si.

U le nau hna, na ca ah santlaihnak a um hrim hrim lai. Cutik ah Pathian nih zeidah na nunnak ah siter an duh? ti kha naa fiang hrim hrim ko lai tiah ruahchannak le siaherhnak he hi ca te hi ka vun in kuat hna. Pathian nih thluachuahnak in pe ko hna seh!

Dawtnak he,

Avic (Par Tha pa)

Camp/ Chiang Mai, Thailand

Source:: THAWNGTHA@yahoogroups.com

Um Har Ah

Um Har Phen Ah Hmanthlak