CCN Le Pu Stanley ( NY Life Insurance)

CCN Channel nih Pu Stanley cu New York Life Insurance Company i a riantuannak kong biahalnak an ngei.Pu Stanley hi kan hnu thla in Dallas pengah a tu tiang a caam rih tiah thawng kan theih.Kan hnu thla chungah khan Thantlang Peng  Thangzang khua mi Pi Iang Khen a thi Pi Iang Khen hi  New York Life Insurance a caw mi a si thlakhat ah $11 a pe mi a si thla 7 hnu ah  ruah lo pi in a thih hi a si caah a pek cia mi  dihlak cu  $ 77 a si  New York Life Insurance a tuah lai i  Pu Stanley  nih bia a kamh btkin US $ 100,000 CU Pu Stanley nih a chungkhar cu a chuah piak hna tiah thawng kan theih.A tu hi kan hnu thla in a tu tiang TX um Laimi nih New York Life Insurance cawk dingah an cah lengmang caah a tu tiang TX ah a camnak a si.

A luan cia mi caan zongah Laimi NY Life Insurance a caw mi a thi mi tampi an um cang bia an kamh hna bang phaisa an liamh bak  hna Company dangtkin an si lo nak Laimi tampi nih kan fiang chin  leng mang.Dallas ah hin Van Ling timi zong  tu kum thal chungah a rak thi i Washington ah kan mah Senthang kan nau Pa Pa Zam  zong a rak thi US $ Ting khat leng Pu Stanley nih mithi pa a chung le  a rak chuah piak ve hna.Cheukhat nih Pu Stanley hi puai-sa btk men2 ah a ruat mi kan um len an chim mi zong kan theih pah lengmang.Minung cu  kan duh zong duh lo zongah a thi dingmi lawngte kan si hna caah NY Life Insurance theng a si lo hmanhah  Life Insurance   ngeih a tthatnak hi thei kho hna uh sihlaw cu thih loh kan ton sual caan zongah  chungkhar cingla rualchan le Khrihfabu an luri a nem deuh hnga  i tak mi chungkhar  ca zongah thilttha a si lai ti hi  Laimi tampi nih  hngalh kho hna uh sihlaw a ttha ngai lai.

 

2012 UCCC X'mas

2012 Christmas cu kan theih manh hlan ah a dih ko cang.Kan nih UCCC zong nih sunglawi tak in caan kan hmang ve hna.Van Biak Nu  le Pa nih  Caw pakhat le Vawksa  in an kan tuah piak.Minung 200-300 kar kan si hna kan caan hman ning tete hna zong mipi thinlung a hlip hlau kan thawngttha theihmi zong a ttha khun in kan theih X'mas hi cu a rak i phun dang hrim2 ko.A ruah hlanah kum thar kan hmang cio tthan hna lai Pathian nih in um pi hna sehlaw thluachuah on pe ko hna seh.A thangah UCCC 2012 X'mas kan hmanthlak tlawmpal rak kan zoh te uh.Video tu cu tam pi kan zaih nain DVD in chuah an duh caah Online ah kan tar rih lo.

"Christmas Laksawng "

UCCC unau nan dihlak cung ah Merry Christmas lunglomh nak le hnangam daih nak um hram ko seh. A kan khamh tu kan Bawipa Jesuh Khrih chuah can kan phan than cang. Kan riantuan nak Company cio nih Christmas Card lak sawng ah an ka chuah cio hna. Zum tu pawl nih kan inn cio ah an ra hna le laksawng tete an kan pek cio . UCCC unau dihlak cah a tang lei Christmas kong he pehtlai in theih awk tha tete ka vun thlah ve. A rel tu nan dihlak cah Chrismas kut tlaih nak le laksawng ah siseh ti ruahchan nak ka ngei. Fran Lal i Christmas Facts chung ta ka lak chin mi a si.

1.  Bethlehem khua ah minung 30,000 hrawng an um.

2. Christmas tree industry ih riantuan tu hi minung 100,000 hrawng an si.

3. Kum khat ih Christmas laksawng peknak i an hman mi laksawng tuam nak hnawm pawl hi 4 million tons tluk a si.

4. Ram mipi sin ah TV he Christmas Message a chim hmaisabik tu cu Queen Elizabeth a si.(1957)

5. Christmas Stamp hmang hmasabik ram cu Canada a si (1898).

6. Bazaar (market/store) busy bik caan cu Dec 24 zaanlei nazi 3-4 pm a si.

7. "Silent Night" (Daaiziar zaan) timi hla cu Joseph Mohr (Austrian priest) nih 1818 kum ah a rak  phuah.

8. Norway ram chung i a um mi hnam (witches) a zum tu pawl nih cun Christmas Eve zaan ah nupi fir a tha tiah an ruah.

9.Bethlehem khua cu Jerusalem i a thlanglei 8km hlatnak ah a um.

10.Christmas Tree dawh ten a tamh hmasa bik tu cu protestant reformer Martin Luther (1483-1546) a si.

11.India ram ahcun Christmas tree ah Faar kung (pine) hnak in hnahcang kung an hmang deuh.

12."Noel" timi biafang cu French holh in a rami a si i "Thawngtha bia" tinak a si.

13. Christmas tree cung ah laksawng thlai a thoktu cu Druids pawl an si i, an thlainak san cu 'thil vial te hi thingkung nih a kan pekmi an si' tiah an zum cah a si.

14. USA ah, Christmas ni cu holiday ni i a hmang hmasabik state cu Alabama a si.( 1836)

15. Vulei cung minung 48% tluk nih Christmas puai kan hman.

16. A tlangpi thu in American minung mi pakhat nih kum khat ah Christmas card 28 tluk an kuat. England ram ah cun mi pakhat nih 47 tluk an kuat.

17. John Lennon le Yoko Ono nih "Happy Christmas (war is over)" ti mi hla an rak phuah. Asinan a awthluk cu hlanlio Folk song ta an lak chin mi a si.

18. Santa Clauses tambik hmun khat i an um ti nak cu Northern Island i Derry khawpi ah a si, minung 13,000 nih Santa Clauses hnipuan an ni hruk hna (sept 9, 2007). ( Guinness world record cah an tuahmi a si)

19. Kum tin minung 2.5 million tluk cu NewYork City ih a um mi Rockefeller Christmas Tree zoh dingah an ra peng ti a si.

20. England nunphung daan ahcun Christmas zaanriah cu hmun khat te ah Vok lu an ei ti tawn.

21.Europe ram tam deuh ah cun riantuan tu dih lak an thla khat lahkhah hi Christmas Bonus ngah ding in phung lam an ngei.

22. 1647 kum Puritan pawl chan ah England Parliament nih Christmas puai a tuah tu poh tlaih dih ding in phunglam a rak tuah.

23.US President lak ah White house ih Christmas tree a chia hmasabik tu cu Franklin Pierce a si.

24. Chrismas tree cinnak hmun cu acre 1,000,000 lenglo hrawng a kau.

25. Korean holh in 'Merry Christmas' ti hi "Sung Tan Chuk Ha " ti a si.

26.“Jingle Bell” timi hla cu 'Thanksgiving' cah an phuah mi hla a si.

27. Christmas Postage stamp tuah hmaisabik tu ram cu Austria a si (1937)
28. Christmas hi South Africa ah cun an Summer Holiday a si.

29. 1995 kum ih survey an tuahnak bantuk a si ah cun England ram i Uico 70% tluk cu a ngeitu nih Christmas  Laksawng an pek peng ve hna.
30. Diamond an zuar mi 32% tluk cu Christmas Holiday can ah an zuar mi an si.
31. Britain ahcun kumkhat ah minung pakhat nih Christmas card 50 tluk an kuat.

32. Christmas Card an rak tuah thok nak cu 1843 kum ah a si.
33. Japan ram ahcun Christmas Card a sen i kuat cu thil dawhlo ngai (bad etiquette) a si.
34. Father Christmas cu kumzabi 4 lio ah Turkey ram ah a chuak.

35. Santa Claus ih hnipuan a sen le a rang an ni hruk nak a ruang cu artist Haddon Sundblom nih Coca-cola Company cawngia nak cah an tuah mi a si.
36. Mifim cheu khat pawl nih an tuak nak ah cun nichuah lei mifim pathum nih an rak zulh mi Arsi kha comet pa khatkhat a si lo ah Uranus a si lai tiah an zumh.
37. Christmas Father i a address pakhat deuh cu 'North pole' a si. North pole cu continent cung i a um mi a si lo. Arctic ocean cung i a um mi a si.

38. Nichuah lei mifim pathum hna an min cu Casper, Balthazar le Melchior hna an si.
39. Mah mifim pathum hna hi " Zoroastrianism" timi biaknak a zum tu pawl an si i an biaknak bantuk in Arsi zoh thiam an si.
40.Bible tuanbia tialtu pawl nih cun Melchior nih Sui laksawng a pek, Balthazar nih Frankincense rimhmui laksawng a pek i Gasper nih Mura zihmui laksawng a pek tiah an ti.Mah mifim pathum hna hi Arabia,Persia le Babylon ram mi an si lai tiah an zumh.

41. Kumzabi 20 chungah White Christmas vei 7 tiang a ngei tu cu England ram lawng a si.

42. 'Jingle Bell' timi hla cu 1857 kum ah James Pierpont nih a rak phuah .
43. "Twelve Days of Christmas" laksawng na hmuh ah cun, laksawng zaten 364 na hmuh lai.

44. Kumkhat chung ah Christmas season hi mah le mah i thah a tlawm bik caan a si.
45. US ah Christmas ni hi Holliday siseh tiah hmahnung bik biakhiah nak an rak tuah nak cu Oklahoma state ah a si (1907).
46. Christmas tree cung i mei van ding idea chuah hmaisabik tu cu 'Thomas Edison ih assistant "Edward Johnson" a si.

47. Vulei cung dihlak ah Christmas he a pehtlai mi thilri zuar mi dihlak chung in then 6 then 1 cu US ram chung ah zuar a si.
48. Christmas tree manfakbik cu United Arab Emirates ah 2010 kum ih an tuahmi a si. US$ 11 millions hrawng a man.
49. December 26 cu "Boxing Day" a si. A thoknak cu England ram i hlawhfa pawl nih milian pawl nih Christmas an tuah nak ti le rawl hleimi kha Christmas thaichun ah a ni lak hna i thingkuang he an ni tin pi hna.

50. 'Twelve days of Christmas' timi cu Dec 24 in Jan 5 tiang a si.



Merry Christmas
Saya Tiam ( Shalom Thang pa )
Wheaton,.USA

A Sunglawi Khunmi X'mas

X’mas thla le lai tlang te kha. Khua a sik nawn. Kan thil thar ngaihchun te i hruk lai kan bawh. I dawh duh ah khuasik zong kan in. Lengval rual hna nih inn tamhnak ding ah farkung hna kan la, cherry par in kan thuamh. Pupuhlut kan chem. Hngakchiarual zong muthai tampi an nei i nuamtak in voktutuhlut an chuih hna. Nubu pawl nih buh an chumh. Upa deuh nih voksa le ciattani tak nawnte an tuah. Uico a vengmi upa zong an rak um ve. Zan pumh a van dih cun upa deuh pawl leng an i khawm. Mino pawl social kan tuah. Zuri deuh pawl nih upa le pastor an lawi cang maw tiah an ngiat hna. Zei si paoh ah Jesuh chuah thla cu Laimi kan i lawmh bik thla kan cah a sunglawi bik thla a si.

Kan nule an lungre a thei. Ka fale thil thar cawkpiak lo cu an ti. Thawhbur kan pe kho lai maw an ti. X’mas zingah ar thahawk a um lai maw an ti. Khat leiin leng khawmh lio lam ding seihku an zin ve. Chiti langtan tein tiah a baa in a lami zong an um. Kan pale nih X’mas lai ram veih ah an baa. Kah lo sual ah tiin vok cu an i zoh cia. Nitlang toh pah in an keden thing tete cu si an thuh hna i an teih len hna. Ho keden dah a tleu tiah an i zuam. Ho te sang vok dah a ngan deuh an ti. “Maw Bawipa, hi hrai hin ka luater ko” tiah a tang ai cum i thla a rak cammi vok le ar, caw le na zong cu an rak um ve. A sunglawi khun ko X’mas cu, kanmah caah.

Mino carolling kan van vak. Hla kha kan aw thareng in kan sak. Nungak kan ngia pah. Nungak pawl zong nih tutan tal ahhin ka tangkai hnga maw an ti ve. “Chin Iang Pa te chungnih muthai an chuah nan i lawm maw?” “Lawm!” Thlacam a sau deuh an kan van zai pah. Inn kip nih an siantawk laksawng an kan pek. Fangvoi hna banhla hna a kan pemi zong an um. Zei si paoh ah mino ta kan ti. Picnic kalnak ah kan hman lai kan ti. A donghnak cu Zai Tha Iang te inn ah sanpuih eipah in caan kan hmang lai tiah mino upa nih an van thanh. A sunglawi khun ko mino kan caah.

X’mas caan ah kan i nuamhnak bel hi lenglei lawng siloin naute Jesuh Khrih he ai tong taktakmi kan si cio nak lai i thlacamnak le thiltha tuahnak in i zuam hna usih. 

Chan Thawng Lian

2012 Christmas Lawmhnak

Dear U le nau hna,

"Jesuh he cu na hme loh" timi capar in 2012 Christmas kan don hna.

......................................................................................................

JESUH HE CUN NA HME LOH!

Sang Uk Cung( Sangtinpa)

Baibal relnak:

Matt 2:6, “Judea ran ummi Bethleihem khua, Nangmah cu Judah ram khua hna lakah a hme bik na si naisai lo; Zeicatiah nangmah chung hin hruaitu pakhat, ka mi Israelmi hna tuukhal a sidignmi cu a chuak lai” a ti. (A dang rel chih dingmi-Micah 5:2)

Biahmaithi

Jesuh chuhnak kong hi Biakamthar chungah hmunnih ah kan hmuh khawh. Pakhatnak ah Dr. Luke nih cun Jesuh le chungkhar kha Nazareth ah an um I Bethlehem ah milu rel ah an va kal, cu lio ah Jesush hi chuah dawh in a um. (Luke 2:4).  Pahnihnak cu Matthai catialtu nih a tial ve ningah cun Bethlehem an um lio ah Jesuh a chuak.(Matt 2:6-7).  Herod nih kumhnih tang hngakchia a thah hna tikah Izipt ram an zam. (Matt 2:16) Izipt ram in an kir hnuah Nazareth ah um hmun an khuar.(Matt 2:23).

Matthai le Luke nih an tialning ai dang ngai nain fiang tein hngalhmi cu Jesuh a chuhnak cu Bethlehem a si ko.  Thawngthabia Mark le John nih cun  Jesuh chuahnak kong hi an tial lo nain Nazareth I a umnak kong cu an tial ve.(Mark 6:1-4; and John 1:46. )  Jesuh chahnak kong tialmi dangah 2005 lio I chuahmi “Archaeology magazine, ah Aviram Oshri timipa nih a tialmi capar ahcun Jesuh khrih a chuahnak hi Galilee peng Bethlehem khua a sinak kha fiang tein a langhter.(ref:Aviram Oshri,"Where was Jesus Born?",Archaeology,Volume.58Number6, November/December 2005. )

Tukum Chistmas caan ah  thlarau mit in van zoh than dingah ka duhngaimi  a um. Cucu Jesuh khrih chuahnak kong kan chim fate Jesuh tuanbia he aa then kholomi khua pahnih cu ‘Jerusalem’ le ‘Bethlehem’ khua hi a si.

1. Jerusalem Khualipi

Jerusalem Jesuh khrih chan ah khuapi dawh taktak a si.  Isaiah 52:1 le Nehemiah 11:1 ahcun “Pathian khua thiang “ tiah aumi  a si.  Hi khua cu vawlei cung biaknak a simi Judah biaknak , Khrihfa biaknak le Islam biaknak hna I khua thiang tiah auhmi khualipi a si. I siangpaharng 14:21 ahcun Pathain nih amah min chiatnak caah a thiammi khua a si. Jeruslam hi khua he an I dannak cu min phunphun in auhmi khua  a si. Abianah, David khualipi, Pathian khualipi(Isiangpahrang 14:21)… tbk in an auhnak hi baibal ah min 50 hrawng kan hmuh khawh.  ‘New Jerusalem’ ti ahcun Khua dawhtuk le khuanuam tuk a sinak kha vancung ram he tahchun in chimmi bia ah hman a si. Jesuh chan zong ah Jerusalem hi Jesuh nih a dawtmi khua a si. (Matt23:37, Luke 13:34-35).

Cu tluk I Jesuh nih a dawtmi khua, khua dawh le khua lianngan, vancung he hmanh tahchunmi khua, vawlei ngeihchiah I a rummi le lengdawh thatha an umnak khua cu Jesuh nih cun a tah ko. Luke 19:41-44 ahcun, “Jesuh nih khan Jerusalam kha a hei neih chin lengmang I a hei hmuh tikah a tha I nihin ah hin daihnak caah zei a herh ti kha hei hngal law cu mu!. Sihmanhseh law cucu na hmu kho tung lo...”. tiah a ti.

Zeiruang ah dah Jesuh nih Jerusalem khua cu a tah? A ruang cu Matt23:37, Luke 13:34-35 fiangtein a langhtermi cu “ Maw Jerusalem, Jerusalem, Profet kha na rak thah hna i nangah sinah Pahtian nih a run thlahmi lamkaltu hna kha lungin na rak den hna. Arpi nih a fale cu voi zeizat dik ka kut in huh ka timh hna I an duh lo.  Atu cu na inn cu kin taktak in a king cang lai” tiah Jesuh nih a rak ti cang mi a si.

Fiangternak: U le nau hna Jerusalem bantuk in a lianngan ngai tung I Jesuh nih an tahmi na si sual ve hnga maw? Na sining kha van I chek tuah! Na nunnak ah Degree sangsang he ngei i, na chungkhar ah mirum lianngan si tung I Jerusalem bang Jesuh a tahmi na si sual hnga maw? Na khrihfabu kha biakinn thatha le thilri tling khitkheh he ngei ko, Jesuh na ngeih lo ahcun Jesuh nih a tahmi na si ve ko lai. Tha tein ruat tuah. Jesuh nih an tahmi na si sual lai maw?

2. Bethlehem

Bethlehem khua hi Jesuh chan lio ah inn 100 hrawng an umnak khua  a si. Bethlehem sullam cu Arabic holh in ‘Sa inn’( house of meat),  Hebrew & Aramaic holh in ‘Changreu inn’ (house of bread) tinak a si. Sehmanhsehlaw hi khua hi harnak le mangtam ruangah Elimelak le Naomi te chungkhar hna nih Moab ram ah an rak pem takmi khua a si. (Ruth 1:2). Bethlehem khua hi  Rili in 775 meters (2,543 ft) a sannak, Jerusalem nakin 30 meters (98 ft) a sang deuhnak hmun ah a ummi a si. Bethlehem hi Judea ram chaklei tlang ah a ummi khuate a si.  Hi khua in  10 kilometers (6.2 miles ) a hlatnak chaklei ah Jerusalem a um.

Bethlem khua hi khua Judea ram chung ah khua hmete si hmahsehlaw, Jesuh a chuhnak khua a si caah vawlei cungah khua lianngan tampi nakin theihhngakmi le chawr awk tlak khua ah a hung cang.

Fianternak: U le nau hna nang le kei zong sikfak santlailo,midang sinah mi hmete,khungkhar dang sinah sikfabik, Khrihfabu dang sinah bu hmebik le santlai lobik, khua dang sinah khua hmebik le santlai lobik sihmah usih, kan pumpak, kan inchungkhar, kan khrihfabu, kan khua te ah hin Jesuh a chuah ve ahcun milianngan kan si ve ko ti kha philh hlah. Jesuh he cu milian ngan kan si. Zecaah tiah Kan Pathian cu khuaruah har fimchimtu,a thawngmi Pathian, zungzl hmunmi pa, Daihnak bawi a si( Isaiah 9:6). Paul nihcun, “Sifak ngai kan lo sihmanhsehlaw mi tampi kan rumter hna, zeihmanh a ngei lomi ko kan lo, asinain a taktak ti ahcun kan ngeih lomi a um lo.” an ti.( II korin 6:10b) Halelujah!

 

3. JESUH HE LOCUN…

Jesuh Zultu nunnak kan zoh tikah Jesuh thih hlan le thih hnuah an un tampi ai dang. Abianain Peter hi bawi Jesuh nih “Vancung tawh” “a pekmi a rak si(Matthew 16:18) nain Jesuh an tleih taktak tikah cun voithum tiang a hlawt ko.(Matt 26:75).  Cu bantuk zumtu menmen a rak si ve caah Peter hi Jesuh nih hin a rak zum taktak mi pa a rak si lo.(Luke 22:33-34,Johan 13:37-38,Matt 26:33-34). Asinain Jesuh a thihnak in a thawhthan hnuah ni ( 40) chung zultu hna sinah voitampi a nungthan hrimhrim ti kha zeihmanh zumhnak lo awk tha lo ding in lam tampi a langh (Lamkaltu 1:3) tikah Zultu hna le a hlei in Jesuh zultu ngenge a si I thawhthannak a zumlo mipa Thomas sinah a langh tikah an nun kha a thleng bak.( luke 24:36-42, John 20:19-24,mark 16:14). Cu hnu lawnglawng ah Jesuh khrih zultu vialte cu an nun ai thleng I an zumhnak khua a dei. Jesuh thlarau hecun hnangamnak tling an ngei, an zumhnak ral a tha, hro an kual, an nun nih mi a hip cang I, thiangthlarau thawngnak an ngei.(Lamkaltu 1:8). Cucaah khuachia an thawl( lamkaltu 16: 16-24), Peter hmanh nih khan mizeng an damter hna.(lam3:6).  

Jesuh thawhthannak a zumlo mipa Thomas zong Jesuh he an van I ton taktak tikah cun a um kho vet i lo I, India le ah a rak I thawh ve I, 18^th December, 52AD ah India ram a rak phan. Kum 20 chung rian a tuan hnuah 3^rd July,72 AD ah a thi. Hi rian a tuan chungah khuaruah har in a nunnak ah Jesuh ai phuang I minung 19 thihnak in a thawhter hna, minung 260 hi khuachia a thawl piak hna, minung 230 hi thinghmui hma a damter hna, minung 250 hi mitcaw khua a hmuhter hna, minung 220 hi kebeimi a damter hna, minung 20 holh thiam lo a holhter hna, minung 250 mizaw a damter hna. (Rev.Dr.Pratap Digal, Lecture notes, Serampore College, 2012). Jesuh he cun an rak hme hrimhrim loh.

Fianternak:

 1.Na pumpak nunah…

Biaceihtu 13-16 chung kan zoh ahcun Pathian nih Samson cu thawnnak le fimthiamnak a pek.  A sinain cu a thawnngak le a fimnak cu pumsa diriamhnak a simi  hlawhlangnu menmen  le miphundang nu Delilah menmen caah  a can a hman caah a chantim hlan ah a thi.Jesuh locun na rumnak, na fimnak, le kan thawnnak hi tih a nung tuk. Nang teh na zumhnak hi Peter nih Jesuh khrih a thih hlan I a rak zumhning in maw na dir hmun a si peng, Jesuh thih hnu Peter nun dah?  Fimnak le thiamnak a ngeilomi Peter zong nih Jesuh ai ngeih hnuah cun mizeng an damter ko.(lam3:6).  Jesuh hecun raltha tein thawngtha a chim I minung 3000 voikhat teah an lung an I thleng ko.( Acts2:41). Jesuh he cun nah me lo loh!

2.Na chungkhar ah…

Galilee ram  Kana khua I nupithih tupa le chungkhar nih Jesuh kha nupi thihnak ah an rak sawm. (Johan 2:2). Jesuh kha rak sawm han hlah sehlaw an mual a pho tuk hnga a ruang cu an misunghang pei a dih kha.( Johan 2:3). Jesuh he a ummi khungkhar cu an mual phonak vialte kha Jseh nih a  tuah piak viar hna. (Johan 2;7-10). Jesuh he cun na chungkhar kha a hme lo kha phih hlah.

3. Khrihfabu ah…

Nan khrihfabu biakinn that le dawhnak nih Jesuh a lawm ter kho lo. Jesuh he lo cun khrihfabu hna hi company bantuk menmen ah a cang tawn. Jesuh khrih nih zultu Johan sin in Khrihfabu pa 7 (Efesa Khua Khrihfabu, Syrna Khua Khrihfabu, Pergamum khua Khrihfabu, Thiatira khua Khrihfabu, Sardis Khua khrihfabu, Filadelfia Khua khrihfabu, Laodisia Khua Khrihfabu ) sin ah  a cawnpiakmi  ah khan nang zei khrihfabu he dah nai lawh bik? Pergamum khua Khrihfabu hna na si sual ve maw? Nan khrihfabu kha tha tein zoh than a biapi tuk. Khrihfabu hmete nan si zong ah Jesuh he cun nan hme nai sai lo kha philh hlah.

4. Nan umnak khua ah…

Nan khua hi zeitluk khuapi le khua dawh si hmanh Jesuh he locun cu khua cu tih a nunmi khua a si ko lai. Matthai 11:21- 24 le Luke 10: 13-15 kan rel ahcun Jesuh nih Khorazin khua, Bethsaisa khua, le Kapernaum khua hna kha fak taktak in a si hna. Jesuh nih zeibantuk in dah a ti han tiahcun, “Pathian nih Sodom khua cu nangmah nakin a zaangfah deuh lai” tiah a ti. A fak tuk. Nan khua hi Jesuh nih sikmi khua nan si sual hnga maw? Khua bawi le khua upa hna na khua dir hmun kha van zoh tuah! Jesuh a chuahnak khua Bethlehem cu khua hmete si nain Jesuh he cun a hme nai sai lo. Nan khua zong Jesuh he cun a hme lo kha philh hlah!

Biadonghnak ah…

Jesuh nih cun “ Naihmanh! Innka ah ka dir I ka  kingh. Ahohmanh an si ah, a aw a thei I, innka a ka hunhmi cu, an inn chungah cun ka lut lai I, a sinah rawl ka dum lai amah zong ka sinah a dum ve lai.” tiah a ti.(Biathlam 3:20).  U le nau hna, December, 2012 Jesuh khrih chuah caan kan phan than cang. Jesuh khrih kha na lungthin, na chungkhar, nan khrihfabu le nan khua ah a chuah khawhnak lai Jesuh nih nan lungthin inn ka a kingh peng. Naute Jesuh chuahnak ah hin kan lungthin innka kha awnglaw Jesuh  chuah ter ve cang tuah! Jesuh he cun na hme lai loh.

Hi capar a relmi nan dihlak cungah 2012 Christmas Lawmhnak le Daihnak cu nan cungah um ko seh. Amen.

 

 

 Source:: YCCF-International@yahoogroups.com

Zung Cer Maw Lai Holh In Biatoi Chim

Pastor Dawt A Duhmi Hna Caah

            Kan Bible nih kan pastor le hruaitu cungah 1) kan lunglomhnak kan langhter ding ah, 2) zeiruangahdah kan langhter a herh, 3) zeitindah kan langhter awk a si timi a chimnak hna ka van tial lai. United Chin Christian Church, Wheaton Illinois ah pastor kum hnih ka tuan i atu zarh hi a voi hnih Pastor Appreciation week an kan tuahpiaknak a si. Zarh khat chung pastor caah thla an cam, mail in siseh, pumpak in siseh lomhnak bia an chim, pastor caah an si khawh tawk tein an lomhnak an langhter. Hi an tuahmi thil nih mipi sinah siseh, pastor sinah siseh i hrimhthannak le i tharchuahnak a chuahpi. Vawlei kil li deng i a ummi laimi nih cawn awk a thami a si tiah ka ruah caah hi ca hi kan van in kuat cio hna.

1.     Pathian riantuantu cu daw hna uh.

a.     U le nau hna, Pathian nih nanmah hruaitu ding le cawnpaiktu dingah a thiammi nan lakah rian a tuanmi hna kha upat hna u. An rian an tuan ruangah khan hmaizarhnak a sangbik le dawtnak a nganbik kha pe hna u. Cun pakhat le pakhat kha i rem niahmah tein khuasa u. (1Thesalon 5:12-13)

“An thazang, an thinlung, an fimnak dihlak kha mipi caah a hmangtu an si”

b.     Khrihfabu tha tein a hruaitu khrihfa upa hna cu, an hmuh awk a simi kha a let hnih in a hmuh awkah an i tlak; cu hna lakah phungchim le cawnpiak i a tangmi kha hmuh awkah an i tlak khun. (1 Timote 5: 17)

“ Fim a kan chimtu le lam a kan hruaitu hna cu midang nakin a lethnih in upatnak pek awk an si”

c.      Thawngtha a chimtu han nih thawngtha chin in an paw an i cawm awk a si ti cu Bawipa cawnpiakning a si. (1 Korin 9:14)

“ Khrihfabu nih Pathian riantuantu hna cu khim tein chia hawk an si”

2.     Zeiruangah dah upat le dawt cu an herh, Paul bia ?

a.     Zeitluk fak in dah ka tuan ti kha kan theihter tuah hna lai….cubantuk ka tuan cu, an ral tha hna sah, thei hngal deuh hna seh, i dawt hna seh, Pathian thei hna seh, hna ngamnak hmu hna seh ti ka duh caah a si….ka pum in a dang ah um hmanh ning law ka thlarau cun nan sinah ka um peng… (Kolose 2:1-5)

“Pastor nih kan cungah an neihmi lungput le an i nunpimi rian ruangah upat awk a si. A kan dawt hmasa tu an si"

b.     Nan kong ka ruat peng…thla kan cam piak peng hna, a chia le a tha nan thlei dan khawhnak ding le a thami nan thim khawhnak dingah  le khrih nih a kan pekmi ziaza tha nan neih khawhnak dingah kan duh piak hna, cun nannih zong nih hi rian ka tuannak ah thong ka um ah siseh, leng ka um ah si seh nan ka bawmh peng caah kai lawm. (Filipi 1:3-5, 7-11)

           “Pastor te cu pumpak ,mibu tha hna seh tiah riantuantu an si”

c.      Tam tuk cu saya nan si awk a si lo, zeicah tiah kannih saya pawl hi hawi nak fak deuh in biacaihnak kan hmu lai …(Jeim 3:1)

“Saya te cu mipi nih siseh Pathian nih siseh fak deuh in an kong caihmi an si”

d.     Thatlonak nih an hrawhral hna nak hnga lo ralring tein um uh…(2Peter 3:17)

“Pastor te cu kan thlarau a himnak ding caah ralrin a kan petu an si.”

3.     Zeitindah upat kan pek hna lai.

a.     Pathian bia thup an theih, a chim khawh chinchin nak ding ah thla kan cam piak hna lai. (Kolose 4: 2-4)

b.     Lung fim le upat awk tlak in rian an tuan khawhnak ding caah thla kan cam piak hna lai. (Hebrew 13:18-19)

c.      Pastor te dawt cu an nawl zulh a si. An bia ngaih a si.(Hebrew 13:7, 17)

d.     Pathian bia tak kan tanh i khrihfabu kan dawt tikah kan pastor te an i lawm bik. (3John 1:3-4)

e.     An cungah siannak kan nei lai zeicahtiah an neihmi dihlak, an nunnak tiang  kha an riantuannak ah an hman. (Mathai 26:7)

“Pastor te zong nih kan i khinhmi rian hi a sehbak in kan i sehchih i lung dong lo tein le dingfel tein le lungthiang tein le nunnak pekin kan tuan ve awk  asi”

Chan Thawng Lian 

Wheaton, Illinois

Damnak Pathian

BAWIPA SUNPARNAK A TLANNAK HMUN AH  VULEI THIL ZEIHMAN A DIR KHO LO.

DAMLO ZAWTNAK PHUNKIP A NGEIMI HNA CAAH

SPECIAL PRESENT

 “ Ka vel hi na caah aza ko. Zeica tiah ka thawnnak cu derthawmnak ah  a lang.(2Korinh.12:9-10). (“My grace is all you need. My power works best in WEAKNESS.” -2 Corinthians 12:9, 10

Niruk ni zanlei kipah  ah  Nunu thlacamnak kan ngei tawn I  cuka ahcun vulei khua zakip in kan theihmi hna  Mizaw tampi   caah thla kan cam tawn.  Vuitampi cu   Bawipa  an zawtnak in damter ko hna tiah kan hal tawn. Vuitampi kan cam hnu ah,   Bawipa nih  an zawtfahnak le harnak vialte hi   cross tang ah  chiah  I thlan ah a vui dih  asi cang.   Jesuh min in tei asi cangnak tu phuang. An zawtfahnak(tlakchamhnak hmun) hi Bawipa caah  hmunlawng an ngeihchun asi caah lomhnak bia chim.  Cuka ahcun   Bawipa sunparnak tlang she tiah  thlacam piak hna tihi a chua I ka thlacam aa thleng.   Hiti ka thlacam aa thlen hnu ah hin Keimah  ka zawtnak  Pancreatitis(Laa phin)nak zong a dam ti ka hmuh.   Ka laa a phin caah  rawl tamdeuh ka ei poh ah   ka paw a khat, afak i um nuam lohin ka um zungzal.   Raw lei ngam huaha loin saupi ka um  cang.  Hiti ka thlacam a thlen hnu  hin   a fah zong ka theih tilo.   Rawl zong ka duhning tein ka ei  khawh cang.    Ka laa arak phinnak kha  Bawipa caah  hmunlawng  ka rak ngeihchun asi. Cuka ahcun   Amah nih  hmun a lak I a sunparnak a tlan cangka in zawtnak le fahnak cu cawl kho loin  a tuah hna i hmun an ngei tilo.

Hi bantuk hin hlan lio ah damlo, micaw, keibei, phar, zeng, thinghmui, thichuak mithi kha,  vulei ah ngeihmi le  hihi ka si timi  chim ding an ngeih  ve lonak  an nun  hmunchia bik le hmuncar hmun lawng te kha Jesuh  nih a hngah thiutheo mi le a panh  i ava luh hnawhmi le a umnak hmun  ah a ser tikah  a uai cangmi pangpar ti kan toih i a nun i pardawh a par than tawn.  Kan zawtnak, damlonak le  tlakchiatnak te hna  hi  Bethlehem  cawrawl kuang  Van arfi ceu Bawipa  chuahnak  si hram ko seh.

Hi ca  arak relmi kip  damlo zawtnak a ngeimi nan um asi ahcun   Hi cabia na relnak thawng in Bawipa  nih nan thlarau mit varter in a sunparnak khuaruahhar nan cungah tlung ko she.   Na hawikom  damlomi hna an um ahcun  rak print piak hna law  an zawtnak cu  Bawipa nih cross ah a ketang ah  a lamchih cangnak le   thlan ah vuiliam asi cangnak, an zawtfahnak le tlakchamhnak  kip cu Bawipa caah hmunlawng an ngeihchun  asi caah lomhnak bia chim ding le Bawipa sunparnak cu cu ka thengte ahcun tlang ding in rak sawm ve hram hna she.   Bawipa caah hmunlawng an ngeihmi kong ah lomhnak bia chimpi hna usih law thlacampi hna usih.

Bawipa sunparnak  a tlantikah  zeidah  a cang pakhat hnu pakhat  kan zoh lai. Lungsau tein rak rel ve hram ko.   A hleice in Damlomi na si ahcun  Bawipa nih   na thinlung na honnak cungah  abia hi tuahmi ngeilo in  vulei ah  a tlakter lai lo I, tuahmi ngeilo in a sinah a kirter lai lo.(Ka bia cu van in a rungtlami ruah le hawhra bantuk asi lai.  Ruah le Hawhra nih cun van ah kir than ti loin  vawlei kha a hnawnter I  thlaici kha an khohter I an  thanter  I thlaici tuhtu kha thlaici an pek hna I  rawl eitu kha rawl an pek hna.  Cu bantuk in ka ka in a chuakmi bia cu a si ve lai.  Ka sin ah  a lawng in arak kir than lai lo.  Tuah she tiah ka fialmi kha a tlolh lai lo I  ka thlah hnawhchanmi thil ah khan a hlawh a tling lai” Isaiah.55:10,11)

Jesuh Khrih a chuah lio ah khan  Judah ram cu Rome cozah kutang ah a um.  Rome cozah nawlngeihnak in  milu relnak tuah asi tikah   Bethlehem khua cu   khualtlung in  an khat I  Rome nawl ngeihnak in a khat.   Bawipa caah ATHAMI hmunlawng a ngeilo. Judah pengchung  khualianngan hna lakah nauta bik arak si tawnmi kha   Khuachung innkip le mikip Cu caah Irael khuadang hna bantuk in Rome uknak hrokual tangah lutung kho loin a kun i  aihramnak he a khat ve. A thinlungah ah Rome(vulei) nawlngeihnak a khah ruangah  Krih caah hmun a um lo.  Asi nain  minung thinlung ah  santleihnak zeihmanh a ngei lomi le  hihi ka si ve ti awk a ngei lomi  hmunchiabik, Zawtnak hrik, ek le voih, thopaw le hmaisem le rimchia he a khatmi Bethlehem caw inn le cawrawl kuang arak um celngel.  Aho hmanh nih an duh lomi hmun kha  Bawipa caah  hmun  lawng um chun asi.   Bethlehem khuapi cu  vulei thil in a khah dih lio ah cu a tlakchamhnak  hmunlawng  umchun caw rawl kuang cu Krih nih a vun rolh: a sunparnak a vun tlang ciammam I vulei cung min thangbik khuapi hna lak ah ,  a ciam kho lomi  min, vulei dongh hnu le van tiang in a hmun dingmi  minthang le khuadawh ah a hung cang. Zumtu  damlo na zawtnak hi Bethlehem cawkuang asi philh sual lai ci.  Cuka ah Bawipa caah  hmun a um caah lomhnak bia rak chim law  Sunparnak Bawipa cu   rak tlang hram seh. Amen

Na nunnak ah  tlakchamhnak, sifahnak, damh khawh lomi zawtnak, zawtnak phunkip fahnak phunkip he a hrammi na si maw,  cu vialte cu   Bawipa caah  hmunlawng na ngeih chun asi.  Bawipa nih hi hmun hi a hngah theuhteumi asi.  Acan ahcun  kannunnak ah hin kanmah  kan timi hi a thawng tuk hringhran i vulei thil le nunnak duhtincuainak in a khat i aliam tawn.  Bawipa nih kan hnun ah  umnak hmuna kawl i  a tlun hringhran tawn lo. Cu ruangah  kan nunnak i a chiatnak bik hmun te hi a hngah cuka te ahcun um hmun aa remh i nunnem Bawipa  dawtnak in a kan domh tawn.  Nan nun hmunchia bik, thlan lawng aa ngeihmi ramcar  ah khan Bethlehem  arfi ceu cu rak chuak ve hram she  law cuka thengte ahcun Bawipa cu sunparnak in  a dir tikah  mitampi cu an khuaruah a har lai I Bawipa kha an thangthat lai.

1Kor.6:19 ah  kan pum cu Thiang Thlarau  biak inn asi. Cu Thlarau cu Pathian nih a kan pekmi asi I kan chung( Abiak inn) ah a um.  Kan nih cu  aman(Krih thisen) in cawkmi kan si  caah kan pum cu Pathian sunparnak caah  kan hman awk asi ti kan hmuh.   Biak inn cu zeidah asi?

Moses  Puan Biak inn le Solomon Temple cu  Inleng(Pumsa), Hmunthiang(thinlung/soul) le hmunhlim bik(Thlarau) tiin then asi.   Hmun thianghlim bik ahcun Biakamnak kuang cherup pahnih nih an thla in an khuhmi  chungah   Nawlbia tialnak lung(Krih) Aron thiangthunh a corhmi (Cross le thawhthannak) le  Manna (Nunnak rawl) an um.   Biak inn cungah   hi Biakamnak kuang hi luhpi asi hlan ahcun   Bawipa sunparnak chum(Shekinah) hi a biak inn chung le cungah a tlang ti  kan hmu lo.   Hi thil an umnak Biakamnak kuang,  Biak inn chungah  aumnak ding hmun thianghlim bik chungah  a um  thok in cuka cun Bawipa sunparnak cu Biak inn chung le cungah  a lang tawn.  Zumtu  nih  Krih cu   ka khamtu  le Pathian, thihnak in thawhnaknak chungah a ka luhpi tu le ka nunnak taktak asi ti kan pom  khawh ni ah, kan pumsa cu a biak inn ah a cang.  Kan thinlung nih a kawl i kan thlarau ah  Biakamnak fek cu a dir tawn.   Hi sunparnak  nih  zumtu  cu chung le cungah a tuam tawn I  mi nih  an hmuh tikah  thluachuahnak, damnak, teinak, thawnnak, nun duhdim a um.  Mi nih an hmuh tikah  Bawipa an thangthat tawn.

Exodus 40:35 ah Pumhnak Thlam cu Bawipa sunparnak  Minmei  in a khat ti kan hmuh.   Mah minmei  hi Minmei  sawhsawh si loin Skekinah  minmei timi Bawipa Sunparnak  chum/minei asi.   Cucu  Israel miphun  ramcar ah kum 40 chung chun ah minmei tom, zan ah  meiceu in a hruaitu hna   Bawipa  sunparnak chum asi.    Bawipa thawnnak nih  rili sen kha  a chah I  vulei car ah ke in  an kal ti kan hmuh. Asi nain cucu can tawite chung lawng asi.   Hi Bawipa sunmarnak  chum le meiceu nih cun   kum 40  chung chunzan in a umh hna. Cu ruangah  an kedan zong a tet lo. An thil puan zong a tet lo ti kan hmuh.  

Cu Sunparnak chum cu  Biak inn chung le cungah a khah dih tikah  midang cu chimlo Moses hmanh a lut  kho lo.  Cu chum cu a thiangmi,  ceunak, mei,thawnnak le  thiannak  a kengmi asi.   Bawipa  sunparnak cu   Biak inn chung a khah tikah   Biak inn cu aa zarhmi hmunthiang ah aa cang. Cu caah  raithawinak  sathi, le rimchia, thlen le daw, Beteria,  zawtnak thil hnomtam  vialte  zong a hloh dih. Biak inn chung rim a hmuiter.  Cu sunparnak chungah cun zei bantuk nunnak hmanh  a hmai ah a dir khomi an um lo.   Cu bantuk in kan pumsa cu  Thiang thlarau  Inn asi tiah Bible nih a kan chimh tikah  hin,  kanmah kan dam ruang, kan fim ruang, kan thawn ruang, kan ti kan tuah khawh ruang, kan dinfel ruang le  kan thian ruangah  si loin   Athiangmi Krih Pathian sunparnak le  AThlarau kan chungah a um ruang ah  a riantuannak kong ah minung  duhnak le  khuakhan cawlcanghnak  a tel ve lo bantuk in kan pum chungah zawtnak le fahnak te hna  zong  hi   cu sunparnak chung ahcun  nawlngeihnak le cawlcangh khawhnak zeihmanh an ngei kho ve lo.  Bawipa  ka pumsa  na Biak inn ah hin sunparnak in rak tlang tuah.   Ka Bawipa, ka khamhtu le ka siangpahrang  na si.   Ka damlonak le ka tlakchiatnak hna hi na caah  hmunlawng an rak si  caah hi nih  hin nangmah cu an ka hlamter I an ka ngeihter,  na vel hi ka caah a za hringhran. Ka zaangdernak ah hin  na thawnnak in rak dir  ko tiin  Bawipa thangthatnak  caah  kan zawtfah le tlakchiatnak hna hi  a hung can  I   Bawipa kanmah ah a dir ahcun  mi thluachuak le lunglawmmi kan si.

Cu sunparnak cu   Moses   Puan Biak inn lawngah si loin  Solomon Temple zong ah a tlan tikah   Tlangbawi  hna zong Biak inn chungah  an  dir kho lo ti kan hmuh.(1Siangpahrang.8:10).  Bawipa sunparnak chum/minmei(shekinah chum  ruangah  Bawipa in  cu aa zarh I a thiang dih.   Cu Sunparnak  khuahar mak le duhnung  nih cun Pathian kan sinah aum IMMANUEL  ti a langhter.  Cu Immanuel cu minung sinah aum tikah   minung nih a dawhnak le sunparnak thawnnak cu a mit in a hmuh nain  a chungah  valuh I  minung sinak in a rian va tuan  piak khawh asi tilo.  Bawipa inn chungah cun Amah  Bawipa tu kha  riantuan piaktu asi.  Hiti asi caah    Israel mi  hna nih Bawipa lam an zulh  I Bawipa  cu  Israel mi hna IMMANUEL asi chung poh cu,  thluachuah an hmu, an dam, ral an tei, an rum luaimai, an karh laimai  I a ho celh lo fa ah an I chuahnak  asi. Anmah  thawnnak ah si loin an sinah aummi   Bawipa sunparnak, ceunak, thiannak le thawnnak ruangah  asi.  Zumtu na chungah  ah   Bawipa cu sunparnak in a tlan tikah cun  thluachuah bawngmal  vialte cu um ko rih she,  na zawtnak le damlonak zong nih a celh lomi   cu asi.

Bawipa  sunparnak  na tlakchamhnak ah tlang hram seh

Peh than ding............

Sui Chin

Ottawa.

Damlo thlacam piak ding na ngeih ahcun  an min le zawtnak he  rak kan kua ve te..........

Source::  LAIFORUM@yahoogroups.com

2014 Caah DV Lottery On Tthan A Si Cang

Ni kum hna zongah ka van thanh lengmang ton mi pakhat hnih caah thathnemhnak hna a chuahpi hnga maw? tiah ka van thanh lengmang mi a tu ton zong ka rak hnu deuh cang nain ka rak  thanhtthan ko lai.A philh sualmi  hna kan um sual ah US  ah hin ramdang mi  DV Program  minung tampi an phan cang cucu kum tin tein a mah le caan teah sawk caan hi on ton a si.A tu hu 2014  caah Diversity Visa program (DV-2014)  cu kan hnu zarh Oct 2-2012 in an on tthan cang thlakhat lawng caan pek a si caah Oct 2 - Nov 3-2012  hlan ah a duhmi paoh Online in sawk khawh a si tthan cang lai.A duhmi le unau chungkhat hoi le kawm caah nan umnak in nan sawk piak khawh hna a sawknak le a sawk ning cang / a kong lam tlamtling deuh in nan mah cio in Hika link ah rak rel khawh a si lai.A dang Form phit hi an thiam cio nain Hmanthlak Upload nak ah hin a tlamtling lo mi an um pah ton caah Photoshop hna nan ngeih ah cun nan i foih deuh lai tlamtling tein a tuah kho lo mi nih pawngkam hoi le kawm zong bawmh hal khawh an si lo lai.A biapi  ngai mi  cu hmanthlak hi a si an mah nih an duh ning an pawm ning tein tuah ah a tlamtling deuh lai i nan tuah hlanah a herhmi tete le hmanthlak an pawm ning tete hna kha ttha tein zoh rel hnu ah tuah cio ah cun a hlawk deuh lai tiah zumhnak ka ngei.
https://www.dvlottery.state.gov/

Daw Aung San Suh Kyi

MACCF A Voi(3) Civui Tuah A Si

Mid-America Chin Christian Fellowship ( MACCF ) Civui ni thum chung August 31 - Sep 3 tiang Wheaton. IL ah sunglawi tak in tuah a si.MACCF cu 2009 ah dirhmi buu a si i Khrihfabuu chungtel buu (8) an um. Hi Civui caan hmannak le tuahmi hna cu Pumhnak / Cawnpiaknak / Hlasak zuamnak le Lentecelh zuamnak in hoi kawpnak zong tuah a si i Bawilung chuih zuamnak / Bawlung bengh zuam tbk hna hna tuah an si. MACCF Civui ah a leng lei in kan pa kan u le a si mi minung pa li nga nih an ni tel pi hna CBCUSA aihawh in minung pa li Rev. Dr. C Duh Kam / Rev. Tial Lian le an hoi le cun G C C F aiawh in Canada um Pastor Salai Cung Cin le Kawlram in a rak tlawngmi Sayama Ngun Kil hna nih an ni tel pi hna.Civui lio hmanthlak ka ngeih tawk Link pa hnih kan kuat hna.Video zaihmi tu cu ka rian a tam deuh caah ka rak thlah kho rih lo a hnu ah tar khawh ka rak i zuam te lai. MACCF A Voi(3) Civui Lio Hmanthlak Hika Le Hika ah zoh khawh a si.

Pastor Cung Cin Sermon

Picnic Hmanthlak Le Video

Kawlram Free In Chawnhkhawh A Si

US um mi hna caah thawng ttha kan thanh tthan hna.Kan hnu thla ah Free Home Phone kong kan thanh mi hna nan hmang cio cang lai ti zumhnak ka ngei.Wheaton le Chicago um cheukhat hna nih kan hman ve a tu tiangah a chiatnak a um rih lo.Computer he peh a hau lo mi a si caah a ttha khun an ti cio.

A tu thanh tthan kan duhmi hna cu Cricket Cell Phone a hmang mi caah a si lai. Cricket Wireless hi US State tam deuh ah a um cang hi Company hi an umnak a nai rih nain an thangcho ngai i a tuah cun US State a um lo nak a tlawm cang.An Phone man a foi lengah Monthly Plan hi $ 35 / $ 45 / $ 50 tbkin an um i unlimited lawngte an si a bill le a tlawm caah US ka phak ka in a tu tiang kaa tlaih ve. A tuah a tthatnak ka van theih chin2 Weekend zan 11 PM hnu in Kawlram lei Free in chawnh khawh a si.Sat /Sunday zan 11 PM hnu cun duh chung chawnh khawh a si cang a bill kongah thin phan ding a um lo Cricket Plan cu unlimited an si caah a lut cang hnu cun duh chung in chawnh khawh a si.Kan nih zong kan chawnhnak thla 2 hrawng a si Cricket a hmang mi nan um ah cun rak chawn chun ve te uh.Kawlram lei lawng hlah Malaysia /India / Australia lei le ka dang2 lei zong chawnhkhawh an si.11 PM hrawngah a lut lo ah cun tlawmpal van ngak rih law 11:30 PM hrawngah van au tthan te a rak lut ko lai.

Cricket a hmang lo mi hna nih Cricket kong hlathlai nan duh sual ah cun http://www.mycricket.com/ ah rak zoh te uh nan Zip Code rak tial piak uh law rak kawl te ko uh.

BAWIPA KANCUNG AH AI LAWMH AH CUN( Number 14 :6-8)

*******************************************

Bawipa dawtmi hna,Kan Pathian nih thluachuah inpe cio ko hna seh,

Pathianfa le zei kan tuah mipoh ah,Taksa Thlarau ah thluachuah kan co i, Taksa Thlarau in ral kan tei khawh nak ding ah a pakhat nak ah,Minung lawmhter le minung duh lungtlin ter nak cun Bawipa lawmhter le Bawipa lungtlin ter hi abiapi bikmi a si.

1.Abraham Miphunpi Paa a si nak zong Bawipa a lawmhter caah si,Pathian nih naram le napa Inn chungkhar vialte kaltak law,kanhmuhsak laimi ramah kal ati bantuk in Siaherh nak a pel hmanh ngei lo in le lung awtawm lo te in Bawipa biakha a zumh i akal caah Bawipa nih thluachuah a pek i a cawisan nak a si.

Ni hin zumtu hna, Vulei nun le kanpa thing a si mi Sehtan le a pennak ram hnuchit in Bawipa zumhnak in karhlan ngam le kanram hlun le kan zia hlun le kan rawl hlun vial te hnuchit in, karhlan hi kan hmuhbal lo mi Pathian thluachuah hmuh nak a si.halleluijah

2.Sadrak,Mesak le Abebaku, hna rengkai ter an si i, Daneal hna Chindeih Kaa in a luat ter lawng si lo in Vuanci dir hmun ah cawi san an si nak zong Bawipa an cung ah ai lawmh caah si.halleluijah.

Nabukkhanejer SPH nih Zuu le saa in a cenh hlaimi hna lak ah an i tel ve i, Zuu hi kanthawn nak le thazaang a si lai lo, Bawipa tu hi a kan thawn ter tu a si lai an ti i, anmah awr nak in an Pathian kha an dawt deuh,SPH nawl nak in Pathian nawl an ngeih deuh caah Bawipa an cung ah ai lawm caah Meiphu in a khamh hna , Chiandeih kaa in a khamh hna, Cungpi ah a cawisan hna.

Nihin Pathian fa le zong kan mah awr le Pumsa duhnak nak in Bawipa duh nak tuah kha, kan i sehchih i,Bawipa kan dawt i kan lawmh ter ah cun harnak meiphu le thih nak Mei phu le, Sehtan Chiandeih kaa chung in a kan chuah lawng si lo in Cungpi ah a kan cawisang i thluachuah a kan pe tu zong a mah a si lai.halleluijah

3.Josef Salpa a si na in Izip ram le Rawlvial te uktu dir hmun ah cawisan le thluachuah a hmuh nak cu, a cung ah Bawipa ai lawmh caah a si, Polatic laih a thiam i a thawn caah a si lo, Bawipa lawmh ter ai tim peng caah a si.

A u le nih Meheh le Tuu an i thanh i an ei lio ah anih cu din nak a tanh i a pa sin ah a uu le nih an tuah mi thiltha lo kha a chimh i Din nak kha atanh peng,Cun Pathian le apa lungtawn le lawnh ter a tim tu pakha a unau nih an hnah chuah caah thah an timh,Horcar chung hna ah an thlak,Izip ram lei ah an zuar,Potifar Inn chung tiang a va phan,Minung lei cun tlakcikcek a si ko cang na in, Bawipa sin ah a vuivai hrim lo.Bawipa nih a ka hmuh ko ti athaih i, Bawipa lungtawn le lawmh ter ai tim peng.

Partifar Siangpahrang khual a tlawn kar ah a nupi nih sual a sawm i,sualtuah nak caan tha te a hmuh ko nain, Bawipa nih a ka hmuh ko ti atheih caah,amah nak in Bawipa kha adawt deuh i, amah lawmhnak nak in Bawipa lawmh ter kha a duh deuh caah sual kha a lektak,Potifar nupi nih a Angki in a tlaih i, Hebru mipa nih a tlaihhrem aka timh e tiah, a au,Mi nih cun Bawipa lawmh ter in sual a tlik tak tu Josef kha sual an puh ko, a ruang Cu a sualmi nu aw lawng an theih caah a si, Potifar nupi aw cu Mi hnakhaw a phan i, Josef nun duh nung cu Bawipa thin lung a phan ve. Cu caah Bawipa ai lawmh caah, Salpa kha Cungpi ah a cawisan ak a si.halleluijah

Pathian fadawt hna zong, Bawipa caah zumh tlak te in kar kan hlan i,dinh nak kan tanh lio ah hin, Hnahchuah tu le dodal tu,Taksa Thlarau ah Unau kan ngei ko lai, Bawipa thangthat ko uh sih, Cun Bawipa nih a ka hmuh dih ko, ti in Bawipa lawmh ter in Sual phunkip hnu kan chit lio ah hin, Sualpuh tu aw aan athangmi tampi zong kan theih ko lai, Minih cun athangmi aw poh an zumh ko lai nain, nang le kei cu bawipa thinlung a tawng tu nun tu ngeih i zuam ko uh sih,

Portifar Nupi awaan athangtuk mi lei ah atang mi hna, Josef Rawlruk tang ah an kun caan a phan than te lai,Mipi sin ah Phisin in a au mi Portifar nupi cu, Bawipa nih athlak caan a phan te lai i, Mipi nih sual an phot mi Josef Bawipa lawmh ter a tim tu le Bawipa a lawmh tertu pa cu Bawipa nih a caan a phak tik ah Cungpi ah cawisan caan a phan te lai.halleluijah

Cu caah zumtu, Bawipa lawmh tertu si hi thlacam in i zuam uh sih mu, Taksa Thlarau ah thluachuah hmuh nak a si.Amen

Bawipa nih thluachuah pe ko seh

H,Thomas Tialuk


Ref:: LAIFORUM@yahoogroups.com

CHIN TV RAK NGAI VE

Visit :: http://www.chintv.info/

Daw Aung San Sukyi A Khual Tlawnnak Video

****Bible Ah Kir Tthan U Sih****

Bible Ah Kir Tthan U Sih a phuahtu hi Paul Ram Cung a si CCC ah Saya a tuan chuahmah mi a si i Rev.Hoi Cung Tum (Hakha) ah khirhfabuu ah Pastor rian zong a tuan pah Pathian a duh ngaimi ca a thiam ngai mi a si a tuah Hla phuah le hlasak zong Bawipa nih thluachuah a van pek chih. Hla a phuahmi hi Khuai 2/3 a chuah cang Solo phun zong in a chuahmi a um i mah zong cu a ruah hlanah US um caah Copy Right tuah a si te lai.A tu i ka van caw-ngia mi cu Bible Ah Kir Tthan U Sih ti a si nai ah a chuakmi a si Lai tlang ah cun an zuar dih cang men lai US ah a tu hi kan phiat cuahmah lio a si.A hla phuahmi an ttha a satu hna zong an thiam Hla remh deuh lawngte an si caah Khrihfabuu cio ah remh dingah an ttha ngai hna Evan Za Kian nih fung khat a phuahmi aa tel cu lo paoh Paul Ram Cung phuah mi lawngte an si i a satu zongah Paul Ram Cung le ( EVB) an si.Hi khuai phot zamhnak ah a kan bawm kho tu nan um si cun vanbiaklianltp@gmail.com ah contact rak kan tuah te uh law kan ni lawm ko lai.

Video Chuah A Duhmi Caah

US caah Video Copy Right tuah a duhmi nan um ah cun man tlawmte nan duh ning in tuah piak kan nin zuam hna lai.US ah hi btk a tuahmi Laimi tampi an um nain kan tuahmi aa dannak tete a um len a man le quality tbk hna ah kan ni dannak tampi a um Laimi cu thilttha tein tuah a duhmi kan si lengmang a man kawl nih te-ta an ti mi a duhmi kan si hna.Kan mah nih tuahpiak mi cu DVD Cover / Cases Lable hna zong Free in suai piak nan si lai lengah nan duhnak State le khua poah ah kuat piak nan si lai.Nan duh ning tein in a kuat lei tiang tuanvo lak piak nan si lai.Chungkhar Video tbk le Video a phun2 Edit zong kan tuah pah cu zong cu a man tlawm tak in tuah piak an si.Cu lawng hlah Khrihfabuu caah Logo / Bullatin tbk hna le nupi thit pheih-sa zong man tlawmte in tuah suai piak khawh a si.

A Zoh Huammi Caah

Bruce Lee Movies

US Ah Suimilam Pakhat Nihlawh Kong

US cu kawl ram tbk a si lo nak a tam ngai.Rian kan tuan tikah kan tuannak Company nih kan tuan man pekmi zong hi cozah nih law an ngei.Suimilam pakhat ah a niam bik cu zat cu nan pek hna lai tbkin Minimum Wage ti mi Federal le state law a um i cu nak in tlawm deuh pek phung a si lo. Mah Minimum Wage Law nih a tlawm bik cu zat an ti mi nak in tlawmdeuh pek ah cun tazacuai khawh an si.

Minimum Wage hi kum tin tein update an tuahṭhan lengmang i a luan cia mi update an tuah mi zoh tik ah kum khat hnu kum khat a tam deuh lengmang.IL hna hi 2008 ah khan suimilam pakhat ah $ 6.75 a si i 2012 ah cun suimilam pakhat ah $ 8.25 a si cang.Minimum Wage Law hi State pakhat le pakhat an ni khat cio hna lo aa dang cio hna Hika link ah hin mirang ca a rel kho mi caah fiang tak in rel khawh a si.A tang hmanthlak ah hin foi tein zoh khawh a si fon.

	States with minimum wage rates higher than the Federal		States with no minimum wage law
	States with minimum wage rates the same as the Federal		States with minimum wage rates lower than the Federal
	American Samoa has special minimum wage rates

Minimum Wage and Overtime Premium Pay Standards Applicable to
Nonsupervisory NONFARM Private Sector Employment
Under State and Federal Laws
January 1, 2012¹

US State Vialte lakah nihlah a saan biknak cu US Map in a cung lei bik a ummi WA State a sang bik ko hih Laimi zong tampi an umnak a si a tang ah hin US State cio i a tu law-law-se Suimilam pakhat ni hlawh zoh fiannak. US um hna na umnak State cio kha rak zoh ve te hmanh fiang deuh in rel na duh cun Click or http://www.dol.gov/whd/ link ah fiang tak in zoh rel khawh a si.

> Federal MW	Equals Federal MW of $7.25	< Federal MW	No MW Required
AK - 7.75	DE	AR - 6.25	AL
AZ - 7.65	HI	GA - 5.15	LA
CA - 8.00	IA	MN - 6.15	MS
CO - 7.64	ID	WY - 5.15	SC
CT - 8.25	IN		TN
DC - 8.25	KS
FL - 7.67	KY	4 States
IL - 8.25	MD		5 States
MA - 8.00	MO
ME - 7.50	NE
MI - 7.40	NH
MT - 7.65	NJ
NV - 8.25	NY
NM - 7.50	NC
OH - 7.70	ND
OR - 8.80	OK
RI - 7.40	PA
VT - 8.46	SD
WA - 9.04	TX
	UT
18 States + DC	VA
	WV
	WI
	23 states