A tuanbia umtuning kan zoh ta lai. Phungbia cawnpiaktu saya pakhat Jesuh sinah a ra i Jesuh kha foih duh ah bia a hal. “Saya, zungzal nunnak hmuh awkah zeidah ka tuah lai?” a ti. Hi pa hi Judah mi lakah Moses nawlbia a thiam ngaimi, mi bia a ceih lengmang mi si dawh asi. Jesuh sin a rat tikah Jesuh kha a upat ngaimi aa lawh ter nain a biahalnak le a nunning aa kalhmi pa a si. Zeicah tiah amah hi nawlbia thiam asi caah hi bia hi ka hal lai i Jesuh hi ka foih lai tiah aa tim (Laimi khrihfa cheu khat, mi pakhat khat bia kan hal tik hna ah kan theih na rawraw in mi san(test) a hmangmi kan um tawn). Jesuh nih hi mi pa hi Nawlbia a thiammi asi ti kha a theih caah “Nawlbia ah zeitindah aa ttial?” tiah biahalnak tu in a leh. Phungbia cawnpiaktu saya pa nih cun aa thawh tthan i “Bawipa na Pathian cu na lungthin, nunnak, ruahnak, thazaang dihlak in na dawt lai, na innpa zong kha nangmah naa dawt bantuk tein na dawt lai a ti, ” tiah a leh. Mipa nih hin minung nih kan tlinh khawh lo ding a si caah hi kong ah hin cun Jesuh hi biadang deuh in a ka leh cang lai tiah a ruah men lai nain Jesuh nih a lehmi cu, “Na bialehnak a hmaan; cucu va tuah law na nung lai” a ti. Mipa nih cun thiam a hun i cuh tthan. Nawlbia thiam kan ti cu bialehawk cu tamtuk ngei ve kaw, “A hodah ka innpa cu asi kun?” a ti tthan. Hi biahalnak kong he pehtlaiin Jesuh nih tuanbia pakhat hmang in a leh.
Jerusalem in Jericho lei ah a kalmi pa kha lampi ah damiah nih an velh i a thil vialte an chuh dih, thil lo nung loin lam kam ah an kaltak. Cu lam ah cun tlangbawi pakhat a kal celngel. Mizaw pa cu a hmuh ko nain lam khattelei in a hrial i a kaltak. Levi mipa a rat than. Mizaw pa cu a hei kalhnawh, a bih cu a bih tak nain a kaltak ve. Samaria mipa zong cu lam zulh in khual a tlawng ve. Mizaw pa cu a hmuh tik ah a zaang a fak i a bawmhnak. Jesuh nih phungbia cawnpiak tu saya pa cu hi pathum hna ah hin mizaw pa i a innpa cu a hodah asi tiah a hal. Mipa nih Samaria pa kha tiah a ti lo, “Amah a zaangfahtu kha ti” tu in a leh. Zeiruangah tiah cun Judahmi nih cun Samaria mi cu an nautatmi, zei ah an rel lomi hna an si. Damiah nih an tteihmi pa sin i a phanmi minung pathum kan zoh hna lai.
Tlangbawipa: Tlangbawi cu Judah mi hna lak ah miphun sang an si. Mi nih upatmi, biakinn chungah rianttuantu an si. Hi tlangbawi pa nih hin mizaw pa kha zei bantukmi a si kha a thei lo. Judahmi asi lo ahcun tongh nak nawl onh asi lo. Athih cang chinchap i tongh sual ah cun cu tlangbawi cu a thurhnawm cang. Cu tin a thurhnawm ahcun Biakinn chung thawhlawm le cheuhra cheukhat hna kha a khawl, cohlang kho ti lai lo, zeicahtiah Judah phung ningin thianhnak a tuahta a hau.
Levi mipa: Levi hrinsor kha Levi mi tiah auh an si i tlangbawi hna rian bawmtu an si. Tlangbawi bantuk in thiannak phung a zultu an si. Mizaw pa kha hei zuan hnawh sehlaw, a bawmh lio ah mi nih an hmuh sual ahcun a cung upa sinah report an tuah lai i phungbuar ah ruah asi hnga. Amah humhimnak lam lawng a ruah caah mizaw pa kha bawmh lo in alanhtak.
Hi a cunglei tlangbawi le Levi mipa nih hin mizaw pa an bawmh lonak a ruang cu “Hi mizawpa kan bawmh ahcun kanmah tu sualphawt le thianlo co ter kan si lai” ti an phang. Anmah lei humhimnak, anmah lei kap lawng kha an ruat. Hi pa kan bawmh ahcun cu tin a si lai ti kha an phang i bawmh loin an lanhtak.
Samaria mipa: Samaria mipa tu nih cun hi mizaw pa hi ka bawmh ahcun zeidah ka cungah chiatnak a tlung lai ti kha a ruat lo. Phundang in chim ahcun amah cung i a tlung ding kong kha biapi ah a chia lo. Cu nak in biapi deuh ah a ruahmi cu “Hi mizawpa hi ka bawmh lo ahcun a cungah zeidah a tlung lai, zeitiang khi dah a sining a si hnga” ti tu kha biapi ah a chiah. Keimah nih hi mipa hi ka bawmh lo ahcun hi mipa cungah zeithildah a cang hnga? A thih hna a thi sual lai maw? ti kha a ruat. Hihi a cunglei minung pahnih he an idannak bik cu asi. Ka bia ka nolh tthan ah cun tlangbawi le Levi pa nih cun “Hi mizawpa kan bawmh ahcun kanmah cungah zeidah a tlung lai?” ti lawng an ruat. Samaria mipa tu nih cun “Hi mizawpa hi ka bawmh lo ahcun amah cungah zeidah a tlung lai?” timi lungput tu kha a ngei deuh. Hi thinlungput nih hin Bible caah mittha tiah auhmi ah aa telnak asi.
U le nau hna, miphun rian kan ttuannak ah, khua le ram ca rian kan ttuannak ah, Pathian rian kan ttuannak le khrifabu rian kan ttuannak hna ah Samaria pa lungput hi kan ngeih aherh ngai rua tiah ka ruah. Voitampi cu thil hmete asi ko nain kan i theihter lo tik ah thilpipa a cang khomi thil tampi a um tawn. Khua le ram caah rian pakhat khat ttuan kan i timh tikah, cu tin kha tin, cuzat khazat in tangka kan thawh lai tiah khua kan khan tikah hi rianttuannak ah ka tangka, ka caan, ka thazaang ka hman ahcun keimah le ka chungkhar nih tuah kan i timhmi thil tampi pei a kan tlolhter lai cu, tiah kan ruahsual caan a um kho men. A si nain kan i tel cio lo ahcun thil kan timhmi ah tlam a tling lo sual hnga maw, chambaunak, thil ttha lo tiang a phan sual hnga maw tiah, kanmah sungh ding tuak tuk nain midangca, khua le ramca, miphunca, khrihfabu le Pathian ca ah chambaunak a si sual hnga maw ti tu hi biapi deuh ah a chia khomi, Samaria pa bantuk lungthin a pu khomi kan si ding hi Bible nih a kan cawnpiak duhmi a si. Nihin i laimi nih, kan senthang miphun nih kan tawn cuahmahmi Thailand ram accident le thihlonak, tlaihkhihnak, harnak hna chung hin Samaria mittha pa bang in midang caah kut a samh khomi, lungthin a pu khomi kan si khawh nak hnga, careltu dihlak kan caah tthahnem santlaiin Pathian nih thluachuah kan pek piak hram ko seh!!
Miphun ah nan unau,
Cung Lian Thawng
Hong Kong
