Wednesday, July 28, 2010

U Saw Kong Tlawmpal

U Saw Kong Tlawmpal Aung San thattu kong hlaithlai ah cun, U Saw kong cu telh lo awk tha lo a si. U Saw hi ahodah a si hnga? U Saw cu Dr. Maung Maung tial ningah cun fimnak tlamtling ngeih setsai tung lo i, power lawng a duhmi, minister sawhsawh in aa lung si lo i, prime minister (ram lu bik) tiang si a duhmi pa a si tiah a ti. U Saw cu orhlei ruahnak (rightist) a pommi a si i, Aung San he hlan tein aa rem lomi pa a si. Chim duhmi cu Aung San i hmuh khawhmi lenglei ral a si.U Saw cu 1900 kum ah Tharrawaddy ah a chuak i, sihni (pleader) a cawng, Saya San a upat ngaimi pa asi. 1928 kum thawkin MP a tuan tawn. 1931 kum i Saya San an tlaih tikah Kawl sihni tam ngaite nih a lakin sihni kan leih-piak lai tiah an rak i pe cio. Nain, a tam deuh cu, cathiam huaha lo khuatefa deuh lawngte an si; cu hna lakah mino cathiam bik pawl ah a hung langmi cu U Saw a si.
U Saw nih Saya San luatnak caah cun sihni cu a leih-piak i, England ummi Mirang bawi pawl sin zongah Saya San luatnak dingah nawlnak ca a rak kuat hna tikah cun laar hram a hun i thawk colh ko cang. Saya San nih Mirang a rak doh liote in U Saw nihhin U Ba Pe dirhmi Thuriya (the Sun) tadinca hmangin Mirang ralkap nih Saya San ralkap pawl an tuahto ning hna hmanthlak tehna a cuanter i Mirang bawi pawl sinah a rak kuat tawn cang. Saya San a thih tikah, Saya San nih Mirang a dohnak pehzulh dingah tiin, a min ah Galon aa bunhnak chan a si [Saya San nih Galon Athin a rak dirh]. May 1935 ah Japan ah a vung tlawng i, a rung tlun tikah Nga-Bwint-Saing Party aiawh in thimnak i cuh dingah an thim. 1938 kum ah, Thuriya (the Sun)tadinca a cawk (Japan pawl phaisa bawmhmi in a cawk tiah zapi nih an ruah19). Dr. Maung Maung tialning ah cun, Thuriya tadinca nihcun, Hitler nih ram le miphun kong he pehtlai in Judah miphun huatnak le German lawng miphun sang an sinak kong a tialmi a cauk Kaa Zuamnak timi Mein Kempf kha a serial in chuah hram a thawk colh tiah a ti. A tadinca hmangin mirum lian pipi le vawlei kau pipi ngeimi hna nih a lei tang dingin a lemsoi hna i20, Myochit Party a dirh, cun amah private ralkap Galon ~at aa ser. U Saw cu Ba Maw21 cozah ah vuanci (minister) a tuan. Asinain, cozah doh ruangah tiin, Ba Maw nih thong a thlak. Thong in a hun chuah hnu, May 30, 1939 ah U Pu cozah ah forest le agriculture vuanci ah an thim. Dr. Maung Maung tialning ah; a Myochit Party hmangin U Pu chambaunak a kawl i, U Pu cozah cu challenge a tuah. Cuticun, September 1940 in January 1942 tiang Chief Minister a tuan.22 Kawl lakah a bawi bik a hun si le cangka in, politician cheukhat thong ah a thlak hna: ruahnak lei ah a saya thing U Ba Pe, Mandalay mi U Ba U le U Ba Thi an si. U Saw nihhin min ah “Ba” aa telmi cu a rem hna lo tiah capo in an siahnak.23 October 1941 lio i, ramdang a tlawn lai cu baisakup aa zaih-mi ko a lo: Private vanlawng bakin…cungah cun a zuang…. cun Shwedagon pura a hun heel i, vancung cun upatnak a von pek. Mi nih thil `ha lo tuah ah an rel. Midang nih Buddha milem hmai ah cun, an bok i, upatnak an pekmi kha U Saw nihcun, aa laak zau i, a bingtalet bakin, a cunglei in a biak.24 Zeiti Dr. Maung Maung nih a va tial zongah,
U Saw hi February 12, 1947 kum ah Panglong hnatlaknak an rak tuah lioah a rak i tel ve. U Saw nihcun tlangcungmi pawl cu; nan miphun `hanchonak ding le nan ram i kilvennak dingah Kawlram he rak i fonh ve ko u, nanmah le nan ram cio ah nanmah tein uknak nawl cu nan i ngeih ko lai tiah a rak sawm ve hna. Hi U Saw bia hi tlangcungmi nih an rak cohlan ngaimi a si. Nain, kam khatlei ah, U Nu nih Mirang nih t l a n g c u n g m i he thleidannak a rak kan tuah ruangah Kawl le tlangcungmi karah huatnak a chuahter timi bia tu cu, tlangcungmi nih an rak pom duh bak lo.25 Nain, U Saw hi mi khuaruahhar ngai cu a si. Aung San le British prime minister Atlee nih January 27, 1947 ni ah London khua i Kawlram luatnak (zalennak) pekding in hnatlaknak an ngeih tikah, U Saw le Ba Sein nih opposition aiawh in an rak zulh i min an thu duh lo.26 Aung San-Atlee hnatlaknak nihhin tlangcungmi nih Kawl he fonh an duh ko ahcun, Kawl uknak tang ah um ding a fianter cang i, asiloah tlangcungmi hna caah a ing tein luatnak pekding timi cu a rawk cang ti awk a si ko caah dah U Saw nihhin tlangcungmi hna zawnruat in a rak thut duh hnga lo? Asiloah Aung San nih hmailei ah Kawlram a hruai telai ti a hmuh caah dah a thut hnga lo? A ruahnak hi hngalh khawh a har ko.




Ref::63nak Azani

No comments: