Sunday, September 5, 2010

Thai Lock-up Ah Kum 2 Deng An Um

Lai ralzaam ngakchia, Kap Cung Lian cu Thailand lock-up ah kum hnih dengmang a um hnu ah September 1, 2010 ni ah khan dam tein US ram a chungkhar sin ah a phan cang.
“Pathian nih kan thlazacamnak a kan leh, kan lunglawmhnak hi a chim zia zong kan thiam lo. Kan fapa dam le lawm in kan sin a rak phaak khawh cu kan lunglawmh zia kan chim kho lo. A tthan zong a tthang zong a thang deuh i a tung zong a sang deuh” tiah hringtu a pa Pu Zai Awi nih Chinland Guardian sin ah a chim. Airpor i kan va tonnak i kan van hmuh ah cun kan lunglomhnak mitthli a tla tiah a chim chih.
“Hi kan fa kongah kanmah nih zeihmanh tuah khawhmi kan ngei lo. Atu bantuk in a kan bawmtu Lai Churh vialte le, bu vialte , cun Raks Thai Foundation hna nih kan fa pa a luancia kum hnih cung an tawlrelnak kong ah kan i lawmnak a sang tuk” tiah a hringtu a pa nih a chim.
2008 lio ah Kawlram in Malaysia lei an rak rat pah lampi ah Kap Cung Lian (mah lio ahhin kum 9 a rak si) le a dang Lai ngakchia panga ( kum 10 tang) hna cu Thai Palik nih an rak tlaih hna. Thiang Bik, 5, Philip, 7, Ngun Za Thin, 9, and Roland, 11, hna tu hi June 10, 2010 ah an nulepa sin Norway ram ah an phan kho. Nain Kap Cung Lian le San Duh Sang tu cu Thai Lock-up ah an rak taang peng. September 1,2010 ni ah Kap Cung Lian cu US ram a chungkhar sin ah a kal kho ve cang. Nain San Duh Sang tu cu amah lawng nihin ni tiang a taang ko rih.
San Duh Sang dah ti lo cu Thailand i a taangmi kan ngakchia hna cu dam tein an chungkhar sin ah an phan kho cang. “A kan bawmtu an cungah kan lung ai lawm hringhran i , a hleice in a kan bawmtu Raks Thai Foundation cungah kan i lawm,” tiah Thailand um Kenneth Biak Cin nih Chinland Guardian ah a chim. San Duh Sang zong hi a rauh hlan ah a chungkhar sin ah a phan ko lai tiah ruahchannak kan ngei.Kap Cung Lian, kum 9, a chungkhar hna cu kan hnu Feb 25 ni ah khan UNHCR Malaysia lei in US ram ah an rak zuang. Hi lio ah KCL cu Thailand Lock-up ah a rak taang.— Chinland Guardian




Seihnam

No comments: