Monday, May 2, 2011

Osama Bin Laden an Thah Khawh Cang

Osama Bin Laden an Thah Khawh Cang


US cozah nih ram vaih in an vaih i an kawl lengmang mi Osama Bin Laden cu US ralkap hna nih ral an dohnak hmun ah athi tiah

thawngzamh tampi nih an thanh cio. US President Obama zong nih mahhi kong hi zung kal ningcang tein thawngthanhnak a tuah cang. CNN thawng zamh nih US president biachimmi vedio an thlah cang.

Mah tiin Bin Laden umnak ahlathlai i athah khomi hi US Ke Ralkap sawhsawh an si lo. CIA le Joint Special Operation Command timi US ram nih special ralkap angeih mi hna mi tlawmte nih Osama Bin Laden hi an thah khawhmi asi tiah wired thawngzamh nih a tial.. Joint Special Operation Command timi cu US cozah nih a kalpimi thil pawi mawh taktak pawl lawng atuanmi an si i, an thil tuahmi hi a lenglei hmanh nih theih aharmi bu an si CIA nakin hmual ngeideuh in rian a tuan khomi bu ansi. President Obama nih a chimnak ah cun nikum August thla te khan Osama umnak hmun hi an rak theih khawh cang a ti. Atulio CIA le JSOC nih Osama Bin Laden an tuknak ahhin Osama telhchih in minung 4 an thi. Confirm khawh sirih lo mi thawngpang pakhat ah cun Osama hi alu ah meithal kuan nih a khen. A fapa tiah an ruahmi pakhat le adang nu pahnih le pa pakhat zong an thi chih. JSOC le CIA minung pakhat hmanh an i hlliam lo ti asi.

US cozah lei rian ngeitu hna nih Osama Bin Laden thihnak kong thawngthanhnak an tuah tiah CNN nih a chim. US cozah lei rian ngeitu hna nih Reuter thawngzamh ah an chimnak ah cun Osama Bin Laden cu Pakistan ram Islamabad khua pawng i inn pakhat chung ah aum lio ah US ralkap nih bom in an kah i, cu ka hmun ah cun a thi, a ruak cu US cozah kut cungah a um ko tiah thawng an chim.

Al Jazeera thawngzamh nih an thlahmi Afghanistan ram Kabul khua ah a ummi thawnghlattu pakhat zongnih Afghan cozah nih Osamabin Laden an thah khawh cang i, a ruak cu US cozah kut cung ah aum cang tiah an chim a tive.

Osama Bin Laden cu Al Qaeda timi Muslim ralhrang bu a derhtu asi. Amah thiltuahnak nih hin US rammi tampi nunnak a liamter. September 11, 2001 kum ah US khua nganbik New York khua i inndotsang pahnih cu Al Qaeda ralhrang hna nih vanlawng in an pah i, minung tampi an thi tiah CNN thawngzamh nih an tialnak ah an telh. Atanglei bantuk zong hin an peh chap rih.


Osama Bin Laden i a pa Mohammad Bin Laden cu Yemen rammi asi i Saudi Arabia ah khua asami mirum pakhat asi. Saudi Arabia ram ah innsaknak 'constractiion company' a lian bikmi an ngei i cu ti cun a rum ngaimi innchungkhar ah an i chuah. Osama Bin Laden cu apa ro aco i, mirum ngaimi ah ai chuah. US cozah he zong hawi komhnak arak ngeimi asi. Soviet cozah nih Afghanistan ram an lak hnik lio ah Arab pawl nih an doh than i, cu lio ah Arab ralkap hna bomh ding ah Osama hi arak i thawh ve. US cozah nih raltuk ningcang le dangdang hna an rak chimh. US hawi pakhat arak si bal. 1980 kum luan hrawng ah hin Al Qaeda timi ralhrang bu arak derh i 1993 kum ah Somali ram ah US ralkap tampi cu meithal in arak thah hna. 1997 kum ah hin 'Jihad' timi Musllim athiangmi raldohnak timi cu athawk i, US cozah he ral hram a thawk.

Iraq ramuktu Sadam Hussein nih Kuwiat ram a lak hnik lio ah, US cozah nih Kuwait ram cu arak chanhmi thawk in Osama Bin Laden hi US cozah he ralhram ai thawk. US nih Iraq atuk lio ah US ralkap tampi cu Saudi Arabia ram ah an thlah hna lio ah Osama Bin Laden nih a ralkap hmang in US cozah cu doh than a rak timh bal.

US cozah nih Afghanistan ram atuk lio zong ah Osama Bin Laden nih duhlonak a chim. Ahruaimi ralkap hna nih US cozah dodalnak cu an tuah lengmang caah US cozah nih tlaih duh bikmi minung pakhat avun si.

2002 kum November thla lio ah Bin Laden cu athi cang tiah an rak ruah nain, a thi hlei lo. November 2002 ah Bin Laden biachimmi vedio tape arak chuak mi an hmuh hnu lawng ah Bin Laden athi lo tihi pom than asi.

2006 kum lio zong ah Bin Laden athi cang tiah thawngpang arak chuak than rih nain, aruah hlan ah athi than lo ti asi than. Atutan ah Osama Bin Laden athi cang timi thawngpang hi US President Obama hrimhrim nih Al Jazeera thawngzamh ah a chim cang caah bia dik asi ko tiah pom asi.

Arau rihlo mi caan te ah khan, Afghanistan ram i thawnginn pakhat chungin Muslim ralhrang ralkap tampi an tli kho i, mah cu he thawngpang he a un pehpar in Osama Bin Laden athihnak thawngpang hi arak chuakmi asi.

Osama Bin Laden si le si lo fianter taktaknak hi DNA test an tuah hnu lawng ah fiang tein thawngthanh khawh asi lai. Asi nain, US President Obama nih cun an thah cang ko tiah a chim.



Ref::Globalchin.org

No comments: