Saturday, August 21, 2010

Zeidah Biapideuh ah na chiah?

Luke 12:15 “Mi a nunnak taktak hi cu, zeitluk hmanh in rum sehlaw, a thilri hi a si lo”

Minung kan nunnak ah ei din awk phan ding a um lo ah hin cun buatlak piin kan tlam a tling ko tiah ruah a si. Vawlei lei pumsa nun kan tlam a tling tikah herh mi kan ngei lo, kan duh mi kan tuah khawh i, kan ni nuam, kan hna a ngam. A donghnak ah cun Pathian cu va um ko hmanh seh law kan herh ti lo, kan tuan caah pei kan ei, kan ding, kan nung kho ko cu ti mi ruah nak a rak chuak. A bik in ram thangcho ah hin hi ruah nak hi a chuak cuahmah cang, ttih a nung ngaingai mi a si. Hlan lio kum zabu 15 hrawng i ro pui ngai in thlarua revival a rak tlak nak Europe ram, zarhpizing pumh lo ah cun ningzak ngai ah ruah a rak si mi ram hna cu, nihin ah cun zarhpizing ah member 20 an ni pum kho ah cun, cu Khrihfabu cu a ngan tak mi ah ruah a si cang. Pastor zong hi tthitumh can le ruakvui can long ah panh a si cang.

Minung hi zei dah kan si, a ho ta dah kan si, kan thawhkeh nak khua zei in dah si, pumsa nun in a dih ding mi kan si maw, oosa kan pek deuh ding mi teh zei dah si ti mi hi kan thei kho ti lo ah cun ngeih chia ngaingai a si ko. Kan hram kan i domh kho ti lo! Pathian miphun kan si nak, thisen in cawk mi kan sinak kan i thei kho ti lo.

1 Piter 2:9 ah cun, "nan nih cu thimmi miphun, Siangpahrang tlawngbawi, miphun thiang, Pathian miphun hrimhrim nan si" a kan ti. Cucu a fapa Khrih nih a nunnak liam tiang in a kan dawtnak le a kan tlanhnak thawng in a si. Zisuh nih Mathai 16:26 ah "mi pakhat nih vawlei cung hi co dih hmanh seh law, a thlarau nunnak a sungh tung ah cun zei dah san a tlai" a ti.

Zungzal nunnak caah san a tlai tung lo mi thil ah hin kan nunnak le kan can dih lak kan hmang tuk sual maw? Hmailei zungzal kan nunnak hnga ding caah a nunnak liam tiang in a kan daw tu Zisuh Khrih caah teh, bible rel can, a mah he bia i ruah can, can kan pe bal maw? Nifa kan nun ah teh a mah kan langhter maw? Kan bible chung ah Pathian nih siter a kan duh mi nun tampi a um, cu hna cu zeirel lo in kan um sual maw? Na nunnak ah zeidah biapi deuh ah na chiah mi an si: Zungzal a hmun ding mi maw, (or) a dih zau ding mi dah???????

Pastor Hniang Uk

Manila, Philippines

//////////////////////////

No comments: