Monday, November 30, 2009

Japan Nih A Panganak Hlathlainak Gyotuh A Thlah

Mahte in thawngpang tling deuh in hlatkhawh nakhnga Japan nih apanganak hlathlainak gyotuh pakhat zarhte ah kan thlah chap cang, tiah Japan cozah nih zahan (zarhte) ah a thanh.Ramchung fimthiamnak he sermi H-2A rocket nih $ nuai 565 dih in sermi gyotuh cu Tanigashima tilukh inkhan kan zuanter cang, tiah ram uk zunglei in Hisashi Michigami nih a ti. “Kam ram humhimnak ca le palairian caah cu gyotuh cu rian a tuan lai. Pawngkam sining hi kanmahte in kan hlat khawh deuh cang lai ti ka zumh. Thawngpang hlat hi kan ram humhimnak caah a biapi tukmi a rak si,” tiah Hisashi Michigami nih a chim. Kumsawmbu tamnawn chung cu thawngpng hlat dingah Japan nih U.S khi a rak i bochanmi a si. Nain, 2003 ahkhan Ch. Korea ral tih ah Japan nih ahmasatbik ralkap lei gyotuh khuah khat a rak thlah. 1998 lio ahkhan, Ch.Korea nih Japan ram taan in rocket a rak kah. Cu thokin, Japan nih Ch. Korea a cawlcangh ning ngiat dingah ralkap lei gyotuh pawl thlah aa zuam cu a si. Tu kum, April thla chung zongahCh.Korea nih Japan ram cunglei taan in Pacific rilipi lei ah rocket a rak kah. Japan cu 1970 lio inkhan gyotuh a rak thlah khawh cang i vawlei cung ah gyotuh thiamnak kongkau ah hmaisatu a si ve. Nain, nai kum hrawng cu Tuluk nih a hun iap deuh. Tuluk nih 2003 ah amahte in vamdum ah minung a rak thlah khawh cang. Japan tu cu ramchung fimthiamnak lawng in vandumchungah minung an thlah kho rih lo, U.S sin a va hrawmmi dah ti locun. Japan nih 2020 hrawngah Thlapa cungah kehnih ngei robot thlah khawh nakhnga aa zuam len liopi a si. (Ref:AP)

No comments: