Saturday, October 2, 2010

Mipi Chung Ah Hlammi Kan Si Maw?

Luke 19:5 “…na inn ah kan tlung lai….”

Zeiruangah Zisuh nih Zakia theng te cu “khulrang in rung ţum, na inn ah kan tlung lai” a ti?

Zakia nih Zisuh zeitluk in dah ton a duh ti mi hi kan theih a hau ngai mi a si. Thingkung cung cu minung pahnih pathum zong kan kai ton cio ko tung, ziah Zakia long cu a kai, midang zong an kai cio ko lo? Hi tluk mipi chungah Zakia cu ho hlei dah a si, a mahnak in abiapi deuh mi (ayikyi deuh mi) upa pawl an tam pi ko lo maw, ti hi kan zoh tik ah Zakia a thin lung hrimhrim nih Zisuh a hlam tuk caah, Zisuh nih a hlam colh ve! “Zakia, na inn ah kan tlung lai” a ti. A thin lung long si lo in, a um tu ning (a action) hrim in Zisuh hmuh le ton a duh nak kha midang he aa lo ti lo.

Vawlei cung mibupi lak ah nang cu hodah na si, kei cu hodah ka si? Hmuh khawh ding hmanh khi kan si lo. Sinan, Zakia ban tuk in Zisuh hmuh duh nak, ton duh nak thin lung kan ngeih ah cun Van le vawlei ser tu Pathian fapa Zisuh nih hi vawlei mipi chung ah an hlam ve lai i, na sin ah a tlung lai, an um pi lai. Zakia nih Zisuh hmuh a duh tik ah inn ah a thu sasawh lo, (he takes some effort) inn leng ah a chuak, thingkung cung ah a kai. Nifatin Zisuh kan duh ko ti long si lo in, (you take some effort) Bible rel, thlacam, internet chung i sermon hna rel, pumhnak kal, tbt…kha action nih a zulh hau mi si. Zisuh nih hliphlau ngai le lungthin pek ngai in zoh mi (special attention a pek mi) kan si hi kan i philh lo awk a si.


David Siangpahrang pa nih cun, “Sazuk nih rial tidai a ngaih bantuk in maw Pathian nangmah cu kan ngai. Maw a nungmi Pathian, nangmah cu ti haal in kan haal” a ti (Salm 42:1-2). Kan nunnak nih Zisuh kha ti haal in a haal i a hlam a si ah cun Zisuh nih a kan hlam colh ve i kan sin ah tlung colh ve lai. Kan nunnak i zoh than uhsih, “Zisuh nih a ka hlam ve maw?” Kan thinlung, kan inn, kan lo, kan sianginn kainak, kan riantuannak hna hi Zisuh a tlun duh nak hmunhma kan si ter maw? Kan nuncan ziaza teh Zisuh nih a hlam duh mi phun nuncan ziaza (action) an si maw?

Pahniang

Manila, Philippines

No comments: