Thursday, August 5, 2010

Laimi Nih Holh Lettu Kan Herh

North America ah a ummi Chin khrihfabu tampi ka tlawng cang hna. Laimi kong ah ka thin a phang deuhdeuh. Nitlak lei ram thumnak ah Chinmi thawng tampi kan phan. Nu le pa cu ramdang holh a thiam lo mi kan si. Thluak a lawngmi ngakchia cu nu le pa nih chun le zan he rian kan ttuan taak hna i nu le pa he Lai holh in i chawnh caan cu ni khat ah suimilam cheu hmanh a tling lo. Lainu le Laipa fa le cu Mirang holh in an holh colh. Abik in, kum 10 tang ngakchia cu ramdang holh in an holh colh. Nu le pa tu cu Mirang holh hi zeiti hmanh in kan thiam kho ti lai lo. Ahopoah nih kan thiammi Mirang holh “I love you” ti mi hmanh hi kan fa le sin ah kan chim zong ah kan fa le hna ah a thlum kho ding a si lo. Lai holh tein “Kan dawt ko” tiah nu le pa aw thlum an theih khawh nak ding tiang in Lai holh an thiam ttung lo ahcun. Mirang holh a thiammi nu le pa cheukhat ca hmanh ah fa le caah a thlum kho ding in kan thiam kho ti lai lo. Thlum tuk in a chim khomi Mirang nu le pa awchuah lawng hi a thlum in an theih hna caah. Ramdang vawlei kan lamh cangka in Lai nu le pa le fa le hna cu holh nih a kan tthen colh. Abik in, Laimi hawi um lo nak hmun ah a phan mi Laimi chungkhar tampi hna cu nu le pa nih Lai holh lawng an thiam. Na fa le nih Mirang holh lawng an thiam. Nu le pa le fa le hna karlak ah holh lettu kan herh. Hi bantuk in holh ruangah nu le pa tampi cu fa le he kan i tthen tuan lai. Hi hi Laimi kan tlaunak hramthoknak cu a si kho men. Mi ramdang ah tlau kan duh ttung lo. Zeitindah kan tuah ne hna lai?

C Duh Kam

Washington, DC

No comments: