UNO timi cu ram tampi nih hruainak phunghram ttha tein tuahmi tangah dirhmi/ thawkmi bu a si. Vawleicung ummi fonhmi Bu vialte lak ah a nganbik mi bu a si. Rianttuannak zongah hmual ngeibik in le kaubik in a cawlcang I minung caah tthathnemnak tampi a chuahpi tu bu zong a si. Mi fim tampi hna nih UNO tluk in rian a ttuan kho mi bu vawleicung ah an sem rih lo an ti fawn. UNO an dirhnak a sullam bik cu kan vawlei pi ah daihnak le hnangamnak / himnak (peace and security) a um zungzal khawhnak lai UN chungtel ram vialte nih hmunkhat te ah khuakhan lairel tti nak he rianttuannak zong ngeih tti ding tiah sermi bu a si.
UN Hruainak Phunghrampi (UN Charter)
UN Charter (Constitution) timi UN hruainak phunghrampi cu ram 50 aiawhtu upa hna nih June 26, 1945 ah San Francisco khua, USA ram ah hnatlaknak an rak ngeih pi i minthuhnak in an rak sermi a si.
UNO Dirh Ni (Foundation Day of the UNO)UNO Dirh Ni a siloah UNO timi bu vawlei cungah a um tinak theihternak le fehternak cu phunglam ning tein October 24, 1945 ah China, France, United Kingdom, USSR (the former USSR), United States, le a dang ram fa deuh hna nih an rak tuah. Cu caah October 24 ni paoh cu vawleicung ram tampi nih United Nations Day ti ah philh lo nak an tuah pengnak a si.
A Voi 1nak UNO Khuakhantu pawl Tonnak (The First Regular Session of the UNO)
A voi 1nak UNO khuakhantu pawl tonnak cu January 1946 ah tuah a si. A hmun cu London khua ah an rak tuah I a voi 1nak chungttuan ( the first elected secretary General of the UNO) an rak thimmi cu Norway ram in Trygve Lie a si.
UNO Headquarters Umnak Hmun (Headquarters of the UNO)
UNO Headquarters umnak hmun cu 1st Ave, UN Plaza, New York khua, USA ramkulh chungah a si.
Alan/ Hmuhsaknak Alan (The UNO Flag)
Alan cu October 20, 1947 UNO Bupi Tonnak (General Assembly) hnatlaknak in an sermi a si. Hmelchunhnak caah a hnu lei zawng (background) cu vandum zawng ( Light Blue) a si I cu cungah cun a rang zawng (white color) in vawlei pumpi zuk le Olive tteng 2 cu keh le awrh in an suai. Olive tteng an thimnak sullam cu daihnak (peace) hmelchunhnak caah a si.
Tinhmi (Aims and Objectives)
A tlangpi in UNO nih a tinhmi hna cu
1. Vawleicung ah daihnak le hnangamnak (himnak) umnak ding caah.
2. Hmunkkhat rianttuan ttinak thawngin sifahnak le zawtnak ttha lo hna cu ralrinnak he kham ding (remove). Nu hrin covo (rights of basic freedom) kan hmuh kan ngeih khawh cio nak lai rianttuannak ngeih ding.
3. Vawleicung ummi miphun vialte khar lak ah dawtnak, rualremnak he pehtlaihnak a um khawhnak ding.
4. Hi a cunglei tinhmi ttuanchuah khawhnak ding caah UNO cu hmunpi / hmunlai caah chiah ding.
UNO Chungtel Luhnak / Sinak (Membership of the UNO)
UNO chungtel sinak a duh mi ram cu Bupi Tonnak (General Assembly) ah chungtel si an duhnak kong kha an chuahpi I chungtel ram hna chungin me (vote) pe dingmi cheu thum cheu hnih nih hnatlaknak me (vote) an pek lawngah cohlan a si.Chungtel chuahnak le caantawi chuahnak (expelled or suspended) zong cu cubantuk tthiamtthiam me (vote) pek nak in biakhiahnak ngeih a si.
Zungzal Chungtel Ram (Permanent Members)
Zungzal chungtel ram hna cu China, France, Russia, UK, le USA an si. Cu hna cu khuakhangtubu (Members of the Security Concil) tiah kawh an si.
Vittu Nawlngeihnak (Veto Power)
Khuakhangtubu (Members of the Security Council) nih vittu nawlngeihnak a khat tein an ngei cio. Vittu nawlngeihnak timi cu khamhkhawhnak / donhkhawhnak nawl tinak a si. Khuakhangtubu chung I aa telmi ram paoh paoh nih aa khat tein cu vittu nawlngeihnak cu hman khawhnak an ngei.
Chungtel Sinak (Membership)
UNO bu uknak caah sermi phunghrampi caah min a rak thu mi ram cu ram 50 lawng an rak si nain 1993 ah khan cun ram 185 an si cang. 1993 ah UNO chungtel cazin ah cohlan mi hna cu Czech Republic, Macedonia, Eritrea, Slovakia, Monaco, le Andorra ram hna an si. 1994 ah Palau (a newly independent Pacific nation) cu cohlan a rak si ve.
UNO Chungtel ram a si lomi ram cheukhat hna.
Switzerland, Taiwan, Nauru, Tonga, le Vatican City hna an si.
Ningcang tein Hruainak le Rianttuan khawhnak ding caah sermi bu ttengnge hna (Organization of the UNO)
UNO ningcang tein le rep ngai tein rianttuan khawhnak ding caah a tanglei bantuk in ttengnge hna cu ser an si.
1. Bupi Tonnak (General Assembly)
2. Khuakhangtubu (The Security Council)
3. Chawlehthalnak le Zapi duhnak/ tthatnak kha pakhatnak chiah in rianttuannak ding caah khuakhangtubu (The Economic and Social Council)
4. Vawlei pi huap in biaceihnak zung (International Court of Justice)
5. Rianttuannak kongah zumhawk tlak in zohkhenh ttuanvo ngeitu laireltubu (Trusteeship Council)
6. Chungttuantu (Secretariat)
Bupi Tonak (General Assembly)
Headquarters: New York
Chungtel Sinak (Membership)
Chungtel ram hna nih Bupi Tonnak ah meeting kaimi 5 cio thlah khawh a si nain an lak I pakhat lawng nih me (vote) peknak nawl a ngei.
Rianttuannak (Functions)
UNO rianttuantu ttengnge cio hna nih anmah le rianttuanak kong he pehtlai in theihternak cu bupi tonnak ah an chuahpi. Rianttuannak kongah ceihmai ding a herhmi cu bupi tonnak ceihkhannak ngeih piak a si.
Tonnak (Meeting)
Bupi Tonnak cu kum khat voi khat ngeih a si i September thla zarh thum nak I cacawn ni hnih ni (the third Tuesday in September) chiar te tuah a si.
UN Khuakhangtubu (UN Security Council)
Headquarters: New York
Chungtel Sinak (Membership)
Khuakhangtubu (The Security Council) nih chungtel 15 an ngeih hna. Cu hna 15 lak ah zungzal chungtel ram a si I vittu (Veto) nawlngeihnak a ngei mi hna ( China, France, Russia, UK and USA) leng ah a dang chungtel 10 thim an si. A dang chungtel 10 hna cu bupi tonnak ah thim an si I an rianttuan caan cu kum hnih ah voi khat a si.
Rianttuannak (Function)
Khuakhangtubu (The Security Council) nih a bik in ttuanvo lak mi cu daihnak le hnangamnak (himnak) caah rianttuan a si. Khuakhangtubu (The Security Council) nih daihnak caah le hnangamnak (himnak) ding a si ah cun chimrelnak nawl, ruahnak pek nak nawl an ngei I a herh ah cun nawlpeknak nawl le hramhram in rianttuannak nawl an ngei fawn.
Chawlehthalnak le Zapi duhnak/ tthatnak kha pakhatnak chiah in rianttuannak ding caah khuakhangtubu (The Economic and Social Council)
Headquarter:New York
Chungtel Sinak (Membership)
Chungtel ram hna chungin aiawhtu 54 hna cu bupi tonnak I cheuthum cheu hnih hnatlaknak in thim an si. Rianttuannak caan cu kum 3 a si.
Rianttuannak (Functions)
Chawlehthalnak le Zapi duhnak/ tthatnak kha pakhatnak chiah in rianttuannak ding caah sermi khuakhangtubu (The Economic and Social Council) nih a ttuanmi rian hna cu chawlehthalnak, mipi duhnak le tthatnak caah tuah dingmi rian hna ttuankhawhnak ding caah cawlcanghnak, le nunphung he aa pehtlai mi rian, fim cawnnak he aa pehtlai mi rian, ngandamnak le a dam lomi zohkhenhnak he aa pehtlai mi rian, le a dang a herhmi rianttuanak hna kha ttuanvo a lak.
Vawlei pi huap in biaceihnak zung (International Court of Justice)
Headquarter: The Hague (Netherlands)
Chungtel Sinak (Membership)
Chungtel ram hna chungin baiceihtu (judges) 15 hna cu bupi tonnak ah thim an si. A rianttuan caan cu kum 9 a si.
Rianttuannak (Functions)
UNO nih rianttuannak a ngeihmi hna ah ruahnak a pek hna i, tazacuainak a um tik ah dinfelnak he biceihnak zong a ngeih hna.
Rianttuannak kongah zumhawk tlak in zohkhenhnak le runvennak ah ttuanvo ngeitu laireltubu (Trusteeship Council)
Headquarter: New York
Chungtel Sinak (Membership)
Zungzal Khuakhangtubu (The Security Council) ah aa telmi ram 5 hna le mah le ram hmunhma cio I thimmi aiawhtu upa hna an si.
Rianttuannak (Functions)
Rianttuannak kongah zumhawk tlak in zohkhenhnak le runvennak ah ttuanvo ngeitu laireltubu (Trusteeship Council) i a rain biapi bik cu mah tein aa uk/ hruai kho rih lomi ram hna kha zohkhenh I runvennak ngeih kha a si.
Chungttuantu (Secretariat)
UNO chungttuan cu bupi tonnak ah khuakhangtu bu nih hruainak in le hnatlak pi nak in thim a si.
Rianttuan Caan (Tenure)
Chungttuan cu kum 5 caan thim an si. Rianttuan caan a dih hnu zongah thim khawh tthan a si.
Rianttuannak (Functions)
Chungttuan rian cu UNO hruainak le cawlcanghnak ah zohkhenhtu le hruihruaitu (the Chief administrative of the UNO) dirhmun ngeitu a si.
UN Chungttuan tu pawl hna (Secretary Generals of the UN)
1. Trygve Lie
2. Dag Hammarskjold (He was killed in an Air Crash) (1953-61)
3. U Thant
4. Dr. Kurt Waldheim
5. Javier Perez De Cuellar
6. Dr. Boutros Ghali
7. Kofi Annan
8. Ban Ki-moon
UNO Chung hmanmi Holh hna (Official Languages of the UNO)
A tanglei holh hna hi UN nih hman dingin hnatlaknak a ngeih mi an si.
1. Chinese
2. English
3. French
4. Russian
5. Spanish
6. Arabic
Cattialtu lei in nawlnak: A cunglei kong ka rak ttialmi ah palhnak a um sual ah cun dawtnak he theihternak rak ka ngeih hram te uh tiah zangfah kan nawl hna. Cun bifang hna le bia tlang hna zong zohdawh deuh in hmankhawh a si ah cun remh piak nak ka ngeih te uh ti zong nawl kan duh fawn hna.
Danny Bawi Thianhlun
Chicago, IL
No comments:
Post a Comment