free web counter
greyhound runningHurricaneRunning Ostrich

Thursday, November 14, 2013

"Bawipa cah A Har lo; Kan Hmang lo cah Asi" (Lam:9:39)

Bible Relnak: Cucaah Peter cu aa tim i an sinah cun a kal. A va phak tikah cungdot ah khan an kaipi, Nuhmei vialte nih khan a zual in an zual i an tahpah khan, Dorkas nih a nun lioah a rak serpiakmi hna angki hna le puan hna kha an hmuh sak.

Mediterran Rilikam, Jerusalem in miles 35 a hlatnak Joppa khua i numei vialte, nu can ai an i tlaih mi Pi. Dorkas nih a thihtak hna tik ah a inn ah cun mithli he tahnak aw thawng cu pawngkamah aa zel. Zultu pa 2 nih Peter cu Joppa khua in miles 12 a hla  mi Lidda khua ah a um ti an thei, khulrang in rat dingah an auh. Peter cu inn cungah an hruai, Pi. Dorkas ruak pawngah cun nuhmei vialte, Pi. Dorkas a nun lio i a thitpiakmi hna angki an i hruk dih, thin lung kekawi ngai in a tap len mi a hmu tik ah zeidah ka tuah piak hna lai ti Peter a fiang cawlh. Jesuh nih bia a chim tak mi bia zong a thei cawlh ve mi cu:

(1) Jh.14:12 Biatak kan chimh hna: Keimah a ka zummi paoh nih ka tuahmi thil hi an tuah khawh ve lai, hi hna nakin a ngan deuhmi hmanh an tuah khawh hna lai, zeicah ti ahcun, ka Pa sinah ka kal lai ca ah asi.

(2) Mk.5:35 Jesuh nih Peter, Jem le unau Johan lawng a zulter hna. Zultu mi 3 le Jairu nu pa hmaiah cun kum 12 fanu athi cang mi thihnak in a thohter.

(3) Lk.6:40 ah Jesuh nih a cawnpiak mi hna cu Siangngakchia cu saya nak in a ngan deuh lo, Sihmanhsehlaw siangngkchia nih a cawnnak kha a dih tikah cun a saya bantuk asi lai.

Peter nih an dih lak in lengah a chuahter dih hna, khuk bil in thla a cam, minu lei ah a mer, Tabitha, tho tuah tiah ati i a nung thannak kan hmu. Zultu Peter cah Jerusalem ar a hong khuang i Jesuh a hngalh than bantuk in Pi. Dorkas ruak hmang in Jesuh min in khuaruahar thil ti khawk nak le thawnnak tuahkhawhnak a theih fiangter tu asi.

Pathian nih Dorkas cu thilthit zungthiam a pek mi in hrukaih ngei lo mi cah le misifak zawnrauhnak he a can tawk in rian a tuan. Cu tuah sernak thawng in hmuh than kho ti lo ding nunnak Pathian nih a pehchah piak. Pathian rian kan tuanning zoh than uh sih, Bawipa cah maw na/ka tuan? Bawipa he dah na/ka tuan? Martha cu Jesuh cah rian a tuan lio ah Mary cu Jesuh he a um ti (Mk. 10:41). Bawipa he cun tlau kho asi lo, Bawipa ca kan taun lio tu ah a kan tinh piak mi kan kheng kho tawn lo.

Dorkas a kut chungah a um mi cu thim le la hi asi ko nain zungthiamnak a vun chuah ngaingai tik ah nuhmei vialte an i dornak asi. 1979 kum ah Noble Peace a hmu mi Mother Teresa cu biahalnak an tuah, hi bantuk rian nganpi  (Siizung, College, Ngakchia zohkhennak, Misifak bawmnak, Daihnak) na tuah khawhnak hi zeidah asi? An ti. A leh mi hna cu, “Ka kut chungah kan ngei mi Rupee 10 le Pathian he cun ka tuan kho ko” a ti. Cun Vawilei cung thanchonak le daihnak cah zeidah kan nih tah kan tuan kho ve lai? tiah an hal than. “Inn ah tlung law na chungkhar kha daw hna” tiah a leh than hna. I Cor.3:6 “Kei nih a ci ka tuh. Apollo nih a kung kha ti a toih, sihmanhsehlaw a thantertu cu Pathian asi” tiah Paul nih a ti. Dawtnak lungput he thilhmete kan tuah mi chungah Pathian nih thlua a chuah i vawilei (mi nun/ pawngkam) cung a thlen khawh ko.

Moses zong a mi Isreal thit hruainak ah a kut chung i a um mi thiangthut in a hruai kho ko hna. Galilee nelrawn ah mi 5000  zong ngakchia pa a kut chung um nga 2 le chang hlum 5 hmang in Jesuh nih rawl a dangh kho hna. IPet. 4:10 “Pathian laksawng kengtu tha bantukin Pathian sinin nan hmuhmi laksawng kha midang ca thatnak ah hmang cio uh” tiah a ti bantuk in thathmennak kan ngei cio i kan hmang lo tu asi. Na tuah mi cungah Bawipa nih thluachuah pek a duh, nun check in mah le can  tawk ah riantuan cio hna uh sih.


William Pa
Philippines

No comments: