Lengte Ka Sa Sa

An mah le chan lio ah Mizo hlasak tham lak i minthang pakhat Siam Thangi nih Lengte Ka Sa Sa tiah a rak sakmi hi an mah Mizo ram chung lawng si lo in Lai tlang lei tiang nih a mah le caan lio te ah cun a min a rak tthang taktak mi a si Laimi nih Lengte Ka Sa Sa ti a thei lo mi kan rak um lai lo dah.A tangah hin rak ngai tthan cio te uh.

Siam Thangi


Mah hla te hi Mizo Ram kan um lio hrawng i a lar ngai mi CFL-Hming Thanga sakmi a si ka uar ngaimi a si ve.

Bishop Mawia Thawngttha

Tang hi 2011 Kumthar nih ah CCBC Chicago Chin Christian Church ah Mizo Bishop Mawia nih phung a chim lio Video toi te a si.Bishop Mawia hi a chuahkehnak cu Mizo Tahan a si nain Yangon ah le Memyoh hna ah a a thangmi a si.Sianginn a rak kai lio ah hin Cathiam min thang pakhat a rak si ve i a pa hi Ralkap Buhmu a rak si lengah Mirum ngai an si.Bishop Mawia hi a luan cia mi thla6 hrawng kha US Chicago ah a rak phaknak cu an nih hi Methodist Church an si hna i Chicago an mah mirang hna nih Pastor caah an lakmi a si.Fa nu pa 2 le fapa pa khat a ngei hna a fanu upa bik hi Isreal ah Doctor a kai lio a si nu pakhat le pa pakhat hna zong US ah College an kai cuahmah lio a si.A nupi hi Malay Taluk a si i Kawlram a um cangmi an si UN Officer pakhat a si Si le Ai lei in UN zung ah rian a tuanmi a si.A tu hi an Chungkhar in US ah an um lio a si hna Khristmas le Kumthar hi an chungkhar in Chicago Laimi hna sin ah caan an kan hmanpi ve a tan i Bishop Mawia Phung a chim lio Video an si.

Bishop Mawia Phungchim Part1

Bishop Mawia Phungchim Part2

Maryland Fimcawnnak Number 1 A Si!

A tang i thawngpang hi nizaan ah a chuakmi a si. Maryland ah hngakchia cacawng lio a ngeimi hna caah thawngttha a si. Washington DC le US state 50 hna cu rampum huap pedan in fimcawnnak lei an dirhmun le an kalpining cio an tah tik hna ah Maryland nih pakhatnak a tlaih. Maryland nih hin kumthum chung pehtlai tein pakhatnak a tlaih cang.

An tahfung nih a sangbik a pek khawhmi Grade cu 'A' a si. Rampum huap buaktlak (national average grade) cu 'C' a si. Cu chungah Maryland Public Education system nih Grade B-plus hmu in quality a sangbik sinak rank a co. A pahnihnak le a pathumnak cu New York le Massachusetts an si i Grade B veve an hmuh. Palinak le panganak cu Virginia le Florida an si i Grade B-minus veve an hmuh fawn. US khualipi Washington DC cu D-minus hmu in 50 nak a si. Rampum pi ah education quality a niambik mi cu Nabraska a si i 51 nak ah a um.

Hi tahfung nih hin hngakchia cacawng lio a ngeimi nu le pa caah khoika state kan um ah dah kan fale nih public education quality ttha an hmuh khawh lai ti a fianter ngaingai.

Lunglawm in,

Thiangi pa

Ref:: metkhuabo@yahoogroups.com

Kalay Peng Ah Pathian Thawngtha Chim Pakhat Thawl A Tong

Sagaing ramthen, Kalay peng, Khunthu khua ah Khrih thawngtha a chimmi pakhat cu palik le khuami nih an thawl. Thawl a tongmi hi Falam Baptist Church in pension a la cangmi Pu Luai Bik a si i Sagaing ramthen ah a ummi Buddhist pawl sinah amah phaisa dih in thawngtha a chimmi a si. “Pu Luai Bik cu Myota le Khunthu khua hna ah a ra i thawngtha a chim. Hiti thawngtha a chimnak kong cu khuami nih Myosi palik sakhan ah an report i palik pahnih an ra, cun thawngtha chim ti lo ding khuachung in an thawl” tiah khuami pakhat nih a chim. Myota khua hi inn 700 hrawng umnak khua a si i Khunthu khua hi inn 150 hrawng khuasaknak a si. “Hihi aa ruang (fair) lo. Buddhist pawl vial cu Chin ram ah an ra le pura an duh paoh in an ser ko” tiah Chin mi pakhat nih a chim. Kawl cozah nih Chin ram ah a ummi Vailamtah pawl cu an phur i cozah phaisa dih in pura pawl an duhnak hmunkip ah an ser. Chin Khrihfa pawl nih biaknak lei puai hmanh cozah nih nawlawnh hnu lawngah tuahnak nawl an ngah. (Ref: Khonumthung)

Faiceu.com

Na Inn Pa Na Daw Maw?

John 15:17 “pakhat le pakhat i daw u”

Luka 10:25-37 ah Phungbia cawnpiaktu pa nih ka innpa cu hodah si? tiah ahal tik ah, Jesuh nih thideng in an velhmipa bianabia kong a chim. Cutikah kan innpa hi a thideng mi, bomh a herh mi, a zaw mi, a kal kho lo mi longlong ah kan ruah sual lai.

Dec. 23-25, 2010 ah Philippine Myanmar Christian Fellowship hruai nakin minung 80 hrawng Subic beach ti mi ah kan kal hna, cun, Dec. 29-Jan. 1, 2011 ah Philippine Chin Christian Fellowship hruai nakin minung 56 cu Hundred Islands ah kan kal hna. Hibantuk mibupi in khualtlawn, tlun, kal ah hin mi thinlung hi theih khun deuh asi. Mah ca long i ruat nak thinlung a ngei mi cu a lang khun. Bus chungah mino te nih upa caah chiahpiak mi a hmai lei ţhutnak i cuh tbt.., ihnak ţha hmunhma i cuh tbt.., ti kholhnak i cuh tbt.., zuunput i cuh tbt.., hruaitu pawl kha bomh um lo in, san an tlai lo tiah thangchiat rih,,, cun, hibantuk ah hin ruahlopiin ţhutnak ţhial awk, thil ţhial awk, thil ţhawnh awk tibantuk a um thiam ngai, cu tikah fial khawh lo, auh khawh lo hlei ah a tuah tu pawl caah hnahnawh le thilrit in a um mi hna an um rih hoi. Ka hoi pakhat cu “hi ka khan ah hin naa tlum ti lo” tiah an rak ţhawl i a lung fah ning cu, kir ţthan hmanh ka duh, a ka ti. Minung cu kan um kal nak poh ah innpa kan ngai. Cucaah hibantuk ah cun damiah taih mi pa theng long kha na innpa si ti lo. Hi bantuk ah hin na innpa cu ho dah si? Na innpa na daw maw, a zawn na ruat maw?

Hi bantuk ah hin khatlei in Pathian min ka thangţhat ngaingai mi cu: mi ţhutnak an ngah dih hnu ah bus chung ah a lut mi, mi ih nak an ngah dih hnu ah a lon nak poh ah ka it te ko lai a ti mi, mi i kholh dih hmasa ko hna seh ati mi, hruaitu hna an chambau nak a um sual si cun khuh piak awkah a herh mi poh a bom tu an rak um len ve. Cubantuk thinlung cu mah zawn long aa ruat lo mi, ka hoi pa caah, ka innpa caah tiah khua a ruat mi an si i Jesuh nih a kan cawnpiak mi thinlung put a ngei mi cu an si.

Nang zong mibupi in khual na tlawng bal ko lai. A bik in khrihfami cu gospel team tbt., khrihfabu in cawlcanghnak tete kan ngei ton hna. Nang teh a cung lei group ah maw naa tel a tang lei group ah dah? Zankhat hnih te siarem lo in ih zong ah poi lo, ti mi maw kan i thim deuh lai, asiloah, kan chan chung mi nih “amah ca long aa ruat” tiah an kan ceih ding dah? Mah tein i check cio uh sih. Khrihfa kan i ti, Khrih zul tu kan i ti, a sinan, hibantuk ah mah siaremnak long kan ruat, hmunhma kan i cuh, kan thil hna a tlau ahcun - mahzawn long i ruatnak (self-centeredness) keimah ti mi Satan thinlung put kan ngei cang i, Jesuh cawnpiak mi innpa dawtnak thinlung put kha zei a rel ti lo. John 15:13 ah “Mi nih a hawile caah dawtnak ngan bik a ngeih khawhmi cu an ca i a nunnak pek hi a si” ati. A cunglei kan langhter mi hna hi kan zoh ah cun nunnak pek cu chim lo, zankhat zanhnih ih nak ruang hmanh ah kan buai cang!

Hmailei ah nun a kan chimhtu siseh law, Khrih nih a kan cawnpiakmi nunzia dawh, innpa dawt, mi zawn ruahnak thinlung kan ngeih khawhnak hnga Pathian nih thluachuah in pe ko hna seh

Pahniang

Manila, Philippines

/////////////////////////////

Pu Zing Cung Nih 2010 Kumthar Ni Ah Dothlennak Bia Roling A Chim

Chin mi si hi aur a rak um taktak. Krifa kan si, zalonak le nuhrin covo hmuhnak ding caah thisen luang in rianţuan mi miphung zong kan si. Vawlei mipi hna nih a vun theih ve cang mi miphung zong kan si cang. Cu bantuk Chin miphun hna lak in zumhawktlak taktak mihna Chin pasal hruaitu ţhaţha kan ngeih hna hi Pathian zong thangţhat chin hna u sih !!! Ţanpi zong kan cu cang!!! Kan miphun hruaitu hna bai le lamhruainak hna zong hi zulve hna usih. MiMi le Brayen Church nih 2010 khumthar ni ah kum 22 an i hmuh lo nak in a hmasa bik an i tonnak a ţa Tongmangham Solomon caah Pathian sin thluachuah hal le thlacampiaknak Indaina Polis ah Kan Pupi Pu Zing Cung nih dothlennak bia roling a chim mi documentary muve record te kan kuat hna. Record ka lak lio in ka miţthli a vun for luangmang . A tu zong hi muve edited ka vun tuah cuahmah lio le you tube ah upload ka tuah cuahmah lio tiang cu dothlennak miţthli nih cun a ka zual ko. Hawidawt CC chungtel hna na hawi le hna sinzong ah hi documentary muve te kha bypassing tuah ve ko hna muh..

Pu Zing Cung Biachim Lio Video

Salai Ţial Bawi Ling

Texas

Ref::chinlandclub@googlegroups.com

Indy Kan Pastor Te Le Upa Bochan Mi Hna Chim Mi

Chin mi kan pa le chungin thawngţha chim lei in le miphun dawtnak lei zong in kan bochan tak mi Rev. Thawngling Mualhlun nih Krifa kan si zong ah dothlennak a herhning a chim mi in siseh Pu Ang Cung nih Tongmangham conglawmhnak Va hla thlornak in siseh Pu Lian Cin nih CNF ţanpi a herhnak kong in siseh thazaang an kan peknak bai roling documentary muve te kan kuat hna…

Salai Ţial Bawi Ling

Lewisville , TX

Ref::chinlandclub@googlegroups.com

Kan Kumvui A Ttha Maw?

Christmas le Kumthar lawmhnak ah kan buai khim cio hna lai dah! Zeikar ah hen kumkhat cu a vun liam manh hoi! kan ti cio. A luancia kum 20 hrawng kan no lio deuh hna ah cun can le kum hi a liam an har ngai ngai. A tu ah cun chikkhatlo an si. Aruang bik cu, computer le internet hi a si ko lai. Mizapi kan i manh hna lo. Theihawk, cawnawk, tuanawk a tam i, manhlo ngai in a um mi hna ca ah cun kum le can liammanh zong hi theih a si theu lo. Kum 2010 cu kan ram ca ah hmelchunh awktlak kum (significant year) a si ve. Cyclone Giri nih Rakhine ram ah mi tampi a thah hna i, mitampi in le lo lo in khua an sa. Kanmah Chin miphun hawi hna zong harnak tampi an tuar ve. Kan ram ah thimnak (Election) an tuah i, kum 20 chung ah avoi khatnak thimnak a si. Kan pi Daw Aung San Suu Kyi cu thong in an chuah. Kum 13 chung thong ah an hren hi a si. Cun, kum 14 chung daihnak (ceasefire) tuah pi mi hna tlangcung hriamtlai ralkap hna he an daihnak tuahmi cu September 1 khan a rawk dih cang i, zeitikcan poh ah i kap than ding dirhmun in an um. Culak ah hriamtlai cheukhat (A hme deuh deuh) cu KRU sin ah aa fon mi zong an um pah ve. A cung lei boruak vialte nih hin 2011 ah kan ram ah zeidah a cang lai ti hi ka hei ruat. Kan hnulei ah Pu Van Lian Thang (Van Van) nih a tial mi scenerio (cozah sernak ah asi khomi) a phun phun a kan tial piak i ka lawm ngai ngai. Rel a nuam i, kan ram chung thil a purhdah ning le a khuaruah a thuk ngai ngai mi a si ti hi ka hmuh tik ah ka upat. Kan duh maw duhlo maw? cozah pakhat kan ngei lai. Cu cozah chung ah cun ralkap uknak zeimawzat a um rih lai ti cu kan theih fiang dih mi a si ko. Sihmanhsehlaw, cu uknak chung ah cun kan mah Chin Miphun zong kan i tel ve lai. Kan ram hrim hrim ah kan parliament ah Chin miphun 74% an i tel. USDP an si zong ah, CNP an si zong ah CPP an si zong ah, Chin miphun nih kan ram ah rorelnak zeimawzat an ngeih mi hi thiltha ah ka ruah ko. Sihmanhsehlaw, dinfelnak le miphun zawnruahnak he khua nan khannak poh ah Pathian kan biakmi tih le zah buu in, kan ram cu nan kan hruai lai tiah saduh ka that ve. Nan lak ah ralkap rual an i zii len rih ko lai na in, raltha te in kan miphun ca ah nan dir ah cun kan hnabei a sei ko. Nanmah kut ah phung nan thluk khawhmi chung in kan miphun ca ah kan biaknak kong ah, kan ca le kan holh kong ah, kan thanchonak kong ah, damlonak zohkhennak le cawnnak lei hna thil tampi an um ko. Mipi nih kan in zumh hna. Kan in bochan ko hna. Kan miphun kongkau ah critical issue (biapi mi thih le nunnak a chuah tik ah) nan party nak in kan miphun kha hmai ah nan chiah poh ah cun, thiltha a chuak ko lai. Kawlram a dai lai maw cozah an ser hnu ah? Dai nai sai hlah. Daw Aung San Suu Kyi nih thong a chuah le cangka in, National Reconciliation (miphun rualremnak) kong a chim. New Year Message (Kumthar biacah) zong ah a chim. Kan mah tlangcung mi nih kan chimnak kum 20 a rau cang. UNO nih thumkomh tonnak chung in daihnak le thlennak ah ti (Negotiated settlement through tripartire dialogue) lengmang a si rih. Tulio vawlei cung nih kan ram ca ah saduh an thah mi cu: A tu hriamtlai an si ah, DASSK le NLD an si ah, KRU karlak ah bia i ruah hna seh ti hi a si ko. Sihmanhsehlaw, cu ti thil a si ti lo ca ah, a bik in hriamtlai hna nih cun hriam he an doh rih ko lai. A kap hmasa tu cu kan si lai lo an ti. Lungrualnak an ser i, a thawngbik hriamtlai Kachin, Mon le Karen le Shan an i tel dih cang i "Committee for Emergence of Federal Union" tiah riantuantinak khua an khang. Ramkip ah an kal i, cozah kip sin ah kan ram zeitindah ser kan duh ti kha an chim. Cozah tampi hna nih hi hna tello in kawlram ah daihnak a um kho lai lo ti kha an hmuh. Conflict Partners (SPDC/ Ethnics/ Democracy Forces) kha dialogue partners an si khawhnak ding ah an i zuam. Hi hna hi kan ram daihnak a phi "solution" ca ah a biapi ah an ruah hna. Tuk le dohnak a um ah cun kan ram cu zeitin cun he a nuamh rih khawh hnga! Sihmanhsehlaw, kan miphun chung ah hi hriam tlaih hi kan politics ca ah thazang a si a hauh ca ah, hriam kan tlaih rih hi a hauhnak a si. Nizan nai hrawng CNF nih Europe ah siseh, USA ah siseh, kan ram dothlennak kong le cu chung ah ramdang um kan biapit zia an chim cang. A rauhhlan ah Australia le New Zealand zong kal an i tim rua! I dohnak zong cu cu hlan nak in a rak um kho fawn. Hitu hi cu sihraw hlah seh tiah thla kan cam cio hna lai. Nizan nai Karen ramri kan va tlawng. I kahnak te te a um peng ko. A rak tli le zam mi zong a thong in an si peng ko ee tiah Dr. Cynthia Maung nih Maesot ah a kan chimh. KNU/ KNLA, DKBA le KNU Peace Council ti in buu thum tluk ah an um i, an zapi ngawtin Kalwram ralkap he kahnak an ngei cuahmah. IDP camp Ehthutha ah kal kan i timh mi zong KRU ralkap camp pakhat KNLA nih an kah hna ca ah Salwin tiva tankhawh a si ti lo i, kan i let. Sha ram zong ah i kahnak te te a um pah. KRU nih Hriamnam ngan (Miakpi pawl) kha a kenkip ah Shan ram ah a chiah hna. Wah dah a tuk hmasa bik lai tiah an zumh cio. Kachin lei kap zong ah (Kah deng deng) stand off voi 2 a um cang. A zeitik can poh ah biatak in kah le dohnak kha a kenkip in a um kho. CNF zong i kap ding ah kan i ready an ti. U le nau hna, kan himnak ca ah ral a do mi miphun kan si. Ramchung ah siseh, ramleng ah siseh, kan ruahnak le kan thazang (phaisa thazang siseh, fimnak thazang siseh..) funtom hna uh sih law, duhsah te in kan ram thlennak ah a kenkip in kan i tel cio a hau. Zeitindah kan i tel cio lai? ti kha biahalnak a um tawn. Ramchung ah a tu Civil Society tampi a thli in siseh, a lang in siseh an dir cang. Media tampi nih kan ram fim an kan chimh thluahmah. Khuakip ah mino buu an dir cang. University kip ah sianghleirun kai kan fanau hna nih kan ram politics (kan ram kong ah) ah biatak te in khua an ruat (Critical thinking). Ramleng chuahnak in ramchung in zeitindah tan kan lak khawh lai ti mi ruahnak thar a um cang. Cu cu a tha. Ramleng a chuakcia hmanh hi kan zatuk cang. Kan Krihfa buu ramchung ramleng kan biaknak kong ah siseh, kan miphun le ca, sifah raldonak etc.. i kawmhnak le biaruahnak an ngei cang. GCCF tiah an kan dir piak. CNP le CPP zong hi hmailei ah cun an i fawn te lai tiah ruahchannak ka ngei. An i fawnhlo zong ah riantuantinak thinlung an ngei ko ca ah hna a ngam. Thathawhnak lawngpi an si ko. 2011 cu kan ram le miphun ca ah a sunglawi mi kum si seh law, kum a dih tik ah "Kan kum a vui tha" kan ti te lai.

Victor Biak Lian

Ottawa

Ref:: YCCF-International@yahoogroups.com

Zumhnak In Kal

Zumhnak in kal

Hebru 11:8

^“Pathian nih Abraham kha a auh tikah,… khuazei ah ka kal ti hngal loin a ram kha a chuahtak”

Abraham cu Pathian nih kan tinhpiakmi ram ah kal, a ti i zeihmanh fian cia mi a ngai lo nain, aa thawh cawlh ko.

Moses nih Israel pawl kha zei tin dah ka hruai hna lai tiah aa fiang cia mi a um lo. Pathian nih chimh chawm mi kha ngeih in a kal pi ko hna.

Joshua le a ralkap hna cu zeiruang ah dah Jericho cu voi 7 cu kan hel lai, zeiruang ah dah, cu ti kan tuah ah cun zeitin dah thil a cang lai ti kha an in fiang cia lo. Pathian nih chimh mi bia tu kha an ngai i an tuah ko.

Cucaah, dawtmi unau hna, 2011 ah hin zeitindah ka um lai, khua ka sak lai, ka nun lai tiah na lungre a thei sual maw? Kan hmailei in a ra ding mi thil pawl hi zeitindah an si te lai ti kan theih lo hmanh ah, fiangtein kan theih khawh mi cu hmailei a ra ding mi thil, caan vial te le zeizong vial te a tlai dih tu kan biak Pathian kha a si. Cucaah, kan hmailei caah hin zeihmanh phannak ngei lo tein, amah Pathian tu kha zumh, i bochan uhsihlaw, zumhnak lei in kan pa asimi hna Abraham, Moses, Joshua hna bantukin zeihmanh thil fiang cia in kan theih lo hmanh ah Amah Pathian tu kha zumhngamnak he 2011 cu kar hlang hna uhsih.

Pathian sinin a ra mi kumkhar thluachuah, daihnak, lawmhnak le hnangamnak hna cu nan dih lak cung ah tlung ko seh!

Pastor Hniang Uk

Manila

"Kum Thar Lawmhnak"

Nan dihlak cungah Kum thar lawmhnak um ko seh.Kum hlun cu a kan liamtak cang bang in Kum hlun mangttha tiah thlah hna u sihlaw Kum thar lunglawm tein don cio hna uh sih.Kum thar nih a rak i kenmi damnak le tlamtlinnak cu nan dihlak cungah um hram sehlaw Kum thar kumpi kum khat chung ah him le dam le lawm tein kan hmankhawhnak dingah Pathian sawm hna u sih.

Kum Hlun Thlahnak Hla Ngai Hna U Sih

"CNA/F Hi Um Hlah Sehlaw"

"CNA/F Hi Um Hlah Sehlaw Chinland Ah Zeidah A Cang Lai Part2"



" CNA/F Hi Um Hlah Sehlaw Chinland Ah Zeidah A Cang Lai Part2 "

GCCF Conference Ah Chin Pastor Te 100 Reng Lo An Phan Kho

KL, Malaysia - Vawleicung hmunkip um Chin miphun hna nih hmunkhat te ah Pathian rian kan ttuan khawhnak dingah tiin ceihkhannak cu hmunkip um Chin miphun chungah Pathian nih chiti a thuhmi hna kan pa le minung 150 leng Malaysia ram ah an phan kho tiah kan theih. Chin ramkulh lei in le Kawlrawn um kan pa le pastor minung 70 an phan kho ti zong theih chih a si. 25.11.2010 ni in Senthang Christian Fellowship (Jalan Sg. Besi) ah nihnih chung tonbiaruahnak le biachanhnak an ngei kho hna. Tutan meting ah a kai khomi hi Pathian rianttuan liomi Pastor minung 150 renglo an si. Ramchung ramelng biaknak lei rianttuan zate minung 200 leng meting a kai khomi an si. Tutan hi a voikhatnak a si bantuk in hmunkip in a rak phan khomi kan pa le zong an i lunghmuih ngaingai hna. Atu bantuk in i tonnak cu a luancia caan in kan pa le nih Chin ram caah zeitindah rian kan ttuan khawh lai timi ruahnak an rak ngeihmi chungah Pathian lam hruainak in nihin ni ahcun hlawhtlinnak pakhat ah a hung cang.

Avoikhatnak GCCF (GLOBAL CHIN CHRISTIAN FELLOWSHIP CONFERENCE) tonbiaruahnak le civuipi ah a rak phan khomi ramleng: US in 7 , Austrilia- 5, Norway- 7, Japan- 2, Korea - 2, Singapore-1, Canada- 4, India-3, Bangladesh - 2, Thailand -2, Philippines -9, UK-1, Kawlram lei in 70 hna hi tutan ah a rak phan khomi an si. Nihinh chung meting an tuahnak ah Malaysia um biaknak lei hruaitu hna he an zate minung 200 tluk meting an tuah kho tiah kan theih.

November 26 cacawn ninga ni meting ah biachahnak an ngeih khawhmi cu 26.11.2010 ni thok in GCCF bu cu hmunkip a rami nih um ding in hnathlaknak ngeih a si. Pakhat hnih nih an chim ve mi cu “ GCCF bu hi kan dirh colh rih ding a si lo, caan sau deuh kan lak rih ah a ttha lai” tiah a timi zong an um pah. Nain meting a kaimi mitam deuh hnatlaknak in lak a si bantuk in GCCF bu cu fehter a si cang. Tutan meting ah cathluan chuahmi zong tam ngai a si. Chin ram tthanchonak ding, nubu lei, mino lei, cun mission rianttuannak ding kong hna cu ceih an si. Nov. 27 ni zarhte ni ah Jalan Alor KL Baptist Church ah zinglei pumhnak le zanlei pumhnak zong a um. Zarhpi ni tu cu mah le umnak biakinn cio ah pumh ding in khuakhan a si. Tu bantuk in biachahnak an ngeihmi cungah hmailei ah biatak in rianttuan dingin timhtuahnak zong a ra mi kip nih ngeih a si.

Atubantuk in GCCF tonbiaruahnak ah hin Ram rianttuan kan pa le CNF, CHRO hna zong rak i tel ve ding in khuakhan a rak si nain ramchung lei a rami hunhimnak lei an ruah caah an i tel kho lo tiah kan theih.



Ref:: Seihnam 455nak

CNF le Nihin Kan Miphun Dirhmun! (Part -10)

Indiana Chin community Chairman Pu Za Bik hruainak thawng in kan hlan mi Chin Community Center cu minung sawm (50) hrawnglawng kan ni tlumnak Hall fate a si nain, kan miphun lawng si loin Indianapolis khua a um mi minak- mirang, upa-ngakchia tam pi nih theih mi hmun a si. Senator office in milian pi pi le Governor office in upa nganngan zong an ra i, kan Chin upa pawl he lai an rel tti nak le khua an khan tawnak hmun a si i, mi tam pi theih lo awk a ttha lo mi hrimhrim khi a si. Nizan December 28,2010 zanlei i, hi Chin Community Center ah kan tawn mi lunglawnhnak hi kan miphun tuanbia vawlei can dongh tiang a rak tang te hnga ding thilmak pakhat a si.

American pawl an tuanbia ah a biapi bik mi inn cu Philadelphia khua i, aum mi Independence Hall khi a si. American pawl caah a bia pi bik mi a si mi British pawl kuttang in luatnak hmuhnak caah Independence Declaration an tuah nak hmun cu mah Hall pi cu a si i, kum 230 leng a hmun cang mi an phunghram (constitution) zong thla 5 chung rauh in an rak ttialnak hmun zong mah inn tthiamtthiam cu a si. Cu ve bantuk in, USA ram i, CNF pawl caah cun hi Chin Community Center hi American pawl i, an Independence Hall ban tuk cu a si ve. Thil pi pa kan tuahnak le kan khan nak bik a hmun hi mah kan Chin Commnunity Center te hi a si. Philh awk ah a ttha lo mi inn le hmun te a si i, hi inn kan rak hlan khawhnak caah a rak tawlrel tu upa pawl nan cung ah kan ni lawm.

Pu Thla Hei nih a vun phah mi Chinland Club (CC) luhnak cauknak lian pi cu, number 1000 nak zawn ah, Pu Lian Kung (Sazaci Lian Kung) fapa hniang Thawng Pi nih a min, a phone number le a E.mail pawl a vun ttial dih. Cu cangka in keimah nih CC member 1000 kan tling cang! Kumkhat (thla 12) chung ah member 1000 tlinh ding in kan thimh i, Sep.4,2010 ah kan thawk mi cu thla li chung ah kan tlinh cang! tiah ka vun thanh cang ka in, ka bia hmanh a dih hlan ah khin zaa pi in an rak au, an kut an bengh i, keimah zong ka bia peh ti lo in ka au ve. Kan ni lawmh tuk ah pakhat le pakhat kan kut kan ni tlai, lawmhnak bia kan ni chimh. Kan ni lawmh tuk ah kan mitthli zong a haa dih. Salai Tial Bawi Ling nih Japan ram tuah a Canon Camera lianpi cu aa lak i, ving ving ving ..tiah hman a rak kan thlak tluahmah. A tlawmpal ah kan Chin miphun lak ah ralbawi lianbik kan ni ngeih mi Col. Solomon nih "mah hnu hin cun kan ni thim mi tluang te le tlamtling tein, kan tuah khawh cang lai, hi CC member chungtel pakhat cio nih kan ram an dawtnak ah kan ni lawm i, Pathian nih um pi chin chin ko hna seh" tiah lungsi ngai in a chim i, kan tthutnak cio ah kan vun tthu tthan.

Zeiruang ah dah mah tluk hin kan ni lawmh? Mi tam pi kan lung a fiang lo men lai. CC member pakhat nih kumkhat ah a tlawmbik American $ 150 thawh ding a si i, member 1000 nih cun kumkhat ah $150000 USA ram chung in CNF rianttuannak caah phaisa a lut tinak a si ko. Hi phaisa hi kan miphun dohtlennak ah aa zaa maa ti ah cun a zaa naisai lo, a sinain hiphaisa nih hin kan miphun dohtlennak ah hmual tam pi a ngeih ter lai. CNF/A rianttuan tu an thabatnak tam pi a dam ter deuh lai i, an rawlttam nak tampi a tthatter lai ti cu a fiang. Khatte lei in chim ah cun hi phaisa nih hin kan miphun dohthlennak zeimaw zat a tlen hrim hrim lai tinak a si ko. CC chungtel member pakhat cio sin ah kan ni lawmtuk hrinhrin tiin, CNF USA regional Chairman aiawh in vum chimchap ka duh. Phaisa $150 hi a tam lo mi a lonain, mah phaisa $150 hmuhnak ah hin zeitluk in dah reitheih thabat in a herh i, hmuh a har ti mi hi CNF rianttuan tu pakhat cio nih kan nin theih piak ngai hna. Kan miiphun le kan ram siaherhnak, dawtnak tak tak ngeih lo in hi phaisa hi pek khawh a si hrim hrim lo.

Careltu u le nau hna, hi member 1000 chung ah phaisa $150 lawng kumkhat ah pek hi cu a tlawm tuk a ti i, a let hra in $1,500 tiang a pee mi hna an um. Cu lawng si loin, meithalttha AK-47 kan cawk piak hna tiah , meithal zunkhat man $600 a pee mi hi minung 64 USA ramchung lawng ah an um. Kan unau pa khat (a min ka philh celngel) cu AK-47 zun hnih kan cawk piak hna a ti i, $1,200 pek ding in aa tim. Hi member chung ah hin kum 12 a si rih mi kan fa le ngakchia hna in rianhmanh a ttuan kho ti lo mi kum 70,80 a si cang mi kannu le kan pa hna tiang an i tel. A fiang tuk mi cu hi CNF dohtlennak hi kan miphun zaa pi kan ni tel mi mipi dohthlenank a si i, USA a um mi kan miphun minung 1000 nih kan ttanh pi mi hna si tinak a si ko. Hi kan dohthlenank kan ttanh timi alanghnak cu kan phaisa $150 kan pek nak hi a si. Mah caah cun hi minung 1000 nih kan thawh mi phaisa $150000 hi mirum pakhat nih million tam pi a thawh mi phaisa nak in vawlei cung mi pi hmaiah sullam a ngei deuh, a hmual a fak deuh, i san a tlai deuh. Minung 1000 nih kan ttanh pi mi thil hi thil sawh sawh a si lo, ti mi hi kan pawng a um mi American mipi le an cozah pawl fiangtuk in kan hmuh ter khawh cang lai an kan ttan pi nak zong ah an tha a tho chin chin ve cang lai.

Hi CC member 1000 si ter ding hi tukum ca kan rak i timh mi lawng a si i,cansau ca kan ni timh mi cu: vawlei cung ramtthatnak a phan mi kan miphun rianttuan tu vialte hi Chinland Club(CC) chung ah lut ter ding hi a si. Hi Chinland Club tuahnak ah a kan hrawi tu Pu Thla Hei nih a ti mi cu " Vawlei cung khuazaa ramkip a um mi kan Chin miphun vialte nih kan umnak office, kan ttuanak sehzung, kan umnak khua, kan umnak ram cio in hi kawl uknak hi kan doh dih lai. Kan ram ah va kal in meithal in va doh lawng hi dohthlenak a si loh, kan phaisa kumkhat ah $150 pek hi kan umnak hmunhma cio in kawluknak kan rak doh mi cu asi ko" tiah a ti . Kan miphun u nau 80 leng nih an nunnak an pek cang mi hi CNF dohthlennak ah aa tel rih lo mi kan um sual ah cun Pu Thla Hei bia bang, kan um nak ram le hmun cio in i tel ding ah a can a tlai rih lo.

Miphun hawi hna, hi kumkhat kan ni timh mi thla 4 chung ah a tlam a tlin khawh hi, kan miphun nih kan ram kan dawt ruang ah le kan miphun kan ttanh ruang ah a hram pi cu a sinain, hi ban tuk kan dawtnak a vun langh khawhnak caah hin Col. Solomon le Pu Thla Hei ban tuk hruaitu ttha hna hi rak um hna hlah seh law a tu ban tuk hin kan tlam a tling lai tiah ka zum hrimhrim lo. America ram chung ah ramkulh (state) 14 an phan i, a khua cun khua 20 an cul. Khua khua khat ah hmun tam pi ah bia an i, thlathum chung an ni rauh. Zan ih manh lo in an um chel hi a tam i, tampi ah hawhra nih a den chel hna hi a tlawm lo.Hi hna pahnih hi kan miphun hruainak ah mi tam pi nih kan ngeih khawh lo mi, mipi hruainak pahrang ttha Pathian nih a pek hna. Hi an pahrang pawl tam pi lak ah pakhat cu: minih thin hun tuk in an vun den hna lio ah zeipawi lo in an ni um mi, mahpa kha hawi ah an ser tthan khawh nak a si. Hihi a tu hruaitu an ttuan hnu lawng ah si lo in, an ngakchiat lio Hakha le Thantlang an rak um lio te hrimhrim in an ni ngeih mi, an ni chuah pi mi a si. A tutan, hi kan hruaitu pa hnih hna i America ramchung an rianttuanak le an kan hruainak hi cu kan miphun tuanbia ah vawlei cang donghtiang a rak hmun lai i, a rak tang ding kan miphun ttuan bia dawh pakhat a si. Hi tuanbia dawh ttialnak aa tel mi CC member pakhat cio cung ah lunglawmh nak le thathawh chin chin nak he...

Nan miphun hawi,

Daniel Sakhong

Indianapolis

Ref:: From: Daniel Sakhong <danielsakhong_chinram@yahoo.com>
To: LAIFORUM@yahoogroups.com;

Taylor Swift, Asian Ramlei Tlawn Aa Tim

America ram ah Country-pop hlasa a simi Taylor Swift (kum 20) cu hla thar aa chauhmi “Speak Now”, zapi sin langhter dingin vawleicung ram 19 ah tlawn aa tim. Hlasa Swift cu kum thawkka February thla in khualtlawn hramthawk aa tim i kum 2011 chungah show voi 87 tuah aa tim. Feb thla chungah a tlawn dingmi ram pawl cu Singapore, Japan, S. Korea, Philippine le Hong Kong ram hna an si i March thla chungah Europe ramlei a tlawng tthan ding a si. A hlasaknak cu America ram ah donghter a timh. Taylor Swift cu chanthar mino nih an uar ngaimi nu a si i kum 2009 lioah a rak i chuahmi “Fearless” hla in tangka tambik hmutu a rak si bal.—Reuters


Ref:: Seihnam

Tan Suai Hmanthlak

Tan Suai Hmanthlak Aa Dawh Ning Hi,,, A Mang Hna A Chia Hnga Maw Ka Ti Pah.

"Jesuh Chuahnak Kong"

Mah Drama i an piah bikmi cung Mathai 2:1-14 chung hi an si i Video Drama na zoh pah hi mah Bible ca caang hi rak rel pah te u tiah kan sawm hna.

(Mathai2:1-14 )1Jesuh cu, Judea ram Bethlehem khua ah, Siangpahrang Herod bawi a si lioah khan a chuak. A chuah tlawmpal ah cun arfi zohthiammi hna kha nichuahlei in Jerusalem khua ah khan an ra i, ²“Judah siangpahrang a si lai dingmi ngakchia a chuakmi cu khuazei ah dah a um? A arfi nichuahlei in a chuah kha kan hmuh i amah biak awkah cun atu hi kan ra,” an ti.

³Cu bia cu Siangpahrang Herod nih a theih tikah a awlok a chong ngaingai i cu bantuk cun Jerusalem khuami vialte hna zong kha an si ve. ⁴Tlangbawi upa vialte hna le Phungbia cawnpiaktu saya hna kha a pumh hna i, “Khuazei ah dah Messiah cu a chuah lai?” tiah a hal hna. ⁵Annih nih, “Judea ram Bethlehem khua ah,” tiah an leh. “Cun Profet nih a rak ṭialmi cu hihi a si:

7Cucaah Herod nih cun nichuahlei mifim hna cu a thli tein a kawh hna i zeitik set ah dah arfi kha a chuah ti kha fiang tein a hal hna. ⁸Cun Bethlehem khua ah khan a kalter hna i, “Va kal u law ngakchia kong kha ṭha tein va hlat u; cun nan hmuh tikah ra ka chim ṭhan u law kei zong amah cu ka va bia ve lai,” tiah a ti hna.

⁹Siangpahrang nih a ti hna bang cun an kal; cun nichuahlei ah an rak hmuh cangmi arfi kha a lang ṭhan i an hmaiah a kal i ngakchia umnak cungah cun a dir. ¹⁰Arfi an hmuh ṭhan caah cun an i lawm tuk hringhran. ¹¹Inn chungah khan an vung lut i ngakchia kha a nu Mary sinah cun an vung hmuh. An khuk an i bil i an biak. Cun an zal chung khan laksawng an i chuah i an pek, cu an laksawng cu sui le frankinsen zihmui le mura zihmui an si.

¹²Pathian nih an mang ah Herod sin i kir ti lo ding khan a chimh hna i cucaah lam dang in an ram ah khan an kir.13Annih an kal hnuah Bawipa vancungmi pakhat cu Josef sinah khan a mang ah a lang i, “Tho law, ngakchia le a nu kha i kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih ngakchia hi thah awkah a kawl lai,” tiah a ti. ¹⁴Josef cu a tho i ngakchia le a nu cu Izipt ram i zampi awkah zan ah khan a thawhpi hna. ¹⁵Cuka ah cun Herod a thih tiang an um. Hi thil cu Bawipa nih profet ka in, “Ka Fapa cu Izipt ram in chuah awkah ka auh,” a timi bia tlinnak caah khan a si. *""Jeusuh Chuahnak Kong Drama""

JESUH A CHUAHNAK HMUN LE CAAN

Caan tlaitu ----------------------------- Siang Dun

Phung chimtu ------------------------- Rev. Philip Hrengling

Khamhtu khrih chuahnak ni le thla a kan phaktertu Pathian kan thangtthat. Pathian cu kan itheih lo lio zong ah dawtnak in a kan vengtu a si. Jusuh nih cun a nunnak pek in a kan tlangh. Jesuh dawtnak hi a ngan taktak ko. Jesuh zoh chih in kan nunnak lam ah hmai ah kal hna usih. CIM chungtel zumtu pathat cio cungah lomhnak kan chim. CIM a nun khawhnak cu Pathian thawng le nangmah na telnak thawng in asi. Nihin thawgttha a kan chimtu hi CIM ah caan saupi Director a kan ttuan piaktu Rev. Philip Hrengling a si. CIM can saupi a rak hruai. A mah kuttang ah chungtel tampi kan rak karh. CIM cauk zong a kan chuah pi khawh. A cungah lomhnak a tam hringhran ko. Upatnak he a kut ah caan kan pek cang.

JESUH A CHUAHNAK HMUN LE CAAN

Cathiang rel ta usih! Luke 2:4-7: Josef cu Galiliram i Nazaret khua in Judearam i Bethlahem khua an timi, Siagpahrang David chuahnak khua ah khan a kal. Josef kha khika i a kalnak cu amah kha David hrinsor a si caah a si. Cun min thlak awk i a kal ah khan a hammi Mari kha a sinah aa kalpi. A ni thla kha a tling dengmang cang i khika i a um lioah khan a hrin can kha a phan, fapa te kha a hrin i cucu fater a si. Puan in a zual i caw rawl einak kuang chungah khan a thlim- riahnak khualbuk ah khan an caah hmun a um lo. Bawi Jesuh a chuahnak hmunhma le ni le caan ahhin ziah hi tluk hin hmun a um lo? a caan pek zong a um lo ti hi ruah awktlak ngai a si. Mi lungthin ah i manh lo caan, hmunhma pek khawh lo caan theng ah Jesuh a chuah hi a ruang a um hnga maw? Pathian khuakhan maw a si hnga? minung leikap in chambaunak dah a si hnga? Jesuh a chuahnak tuanbia tawi kan hmuhmi cu a chuahnak hmun Bethlahem cu Jerusalam lei a tlawngmi hna nih an tan pahnak le an i din tawnnak hmun rem ngai a si. Jerusalem khuapi cu mikip nih hmuh le tlawn duh cio a si i, Bethlahem i tan pah cu a nuam ngai in an theih. Jesuh a chuah lio hrawngah hin Siangpahrang Awkastas nih ramchung ah a ummi vialte David hrinsor a simi milu rel dingah nawlbia a chuah. Cucaah min i thlak awkah a mi paohpaoh in anmah le an khua cio ah khan an kal. Josef zong cu David hrinsor a si ve caah min thlak awk ah a hammi Mari kha aa kalpi ve. A ni thla kha a tling dengmang cang i, khika an um lioah khan a hrin can kha a phan. Fapate cu a hrin i cucu a fater a si. Puan in a zual i caw rawl einak kuang chungah khan a thlim-riaknak khualbuk ah khan an caah hmun a um lo. Ram chungah David hrinsor vialte min thlak awkah anmahle khua cioah an kal caan cu sikaw, lampi le riahnak inn paoh cu minung an khat ko lai. Riahnak khualbuk le i dinhnak hmun zong ham cia dih a si ko lai. Kalnak le riahnak zong a cuh in i cuh dawh an si. Chungkhar unau i hmuh caan, i ton caan le hmun khat ah riah tti caan a si. America ah Thanksgiving hi November zarh donghnak a si. Cucu an sunsak ngai ve i, chungkhar i hmuhton caan le rawl dum ti caan ah an hman. Rian ah a khunh a la kho lo zong hi ni ahcun a khunh pek dih a si. Hi bantuk caan ahhin khual a tlawngmi an tam ngai i, i manh lo cio a si. Tlawmpal ah Christmas ni le caan nih a hun zulh i, rian tam aa peh. Mi paoh i manh lo cio a si. Cucaah America um Laimi holh cu ka bizi tuk ti a si. Bizi tuk cang ahcun, Pathian he zong appointment lak khawh lo, hmun le caan pek khawh lo a si. Bawi Jesuh a chuah lio hrawnghrang ahhin mikip cu anmahle rian herh ah an buai cio lai i, naute Jesuh le a nu biak chonh can zong an ngei kho lai lo ti cu mitthlam in cuanter khawh a si. Caw rawl einak kuang an hei tan pah ko zongah lungthin le pum i manh lo cio cu an si hna lai i, Jesuh tonnak hmunhma le caan pek khawh a har kho men. Atu chan cu minung pakhat le pakhat iton zong hi appointment lak hau lengmang in a um cang. Ton kan duh i, can le hmunhma na ka pe kho hnga maw? ti a si lengmang. Minung sinah cun appointment lak khawh lengmang a si pah ko nain Pathian he i tonnak dingah appointment lak hi a tlawm ngai. Khrihfabu cawlcanghnak le Nubu nih thlacamnak an ngeihmi ti bantuk hmanh ah micheu cu a hmun le a caan kan pe kho tawn lo. Tukhal pawl cu lamhlapi in an ra; an laksawng te he naute Jesuh cu a nu he khan an va ton i, cu an laksawng te he cun an biak. A caan an pek, hmunhma zong an ngei. Pathian Fapa cu hi vawlei cungah a thlite le hmun kiangte ah run inn ngei lo in a chuak. Cun khualtlawnnak puan in zual a si. Hla phuahtu Emily E. Elliot nih Hi Bible caang Luke 2:7 lakin Hlabu 85 kha a phuah. A hla bia a ttialmi cu; A caang khatnak ah; Bawi tthudan le suiluchin kha na kaltak, asinain Bethlehem ahcun ihnak hmun hmanh kha na ngei lo. A caang hnihnak ah; Vancung ah lawmhnak hla an sa; asinain vawlei ah toidornak na in. A caang thumnak ah; Vawlei ah sermi saram cenghngia le vate nih hmun an ngei; siseh Pathian Fapa cu vawlei ah ihnak hmun hmanh a ngei lo” . A caang linak ahcun; Jesuh a ttum tthan tikah, ka pawngah um tuah a ka ti lai” tiah hla dawh ngai a phuah. Hi hla nih Jesuh chuahnak hmanthlak a fianter ngai. Vawlei misual khamhtu Jesuh cu vawlei a rat lioah inn nuam le inn dawhpi kha i thim loin lothlo le sattil zuattu inn tu kha aa thim deuh. Run inn ngei lo le khual puan in zual kha aa thim deuhmi a si ko rua hih. A kum a hung upa deuh i kum 12 a si lio zongah Jerusalem lei lampi le biakinn ah a nu le pa nih an va hmuh. Inn ah siarem ngai in a um lo. A kum a hung upa hnupi zongah pakhatpa nih “Na kalnak paoh ah kan zul lai” tiah a ti i, Jesuh nih cun “Cenghngia nih kua an ngei i vate nih bu an ngei, sihmanhsehlaw Mi Fapa cu riahnak hmun hmanh ka ngei lo” tiah a ti (Luke 9:58 ). Hika Jesuh biate hi minung ruahnak in ngaih ahcun, lung a hno ngai. Jesuh nunnak lampi cu caw rawl einak kuang in vailamtahnak tiang a kalmi a si. A donghnak ahcun, an vuinak a thlanpi zong kha a lawng ko. A rian liimnak dingah hmunhma lakin le siarem tein nunnak caan hman hi a si kho hrimhrim rua lo. Atu kannih chan zongah Bawi Jesuh a chuah ni le caan cu rian tam lio he aa tong, khualtlawn caan he aa tong. Cun khuasik can a si fawn. Cu tikah Pathian biaknak a caan pek a har, tenh khawh a har; ruah can zong a um kho tuk lo. Jesuh cu hmunhma le a caan kan pek khawh lo hmanhah amah tu nih a khualtlawnnak a donghnak bik i a chimmi cu “Ka Pa inn chungah khaan tampi a um ko i cuka i nan caah hmun va timh awkah ka rak kal lai” (Johan 14:2) a ti. Vawlei ah riahnak hmun le tonnak caan a ngeih lo hmanhah amah nih cun hmun a kan timhpiak peng ko. Van innka cu a hun lai i, ahohmanh lam pawng le innka ah khuasik bu in hngah a um ti lai lo. Run rep lo ah a chuak i, riahnak hmun a ngei lomi a si ko nain, kan caah run inn dawh a kan timhtuah piaktu Khamhtu Jesuh cu thangtthat peng usih!

Philip Hrengling

Maryland , USA

Ref:: [CIM] CIM Caan Hmannak (Dec 19, 2010)

THAWNGTHA.yahoogroups.com>

Tu Kum 2010 X'Mas Kan Thinlung Chungah

Unua hna kan nunnak cio ah Pathian nih damnak he lam a kan hruai hna i tu kum 2010 X'mas dam tein kan phan tthan cang hna lai tu kum X'Mas ah hin nang zei tal i na thinlung chungah Pathian aa phuang i Pathian dawtnak zei tal in a lang maw?A tu lio caan hi Jesuh nih kan thinglung chungah hmuhma lak i um hmun a kawl lio caan a si a tang Bible ca caang hi voi khat tein van rel tthan hna uh si law.Matthai 2 :1Jesuh cu, Judea ram Bethlehem khua ah, Siangpahrang Herod bawi a si lioah khan a chuak. A chuah tlawmpal ah cun arfi zohthiammi hna kha nichuahlei in Jerusalem khua ah khan an ra i, ²“Judah siangpahrang a si lai dingmi ngakchia a chuakmi cu khuazei ah dah a um? A arfi nichuahlei in a chuah kha kan hmuh i amah biak awkah cun atu hi kan ra,” an ti.

³Cu bia cu Siangpahrang Herod nih a theih tikah a awlok a chong ngaingai i cu bantuk cun Jerusalem khuami vialte hna zong kha an si ve. ⁴Tlangbawi upa vialte hna le Phungbia cawnpiaktu saya hna kha a pumh hna i, “Khuazei ah dah Messiah cu a chuah lai?” tiah a hal hna. ⁵Annih nih, “Judea ram Bethlehem khua ah,” tiah an leh. “Cun Profet nih a rak ṭialmi cu hihi a si:

⁶Judea ram ummi Bethlehem khua,

• Nangmah cu Judah ram khuapi hna lakah a hme bik na si naisai lo;
• Zeicahtiah nangmah chung hin hruaitu pakhat, ka mi Israel mi hna tuukhal a si dingmi cu
• a chuak lai,” a ti. *2:6: Mik 5:2

⁷Cucaah Herod nih cun nichuahlei mifim hna cu a thli tein a kawh hna i zeitik set ah dah arfi kha a chuah ti kha fiang tein a hal hna. ⁸Cun Bethlehem khua ah khan a kalter hna i, “Va kal u law ngakchia kong kha ṭha tein va hlat u; cun nan hmuh tikah ra ka chim ṭhan u law kei zong amah cu ka va bia ve lai,” tiah a ti hna.

⁹Siangpahrang nih a ti hna bang cun an kal; cun nichuahlei ah an rak hmuh cangmi arfi kha a lang ṭhan i an hmaiah a kal i ngakchia umnak cungah cun a dir. ¹⁰Arfi an hmuh ṭhan caah cun an i lawm tuk hringhran. ¹¹Inn chungah khan an vung lut i ngakchia kha a nu Mary sinah cun an vung hmuh. An khuk an i bil i an biak. Cun an zal chung khan laksawng an i chuah i an pek, cu an laksawng cu sui le frankinsen zihmui le mura zihmui an si.

¹²Pathian nih an mang ah Herod sin i kir ti lo ding khan a chimh hna i cucaah lam dang in an ram ah khan an kir.

13Annih an kal hnuah Bawipa vancungmi pakhat cu Josef sinah khan a mang ah a lang i, “Tho law, ngakchia le a nu kha i kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih ngakchia hi thah awkah a kawl lai,” tiah a ti. ¹⁴Josef cu a tho i ngakchia le a nu cu Izipt ram i zampi awkah zan ah khan a thawhpi hna. ¹⁵Cuka ah cun Herod a thih tiang an um. Hi thil cu Bawipa nih profet ka in, “Ka Fapa cu Izipt ram in chuah awkah ka auh,” a timi bia tlinnak caah khan a si. *

X'Mas Hla Kan Ngai Hna Lai